5
Yolisim gurim la yela
1 Kiristo da faaenn ti ye ti soꞌe ti meŋ wada la saꞌan. Dinzugo, ziꞌenimi kiŋ kiŋ ka da siaki lieb yamis yaꞌasa.
2 Gosimi, mam Paul yeti ya ye, ya yaꞌa siak ka ba kpenꞌesi ya baŋo, Kiristo yela n be ya ni la pu mor nyoode.
3 Ka len yet on mekama siak ka ba kpenꞌes o baŋo ye, on kpenꞌ baŋo la zug, li a tilas ye o dol wada la wusa.
4 Yanam bane bood ye ya a popielim dim Winaꞌam tuon ya wada dolim zug la, baŋim ye ya baki ya meŋ ne Kiristo ka yiisi ya meŋ Winaꞌam popielim ni.
5 Ka ti yadda niŋir Kiristo ni la ke ka ti mor tiꞌir ye Winaꞌam na ke ka ti a popielim dim o tuon. Ka Winaꞌam Siig Suŋ paŋ ke ka ti guri li.
6 Ka tinam a yinni ne Yesu Kiristo la, li yela pu pak ye ti kpenꞌ baŋo bee ti pu kpenꞌee. Lini pak ane ti yaꞌa niŋ Yesu yadda ka li dolne ti noŋilim.
7 Ya daa dol Winaꞌam yelsida suꞌuŋa. Anoꞌone ke ka ya pu lem doli li?
8 Lin ka ba panꞌasi ya ka ya bas sida la pu yi Winaꞌam one buoli ya la saꞌan naa.
9 Ala ka ba ye, “Li ane dabin biꞌela ket ka bodobodo gbil ukid.”
10 Tinam a yinni ne Zugsob la ke ka m miꞌ suꞌuŋa ye ya tenꞌesa ku bee li konꞌ ne man paꞌali ya siꞌel laa. Winaꞌam na saans niŋkane wusa daamidi ya tenꞌesa la, on kun a soꞌ wusa.
11 M baꞌabiise, li yaꞌa a sida ye man meŋi moon ye li nar ka ba kpenꞌ baŋo, bo ka Jew dim namisidi ma? Lina yaꞌa aan sida, Jew dim naan ku tenꞌesidin ye m moolug Kiristo kum dapuudir zug la kaꞌ suꞌum.
12 M naan bood ye nimbane daamidi ya tenꞌesa n yet ye li nar ka ya kpenꞌ baŋo la na maligim saꞌami ba meŋ niŋgbiŋ n paas.
13 M baꞌabiise, Winaꞌam gaŋi ya ye ya mor yolisim. Dinzugo da ke ka ya yolisim la ke ka ya tum ya ninsaalib yaꞌamleog boodim, ka lee suŋ taaba ne noŋilim.
14 Wada la wusa laꞌasne a yinni ye fu noŋim fu tiraan wenne fu meŋ.
15 Ya yaꞌa zabid ne taaba wuu ya ane bunyuos, guꞌusimi ka da saꞌam taaba.
Winaꞌam Siig Suŋ boodim ne ninsaalib boodim la yela
16 Neꞌ ka m yet ye, keli ka ya beilim dolne Winaꞌam Siig Suŋ la boodim, ka da niŋ lin ka ya ninsaalib boodim mor yaꞌamleog laa.
17 Ka lin ka ninsaalib boodim mor yaꞌamleog la bee li konꞌ ne Winaꞌam Siig Suŋ la boodim. Bama ayi la ane dataas. Ka dinzug ya ku nyaŋe niŋ yaname bood siꞌem laa.
18 Winaꞌam Siig Suŋ yaꞌa soꞌe ya, wada la pu lem soꞌe yaa.
19 Ti ninsaalib boodim niŋid siꞌel la nie paalo, ka ket ka nidib mor poꞌasaꞌuŋ ne dianꞌad tuuma ne tuumyaalis
20 ne baꞌamaalug ne sontuuma ne datatuuma ne zabtaasim ne nyuur ne supeen ne dindiisim ne nogban nwaꞌar.
21 Ka fufum dim ne bane nuud daam koon ne diꞌemyaalis ne tuum bane wenne bamanam, m yeti ya wuu man daa yeli ya siꞌem la ye, on mekama niŋid bama ku di Winaꞌam soꞌolim la faare.
22 Ka nyood line ka Winaꞌam Siig Suŋ la ket ka li nobugid nidib sunfin, ane noŋilim ne sumalisim ne sumodigir ne popielim ne yelsida
23 ne sumbugusum ne meŋ gbanꞌar. Wada la ku yel nid ye o da niŋ bamaa.
24 Ka nimbane a Yesu Kiristo nidib la, ba ninsaalib boodim ne li yaꞌamleog la kpi ne Kiristo ne, ka li pu lem soꞌe baa.
25 Winaꞌam Siig Suŋ sadigim tisi ti vum paal la, keli ka ti beilim dolne o boodim la.
26 Ka ti da mor nyeesim bee ket ka ti taaba sunf dued bee mor nyuur ne taabaa.