144
Ra King i pite pa God ure ra niuvia
Kai David.
1 Da pite pa ra Luluai kaugu vat i ta;
I tovo tar ra vinarubu ta ra limagu,
Ma ra vartaliur ta ra kaka na limagu.
2 Ra Luluai ia kaugu varmari ma kaugu dekdek na pal na bakbakit,
Kaugu dekdek na pal i manga tuluai urama, ma kaugu tena valaun;
Kaugu ramravit, ma nina iau nurnur tana;
Nina i vamadudur pa kaugu tarai tagu.
3 Luluai, ava ra tarai upi una nuk pa diat?
Ba ra umana natu i ra tarai upi una torom ta diat?
4 A tarai dia varogop ma ra magit vakuku;
Kadia kini ati ra pia i da ra malur i papaniai.
5 Luluai, una lele ra bakut, ma una kuba;
Una tuk ra umana luana, ma diat a mi.
6 Una pala ra meme, ma una korot varbabaiane diat;
Una tulue vaarike kaum lavur pu, ma una uvia pa diat.
7 Una tulue vaba ra limam marama;
Una valaun iau, ma una al vairop iau ta ra ngala na tava;
Kan ra lima i ra umana vaira,
8 Nina dia tatike ra tinata vakuku,
Ma kadia vavalima a vavalima vavaongo.
9 Ina kaile ra kalamana kakailai tadav u, God;
Ina ubu ra pagol ba a vinun na vinau tana, ma ina kakailai na pite varpa piram.
10 I tul tar ra niuvia ta ra umana king;
I valaun David kana tultul kan ra pakat na vinarubu.
11 Una valaun iau, ma una valangalanga iau kan ra lima i ra umana vaira,
Nina dia tatike ra tinata vakuku,
Ma kadia vavalima a vavalima vavaongo.
12 Boina ba ra umana natu i dat, a umana barmana, diat a da ra umana kuluban;
Ma kada umana bul vavina diat a da ra umana vat na ngu na pal, di mut mal diat upi diat a topa ra pal na king;
13 Boina ba dat a vung rede ta ra lavur mangana tabarikik,
Ma ra umana sip ta kada umana gunan diat a kava vue ra umana arip na marmar ma ra umana vinvinun na arip na marmar;
14 Boina ba na ngala ra magit kada umana bulumakau dia puak ia,
Ba pa ta kamara, ma pa ta vinarubu,
Ma pa ta tinangi ta ra bala na gunan.
15 I ti doan nam ra tarai ba dia ki mamal dari;
Maia, i ti doan ra tarai ba ra Luluai kadia God.