61
A niaring upi ra varbalaurai
Kai nina i lue ra kakailai; ta ra pagol; kai David.
1 Una valongore kaugu kinail, God;
Una torom ta kaugu niaring.
2 Maro iat ra ngu na rakarakan a gunagunan ina kail u, ba i tup ra balagu;
Una ben vatutua iau ra ul a vat ki, nina i manga tuluai urama.
3 Tago u a rivarivan piragu,
Ma a dekdek na pal na bakbakit kan ra ebar.
4 Ina ki vatikai ta ra kubam;
Boina ba ina rivarivan ta ra vavai na bebeam. Sela.
5 Tago u, God, u tar valongore kaugu lavur vavalima,
U tar tul tar ra tiniba tagu kadiat dia ru ra iangim.
6 Una ga valolovina ra nilaun kai ra king;
Kana lavur kilala diat a varogop ma ra kilala kai ra mangoro na taun tarai.
7 Na ki vatikai ta ra luaina mata i God;
Una tul tar ra varmari ma ra dovotina upi dir a balaure.
8 Damana ina kakailai na pite varpa pa na mutu,
Upi ina pait ot pa kaugu umana vavalima ta ra bungbung par.