20
Yuma tusa la yela
1 Ka m lem nye malek soꞌ ka o yi arazana ni sigid na n mor bumbok zuluŋ la saafi ne baans line toꞌoŋ taaba ka kpiꞌem la o nuꞌugin,
2 ka gbanꞌe dragon one a waaf line da be kudumin sa, ka a kikiris Naꞌab ne Sutaana la, n loo o digil yuma tusa,
3 ka nok o lob bumbok zuluŋin la ka kpar ka nok siꞌel taasi li, ye o da nyaŋe maꞌ dunia dim buudi wusa n ti paae yuma tusa laa. Ka yuma tusa la nyaꞌaŋ ba na idig o n ke ka o yi paalo saŋa biꞌela.
4 Ka m nye naꞌam gbana ka ba tis bane zinꞌi li zugin la paŋ ka ba na kat saria, ka lem nye nimbama siis, bane ka ba daa kuu ba, bam moon yelsida line ka Yesu paꞌal ne Winaꞌam pianꞌad la yela. Nimbama daa pu zunꞌod bunyua la ne o win laa, bee diꞌed o zanbina ba gbeꞌedin bee nuꞌusinee, ka yuꞌun vuꞌug na ka laꞌas ne Kiristo a naꞌanam yuma tusa la poogin.
5 Ka bane daa kpelim la pu vuꞌug naa, asee yuma tusa la ti gaad. Yiiga kumvuꞌugir nwa.
6 Bane paam yiiga kumvuꞌugir la na nye yelsum ka me a suꞌum nyain. Ka kuꞌum line paas ayi la ku nyaŋe baa, ka ba na a Winaꞌam ne Kiristo maalmaanib ka ba laꞌas ne Kiristo di naꞌam yuma tusa.
Ban nyaŋ Sutaana la yela
7 Ka yuma tusa la yaꞌa ti gaad, ba na bas Sutaana
8 ka o yi sarega ni n maꞌ dunia buudi wusa, bane be zinꞌis wusa dunia ni la, bane ka ba buoni ba ye Gog ne Magog la. Ka na laꞌase ba wusa keŋ zabirin ka ba zanꞌa laꞌas a bedego wuu titanbiꞌisug line dig moꞌar noorin ne.
9 Ka ba yi peꞌel teŋgbauŋin n keŋ gilig Winaꞌam nidibi laꞌase be zinꞌisiꞌa ne teŋ kane ka Winaꞌam noŋ la. Ka bugum yi arazana ni kena dii ba.
10 Ka maleknam nok Sutaana one maꞌad dunia nidib la n lob o bas bugum moꞌar line peꞌel ne bugum ne tan line nyelig n dit wuu bugum la ni, zinꞌikan ka ba deŋim lob bunyua ne ziri nodiꞌes la bas la. Ka anina ka ba na namis nintaŋ ne yuꞌuŋ, saŋa line kaꞌ benne.
Winaꞌam kad saria la yela
11 Ka m lem nye naꞌam gbauŋ piel titaꞌar ka soꞌ zinꞌi li zug. Ka teŋgbauŋ ne saŋgbauŋ zo melim o tuon, ka soꞌ ku lem nyee ba yaꞌasa.
12 Ka m nye bane kpi la, bane daa a tadimnam ne kpiꞌemnam, ka ba ziꞌe naꞌam gbauŋ la tuon. Ka soꞌ lakidi gbana, ka me lem lak gbauŋ siꞌa line a gbauŋ kane ka ba sob bane mor nyovurpaal yuda n niŋ la. Ka Winaꞌam kad bane kpi la saria ka li dolne ban daa niŋid siꞌem ka li sob gbana la ni la.
13 Ka ateuk bas bane daa kpi li puugin la. Ka Kuꞌum ne Kpiꞌim Teŋ la me bas nimbane daa kpi n bee ba ni la. Ka Winaꞌam kadi ba zanꞌa saria ka li dolne ban da niŋid siꞌem la.
14 Ka maleknam nok Kuꞌum ne Kpiꞌim Teŋ la n lobi bas moꞌar line peꞌel ne bugum la ni. Ka bugum moꞌar kaŋa ane kuꞌum ayi daan la.
15 Ka soꞌ yuꞌur yaꞌa daa pu sob nyovurpaal dim gbauŋin laa, ba na lobi ba bas bugum moꞌar la ni.