17
Paulo Tesalonika neḡano
1 Paulo zu Silasi ze Amefipoli zu Apolonia neḡa vitau onamadu, Tesalonika neḡano feuriro. Eꞌe neḡanoꞌe Iuda azaḡa kuru neḡa ꞌeꞌe.
2 Paulo ani iḡaiḡa haḡaeꞌeteꞌe teige, Bana Madaḡa madaḡano Iuda azaḡa kuru neḡa diuḡadu, buka zaḡoḡa meꞌodeꞌenaꞌa Iuda azaḡa teite ḡoꞌaniro. ꞌOugeꞌenaꞌa Bana Madaḡa madaḡa uḡidu meiro.
3 Aniꞌe buka zaḡoḡanonoꞌo ḡoere ꞌahoga ꞌahoga meꞌodeꞌenaꞌa, Kerisoꞌe zaharaniꞌuma ebu runeonoꞌo bare ḡabodiꞌuma rae tiroteꞌe, faifairu ihoziro. Ebu ꞌahige reiro, “Eḡeꞌa rae fureneꞌeteꞌe vazeḡa, niḡaꞌe Iesu, ane hugaꞌe Keriso.”
4 Ebu Iuda azaḡa nuꞌe zamazeꞌa bohatanadu Paulo ḡoere mae ḡihiniro, ebu Paulo zu Silasi teite ꞌauḡiro, ebu Giriki azaḡa ḡehaḡa Badiꞌa gubaneꞌeteꞌe, zu eꞌe neḡano nize boro roḡaeḡa ḡehaḡa zuni ꞌauḡiro.
5 Rehano Iuda azaḡa nuꞌe eꞌe horonirotene, Paulo zu Silasi mazao ahiahi meiro. Eꞌanoꞌo ḡonore azaḡa maketi habaꞌano rau tauḡeꞌeteꞌe, mae nuꞌozadu, Tesalonika neḡa zamaḡano utitihi radu harae ḡuzuhiro. Ebu Iasoni ne haonadu Paulo zu Silasi vaḡiro, vaze ḡuḡuvaḡa mazao mae buzoga veize.
6 Ze mene horozirotene, Iasoni zu Zuhiꞌa Boro mone azaḡa nu ahasise buzadu, kanisoro azaḡa zamao ohoziro, ebu ḡihau ḡoeriro, raenaꞌa, “Paulo zu Silasiꞌe haba niduꞌa zamaḡano vaze mae ḡunuḡunuze onaeha. Ebu ze emeḡe ne zuni diuḡeha.
7 Ebu Iasoniꞌa ane neo mae zouziro. Zeꞌe Roma zuhiꞌaḡa goro ḡoeꞌa variꞌeꞌohe, mazaḡa zeꞌe kini ꞌahoga ꞌeꞌe raꞌohe. Niḡaꞌe Iesu.”
8 Eꞌea nuꞌoraroteꞌe azaḡa zu kanisoro azaḡaniꞌa eꞌe igirotene, zamazeꞌa adudu ḡouriro.
9 Rehano zeꞌe Iasoni duḡuru mazaonoꞌo mae buziteꞌe moniḡa madu, tuḡuze onamiro.
Paulo Berea neḡano
10 Eꞌe oheꞌano, Zuhiꞌa Boro mone azaḡaniꞌa Paulo zu Silasi zogone tuḡuzadu Berea neḡa onamiro. Berea neḡano feurirotene, Iuda azaḡa kuru neḡa diuḡiro.
11 Berea azaḡaꞌe zamaze mene riḡa, Tesalonika azaḡa mene heuḡa. Eꞌanoꞌo Pauloꞌa harameꞌeteꞌe ḡoeꞌa faifairu igiro, zu ane haramo ḡoeꞌaꞌe huga ga mene radu, mada niduꞌa buka zaḡoḡa meꞌode udahido.
12 Ebu Iuda azaḡa ḡehaḡaniꞌa Zuhiꞌa Boro mazao fiiro, zuni Giriki roḡaeḡa zu Giriki ohozeḡa nize boroboro ḡehaḡaniꞌa Zuhiꞌa Boro mone reiro.
13 Rehano Iuda azaḡa Tesalonika neḡano radiuꞌeteꞌeꞌa, Pauloꞌa Berea neḡano zuni Badiꞌa ḡoere haramiroteꞌe igirotene, zeḡe zuni Berea neḡa onamadu, Berea azaḡa soꞌoze tutuzadu, nuꞌoze harairo.
14 Eꞌanoꞌo Zuhiꞌa Boro mone azaḡaꞌe Paulo daꞌo zogone tuḡune davara habaꞌa onamiro. U Silasi zu Timoteoꞌe Berea neḡano radiro.
15 Paulo ḡatiniroteꞌe azaḡaꞌe Paulo Atena neḡa tutune onamiro. Ebu Pauloꞌa zeḡe mazao Silasi zu Timoteo veize ḡoere tuḡuriro, raenaꞌa, “Eḡe vaḡe ḡarihe aroꞌi!” reiro. Ebu ze ḡoere odohe, Berea neḡa bare onamiro.
Paulo Atena neḡano
16 Pauloꞌa Atena neḡano Silasi zu Timoteo guhize radiroteꞌea, ḡuriro badiꞌaḡa ḡehaḡa eꞌea horonirotene, zamaḡaniꞌa adudaro.
17 Eꞌanoꞌo ani Iuda azaḡa kuru neḡa diuḡadu, Iuda azaḡa, zu Giriki azaḡa Badiꞌa gubaneꞌeteꞌe teite, Iesu Keriso ḡoꞌanido, zuni mada niduꞌa ne huni maketi habaꞌano iniu iniuꞌa onairoteꞌe teite ḡoꞌanido.
18 Ebu edeḡa azaḡa nu, Epikuro ga Sitoa rae huzeꞌeteꞌe teite hidadu, ḡoere ꞌuꞌue titiro. Ebu Pauloꞌa Iesu hariḡa zu Iesuꞌa rudanadu bare ḡabodiroteꞌe rae furenirotene, vaze nuꞌa ꞌahige reiro, raenaꞌa, “Ḡoeꞌa fuꞌa vazeḡa ꞌadi nagini reihi raꞌohe?” Ebu hena, nuꞌa raenaꞌa, “Badiꞌa ꞌahoga nu rae fureneꞌe gaogi.” reiro.
19 Ebu ze Paulo tutunadu Areopago maḡano kanisoro azaḡa nuꞌonuꞌo habaꞌa onamiro. Ebu zeḡeꞌa ninaꞌa, “Ḡaeꞌa rae fureneꞌeteꞌe ihoreḡa iziga ꞌadiꞌe nagini, eme ura ederihi raꞌohe,
20 mazaḡa emeḡe teḡao ibite mene hune zu igiroteꞌe hariḡa ꞌahoga rae fureneꞌohe. Eꞌanoꞌo ani hugaꞌe nagini, eme ura ederihi raꞌohe.”
21 Mazaḡa Atena azaḡa, zu haba ꞌahoga ꞌahoga azaḡa eꞌea radiuꞌeteꞌe haḡaiꞌe ꞌahiguḡa. Zeḡe niduꞌa, zeḡe radiu tauḡeꞌenaꞌa, ihore iziga ḡoeroga zu egoga daꞌo uratiro.
22 Ebu Pauloꞌa Areopago kanisoro azaḡa zamao edanadu ḡoeriro, raenaꞌa, “Atena azaḡa, e za horozatene, ꞌahige zamareha. Zaꞌe badiꞌa ḡehaḡa kurano hauꞌeteꞌe azaḡa.
23 Mazaḡa eḡeꞌa zae neo ragavatene, zaeꞌa kurano hauꞌeteꞌe ḡauḡa ḡehaḡa horoneha. Eꞌe zamaḡano dibuꞌo fataḡano ḡoere ꞌahoga mirihoga horoneha, raenaꞌa, “EME AḠUꞌA BADIꞌAḠA VEIZE”. Za aḡuꞌa badiꞌaḡa mazao kurauꞌohe. Eꞌanoꞌo eḡeꞌa Badiꞌa aꞌe iniu rae furenihi raꞌohe.
24 Badiꞌa ani, haba zu eꞌe zamaḡano radiuꞌeteꞌe ḡauḡa niduꞌa haḡairo. Aniꞌe Zuhiꞌa Boro, adure zu raha zuhiꞌaniꞌohe. ꞌAhine dibuꞌo neḡa zamaḡano mene radiuꞌohe. Aꞌe vazeꞌa ꞌevore hina ogoraroteꞌe neḡa.
25 Ane hugaꞌe ḡabone, ḡabone iriga zu ḡau niduꞌa vaze niduꞌa ziniꞌeteꞌe Badiꞌaḡa. Eꞌanoꞌo ane mazaoꞌe fereneꞌeteꞌe ḡauḡa oꞌoꞌa. Vazeꞌa ane veize ḡau ꞌahoga mene haḡao haꞌuma.
26 Badiꞌa ani, vaze tibuhuga haḡaadu, anionoꞌo haba ꞌahoga ꞌahoga azaḡa niduꞌa haḡairo, vazeꞌa haba niduꞌa zamaḡano radoga veize. Ebu zeḡeꞌa radiꞌuma madaḡa rae tiro, zu radiꞌuma habaꞌa ḡonaneḡa haḡairo.
27 Badiꞌaꞌa ꞌougirotaꞌaꞌe, vazeꞌa Badiꞌa vaḡoga veize, ebu inare vaḡadu Badiꞌa hidoga veize. Rehano hugaꞌe aniꞌe emeḡe niduꞌa mazaonoꞌo mene faḡa.
28 Mazaḡa eme ane ḡabone zamaḡano ḡabode onameꞌohe, ebu hagareꞌohe, ebu radiuꞌohe. Zae boꞌaḡano bada garaheꞌeteꞌe vazeḡa ꞌahoganiꞌa ꞌahige tiroteꞌe teige, raenaꞌa, “Emeḡe zuni ane mariga.”
29 Eme Badiꞌa ene ꞌahine, Badiꞌa hugaꞌe golo (gold) ga siliva (silver) ga hadi hina vazeꞌa zamaradu haḡaeꞌeteꞌe ḡauḡa teite idaḡa rae mene zamariꞌuma.
30 Ibite bone, vaze aḡuꞌa ꞌahine, ꞌuguḡa haḡaiḡa haḡaidoteꞌea, Badiꞌa ani ḡiaze modido. Rehano izidiꞌe haba niduꞌa zamaḡano radiuꞌeteꞌe azaḡa niduꞌa aneꞌa ziꞌohe. 'Zamaze ḡihunoꞌi!'
31 Mazaḡa aniꞌe haba niduꞌa zamaḡano radiuꞌeteꞌe azaḡa ibi duduḡano kotaziteꞌe madaḡa rae tiro. Ebu kota ibito haꞌuma vazeḡa zuni ohoniro. Eꞌe vazeḡaꞌe aniꞌa runeonoꞌo bare ḡaboniro. ꞌOugeꞌenaꞌa, Iesuꞌe hube hune vaze niduꞌa kotaziꞌuma rae fureniro.”
32 Paulo ꞌize ḡoere onamihi raꞌenogano, Atena azaḡaniꞌe, rune vazeḡaniꞌa bare ḡabodiroteꞌe ḡoeꞌa igirotene, vaze nuꞌe Paulo eḡofo haro. U vaze nuꞌe ꞌahige reiro, raenaꞌa, “Eꞌe hariḡaꞌe nougine vesuꞌu bare igiꞌuma.”
33 Pauloꞌe eꞌe igirotene, ḡoeꞌa nemao ꞌuadu, kanisoro azaḡa mode iḡuniro.
34 Rehano vaze nuꞌe Paulo teite ꞌauḡadu, Zuhiꞌa Boro mazao fiiro. Eꞌe zamaḡanoꞌe, Areopago kanisoro vazeḡa ꞌahoga, niḡa Dionusio, zu roḡae ꞌahoga, niḡa Damari, ebu vaze ḡehaḡa zuni.