25
A tarai Israel diat a tak tar ra vartabar
(Niir 35:4-9)
1 Ma ra Luluai i ga tatike ra tinata tai Moses dari: Una ve ra tarai Israel, ba diat a tak tar ra tinabar tagu;
2 avat a alube pa ia ta diat par ba ra bala i diat i mariga tana.
3 Ma go ia ra tinabar ba avat a vatur vake ta diat: a goled ma ra silva, ma ra palariam gobol;
4 a mal i blu marut, ma i meme marut, ma i meme tuna, ma ra mal kumau, ma ra ivuna me;
5 ma ra pal a sip di puk vameme pa ia, ma ra pal a me, ma ra davai akasia;
6 a dangi ure ra lamp, a lavur magit i ang na vuvuvul ure ra dangi na varku ma ure ra mi na lotu i ang na katkat;
7 a vat na onik ma ra vat na marmar ure ra mal na bongobongo ma ure ra popopoi.
8 Ma diat a pait kaugu ta gomgom na pal upi ina kiki livuan ta diat.
9 Avat a pait ia upi na varogop tuna ma ra lavur magit ina vaarike tam, varogop ma ra valavalar ure ra Pal ma ra valavalar ure ra lavur tabarikik tana.
A Bok na Tinata
(Niir 37:1-9)
10 Ma diat a pait tika na bok ma ra davai akasia; kana lolovina na varogop ma a ura malmalikun ma ra ngungu ma ra tababana varogop ma tika na malmalikun ma ra ngungu, ma tika na malmalikun ma ra ngungu a tuluaina.
11 Ma una vung vapetep tar ra goled tuna tana, ta ra balana ma ta ra tamuruna, ma una mar kikil ra ul a bok ma ra goled.
12 Ma una mal a ivat na ngovo ure, ma una pait vake diat ta ra ivat na kakene; a ura ngovo dir a tur tai tika na paparaina, ma ta ra urua tai ta ra tikai.
13 Ma una pait ra ivu kip ma ra davai akasia, ma una vung vapetep tar ra goled tana.
14 Ma una ule tar ra ura kip ta ra ngovo ta ra papar a bok, upi da kip ia me.
15 Ra ura kip dir a tur vatikai ta ra ngovo na kip, koko da ule vue dir kan ia.
16 Ma una poe ra tinata, ba ina tul tar ia tam boko, ta ra bala na bok.
17 Ma una mal tika na tubatuba ma ra goled tuna; kana lolovina na varogop ma a ura malmalikun ma ra ngungu, ma a tababana na da ra malmalikun ma ra ngungu.
18 Ma una mal a ura angelo ma ra goled ba di tutut ia, ma dir a ki ta ra ura ngungu na tubatuba.
19 Ma una pait tika na angelo tai tika na nguna, ma tika na angelo tai ta ra nguna; dir a kidoloina ka ma ra tubatuba ta ra ura nguna.
20 Ma ra ura angelo dir a pala ra bebea i dir urama ma dir a turup ra tubatuba me, ma dir a bobo varkuvo; ra mata i ra ivu angelo na lingan tadav ra tubatuba.
21 Ma una vaki ra tubatuba urama ta ra ul a bok, ma una poe ra tinata, ba ina tul tar ia tam, ta ra bala na bok.
22 Ma dor a varkuvo ie; ina ki arama ra tubatuba livuan ta ra ura angelo ta ra ul a bok na tinata, ma dor a pirpir ure ra lavur magit, ba ina vartuluai me piram upi kai ra tarai Israel.
A Vuvuvung na Nian ure ra Gem na Ginigira
(Niir 37:10-16)
23 Ma una pait tika na vuvuvung na nian ma ra davai akasia; kana lolovina na varogop ma tika na papar, ma ra tababana na varogop ma tika na malmalikun, ma ra tuluaina tika na malmalikun ra ma ngungu.
24 Ma una vung vapetep tar ra goled tuna tana, ma una mar kikil ia ma ra goled.
25 Ma una pait tika na pal a davai kikil ia, a tababana na varogop ma ra tababa na lima, ma una mar kikil ra pal a davai arama.
26 Ma una mal a ivat na ngovo ure ma ra goled, ma una vung ra ngovo ta ra ivat na nguna ta ra ivat na kakene.
27 Ra ivat na ngovo diat a tur maravai pire ra pal a davai i vana kikil ia, ma da ule tar ra kip tana, upi da kip ra vuvuvung me.
28 Ma una pait ra kip ma ra davai akasia, ma una vung vapetep tar ra goled tana, upi da kip ra vuvuvung me.
29 Ma una mal pa kana umana la, ma ra umana momamomo, ma ra umana pal a tava ma ra umana la upi da lolongoi me; una pait diat ma ra goled tuna.
30 Ma una vung vatikene pa ra gem na ginigira ta ra luaina matagu.
A Turtur na Birao i Goled
(Niir 37:17-24)
31 Ma una pait ra turtur na birao ma ra goled tuna; una tutut mal ra turtur na birao, a bitina ma ra livuana; a matana pupuna, ma ra pupuluna, ma ra mapina pupuna diat a kidoloina me;
32 ma laptikai na ingarina ta ra ura paparaina; a utul a ingar i ra turtur na birao tai tika na paparaina ma a utul a ingarina tai ta ra paparaina;
33 a utul a matana pupuna da ra pupuna i papala tai tika na ingarina, a pupuluna ma ra pupuna; ma a utul a matana pupuna da ra pupuna i papala tai ta ra ingarina, a pupuluna ma ra pupuna; damana ure ra laptikai na ingarina ba dia vana rikai ta ra turtur na birao;
34 ma ta ra turtur na birao a ivat na matana pupu na davai da ra pupuna i papala, a pupuluna ma ra mapina pupuna;
35 tika na pupuluna ta ra vavai ra ura ingarina, na kidoloina me, ure ra laptikai na ingaingarina dia vana rikai ta ra turtur na birao.
36 A umana pupulu i diat ma ra umana ingar i diat diat a kidoloina ka me; una pait vapar ia ka ma ra goled tuna ma una tutut mal ia.
37 Ma una pait lavurua na matana lamp tana; ma diat a valiting ra umana lamp upi diat a vakapa ra maup ta ra luaina mata i diat.
38 Una pait kana kia ma ra goled tuna, ma damana bula kana la.
39 Una pait ia ma tika na talant na goled tuna, damana go ra lavur tabarikik bula.
40 Ma una nuk pa ia, upi una pait tuna diat varogop ma ra valavalar u ga gire ta ra ul a luana.