11
Paul ne ziri Tumtumnib la yela
1 M mor tiꞌir ye ya na di suguru ne m yalimis la biꞌela, amaa ya pun di suguru ne li.
2 M nyuune ya yela wuu Winaꞌami nyuune ya yela siꞌem la, li wenne dau one gur poꞌaꞌeliŋ one ziꞌ dau la, ka ti ke ka o kul sid. Ka yanam wenne poꞌaꞌeliŋ la, ka o sid la me wenne Kiristo ne.
3 M zot dabiem ye ya potenda na tiak ka ya bas ka ku tiaꞌ ye ya dol Kiristo suꞌuŋa ne ya sunf yinnii, ka wenne Eve one ka waaf la da maꞌ o ne o yaꞌambeꞌed la.
4 Ka soꞌ yaꞌa keenn ya saꞌan na ka moon Yesu soꞌ yela, ka li kaꞌ Yesu one ka ti mool la yelaa, bee ya diꞌe siig kane be li konꞌ ne line ka ya pun diꞌe la, bee ya diꞌe labasuŋ line be li konꞌ ne line ka ya siak la, ya na yiti modig ka di suguru ne ba.
5 M pu tenꞌes ye m ane nyaꞌaŋ nid ne Tumtumnib bane ka ya tenꞌes ye ba a suꞌum galis laa.
6 Hale ne man pu zamis nomiꞌilim pianꞌad la, m lee mor baŋir. Ti yele ya nyain siꞌel wusa poogin.
7 M daa mool Winaꞌam labasuŋ la ya saꞌan, ka daa pu ke ka ya yo siꞌela, ka sie m meŋ ye yanam lee du. Ya tenꞌes ye man daa tum siꞌel la, a beꞌed n tisi ya bee?
8 M daa diꞌe ligidi Winaꞌam nidib sieba saꞌan ye m suŋi m meŋ ka lee tum tisi ya.
9 Ka man daa be ya saꞌan ka m boodim a siꞌem wusa, m daa pu daami yaa. Amaa li daa ane ti baꞌabiis bane yi Masedonia ni la daa tis man bood siꞌel wusa. Man daa pu daami ya siꞌel ni la, m na kpelim a ala ne dabisbane be tuon la.
10 Li a sida ye m miꞌ Kiristo yelsida ka doli li. Ala li me a sida ye soꞌ ku ke ka m sin m noor Akaia teensin nyoꞌog nweꞌeb kaŋa yelaa.
11 Bo ka m yel anwaa? Man pu noŋi ya la zug bee? Ayei. Winaꞌam miꞌ ye m noŋi ya.
12 M na kpelim niŋ man niŋid siꞌem la nannanna ye m ke ka ziri dim la ku nye suer n nweꞌe nyoꞌog n yel ye ba tum wuu tiname tum siꞌem laa.
13 Nimbama nwa buudi ane nimbane maꞌad ye ba ane Tumtumnib, ka maꞌadi ba tuuma yela ka tiake ba meŋ n tuꞌas wuu Tumtumnib bane ka Kiristo sid tum la.
14 Li kaꞌ yelsaaŋa. Hale Sutaana tunꞌe tiak o meŋ n tuꞌas wuu malek suŋ ne.
15 Dinzugo, Sutaana tumtumnib yaꞌa tiake ba meŋ n tuꞌas wuu nimbane tum popielim tuuma la, li kaꞌ bunnyalimaa. Ba daar yaꞌa ti paae, ba na diꞌe line nare ba tuuma la a siꞌem.
Paul namisug la yela
16 M ye m yel din ka m pun yeli ya ye, soꞌ da tenꞌes ye m ane zolugo. Amaa ya yaꞌa tenꞌes ye m sid ane zolug, yanam dimi m suguru wuu yaname yiti dit zolug suguru siꞌem la, ka m na nyaŋe nweꞌe nyoꞌog biꞌela.
17 Man yel siꞌel nannanna la pu yit Zugsob saꞌan naa. Ka li yaꞌa aa m nyoꞌog nweꞌeb la ni, m pianꞌad wuu zolug ne.
18 Ka nidib bedego sadigim nweꞌe nyoꞌog ba dunia bun yela la, mam me na nweꞌe nyoꞌog.
19 Yaname sadigim a yaꞌam dim bedego la, ya yiti dit suguru ne zon!
20 Soꞌ yaꞌa tansi ya wuu ya ane ba yamis, bee diꞌe siꞌel ya saꞌan yanam naꞌasidi ba la yela, bee more ya ba nuꞌusin, bee ziemi ya, bee nweꞌe ya tampianꞌas, ya yiti modig ka di suguru ne ba.
21 Line kpenꞌesi m nyan la ane ye ti daa tadigne, ka m me siake li.
Ka soꞌ yaꞌa mor sukpiꞌeuŋ na nweꞌe nyoꞌog ne siꞌel yela, mam me mor sukpiꞌeuŋ na nweꞌe nyoꞌog li yela. M pianꞌad ne wuu zolug ne.
22 Ba yaꞌa nweꞌe nyoꞌog n yel ye ba ane Hibiru dim bee Israel dim bee Abraham yaas, man me tunꞌe lebis ye man me ane ba yinni.
23 Ba yaꞌa yel ye ba ane Kiristo tumtumnib m tunꞌe lebis ye man a Kiristo tumtumsuŋ n gaadi ba. M pianꞌad ne wuu one kaꞌa yaꞌam ne. Mam tum bedego n gaadi ban tum siꞌem la. Ka ba kpenꞌesi m sarega noor bedego n gaad bam kpenꞌesi ban siꞌem la. Ka ba fiꞌebi m noor bedego n gaad bam fiꞌebi ban siꞌem la. Ka saŋa bedego ka m pu lal ne kuꞌum.
24 Noor anu ka Jew dim fiꞌeb man ne kpaꞌasa noor piistanꞌ ne awai.
25 Noor atanꞌ ka Room dim buꞌu m. Ka noor yinni ka nidib lob man ne kuga. Noor atanꞌ ka m be aaruŋin ka li tua tampiins ka saꞌam ateukun. Ka noor yinni ka m be kuꞌomin la dabis mum.
26 M daa nye yeltood m goondim ni. Kuꞌom daa ye li di man, ka faandib giŋi man ye ba faann m laꞌad. Ka m Jew dim taaba ne bane kaꞌa Jew dim moꞌ ye ba saꞌam man. Ka m nye yeltood ateuk poogin. Ka zam baꞌabiis moꞌ ye ba saꞌam man.
27 M daa tum tuum kpiꞌema. Ka noor bedego ka m pu gbisida. Ka koꞌom ne kuꞌonuud daa gbanꞌe m. Ka m pu nye diib bee gbeensir bee fuugi na pil waade.
28 Line paꞌas la, daa wusa m mor sunf zeeb ne Winaꞌam nidibi n be zinꞌig wusa yela.
29 Soꞌ yaꞌa pu kpiꞌem ne o Winaꞌam dolim la nii, li wenne mane pu kpiꞌema. Ka soꞌ yaꞌa ke ka o tiraan tum tuumbeꞌed, m sunf yiti saꞌam ne one ke ka o niŋ ala la.
30 Li yaꞌa nar ye m nweꞌe nyoꞌog, m na nweꞌe nyoꞌog ne line paꞌal m tadimis.
31 Winaꞌam one aa ti Zugsob Yesu saam ka o yuꞌur nyet zunꞌor ka li kaꞌ naar la, miꞌ ye m pu maꞌada.
32 Man daa be Damaskus teŋin la, niŋ kane ka naꞌab Aretus ke ka o soꞌe Damaskus la daa guꞌul nidib teŋ la zaꞌanoorin ye ba gbanꞌe m.
33 Ka sieba daa nok nwiig n lo peog ka ke ka m kpenꞌ zinꞌi peogin la, ka ba noki li tud takoro ni sigisi m ka m zo.