8
Tabilig line peꞌes ayopoi la yela
1 Ka Peꞌebil la yoꞌog tabilig line peꞌes ayopoi la, vuud daa kaeꞌ arazana la nii saŋa biꞌela.
2 Ka m nye maleknam ayopoi bane ziꞌe Winaꞌam tuon la ka ba diꞌe naꞌatana ayopoi.
3 Ka malek soꞌ mor salima laa dine ka ba niŋid tudaare la, keŋ ziꞌe maan maalug zinꞌig la baba. Ka ba tis o tudaare bedego ye o peꞌesi li Winaꞌam nidib puꞌusugin n niŋ bimbim line ziꞌe naꞌam gbauŋ la tuon la tis Winaꞌam.
4 Ka tudaare dine ka ba nyuꞌe la nyoꞌos ne Winaꞌam nidib la puꞌusug yi malek one ziꞌe Winaꞌam tuon la nuꞌusin dut agol.
5 Ka malek la nok tudaare laa la muꞌe bugum bimbim la zug n peꞌel laa la n lobigi li dunia ni. Ka satansug ne vuud ne sayanꞌasug ne teŋdamug daa naam.
Naꞌatana la yela
6 Ka maleknam ayopoi bane mor naꞌatana ayopoi la tiꞌeb ye ba piebi ba.
7 Ka yiiga malek la piebi o naꞌatan. Ka sakuga ne bugum gendig ne ziim n kpaꞌadi lut dunia ni na. Ka bugum di dunia pudugir la yinni pudugir atanꞌ la ni, ka me di tiis pudugir la yinni, pudugir atanꞌ la ni, ka di momaꞌasa wusa.
8 Ka malek one peꞌes ayi la piebi o naꞌatan. Ka ba lob siꞌel ka lu wenne zuer titaꞌar lin ka bugum dit la, ka lu dunia kuꞌom wusa la ni. Ka kuꞌom la pudugir la yinni pudugir atanꞌ la ni kilim ziim.
9 Ka bunvoeya bane me be kuꞌomin la pudugir la yinni pudugir atanꞌ la ni kpi wusa. Ka aaruma la me pudugir la yinni pudugir atanꞌ la ni saꞌam wusa.
10 Ka malek one peꞌes atanꞌ la piebi o naꞌatan. Ka nwadibil titaꞌar diti wenne bugum ne yi saŋgbauŋin li moꞌa ne kuꞌobula pudugir yinni pudugir atanꞌ la ni.
11 Ka nwadibil la yuꞌuri buon Toog. Ka kuꞌom la pudugir yinni kilim toog. Ka nidib bedego nu kuꞌom la kpi, kuꞌom la daa a toog la zug.
12 Ka malek one peꞌes anaasi la piebi o naꞌatan. Ka winig la pudug zinꞌisa atanꞌ, ka nwadig la me pudug zinꞌisa atanꞌ, ka nwadibibis la me pudug zinꞌisa atanꞌ. Ka siꞌel nweꞌ ba pudugir yinni yinni, ka ba wusa pudugir yinni yinni la kilim lik. Ka nintaŋ line nie nyain la pudugir la yinni pudugir atanꞌ la ni kilim lik. Ka yuꞌuŋ pielim pudugir la yinni pudugir atanꞌ la ni me kilim lik.
13 Ka m gosi nye silug titaꞌar one ianꞌad agol lalle, ka wum ka o yet ne kukotitaꞌar ye, “Susaꞌaŋ be, susaꞌaŋ be. Maleknama atanꞌ bane kpelim la ye ba piebi ba naꞌatana la, ka ba kukuma yaꞌa ti kum, susaꞌaŋ na be tis bane wusa be dunia ni.”