4
Ba n zunꞌod Winaꞌam arazana ni la yela
1 Neꞌeŋa ka m nye ka arazana kuluŋ yoꞌog. Ka kukor kane ka m deŋi wum la pianꞌadi tisid man, ka li vuud wenne naꞌatan. Ka li yeli m ye, “Dum kpela na, ka m na paꞌal uf dine na niŋ neꞌeŋa nyaꞌaŋ la.”
2 Ka yimmo ka Winaꞌam Siig Suŋ la more m, ka m nye ka naꞌam gbauŋ digi arazana ni ka soꞌ zinꞌi li zug.
3 Ka o nindaa nyeen wenne kugvenla line yuꞌuri buon yaspa ne kanelian. Ka saa dindeog buenn gilig naꞌam gbauŋ la, ka dindeog la boonsim a denꞌem.
4 Ka naꞌam gbana piisi ne anaasi gilig naꞌam gbauŋ la, ka kpeenmnam piisi ne anaasi ye fupiela ka pid salima zugpibis zinꞌi ba zutin.
5 Ka sayanꞌasug yit gbauŋ la ni na ne vuud ne satansug. Ka fitlanam ayopoi lamisid dit naꞌam gbauŋ la tuon. Bama a Winaꞌam siisa ayopoi la.
6 Ka siꞌel wenne moꞌar dig naꞌam gbauŋ la tuon wenne gotiŋ nie nyain ne.
Ka bunvoeya anaasi ziꞌe gilig naꞌam gbauŋ la, ka nini peꞌeli ba tuon ne nyaꞌaŋ.
7 Ka yiiga bunvor la wenne gbigim ne, ka one tiaꞌ la wenne naꞌaraug ne, ka one tiaꞌ atanꞌ la mor ninsaal nindaa. Ka bunvor one tiaꞌ anaasi la wenne silug titaꞌar n ianꞌad ne.
8 Ka bunvoeya la yinni wusa mor kpukpama ayuobu, ka nini peꞌeli ba poogin ne yiiŋ. Ka yuꞌuŋ ne nintaŋ ba pu basid yuumaa ka ye,
“Zugsob Winaꞌam one mor paŋ la a suꞌum nyain.
O a suꞌum.
O sid a suꞌum.
One a one da be,
ka nan be,
ka na ti be la.”
9 Ka bunvoeya anaasi la yaꞌa yiti zunꞌod ka naꞌasid one be saŋa dine kaꞌ benne ka zinꞌi naꞌam gbauŋ zug la ka puꞌus o bareka,
10 kpeenmnam piisi ne anaasi la iginidne one zinꞌi naꞌam gbauŋ zug la tuon ka zunꞌe one be saŋa dine kaꞌ ben la, ka pidigi ba zugpibis n digil one zinꞌi naꞌam gbauŋ zug la tuon n yet ye,
11 “Ti Zugsob Winaꞌam fune nar
ye fu diꞌe pipilim naꞌasi ne zunꞌor ne paŋ
bozugo fune maal siꞌel wusa,
ka fu boodim yela
ka fu maali ba ka ba be la.”