22
Dia tata guvai upi diat a vagu pa Iesu
(Mat 26:1-5; Mar 14:1-2; Ioa 11:45-53)
1 Io, i maravai ra lukara na gem ba pa i leven, di vatang ia ba ra lukara na bolo lake.
2 Ma ra umana tena tinabar, ma ra umana tena tutumu, dia nuknuk upi ta mangana nga ba na virua tana; tago dia burutue ra tarai.
Iudas i mulaot upi na vagu pa Iesu
(Mat 26:14-16; Mar 14:10-11)
3 Ma Satan i ovai tai Iudas, a iangina bula ba Iskariot, tikai ta diat ra vinun ma a ivut.
4 Ma i vana tadav ra umana tena tinabar ma ra umana luluai na vinarubu, ma dia tata me ba na vagu davatane tar ia ta diat?
5 Ma dia gugu, ma dia kubu ba diat a kul ia ma ra mani.
6 Ma i mulaot, ma i kiki pa ia upi na noe ive tar ia ta diat ba pa ta kor na tarai.
Iesu diat ma kana tarai na vartovo dia en ra magit na bolo lake
(Mat 26:17-25; Mar 14:12-21; Ioa 13:21-30)
7 A bung na gem ba pa i leven i vut ba di tul tar ra bolo lake tana.
8 Ma i tulue Petero ma Ioanes dari: Amur a vana, amur a vaninare ra magit na bolo lake upi dat a en ia.
9 Ma dir tir ia: U mainge ba amir a vaninare ave?
10 I biti ta dir: Ba amur tar olo ta ra pia na pal, amutal a varkuvo ma ra tutana i kapkap ra la na tava; amur a mur ia ta ra pal i ruk tana.
11 Amur a biti tai ra luluai na pal dari: A Tena Vartovo i tir iu ba: Akave kaum pal na vaira ba avet ma kaugu tarai na vartovo avet a en ra magit na bolo lake tana?
12 Ma na ve tar ta mumur ra ngala na pakana pal liu di tar vangan ia; amur a vaninare tana.
13 Ma dir vana, ma dir gire tadav nam par i ga tatike, ma dir mal pa ra magit na bolo lake.
A nian kai ra Luluai
(Mat 26:26-30; Mar 14:22-26; 1 Kor 11:23-25)
14 Ba ra pakana bung i vut, diat ma ra tarai na vartovo dia ki.
15 Ma i biti ta diat: Iau ga mamainge muka ba dat a en go ra magit na bolo lake ba pa di vakadik iau boko;
16 tago iau tatike ta vavat: Pa ina en mule tuk ta nam ba da pait ot pa ia ta ra varkurai kai God.
17 Ma i vatur tika na momamomo ma ba i tar pite varpa, i biti: Avat a vatur go, ma avat a tibe avat me;
18 tago iau tatike ta vavat, ba pa ina mome mule ra vuai na vain papa gori, ma na tuk tar ta ra bung ba na pot i tana ra varkurai kai God.
19 Ma i vatur ra gem, ma ba i tar pite varpa, i tabik ia, i tabar diat me, ma i tatike: Go ra pakagu. [Di tul tar ia ure avat; avat a papait. go, ma avat a matamatane upi iau me.
20 Damana bula ra momamomo, ba i tar par ra nian, ma i tatike: Go ra momamomo a kalamana kunubu ta ra gapugu nina i talingir ure avat.]
21 Ma ra lima i nam i vagu tar iau, go kari ta go ra vuvuvung na nian.
22 A dovot ba Natu i ra tutana na vana da di ga kure; ma na kaina tai nina ra tutana i vagu tar ia.
23 Ma dia varvartir vargil ba to ia ta diat na pait go ra magit.
A vartoto vargil ure to ia ta diat i ngala
24 Dia vartoto vargil bula ba to ia ta diat i ngala kakit.
25 Ma i tatike ta diat: A umana king kai ra lavur Tematana dia papait na luluai na kaia ta diat; ma di vatang diat dia kure diat ba ra umana boina.
26 Ma koko avat a damana; nam i ngala ta vavat, boina ba na da nina i mur, ma nam i luluai na da tikai i toratorom.
27 Tago nuve i ngala, nina i ki ta ra nian ba nam i toratorom tana? Vakir nina i ki ta ra nian vang? Ma go iau ki pire vavat da tikai i toratorom.
28 Avat dat, ava ga tur maravut iau ta ra lavur mangamangana di ga valamlam iau me;
29 ma iau tibe tar ra varkurai ta vavat, da Tamagu i ga tibe iau me,
30 upi avat a ian ma avat a momo ta kaugu vuvuvung na nian ta kaugu varkurai; ma avat a ki ta ra umana kiki na king, avat a kure ra vinun ma ra ivu vuna tarai Israel.
Iesu i tata na lua ba Petero na pue vue
(Mat 26:31-35; Mar 14:27-31; Ioa 13:36-38)
31 Simon, Simon, Satan i tir pa avat upi na tang valar avat da ra Vit;
32 ma iau tar araring ure u, upi koko kaum nurnur na panie kakit, ma tuka boko ba u tar nukpuku mulai, una vapatuan ra tara na turam.
33 Ma i biti tana: Luluai, go iau vaninara upi ina mur u ta ra pal na banubat ma ta ra minat.
34 Ma i biti: Petero, iau ve u, gori ba ra loko pa i riki boko, una vautul a varpuai ba pa u nunure iau.
A popopoi, a rat ma ra pakat
35 I tir diat: Ba iau ga tulue avat, ma pa kavavat ta popopoi ba ta rat ba ta pal a kau, ava ga iba vang upi ta magit? Ma dia biti: Pata.
36 Ma i biti ta diat: Ma go, nina ba kana ta popopoi, na kap ia ka, damana bula ra rat; ma nina ba pa ta, boina ba na ivure kana olovoi ma na kul pa ra pakat na vinarubu.
37 Tago iau tatike ta vavat, ba da pait ot pa ia tagu go di ga tumu ia dari: “Ma di ga luk guve ma ra lavur tena varpiam.” Tago a dovotina da pait ot pa nam parika di ga tumu ia ure iau.
38 Ma dia biti: Luluai, a ivu pakat go kari. Ma i biti ta diat: I ot ika.
Iesu i araring
(Mat 26:36-46; Mar 14:32-42)
39 Ma i irop, i vana ta ra luana na Oliva, da kana mangamangana iat; ma ra tarai na vartovo dia mur ia.
40 Ba i tar pot ta nam ra gunan, i tatike ta diat: Avat a araring kan da valam pa avat.
41 I ki irai kan diat da ra kulalongo na vat; ma i va timtibum, i araring dari:
42 Tama, ba u mainge, una tak vue go ra momamomo kan iau, ma koko da pait ra nuknukigu, da pait ra nuknukim iat. [
43 Ma tika na angelo marama ra bala na bakut i tur pa, pirana, i vaongor kap ia.
44 Ma tago i liliut na kinadik, i ongor ma ra niaring; ma kana mangamangon i da ra ngala na tua na gap, i bura ta ra pia.]
45 Ba i tut kan ra niaring i vana pire ra tarai na vartovo, i babare diat dia va mat, tago i tabun ra bala i diat,
46 ma i tatike ta diat: Dave ava va mat? Avat a tut, avat a araring upi koko da valam pa avat.
Di vagu pa Iesu
(Mat 26:47-56; Mar 14:43-50; Ioa 18:3-11)
47 Ba i tata boko, nam di vatang ia Iudas, tikai ta diat ra vinun ma a ivut, i vut ma ra kor na tarai i agure diat, ma i tadav Iesu upi na galum ia.
48 Ma Iesu i biti tana: Iudas, una vagu tar Natu i ra tutana ma ra vargalum laka?
49 Ma ba diat dia varagur me, dia gire nam ba diat a pait ia, dia tir ia ba: Luluai, avet a varubu ma ra pakat vang?
50 Ma tikai ta diat i kita ra tultul kai ra tena tinabar i lualua, i kutu vue ra talingana ta ra papar a lima tuna.
51 Ma Iesu i biti: Avat a nur vue. Ma i bili ra talingana, i varkotone pa ia.
52 Iesu i biti tai ra umana tena tinabar, ma ra umana luluai na vinarubu kai ra pal na vartabar, ma ra lavur patuana, dia tar vut upi ia, dari: Ava tar vana rikai vang ma ra umana pakat ma ra umana ram da upi ra tena nilong?
53 Ba dat ta ra pal na vartabar a bungbung, pa ava tulue ra lima i vavat ure iau; go muka kavava pakana bung, ma ra ongor na bobotoi.
Petero i pue vue Iesu
(Mat 26:57-58,69-75; Mar 14:53-54,66-72; Ioa 18:25-27)
54 Ma dia kinim pa ia, ma dia ben vaire; dia kap ia ta ra kuba i ra tena tinabar i lualua. Petero i murmur maro vailik.
55 Ba dia tar voto ra iap livuan ta ra gunan, ma dia ki varurung, Petero i ki maravut diat.
56 Ma tika na vavina i gire ba i ki ta ra kapa na iap, ma i bobobe muka, ma i biti: Go ra tutana dir ga varvaragur bula me.
57 Ma i varpuai dari: la An, pa iau nunure muka.
58 A ik namur, ta ra tikai i gire, ma i biti: U bula avat. Petero i biti: To An, iau pata.
59 Ma namur mulai, ba i par tika na pakana bung, tikai bula i takun vadekdek ia dari: A dovotina, go ra tutana dir ga varvaragur me, tago ia ra te Galilaia.
60 Petero i biti: To An, pa iau nunure nam u tatike. Ba i tata boko, a loko i riki muka.
61 Ma ra Luluai i lingan, ma i bobe ung Petero. Ma Petero i nuk pa ra tinata kai ra Luluai, ba i ga tatike tana dari: Gori, ba ra loko pa i riki boko, una vautul a varpuai vue iau.
62 Ma i irop, ma i tangi mat.
Di kulume Iesu ma di kita ia
(Mat 26:67-68; Mar 14:65)
63 Ma ra tarai dia vatur vake Iesu, dia kulume, ma dia kita ia.
64 Dia vi bat ra ura kiau na matana, ma dia biti tana: Una tata na propet ma una vatang nina i tar kita u?
65 Ma mangoro na tinata bula dia vul ia me.
Iesu i tur ta ra mata i ra umana tena kivung
(Mat 26:59-66; Mar 14:55-64; Ioa 18:19-24)
66 Ba i tar keake mulai, a umana patuana kai ra tarai dia kivung, a umana tena tinabar, ma ra umana tena tutumu bula diat; ma dia ben ia ta kadia kivung, dia tatike tana:
67 Ba u ra Kristo, una ve avet. Ma i biti ta diat: Ba iau ve avat, pa avat a nurnur;
68 ma ba iau tir i avat, pa avat a tata.
69 Papa gori, Natu i ra tutana na ki ta ra lima tuna ta ra dekdek i God.
70 Ma diat par dia tir ia: U Natu i God vang? Ma i biti ta diat: Avat iat ava tatike, iau ia tuna.
71 Ma dia biti: Pa da mainge mule ta varvai; go da tar valongore ta ra ngiene iat.