14
Nidib bedego bane nye faangir la yela
1 Ka m gos ka Peꞌebil la ziꞌe Zion zuerin Jerusalem ni. Ka nidib tusa kobuga ne tusa piisnaasi ne tusa anaasi bane mor o yuꞌur ne o Baꞌ yuꞌur la ka li sob ba gbeꞌedin ka ziꞌe o saꞌan.
2 Ka m wum kukor ka li yi arazana ni na vuudi wenne kuꞌosusuud titaꞌar ne satansug titaꞌar ne, ka me wenne kon nweꞌedibi n nweꞌedi ba kona siꞌem la.
3 Ka ba ziꞌe naꞌam gbauŋ ne bunvoeya anaasi ne kpeenmnam la tuon ka yuꞌum yuum paal dine ka soꞌ ku tunꞌe zamise, asee nidib tusa kobug ne tusa piisnaasi ne tusa anaasi bane ka Winaꞌam faaenn ba dunia ni la maꞌaa.
4 Ba ane dap bane luaki ba meŋ ne poꞌab ka a nyain, ka dol Peꞌebil la ken zinꞌikan ka o ken wusa, ka nye faangir ninsaalib soogin, ka a yiiga bun wela bane ka ba zaŋi tis Winaꞌam ne Peꞌebil la.
5 Ziri pianꞌad pu yi ba noorin ne, ka ba me pu mor taale.
Maleknam atanꞌ la yela
6 Ka m nye malek soꞌ ka o ianꞌad saa agol ka mor labasuŋ kane kaꞌ naare, ye o mooli li tis nidib wusa bane be dunia ni, laꞌam ne teŋgbana ne buudi pianꞌad wusa,
7 ka tans n yel ye, “Zom Winaꞌam ka zunꞌe o yuꞌur la, bozugo saŋa kan ka o na kad nidib saria la paae na. Zunꞌom Winaꞌam one maal arazana ne dunia ne moꞌa ne kuꞌobulis wusa la.”
8 Ka malek one peꞌes ayi n dol yiiga daan la ye, “Babilon teŋtitaꞌar la saꞌameya. Li sid saꞌameya. Teŋ la daa wenne poꞌagoondir ne ka ke ka nidib buudi wusa tum tuumbeꞌed ne o wenne daam line kpiꞌem ka o tisi ba ka ba nu ne.”
9 Ka atanꞌ daan dol yiiga maleknama ayi la n tans yel ye, “Soꞌ yaꞌa zunꞌe bunyua la ne o win ka diꞌe zanbin la o gbeꞌugun bee o nuꞌugin,
10 Winaꞌam sunf na pelig ne o wenne daam line kpiꞌem line ka o kpaꞌe ne supeen n niŋ o butiŋin la n ke ka o nuu li. O na namis maleksuma ne Peꞌebil la tuon n kpenꞌ bugumin ne tan line nyelig ka tul bedego la ni.
11 Ka soꞌ yaꞌa diꞌe bunyua la zanbin la bee zunꞌe li ne li win, o na namis bugum dine ka li nyoꞌos dut agol saŋa dine kaꞌ ben la ni, ka ku nye vuꞌusum nintaŋ bee yuꞌuŋo.”
12 Linzug li a suꞌum ye Winaꞌam nidib bane siak o noyelug ka dol Yesu ne yadda niŋir la, modigim.
13 Ka m wum kukor ka li yi arazana ni na ye, “Som neꞌeŋa. Line yi zina ken sa, yelsum be ne bane dol ne Zugsob la ka kpi la.”
Ka Winaꞌam Siig Suŋ la siak ye, “Sida, ba na vuꞌus ne tuumkpiꞌema ka ba tuumsoma na doli ba.”
Dunia bunib la yela
14 Ka m gosi nye saŋgbauŋ piela ka soꞌ wenne Ninsaal Biig zinꞌi li zug n pid salima zugpibig o zugin, ka mor gonꞌog line noore dit o nuꞌugin.
15 Ka malek soꞌ yi Winaꞌam puꞌusum yin la n yel one zinꞌi saŋgbauŋ zug la ne kukotitaꞌar ye, “Nokim gonꞌog la bun, bozugo saŋa la paaeya, ka dunia la biꞌigi siak bunib.”
16 Ka one zinꞌi saŋgbauŋ la zug zaŋ o gonꞌog la kia dunia ka buni li.
17 Ka malek siꞌa yi arazana puꞌusum yin la na, n me mor gonꞌog line noor dit.
18 Ka malek one soꞌe bugum la yi maan maalug zinꞌig na yel malek one mor gonꞌog line noore dit la ne kukotitaꞌar ye, “Nokim gonꞌog la n ponꞌ veen tiis wela dunia ni. Ka dunia la wenne veen tiis lombonꞌog ka li wela la biꞌigi ya.”
19 Ka malek la nok o gonꞌog la n ponꞌ veen wela dunia ni, ka nok wela la niŋ zinꞌig kan ka ba nwiakid wela kuꞌom la. Wela la nwiakir wenne Winaꞌam supeen titaꞌar ne.
20 Ka ba yi teŋ la kpeŋ n nwiak wela la, ka ziim yi zinꞌikan ka ba nwiak li la wenne moꞌar titaꞌar ne. Ka li waꞌalim a wuu maila kobus yi. Ka wief yaꞌa sigin li ni, li zuluŋ na paae o salibir.