LUK
Kamambuno Wakai Luk Muno Boglkwa
Ka mongo yegl ende okuna ongwa
Luk pepa muno boglmara i ka yegl pangwa: Yesus eremogl Israel yomba ya te yomba dumo koglkoglo meglkwa i prapra ere ikine endinambuka pre okuna God ya propet wagle digidi pandiglkwa. Luk ombugl dungwa, Yaglkande Spiritmo ye kiuglgiunde yomba meglmara Yesus kamambuno wakai ditenambuka pre aglendi yungwa. Te gun argan kamo ipre Luk ka mere dungo mambuno ere muno boglmara ya te dundumara i mina akiye dungwa.
Ka tau ombugl boglkwa, i Kamambuno Wakai pepa tau mina paikrukwa, i yegl: Angelo giglange dingwa ya sipsip sugl yomba pi gak kuglambu Yesus pamara kanigwa, te Yesus gak kembra mogltre Jerusalem God holi yungumo suna moglkwa ya te Samaria yagl wakai pre ka simbogl dungwa ya te yagl ta wam wu taya ongwa ka simbogl dungwa.
Luk ka pond muno boglkwa i Yesus eremogl kamange eraglkwa ya Holi Spirit pre ka dungwa ya te yomba tandaglmeno God koko endungwa kamo i dungo pangwa.
Ana Yesus wedi pirngi dingwa yungu ombuno yake wu pond ongwa i Luk ama Aposel mina muno boglkwa.
1
Luk kamambuno pepa muno bogl Tiopilas tongwa
Yagl wakai Tiopilas, okuna yomba merkinde nono mina suna taragl plau dingwa i kamo boglo muno boramunedi yombuglo erikura. Yomba komnaiye mambuno ere taragl plau dungo ongumutno mina kanigwa yomba, ana ye ka i akepledi nono ka boglo kugl normere ikra, ana kuno yene ere pepa muno beglkwa. Ana yeglpre, na nana wakai yene ere taragl i prapra mambuno boglmara igle krapogl doko dipirka. I ama muno boraglka wakai pango ana pamere mere muno bogl ene Tiopilas tenaglka. Na erika i yegl, ene kere piratnga, okuna yene ka ene beke teingwa i kuno kaima orkwa.
Jon Baptais mam kugl yenambuka pre angelo wu Sekaraia ditongwa
Herot, Judia kamun suna king moglkwa enge, pris ta igle moglkwa, kangiye Sekaraia. Ye ombugl Abiya pris kongun ormara i epiglmo ta moglkwa. Ye embiye kangiye Elisabet, ambumo i ama Aron gawamo ta moglkwa. Ye suwo-akiye God ongumuglo mina wakai kaima mogltre ana Yaglkande lomo ya kamo pamere prapra sika simbrika. Ana ye aglau ta paikrukwa. Ba ye gak ta kugl yeikiurika, sraglpre Elisabet kurpangwa pre ana ye suwo-akiye buglayungu olto yoko wakai mogl wu kindagl yembrika.
Enge suwarata Sekaraia epiglmo wagle pris kongun eriko, ye ama God ongumuglo mina pris kongun orkwa. Satu sindre Sekaraia ye pinde ingwa i okuna pris mambunono pango ere-ere erimere ertre ana ye ende God holi yungumo yungugl pindre God altamo mina suna endi inge demine orkwa garaglmedi pre yegl erikwa. 10 Ana ye endi inge demine orkwa gaglkwa enge yongo, yomba prapra mendakra makaisi kamange ere meglkwa.
11 Ana God angelomo ta Sekaraia moglmara plau dindre ana endi inge demine orkwa gaglmara alta mina igle, ongo wokra koglo andigl moglkwa. 12 Sekaraia eremogl angelo kangwa enge, ye sipuglo dindre ana kundugl goglkwa. 13 Ba angelo di Sekaraia tongwa, “Ene kundugl goglkro, Sekaraia, ene kamange etnga God pir kondungwa. Ene embin Elisabet wam ta kugl tenambuka ana ene gakmo kangiye Jon we dinatnga. 14 Ene mundun wakai eran ana gun yenatnga, ana gak i morambuka enge, yomba merkinde gun yenaglkwa. 15 Sraglpre, Yaglkande ongumuglo mina ye kande morambuka. Ye wain mo nigl giglekui dungwa tau nekrambuka. Ye mam dane suna morambuka enge Holi Spirit kausi tenambuka. 16 Ana ye Israel yomba merkinde auro yend ikine Yaglkandeno God mina unambuka. 17 Ye Yaglkande okuna yei tenambuka i ana propet Elaija yombuglo ya kongun giglendi ormere yeglkra erambuka. Ye nema nangiglma nomano ake i-suwara endinambuka. Ye ka sendingwa yomba nomano yake tenan ana mambuno du-yene piraglkwa. Ye erewakai eran, Yaglkande unambuka pre yomba akekun eraglkwa.”
18 Sekaraia krapogl angelo tongwa, “Na sraglmere ene ka dinere yegl erambedi piragle? Na yagl kindagl moglko, ana embina ama kindagl yongwa.”
19 Ana angelo di ikine endungwa, “Na Gabriel, God gumamugl suna andigl moglka, na ka ene ditenaglka pre, ye na diendungo ana ka wakai iyu ene diteinga. 20 Ba ene erme na ka diga i pirngi dikitnga, ipre ene dran aketenan ka dikre, ana kiendi mogl emin, engemo ta yenan kade, na ene diteinga, i kaima plau dinambuka.”
21 Enge i yomba Sekaraia pre suglmo mogltre, ana sraglpre God holi yungumo yungugl kra ye enge olto kaima moglmedi kinano yongwa. 22 Sekaraia ende menda ungwa enge, ye yomba ka ditenambuka mere manga. Yomba pirkwa ye God holi yungu yungugl kra ongumuglo-mugl ta orko kanmedi pirkwa. Ana ye ongo keunde ariye ere ombuno ditongwa. Ba ka ta dikrukwa i aimande paimoglkwa.
23 Sekaraia God holi yungumo yungugl kongunmo orkwa dundungo, ye ende ikine yungumugl ongwa. 24 Engemo i mokomugl ye embiye Elisabet gak dane pango, ana ba 5 ye teke paimoglkwa. 25 Ana ye dungwa, “Erme Yaglkande na akepledi narkwa. Enge igle ye munduwo argan orkwa pre gak narukwa ombuno dinare ana yomba mina na angaina i eglke endungwa.”
Maria ye Yesus kugl yenambuka pre angelo ditongwa
26 Elisabet gak dane pango ba 6 orko ana God eremogl angelo Gabriel di Nasaret taun Galili dumo kande suna endungwa. 27 Angelo kakep yei ambai mor ta yagl Josep bogl inambe dingwa i ditena pre ongwa. Josep ye King Devit gawamo, ambai mor kangiye Maria. 28 Angelo Gabriel Maria moglmara pindre ana dungwa, “Enge wakai ene mina yongwa! God ene pir i mitna imbo endungwa. Yaglkande ene bogl moglkwa.”
29 Angelo ka dungwa i Maria kundugl pond gogltre ana ka dungwa i sraglmere panambedi kina gundungwa. 30 Ba angelo di ambai tongwa, “Maria, kundugl goglkro, God wakai kangwa ene mina yongwa. 31 Ene gak dan mogltre, ana wan ta kugl yenatnga, kangiye Yesus we dinatnga. 32 Ye okuwo yagl kande eran ana kangiye God Mitna Imbo Kaima Wam we dinaglkwa. Yaglkande God, yene eran king mogltre ana yagl awamo King Devit moglmere yegl morambuka. 33 Ana ye Jekop yungumo ombuno i king mogltre sugl aimande morambuka. Ye kingdomo i kaima ta dundikrambuka.”
34 Maria krapogl angelo tongwa, “Na ambai mor mogl painga, ana taragl i srambre ere plau dinambe?”
35 Angelo di ikine endungwa, “Holi Spirit ene mina unan ana God Mitna Imbo Kaima yombuglomo ya kuiyamo ene si yokonambuka. Yegl eran ene gak holi kugl yemin, ana ye kangiye God Wam we dinaglkwa. 36 Pro, ene ambu yongutn Elisabet moglkwa. Yomba dingwa, ye kur pai gak ta kugl yeikrukwa. Ba ye ambu kindagl kaima yomara erme gak dane moglko ba 6 orkwa. 37 God yombuglomo kande pangwa, ipre ye taragl prapra erambuka kuno orkwa.”
38 Ana Maria di ikine endungwa, “Na Yaglkande kongunmo ambai, ene dinmere na mina pra plau dinambuka.” Ana angelo ambai kindekondo endongwa.
Maria pi Elisabet kangwa
39 Enge i Maria akekun ertre ana oglandi endpi taun ta Judia kamun muglo suna ongwa. 40 Ye Sekaraia yungumo mina yungugl pindre ana Elisabet diwakai yeitongwa. 41 Maria diwakai yongo Elisabet prukwa enge ana ye dane mina gak sumuntaglau orko, Holi Spirit Elisabet mina kau sungo, 42 ana kaglkane binan bogl indre, dungwa, “Ambu prapra meglmara suna i God ene wakai ere tongwa ene mina pangwa ana ene gak kuratnga i God wakai ere tongwa ye mina pangwa! 43 Sraglpre taragl kande i na mina plau dinambuka pre, ana Yaglkandena mam wu na kanme? 44 Ene diwakai yeinatngo, na kinana mina pirka enge ana gak dana mina suna moglkwa i gunyei sumuntaglau orkwa. 45 Yaglkande dumere ene ere gunyei pirngi dinga pre ene wakai ere tenan, ana ene mina kaima pai inambuka.”
Maria giglangemo
46 Ana Maria dungwa,
“Na kuiyana mina
Yaglkande dembiyesi mitna imbo endinga.
47 Na spiritna gunyei God
tongwa, sraglpre, ye na akeple dungwa.
48 Sraglpre, ye na pre pir
moglkwa, na mogl-atne ende
Yaglkande kongunmo erika.
Yeglpre erme ya okuwo imbor
yomba prapra na God ere
wakai ere tome dinaglkwa.
49 Sraglpre, God yombuglo
pond pangwa taragl kande
kaima na pre ere narkwa,
ye kangiye holi pangwa.
50 Yomba ye wedi kunduglmo
geglkwa i ye mitno gogl
tongwa. Yeglpre, okuna
kowano mina pai ende wu
erme ya okuwo gawano
mina panambuka.
51 Ye ongo kande duglosi
kongun giglendi ere ana
yomba no kanaglmedi erikwa
yomba i si perepere endungwa.
52 Ye yomba kande king
botno mina ake atne
endungwa, ba yomba yene
pre pir yangingwa yomba i
ye akepledi mitna endungwa.
53 Kindan gogl meglkwa
yomba ye taragl wakai
merkinde tongo kau sungwa,
ba taragl merkinde pai
tongwa yomba ta tekre yoko
diendungo endeingwa.
54 Ye kongunmo yomba Israel
akeple dindre, okuna dumere
mere ere mitno gogl tenambuka.
55 Ye nono yagl awano
ditomere yegl: Abraham ya
ye epiglmo mina mitno
goglkwa i aimande pai enambuka.”
56 Maria ba suwota Elisabet bogl mogltre ana ende ikine yungumugl ongwa.
Jon Baptais mam kugl yongwa
57 Elisabet gak kurambuka engemo ungo ana ye wam ta kugl yongwa. 58 Ye yene yombamo ya te yomba mangigl keipaingwa, Yaglkande ye Elisabet miriye kande gogl ombuno ditongwa i pirtre, ana ye Elisabet bogl gun yeingwa.
59 Ande enge 8 mina ye undre gak nangiye punduno bogltre ana ye nem kangiye yeite Sekaraia we dinamune dingwa. 60 Ba gak mam dungwa, “Taman, ye kangiye Jon we dinamga.”
61 Ana ye eremogl Elisabet diteingwa, “Ba ene yombano mina yomba kangiye yegl ta paikrukwa.”
62 Ana ye onguno keunde ariye ere nem Sekaraia krapogl teingwa. Ye gak kangiye ira we dinambuka i kana pre erikwa. 63 Sekaraia taragl ta narimbi muno boragledi pre ariye ere, ana gak kangiye muno boglkwa, “Gak kangiye Jon.” Ana yomba prapra kinano gundingwa. 64 Oglandi kaima Sekaraia dra ka dinambuka undungo te drambiye pirka sungwa ana ye ka aglke mambuno ere dindre ana ye God dembiye sungwa. 65 Yomba mangigl keipaingwa prapra kundugl geglkwa, Judia kamun muglo meglkwa yomba prapra kamo i diwai dingwa. 66 Yomba prapra ka i pirtre kinano yongo ana krapeglkwa, “Okuwo gak i sraglmere morambe?” I Yaglkande ongo ya yombuglomo i ye mina yongwa.
Sekaraia ka pai inambuka pre dungwa
67 Jon nem Sekaraia Holi Spirit kau sitongo ana God kamo pai inambuka pre dungwa:
68 “Nono Yaglkande dembiyesi
mitna imbo endinamga.
Israel Godno, ye undre
ana yene yombamo akepledi
toposi ikine endinambuka.
69 Ye kongunmo yomba Devit
yungumo ombuno mina.
Yaglkande giglekui dungwa
ta, Ye nono ere-inambuka pre i-pene endungwa.
70 Ye propetmo holi okuna
koimbo ka ditomere orkwa.
71 Ye nono kundano ikine
ya kinde pir norikwa yomba
prapra onguno mina nono ere-inambuka.
72 I nono kowano wagle
mitno goglkwa ombuno
dindre. Ana ye lo holi eragle
dungwa kontrak i aimande pir moglkwa.
73 Ye ka di giglendi nono
yagl awano Abraham tongwa.
74 Ye nono kundano ikine
onguno mina i-yeglke ende,
ana ake wakai ere norkwa
pre, nono kundugl goglkre,
ye kongunmo eramunga.
75 Yeglpre nono tandaglme
ta paikran ana God mambuglo
mina mambuno du-yene
pamere engenge eramga.
76 Ana ene na wana,
ene kangin yei God Mogl
Mitna Imbo endungwa,
propetmo we dinaglkwa,
sraglpre, ene Yaglkande
konbaunamo akekun ere yeitenatnga.
77 Ye yombamo tandaglmeno
kindekondo tendre ana
nomano wakai tendre ere-inambuka.
78 Sraglpre, nono Godno
mitno goglko windadi dindre
ikine endinambuka pre, ana
heven imbo ande koragle
sumere yeglmere ende
nono mina unambuka.
79 Ana yomba mim ormara
suna meglkwa, ya te gounga
mambuno kuiyamo atnekra
meglkwa i ambuglangesi
tendre, ana nono katno sugl
mogl. Ana deno munduno
winda dungwa konbo mina
auro i suna enambuka.”
80 Ana gak yakindre nangiye ya spiritmo mina suna gigle dungo, makan waule suna mogl pindre ana engemo yongo, Israel yomba mina wu nongugl ongwa.