20
A tinir ure ra varkurai kai Iesu
(Mat 21:23-27; Mar 11:27-33)
1 Tika na bung ta nam ra e, i tovo ra tarai ta ra pal na vartabar, ma i varvai ma ra bo na varvai; ma ra umana tena tinabar ngalangala, ma ra umana tena tutumu, ma ra umana patuana dia tadav ia;
2 ma dia biti tana: Una ve avet ta ra varkurai u pait go ra lavur magit i tana, ba to ia i ga tul tar go ra varkurai tam?
3 Ma i tatike bali diat dari: Iau bula go, ina tir avat tai tika na magit, ma avat a ve iau:
4 Mamave ra baptaiso kai Ioanes, marama ra bala na bakut, ba tai ra tarai?
5 Ma dia biti vargil ivai dari: Ona dat a biti ba: Marama ra bala na bakut, na biti: Ba damana, dave pa ava ga nurnur tana?
6 Ba ona dat a biti ba: Tai ra tarai, a tarai par diat a tupar dat; tago dia kapupi Ioanes ba ia ra propet.
7 Ma dia bali ia ka, ba pa dia nunure ba mamave.
8 Iesu i biti ta diat: Iau bula, pa ina ve avat ta ra varkurai iau papait go ra lavur magit i tana.
A tinata valavalar ure ra umana tena papalum ta ra uma na vain
(Mat 21:33-46; Mar 12:1-12)
9 Ma i tatike go ra tinata valavalar tai ra tarai: Tika na tutana i vaume ra uma na vain, ma i tul tar ia tai ra tarai na vinauma, ma i vana tai ta ra vuna gunan upi na ki vavuan tana.
10 Ma ta ra e na vunuai i tulue tika na tultul tadav ra tarai na vinauma, upi diat a tul tar ta umana vuai na uma tana; ma ra tarai na vinauma dia kita ia, ma dia tul tuna vue ke.
11 Ma i tulue ta ra tultul; ma dia kita ia bula, ma dia vakaina, ma dia tul tuna vue ke.
12 Ma i tulue ta ra tikai bula; ma dia kita vakinkin ia, ma dia okole vue.
13 Ma ra luluai na uma i biti: Ava ina pait ia? Ina tulue natugu, a bul na vakak, upi diat a ru ia bar.
14 Ba ra tarai na vinauma dia gire, dia biti vargil dari: Go ra bul mur tana; dat a doka, upi kadat ika ra vurvur magit.
15 Ma dia okole vue kan ra uma ma dia doka. Ava ra luluai na uma na pait ia ta diat?
16 Na vut ma na doko vue nam ra tarai na vinauma, ma na tul tar ra uma tai ta umana enana. Ba dia valongore go dia tatike: Koko muka.
17 Ma i bobobe diat, ma i biti: Ava go di ga tumu ia?
“Nina ra vat ba ra umana tena pait pal dia tar pilak vue,
Nam muka di tar pait ra ul a ngu na pal me.”
18 Ma nina i bura ta go ra vat na ti tagigi, ma nina ba go na bura taun ia, na taimirai da ra tobon.
A tinir ure ra totokom
(Mat 22:15-22; Mar 12:13-17)
19 Ma ra umana tena tutumu, ma ra umana tena tinabar, dia mainge ba diat a kinim ia ta nam ra pakana bung, ma dia burut uka ta ra tarai; tago dia nunure ba i tar tatike go ra tinata valavalar ure diat.
20 Ma dia kiki ue pa ia ma dia tulue ta umana kilao dia vaongo ba ra umana tena takodo diat, upi diat a vagu pa ia ta kana tinata, ma diat a tul tar ia ta ra varkurai ma ta ra dekdek i ra tena varkurai na gunan.
21 Ma dia tir ia dari: Tena Vartovo, ave nunure ba i takodo kaum tinata ma kaum vartovo, ma pa u nuk pa ta tikai, u varvai ma ra dovotina ure ra nga kai God.
22 I takodo ba avet a tul tar ra totokom tai ra Kaisar ba pata?
23 Ma i nunure kadia vaongo, ma i biti ta diat:
24 Avat, a ve tar tika na denaria tagu. A malalar i to ia tana? Ma kai ia bula ra tutumu tana? Ma dia biti: Kai ra Kaisar.
25 I biti ta diat: Avat a tul tar tai ra Kaisar ra lavur magit kai ra Kaisar, ma avat a tul tar tai God ra lavur magit kai God.
26 Ma dia mama vagu pa ia ta nam ra tinata ta ra mata i ra tarai; ma dia kaian ta kana tinata na balbali, ma dia ki mut uka.
A tinir ure ra tinut mulai kan ra minat
(Mat 22:23-33; Mar 12:18-27)
27 Ma ta ra umana ta diat ra Sadukaio, diat dia varpuai ta ra nilaun mulai, dia tadav ia; ma dia tir ia dari:
28 Tena Vartovo, Moses i ga tumu tar ia ta dat, ba ra tutana i mat kan kana taulai, ma pa ta natuna, turana na ben kana vavina, ma na vangala ta umana bul upi kai turana.
29 Io, a lavurua na tutana dia turana; a luaina i ben pa ra vavina, ma i mat, ma pa ta natuna;
30 ma ra vauruana damana, ma ra vautuluna bula;
31 damana bula diat par ra lavurua dia mat, ma pa ta natu i diat.
32 Ma ra vavina i mat mur ta diat.
33 Ta ra nilaun mulai, kai ia ta diat nam ra vavina? Tago ra lavurua par dia ga taulai me.
34 Iesu i tatike ta diat: A tarai ra pia dia varvarbean, ma dia tulatulai ta ra varbean;
35 ma diat da kure boko ba na topa diat nam ra nilaun ma ra nilaun mulai kan ra minat, pa dia taulai, ma pa dia tulatulai ta ra tinaulai;
36 tago pa diat a mat mulai; tago dia vardada ma ra umana angelo; diat a umana natu i God, ma ra umana natu i ra nilaun mulai.
37 Ma ra lavur minat dia laun mulai, da Moses i ga vaarike ure ra Davai, ba i ga vatang ra Luluai dari: A God kai Abaraam, ma ra God kai Isak, ma ra God kai Iakob.
38 God, vakir a God kai ra umana minat, kai ra umana launa iat; tago dia laun par ta ra matana.
39 Ma ta umana tena tutumu dia tatike: Tena Vartovo, i boina kaum tinata.
40 Tago pa dia valar mule ma ta tinir.
A tinir ure Kristo
(Mat 22:41-46; Mar 12:35-37)
41 Ma i biti ta diat: Dia biti dave ba ra Kristo ia ra natu i David?
42 Tago David iat i tatike ta ra buk na Kakailai dari:
“Ra Luluai i tatike tai kaugu Luluai:
Una ki ta ra limagu tuna,
43 Tuk tar ina vadiop kaum lavur ebar upi a ruarua na kakim.”
44 David i vatang ia ba Luluai, ma dir tamana dave?
Iesu i vale diat ure ra umana tena tutumu
(Mat 23:1-36; Mar 12:38-40)
45 Ma ra tarai par dia valongore i tatike tai kana tarai na vartovo dari:
46 Avat a nuk pa ra umana tena tutumu, dia mainge ba diat a vanavana ma ra umana lolovina mal, ma dia mainge ra nioro varvagai ta ra lavur tavul a bung, dia mainge ra lavur kiki na luluai ta ra umana pal na lotu, ma ra umana kiki ara na lua ta ra umana lukara;
47 dia ian vapar ra tabarikik kai ra umana ua na vavina, ma dia vaongo ma ra umana niaring lolovina; na manga tup go diat ra varkurai na balbali.