3
Ti tuuma line dol Winaꞌam Siig Suŋ la yela
1 Ya tenꞌes ye ti lem pinꞌili pianꞌad tinam a suꞌum la yela bee? Ka tenꞌes ye ti wenne ninsieba ka bood gbana line na paꞌali tinam a suꞌum siꞌem la yela ye ti tisi ya bee? Ka bood ye ya sob gbauŋ kan la buudi ye ti tis ninsiebaa?
2 Yanam meŋ wenne gbauŋ kaŋa ne. Ka nidib wusa nyaŋe nyee li ka karemi li. Ka ti noŋi ya bedego.
3 Li nie paalo ye Kiristo meŋ sob gbauŋ kaŋa la ye ti tolisi li. Ka o pu nok siꞌel sob kuglamir zugo, ka lee nok Winaꞌam one voe la Siig Suŋ n sob ninsaalib sunfin.
4 Ti miꞌ ye Winaꞌam niŋid ala, ka ti miꞌilim yit Yesu Kiristo ni na.
5 Ka siꞌel kaeꞌ ti ni n ke ka ti tunꞌe yel ye ti nar ye ti tum tuumkaŋaa. Li ane Winaꞌam ke ka li nar ye ti tumi li,
6 ka me nar ye ti tum nonaar paal tuuma la. Nonaar paal la kaꞌane wada kan ka ba sobe, ka lee yine Winaꞌam Siig Suŋ ni na. Ka wada dine sob la dolne kuꞌum, ka Siig Suŋ la tisid nyovur.
7 Winaꞌam da tis wada line taꞌasid kuꞌum ka o da kpiꞌa li sobir kuglamir zug la, ka o naꞌam pipilim nie nyain li tisibin la. Ka Moses nindaa pelig ka nyeen pil pil, ka Israel dim pu nyaŋe gosi lii, laꞌam ne pipilim la da sied la. Wada line taꞌasid kuꞌum la sadigim da mor pipilim anwa la,
8 labasuŋ line tisidi Winaꞌam Siig Suŋ la ku mor pipilim n gaad ala bee?
9 Ka wada line ke ka nidib li kumin la yaꞌa da mor pipilim, labasuŋ line ke ka ti a popielim dim Winaꞌam tuon la ku peligi gaad ala bee?
10 Sida, pipilim line be nannanna nwa gaad pipilim line da be la bedego, ka dinzug ka pipilim line da be la lieb zaalim.
11 Line ku yaꞌas naar la yaꞌa da mor pipilim, line be nannanna nwa ka ku naae laa, ku mor pipilim bedego n gaad ala bee?
12 Tiname mor tiꞌir kaŋa la zug, ka ti sunf kpiꞌem,
13 ka ti pu wenne Moses one da nok pien lus o nindaa ye Israel dim da nyee o nindaa pipilim line sied la naare.
14 Ka Israel dim la me mor yaꞌam lik. Ka saŋkan la n ti paae zina, ka ba yaꞌa karem nonaakudug gbauŋ la, li wenne pien la nan kpelim be, ka ba pu gbanꞌed ban karem siꞌel la gbin ne. Kiristo ni maꞌaa, ka pien la na bodig.
15 Sida, saŋkan la n ti paae zina, ba yaꞌa karem Moses gbauŋ la, pien la nan kpelim ligil ne ba yaꞌam.
16 Ka soꞌ yaꞌa bas ka dol Zugsob la, pien la na bodig o ni.
17 Ka Zugsob on ka ba dol la ane Winaꞌam Siig Suŋ. Ka Zugsob Siig Suŋ la be siꞌel la, yolisim me be anina.
18 Pien pu ligil tinam bane wusa dol Zugsob la nindaase. Ka Zugsob la naꞌam pipilim nie ti ni, ka tiakedi ti ye ti wenne on a siꞌem la. Ka o naꞌam pipilim bee ti ni n nobugid bedego bedego. Ka li wusa yi ne Zugsob one a Siig Suŋ la ni na.