4
Heven suna God sia kingmo mina moglko dembiye siteingwa
Taragl yegl dundungo, ana na kaniga heven imbo konbo dra ta yauro audi yongo ana nungo embriye ta komnaiye kana dungo na pirka, i biukul bendumere yeglkra aglkekor dungwa, “Ene ende egli ya wo, ana taragl okuwo plau dinambuka i na ombuno dimbo kanatnga.” Ana tambre kana Holi Spirit na ake undi narko na kaniga heven sia king ta igle yongo ana yomba ta amedi moglkwa.* Yomba sia king mina amedi moglkwa ikra ye ekinmo wakai i kombuglo jaspa ya konilian singigleno wakai yeglmere ye gumadra mina pango, ana teikombukun muno boglkwa i kombuglo emeral mereyegl ere sia king winambodi isuna endungwa. Te sia king yomara igle ama sia 24 yei winambo digo ana yomba mina ende okuna eingwa yomba 24 igle amedi meglkwa, ye gagl olto kruwo ende pandigl te king bitno gagl gol mina bekingwa i bitno mina pango meglkwa. Ana sia king mina ambuglangesi potndungo, te kamun gurgagla dindre gurgurdi ongwa. Ana sia king yomara gumamugl igle ken-lam 7 depangwa. Ken-lammo 7 i God yene Spiritmo. Te sia king yomara gumamugl igle ombugl taragl ta yongwa, i mundi nigl kande glas mereyegl moglkwa ana kuglmuna kaima yei pesungwa.
Te sia king yomara dumo igle taragl kor-meglkwa 4 mogl winambo dingwa. Ana ye gumanomugl ya te mokonomugl ongumutno pai kuno orkwa. Ana taragl kor-meglkwa ikra mogl komuno endungwa i singigle agl-pusi kande kangiye laion mereyegl pangwa te ta bugla-kau kumugl mereyegl singigle pangwa, te ta gumadra yomba mereyegl pangwa, te ta kua-dua koiye pigladi omere yegl singigle pangwa. Taragl 4 kor-meglkwa ikra suwara suwarandi koiyeno 6 paingwa. Ana nangino mina ongumutno merkinde pai kuno orko te koiyeno mina tembe ya atne akiye pangwa. Te ye ermine ya enduwer engenge ka yegl dingwa:
“Holi, holi, holi,
ye God Yaglkande Giglekui
dungwa, ye okuna moglkwa,
erme moglkwa, ana okuwo unambuka.”
Yomba ta sia king mina amedi moglkwa i ye kor aimande aimande moglkwa. Ana ipre taragl 4 kor-meglkwa ye ambuglangemo dipene ende te kangiye kande tendre ana diwakai yei tengo, 10 ana mokomugl ende okuna eingwa yomba 24 ye eremogl kor aimande aimande moglkwa sia king mina amedi moglmara igle goglkuno bondugl ana dembiye karaugl ereteingwa. Ye king bitno gagl endingwa i gugl sia king yomara igle nongagle yendre ana yegl dingwa:
11 “No Yaglkandeno ya Godno
motnga, ene kangin kande
tendre te dembin sumga ya
yombutn kande pangwa i ene
inatnga kuno orkwa. Sraglpre,
ene taragl prapra ereyei
kondinga, ana enene pitnere
mere taragl prapra ereyengo
ana erme paimeglkwa.”
* 4:2 Yagl ta king boglmo wakai mina amedi moglko ana Jon kangwa, i God moglkwa. Ba Jon eremogl God kangiye kaima daglkrukwa. Ana okuwo Ka Teke Pangwa 7:10 mina ka yegl pangwa, “God king boglmo wakai mina amedi mogl mogl orkwa.” Te Jon eremogl God yomba mereyegl moglme dikrukwa. Ba ye eremogl God pre, ambuglange kande ya te teikombukun kanekane di simboglkwa.