25
Pauloꞌe Roma zuhiꞌaḡaniꞌa kotanoga reiro
1 Festo ani, gavana vazeḡa rouga radu Kaisarea neḡano feuradu, mada uḡidu meirotene, Ierusalema neḡa itiro.
2 Eꞌea dibuꞌo hauꞌeteꞌe boroboro zu Iuda azaḡa ibito ziniꞌeteꞌe azaḡaniꞌa onaadu, ani mazao Paulo ꞌuteꞌeteꞌe ḡoeꞌa rae fureniro. Ebu uminiro, raenaꞌa,
3 “Eme ura haḡaofine idaḡa hehe, Paulo Ierusalema neḡa bare tutune eroga veize?” Ze ura ibio ganatadu, Paulo matihi rae neneḡaniro.
4 Rehano Festoꞌa naenaezinaꞌa, “Paulo ani Kaisarea neḡano obone ti radiuꞌohe, ebu eḡe zuni nariga eꞌe bare ovoeꞌohe.
5 Zae vaze boroboro nu zuni eḡe teite ovaoꞌi! Ebu Pauloꞌa haḡai sauꞌa haḡairo roꞌidene, eꞌea eꞌe hariḡa rae furenoꞌi!”
6 Festo ani, Ierusalema neḡano mada fuꞌo zu uḡidu fare (8) ga gaubanana (10) bare radiunutene, Kaisarea neḡa ovoiro. Irarirotene, Festoꞌe kota habaꞌano ehoriro. Ebu Uti azaḡa zeadu, Paulo zamahu zouniro.
7 Pauloꞌa diuḡirotene, Ierusalema neḡanonoꞌo ovairoteꞌe azaḡaniꞌa ḡeḡemaḡe edanadu, Paulo ꞌuteꞌeteꞌe ḡoeꞌa aduga ḡehaḡa riꞌiniro. Rehano Pauloꞌa ꞌouge haḡaoga horoniroteꞌe vazeḡa oꞌoꞌa. Eꞌanoꞌo eꞌe hariḡaniꞌe huga rae rouganiꞌe mene idararo.
8 Ebu Pauloꞌa ane mone ḡoeꞌa rae fureniro, raenaꞌa, “Eꞌe Iuda azaḡa goro ḡoeꞌa mene variꞌiro, zu dibuꞌo neḡa sausauneꞌeteꞌe haḡaiḡa mene haḡairo, zu Roma goro ḡoeꞌa mene variꞌiro.”
9 Ebu Festoꞌe, Iuda azaḡa zamaꞌa manoroga veize, Paulo ḡadiniro, raenaꞌa, “Ḡaꞌe Ierusalema neḡa itadu, kota ꞌadiꞌe eḡeꞌa eꞌea kotaꞌoga urateꞌe hehe?”
10 Pauloꞌa naenaeninaꞌa, “Eꞌe Roma azaḡa kotao edauꞌohe. Eꞌanoꞌo Roma azaḡa kotao kotahine manoḡa. Ḡaꞌe hubehune edeḡa, eꞌa Iuda azaḡa mazao haḡai sauꞌa mene haḡaidotaꞌaꞌe.
11 Eḡe haḡai sauꞌa uꞌano uḡuhiꞌuma roꞌidene, eꞌe rudanoga idaḡa. Rehano Iuda azaḡa ꞌadaꞌa rae fureneꞌeteꞌe ḡoeꞌaꞌe mene huga roꞌidene, vaze ꞌahoganiꞌa uḡuhoga veize zeḡe ꞌevorao riꞌihogaꞌe mene idaḡa. Eꞌe Roma zuhiꞌaḡaniꞌa kotahoga urateꞌohe.”
12 Festo ani, aneꞌa dananeꞌeteꞌe azaḡa ḡadiziroteꞌe enogano, Paulo ꞌahige niro. “Ḡaꞌe Roma zuhiꞌaḡaniꞌa kotaꞌoga urateha. Eꞌanoꞌo ḡaꞌe Roma zuhiꞌaḡa vaḡe onamiꞌuma.”
Festoꞌa kini Agripa teite ḡoꞌaniro
13 Mada nu enogano, Kini Agripa zu ezeḡa, niḡa Berenikeꞌa Kaisarea neḡa onairo, matuꞌu ḡoeꞌa Festo hanoga veize.
14 Ze Festo teite mada ḡehaḡa radiunu ꞌahine, Festoꞌa Paulo hariḡa Agripa meꞌodo haro, raenaꞌa, “Felikiꞌa ꞌadama vaze ꞌahoga ḡuꞌano ohone modiro.” reiro.
15 “Eḡeꞌa Ierusalema neḡa itirotene, dibuꞌo hauꞌeteꞌe boroboro zu Iuda azaḡa boroboroꞌa onaadu Paulo ꞌutiro, ebu eḡeꞌa kota ḡonaga ḡoeꞌa roꞌi rae umidiro, runeo tuḡunoga veize.
16 Eꞌanoꞌo e ꞌahige rae ziro. 'Roma goroḡaꞌe ꞌahiguḡa. Kota zamaḡanoꞌe vaze ꞌahoga ꞌutine, vaze aꞌaꞌe ge ꞌuteꞌeteꞌe azaḡa zamao edanadu ane mone ḡoeꞌa rae fureniꞌuma. Eꞌe ḡaruganobuꞌu ḡonaga ḡoeꞌa rae furenadu, zeḡe ꞌevorao riꞌiniꞌuma.'
17 Eꞌanoꞌo zeḡeꞌa eḡe teite Kaisarea neḡa ovairotene, madaḡa mene fanediro. Rehano irarirotene, e kota habaꞌano ehoriro. Ebu uti azaḡa zeadu eꞌe vazeḡa zamahu zouniro.
18 Ane ꞌutiroteꞌe azaḡaniꞌa ḡoeꞌa rae furenirotene, eḡeꞌa zamariroteꞌe haḡaiḡa sauꞌa nuꞌe mene rae fureniro.
19 Rehano zeꞌe, zeḡe Badiꞌa mazao fieꞌeteꞌe haḡaiḡa moneo, zu vaze ꞌahoga, niḡa Iesu, ani rudaro rehano ꞌize ḡaboga rae, Pauloꞌa raꞌeteꞌe hariḡa rae fureniro.
20 Eꞌe aḡuꞌa e nouge nouge ḡoeriꞌumaꞌe. Eꞌanoꞌo Paulo ḡadiniro, ani urateꞌe ga, Ierusalema neḡa itadu eꞌea kotanoga.
21 Rehano Paulo uraꞌe Kaisarea neḡano radadu Roma zuhiꞌaḡaniꞌa kotanoga uratiro. Eꞌanoꞌo uti azaḡa zinaꞌa, 'Pauloꞌe ḡuꞌano ohone radoꞌi! Onamoo madaḡa meine, Roma zuhiꞌaḡa mazao tuḡuniꞌuma' reiro.”
22 Ebu Agripaꞌa Festo ninaꞌa, “Eḡe ḡatana zuni ane ḡoere igihi.” reirotene, Festoꞌa ninaꞌa, “Ḡa ohoḡoruꞌu igiꞌuma.” reiro.
Pauloꞌa Kini Agripa zamao ane mone ḡoeꞌa rae fureniro
23 Irarirotene, Agripa ani Berenike-ne, dabua manoḡa rohorohoḡeita haḡaadu, nuꞌonuꞌo neḡa diuḡiro. Ebu uti azaḡa boroboro zu Kaisarea neḡa azaḡa boroboro zuni diuḡiro. Ebu Festoꞌa uti azaḡa zeadu Paulo zamahu zouniro.
24 Ebu Festoꞌa raenaꞌa, “Kini Agripa zu ꞌahi onaateꞌe azaḡa niduꞌa, vazeḡa ꞌadiꞌeꞌe. Ierusalema neḡano zu Kaisarea neḡano Iuda azaḡaniꞌa raenaꞌa, 'Ḡabode radoga mene idaḡa.' rae tatareꞌeteꞌe vazeḡa.
25 Eꞌa ani ḡoere abitirotene, runeo tuḡuniꞌuma haḡaiḡa mene horoniro. Rehano ani uraꞌe, Roma zuhiꞌaḡaniꞌa kotanoga uratiro ꞌahine, Roma zuhiꞌaḡa mazao tuḡuniꞌuma raꞌohe.
26 Rehano eꞌe Roma zuhiꞌaḡa veize nouge rae mirihiꞌuma? Mazaḡa ani, haḡai sauꞌa ꞌahoga mene haḡairo. Eꞌanoꞌo Kini Agripa ḡae hune zamao zuni zae niduꞌa zamao tutune onaeha, zaeꞌa Paulo ḡadinadu eḡeꞌa mirihiteꞌe ḡoeꞌa ederoga veize.
27 Mazaḡa eḡeꞌa zamareꞌetene, ḡuꞌa vazeḡa Roma zuhiꞌaḡa mazao tuḡuneꞌeteꞌe zamaḡano, ꞌuteꞌeteꞌe ḡoeꞌa mene mirihogaꞌe mene idaḡa.”