3
Odaḡa sauꞌa vazeḡa fainiro
1 Mada ꞌahogano Petero zu Ioaneꞌa kuru madaḡano Dibuꞌo Neḡa itiro. Aꞌe ḡorava mone mada uḡidu (3 koroko) zamaḡano.
2 U ibiheta ꞌahoga, niḡa Iraḡa Manoḡa raꞌeteꞌe genaḡano, odaḡa sauꞌa vazeḡaniꞌa ehore radiro. Aniꞌe ꞌouge fureniro, ebu mada niduꞌa eꞌe habaꞌa tutune onamido, ebu Dibuꞌo Neḡa diuḡeꞌeteꞌe azaḡa mazao moni umidinu.
3 Ani Petero zu Ioaneꞌa Dibuꞌo Neḡa diuḡihi raꞌenogano horozadu, moni umiziro.
4 Rehano Petero zu Ioaneꞌe ḡiane runadu, Peteroꞌa niro, raenaꞌa, “Eme ḡiafoꞌi!”
5 Odaḡa sauꞌa vazeḡaniꞌe ḡau ꞌahoga iniꞌuma rae zamare ḡiaziro.
6 Rehano Peteroꞌa niro. “E monihe oꞌoꞌa rehano, eḡe mazao radiuꞌeteꞌe ḡauḡa ḡaniꞌuma. Eḡeꞌa ḡaꞌohe. Iesu Keriso, Nazareta neḡa vazeḡa niḡano iḡunadu onamoꞌi!”
7 Ebu Peteroꞌa ane edaꞌe ꞌevoreḡa madu mae ḡihinirotene, odaḡa zu kekeḡaniꞌa tabara inariro.
8 Eꞌanoꞌo ani rafate iḡunadu edaro, ebu oname onainu. Ebu rafate onameꞌenaꞌa zu Badiꞌa niguneꞌenaꞌa zeḡe teite Dibuꞌo Neḡa diuḡiro.
9 Vaze niduꞌa aneꞌa Badiꞌa niguneꞌenaꞌa onameꞌeteꞌe horonirotene,
10 aniꞌe Dibuꞌo Neḡa ibihetaḡa, niḡa Iraḡa Manoḡano iḡaiḡa ehoradu, vaze mazao moni umidinuteꞌe vazeḡa rae reiro. Ebu ane mazao naginiꞌa fureraroteꞌe uꞌano, zaguzagau rudaro.
Peteroꞌa Dibuꞌo Neḡano haramiro
11 Odaḡa manoriroteꞌe vazeḡaniꞌa Petero zu Ioane hegote ragavinuteꞌe zamaḡano, vaze niduꞌa zaguzaganadu, zeḡe vaḡe isau dure onairo. Aꞌe Solomona touraḡi raꞌeteꞌe habaꞌano.
12 Peteroꞌa vaze ḡehaḡaniꞌa onaoga horozirotene, ziro, raenaꞌa, “Isaraela azaḡa, za nougaꞌahi zaguzagauꞌohe? Zu nougaꞌahi ḡiaḡiafeꞌohe? Zaꞌa zamareꞌetene, emeḡeꞌa gigiꞌafe hina vaze ꞌadi faina ga? Ga emeḡeꞌa hube hune Badiꞌa gubaneꞌeteꞌe uꞌano faina ga?
13 Aberahamo, Isako, Iakobo, zu vouḡafeꞌa kurano haudoteꞌe Badiꞌaḡaniꞌa ane tuḡure vazeḡa Iesu mae ite nigune ḡihiniro. Rehano zaeꞌa Pirato ꞌevoreo riꞌiniro. Ebu Piratoꞌe tuḡune bunihi rae zamariro rehano, zaeꞌa Pirato zamao heꞌeheꞌeniro.
14 Zaꞌe Vaze Zaḡoḡa zu Duduḡa heꞌeheꞌeniro, ebu vaze runediroteꞌe vazeḡa ꞌahoga mae bunoga veize umidiro.
15 Zaꞌe ḡabone ziniꞌeteꞌe Zuhiꞌaḡa maro, rehano aniꞌe Badiꞌaꞌa runeonoꞌo bare ḡaboniro. Ebu eme eꞌe horonadu ꞌada rae fureneꞌeteꞌe.
16 Ebu Iesu mazao fieꞌeteꞌe uꞌano vaze ꞌadi faineha. Za edeḡa vaze ꞌadiꞌe mene edau ragavido. Iesu ni gigiꞌaḡa uꞌano zu Badiꞌa mazao fieꞌeteꞌe Iesuꞌa rifateꞌe uꞌano vaze ꞌadaꞌa manore huneha. Zae niduꞌa ꞌada horoneꞌeteꞌe.
17 Nego nabudi, eḡe edeḡa, Iesu maroteꞌe madaḡano bone zaꞌe aḡuꞌa, ani mazao nagini haḡairotaꞌaꞌe, zu zae vaze boroboro zuni aḡuꞌa.
18 Rehano Badiꞌaꞌa peroveta azaḡa niduꞌa hebeonoꞌo amahi rae furenirotaꞌaꞌe Badiꞌaꞌa ꞌahige haḡae huniro, raenaꞌa, 'Badiꞌaꞌa tuḡuniteꞌe Kerisoḡaꞌe zaharaniꞌuma.'
19 Eꞌanoꞌo zamaze ḡihunadu Badiꞌa mone roꞌi, zae sauꞌa vuzuꞌe modoga!
20 ꞌOugine, Zuhiꞌa Boroꞌa vineze izifiꞌuma madaḡaniꞌa onaiꞌuma, ebu zae ḡabozoga veize Badiꞌaꞌa amahi, Keriso rae ohoniroteꞌe vazeḡa tuḡuniꞌuma. Niḡaꞌe Iesu.
21 Rehano aniꞌe adureo ꞌize radiꞌuma, onamo ḡau niduꞌa izifiꞌuma madaḡaniꞌa onaiꞌuma. Aꞌe Badiꞌaꞌa amahi peroveta zaḡoḡa azaḡa tuḡuzadu rae fureniroteꞌe haḡaiḡa.
22 Moseꞌa raenaꞌa, 'Zuhiꞌa Boro zae Badiꞌaꞌa, zae boꞌaḡanonoꞌo peroveta vazeḡa ꞌahoga eḡe heuḡa zae veize tuḡuniꞌuma. Aniꞌa nagini ziteꞌe niduꞌa ego hanoꞌi!
23 Iniuꞌa ani ḡoere mene ego haune, zeḡe niduꞌa Badiꞌaꞌa meiroteꞌe azaḡa mazaonoꞌo mae vaḡizadu ruiziꞌuma.'
24 Samuela zu ane ḡarunio peroveta azaḡa onairoteꞌe niduꞌa zuni izidi fureruꞌeteꞌe ḡauḡa irina rae furenido.
25 Zaꞌe peroveta azaḡa mariga, zu Badiꞌaꞌa zae vouḡa mazao rinede tiroteꞌe ḡoeꞌa meiroteꞌe azaḡa. Mazaḡa Badiꞌaꞌa Aberahamo ninaꞌa, 'Habao radiuꞌeteꞌe iduhuḡa niduꞌaꞌe marigoonoꞌo manoḡahe meꞌuma.'
26 Badiꞌaꞌa ane Tuḡure Vazeḡa tuḡunirotene, Isaraela azaḡa zae mazao ibite tuḡuniro, zae tiba tiba haḡaize sauꞌanonoꞌo mae vaḡizadu manoḡa zinifine.”