2
Paul ne o Tumtum taab la yela
1 Ka yuma piinanaasi daa gaad la, ka man ne Barnabas nyaan leb Jerusalem, ka Titus me laꞌam doli ti.
2 Winaꞌam n daa paꞌali m ye o bood ye m keŋ la zug ka m daa keŋ. Ka mam ne Winaꞌam nidib bane a kpeenmnam la laꞌase gbanꞌe gbanꞌar. Ka li ane man ne ban maꞌaa ka kaꞌ nidib sooginee. Ka m yeli ba labasuŋ kan ka m moon tisid bane kaꞌ Jew dim la saꞌan la a siꞌem; ka m pu bood ye tuumkan ka m daa tum ka nan tumi li la a zaalim.
3 Hale laꞌam ne m dolim taab Titus a Greek nid la, ba daa pu mugus o ye o kpenꞌ baŋo,
4 hale baa ninsieba bane daa maꞌa ye ba ane Winaꞌam nidib ka suaꞌ kpenꞌ ti soogin la, n bood ye ba ke ka o kpenꞌ baŋo la. Nimbama daa laꞌas ne ti ye ba baŋ tinam a yinni ne Yesu Kiristo la ke ka ti soꞌe ti meŋ Jew dim malima ni siꞌem la, ka bood ye ba ke ka ti dol malima la, ka aa li yamis.
5 Ti daa pu siak ba boodim la baa fiinn mene, ye labasuŋ la ku tiake ka na kpelim a suꞌum ya saꞌan.
6 Ka nimbane ka ya tenꞌes ye ba a nintitada la pu paas siꞌel m paꞌaluginee. Ban a siꞌem la pu paki ma. Bozugo Winaꞌam n nye ninsaal ka o a siꞌem la, ninsaal pu gosid o tiraan ka o a alaa.
7 Ba yuꞌun nye ka Winaꞌam guꞌuli m labasuŋ la ye m mool li tis bane kaꞌ Jew dim la, ka li a wuu on me guꞌul Piita labasuŋ la ye o mool li tis Jew dim la.
8 Ka Winaꞌam paŋ ke ka Piita a Kiristo Tumtum n tum Jew dim la saꞌan, ka me ke ka man me tum bane kaꞌ Jew dim la saꞌan.
9 Ka Jemes ne Piita ne Joon, bane ka ya gos ka ba a kpeenmnam la baŋ ye Winaꞌam guꞌul m tuumsuŋ kaŋa, ka gbanꞌe man ne Barnabas nuꞌus n paꞌal ye ti mor noor yinni na tum Winaꞌam tuuma, ka ti siak taaba ye tinam na tum bane kaꞌ Jew dim la saꞌan, ka ban me na tum Jew dim la saꞌan.
10 Yel yinni ka ba daa sosi ti ye ti tenr ye ti suŋi ba tadimnam la. Ka lina ka m daa pun tiaꞌ bedego ye m niŋ.
Paul n daa yel Piita o tuumbeꞌed la yela
11 Ka man daa be Antiok teŋin la ka Piita kenn anina la m daa yel o nidib soogin ye o pu niŋ suꞌum, lin daa nie nyain ye o tum taal la zug.
12 Saŋkan ka nimbane ka Jemes tum la nam pu kena la, ka Piita yiti dit ne bane kaꞌ Jew dim la. Ka nimbama la daa ti paae na la, o daa weligi o meŋ ka pu lem dit ne baa, bozugo o daa zot dabiem ne nimbane yel ye li nar ka baꞌabiis bane kaꞌ Jew dim la kpenꞌ baŋo la zug.
13 Ka baꞌabiis bane a Jew dim la daa paꞌas Piita zam la ni, ka ba zam la daa me veꞌeg Barnabas ka o yidigi dol ban niŋ siꞌel la.
14 Ka man daa nye ka ban tum siꞌem la pu dolne labasuŋ la yela la, ka m yel Piita ba wusa tuon ye, “Fu ane Jew nid, bo ka fu tum wuu one kaꞌ Jew nida? Wala ka fun na nyaŋe mugus bane kaꞌ Jew dim la ye ba dol Jew dim malima?”
Yadda niŋir zug ka ti nye faangir la yela
15 Tinam bane ka ba duꞌa ka ti a Jew dim, ti kaꞌa bane kaꞌ Jew dim, ka a tuumbeꞌed dim laa.
16 Hale ti miꞌ ye soꞌ yadda niŋir Kiristo ni maꞌaa ka Winaꞌam na ke ka o a popielim daan o tuon, ka kaꞌ on na niŋ wada la yel siꞌem laa. Ka tinam me niŋ Yesu Kiristo yadda ye Winaꞌam ke ka ti a popielim dim o tuon, ka li yine ti yadda niŋir Kiristo ni na, ka kaꞌ tiname niŋ wada la yel siꞌem laa. Soꞌ wada siakir kudin ku ke ka o a popielim daan Winaꞌam tuone.
17 Ti bood ye Winaꞌam ke ka ti a popielim dim o tuon, tiname a yinni ne Kiristo la zug. Ka lin yaꞌa ke ka ti baŋ ye ti a tuumbeꞌed dim wuu bane kaꞌ Jew dim la a siꞌem la, ya tenꞌes ye Kiristo duꞌosidne tuumbeꞌed dimaa? Ayei baa biꞌelaa.
18 M yaꞌa daa dol Jew dim wada ka basi li, ka ti lem pinꞌili doli li, li paꞌal ye m saꞌamid wada la.
19 Wada la paŋ zugoo, m ane kuꞌum ne wada la, ka m na tunꞌe voe ne Winaꞌam zug.
20 Ba da laꞌam kpaꞌa m dapuudir zug ne Kiristo, ka m kpi. Ka li ku lem aa ye m voe ne m meŋ vum, ka ane Kiristo vum be m saꞌan. Ka m yadda niŋir Winaꞌam Biig la ni one noŋi m ka kpii m yela la, ke ka m be vum kan ka m nam be nwa ni.
21 M pu ket ka Winaꞌam popielim la a zaalim. Soꞌ yaꞌa aan popielim daan Winaꞌam tuon, ka li yiinne o wada siakir la ni, Kiristo kum la aane zaalim.