☰ Nakum 1
A BUK KAI RA PROPET NAKUM
1
A Luluai, a tena ongor ma a tena varobo
1 A mamat na tinata ure Nineve, A buk ure ra magit Nakum ra te Elkos i ga gire.
2 A Luluai God a tena ongor, ma a tena varobo; a Luluai a tena varobo ma i tup ia kana kulot; a Luluai i varobo pire diat dia tur bat ia, ma kana kankan i tur ure kana lavur ebar. 3 A Luluai i vabing ma ra kulot, i ngala ra dekdekina, ma pa na nur vue ra balbali pire ra umana tena varpiam; a nga kai ra Luluai i tur ta ra ragia ma ta ra kalivuvur, ma ra lavur bakut dia da ra kabu na pia ta ra kakene. 4 I bor ra ta, ma i vagea, ma i rang vage ra lavur tava alir; Basan i maranga, damana Karmel, ma ra ibul na davai Lebanon i makuk. 5 A umana luana dia dadar tana, ma ra umana buana dia polo; ma ra pia i guria ta ra luaina matana, maia, ra rakarakan a gunagunan ma ra lavur magit i tana. 6 Na tale to ia ba na tur ba i kulot? Ma na tale to ia ba na ki ba i karangap ma ra kankan? Kana ngala na kankan na talingir da ra iap, ma i pelegi ra umana vat ki. 7 A Luluai a tena varmari, a dekdek na pal na bakbakit ta ra bung na purpuruan; ma i nunure diat dia vila bakbakit pirana. 8 Ma na vamutue vakakit vue diat dia tur bat ia ma ra ngala na lovon ta, ma na korot vue kana lavur ebar upi diat a ki ta ra bobotoi.
9 Ava varpit dave ure ra Luluai? Na vapar vakakit vue; a varvakadik pa na vana rikai mulai. 10 Tago gala dia da ra kada i poraporo, gala da vaimur vakakit vue diat da ra timul a kunai i maranga. 11 Tikai i tar vana rikai tam ma i nuk pa ra kaina ure ra Luluai, ma i nuknuk pa ra magit vakuku.
12 A Luluai i biti dari: Ma ona i tar ot ra ongor i diat, ma dia peal, da mut vue ke diat, ma na par. A dovotina iau tar vakadik u, ma pa ina vakadik mule u. 13 Ma go ina bubur vue kana kip kan u, ma ina al kutu ra am lavur vivi.
14 Ma go ra Luluai i tar vartuluai ure u ba koko da oe mule ra iangim; ina vamutue vue kan ra kuba i kaum umana god ra umana tabalar di ga taba diat, ma diat di ga tun mal diat; ina kal ra tung ure u; tago u a magit vakuku.
A varvai ba Nineve i tar virua
15 Ea, ra kak i nina i kap ra bo na varvai ma i vaarike ra malmal ta ra ul a lualuana! Iuda, una pait kaum lavur lukara, una pait ot pa ra magit u ga vavalima ure; tago ra tena varpiam pa na vana alalu mulai piram; i tar virua kakit.
☰