6
Tabilis la yela
1 Ka m nye ka Peꞌebil la yoꞌog tabilis ayopoi la yinni. Ka m wum ka bunvoeya anaasi la yinni yel ne kukor dine wenne satansug ne ye, “Kem na.”
2 Ka m gosi nye wedpiel. Ka one banꞌad o la mor tiraug. Ka ba tis o naꞌam zugpibig. Ka o yii a paŋ daan ye o zabi nyaŋ siꞌelnam wusa.
3 Ka Peꞌebil la yoꞌog tabilig kane peꞌes ayi la. Ka m wum ka bunvor one peꞌes ayi la yel ye, “Kem na.”
4 Ka wedzinꞌia me yi na. Ka ba tis one banꞌad o la paŋ ye o saꞌas zaba dunia ni ka nidib ku taaba. Ka o diꞌe suꞌug titaꞌar.
5 Ka Peꞌebil la yoꞌog tabilig kane peꞌes atanꞌ la. Ka m wum ka bunvor one peꞌes atanꞌ la yel ye, “Kem na”. Ka m gos ka wedsabilig be anina. Ka one banꞌad la mor line makid la o nuꞌugin.
6 Ka m wum line vuud wenne kukor line yi bunvoeya anaasi la soogin ye, ki ligidi zem nid daar yinni tuuma yood. Ka kizenꞌug butis bibis atanꞌ me a nid daar yinni tuuma yood. Amaa da saꞌami kpaam ne daam laa, ka ba ligidi zuꞌe ya.
7 Ka Peꞌebil la yoꞌog tabilig line peꞌes anaasi la, ka m wum ka bunvor one peꞌes anaasi la yel ye, “Kem na.”
8 Ka m nye ka wedpipelug be anina, ka one banꞌad o la yuꞌuri buon Akum, ka Hades, line a kpiꞌimnam teŋ la doli o nyaꞌaŋ. Ka ba tis Akum ne Kpiꞌim Teŋ dunia pudugir yinni pudugir anaasi la ni ye ba soꞌe, ka ba na ku ne suꞌuraug ne koꞌom ne wiim ne dunia bunyuos.
9 Ka on yoꞌog tabilig line peꞌes anu la, ka m nye bane ka ba kuu ba, ban moon Winaꞌam pianꞌad la ka yet Winaꞌam yelsida la zug, ka ba be maan maalug bimbim la teŋir,
10 ka tansid ye, “Zugsob titaꞌar, one a suꞌum ne sida, ye li na yuuge paae wala ka fu na kad nidib nwa saria ka namisi ba ka teki ba toba, ban kuud nidib la yela?”
11 Ka ba tisi ba wusa fupielis, ka yeli ba ye, “Vuꞌusumi biꞌela ka guri ya tumtumnib taaba bane a yadda niŋidib ka kpelim dunia ni la, ka ba ti kuu ba wenne ban ku yanam siꞌem la, ka ba kal ben ti paae.”
12 Ka m nye ka o yoꞌog tabilig dine peꞌes ayuobu la. Ka teŋ dam bedego, ka nintaŋ kilim lik bedego, ka nwadig la wusa lieb zenꞌugo wenne ziim ne.
13 Ka nwadibibis la yi saŋgbauŋ la ni li teŋin na wenne kekama ka sisiꞌem yiti nweꞌ ka kekaŋ la dam ka welkasa lut siꞌem la.
14 Ka saŋgbauŋ la melim wenne gbauŋ ka ba kpilim naae ne. Ka zueya ne teens bane ka kuꞌom gilig wusa enris.
15 Ka dunia naꞌanam ne nintitada ne sogia naꞌanam ne kpaꞌam dim ne paŋ dim ne soꞌ wusa, yamis ne bane kaꞌa yamise, ba wusa suaꞌ tampiins lema ni ne tampiins sianꞌasima zueya zut,
16 ka tans zueya la ne tampiins la yel ye, ba limi ba zutin suaꞌa ba, ye ka one zinꞌi naꞌam gbauŋ zug la ku nyee ba, ka Peꞌebil la me ku nyee ba ne o supeen la.
17 Ka Peꞌebil la ne one zinꞌi naꞌam gbauŋ zug la supeen dabistitaꞌar paa na, ka soꞌ soꞌ kaeꞌ na nyaŋe ziꞌe ne sukpiꞌeuŋ ba supeen la tuone.