Tjukurrpa Nyukurnitjanu
1
Nyukurnikapirri Palyarnu
1 14-15Nyukurnikaparri Mamalu-pulanya yalkiri kamu parna palyarnu.
2 Nyukurni katji parna wiya yuti ngarangu wurrakili. Tjitja kalyu tjarluminyirri parnangka kankarrawana ngarrirra parrayurrima. Munga tjarlulu tjutunma. Mamakurnu kurrurnpa kankarrawana kalyungka parrayurrima mayarnyuru.
3 Tjiitjanu Mamalu watjarnu, “Tilirriwa.” Mularrpalpi tilirringu.
4-5 Katji palurulu nyangu watjarnu, “Yuwayi, palyaminyirri ngarinpa.” Mamalu tili tjiitja yini yungu-ra “Karrpu.” Tjiitjanu partukanu-pulanya karrpu kamu munga partumparra ngarakuwa. Mamalu munga yini watjarnu “Munga.” Yulyultjarrarringu kamu karrpu kutjungkalpi wiyarringu.
6 Kalyulu parna tjuturnu kanyinma. Mamalu watjarnu, “Kurtungka yalkiri tjarlurri miku kalyu partungka-partungka ngarakuwa.” Mularrpakili ngarangu.
7 Kalyu kalkinpa pakarnu kankarra ngarama. Kamu kalyu kalkinpa parna kutjuwarrawana ngarrima. Mamalu watjarnu tjilanyatuka partumparra ngaramalpa.
8 Tjiitjanu yungu-ra yini “Yalkiri.” Yulyultjarrarringu kamu karrpu kutjarrangkalpi wiyarringu.
9 Mamalu watjarnu kalyu kaninytjarra yankuwa miku parna yutilpi ngaramalpa. Parna mularrpalpi yutirringu.
10 Kamu Mamalu yini yungu-ra “Parna.”Tjiitjanu Mamalu kalyuku yinilpi yungu-ra “Kalyu tjarluminyirri”. Palurulu parra nyangu ngurrkurringu.
11 Mamalu watjarnu mangkalpa kutjuwara lukararrakurlu pakalkuwa, kamu warta kalkinpa mangarrikurlu pakalkuwa.
12 Mularrpalpi pakarnu ngarama-ya. Mamalu parra nyangu ngurrkurringu watjarnu, “Palya.”
13 Yulyultjarrarringu kamu karrpu marnkurrtalpi wiyarringu.
14-15 Mamalu watjarnu tjirntu yakanpa kamu wilpa yutirrikuwa. Mularrpakili yutirringu ngarama-ya. Mamalu watjarnu tjirntu pakalku raayanku maa tjarrpaku mungarriku. Yakanpalpi mungangka raayanku maa tjarrpaku. Miku puntulu laltulu tjirntu yakanpa kamu wilpa nyangamalpa-ya. Tjiitjanu nintilu tjungarnilu watjanmalpa yaltapuru mayarnpuru yalipuru.
16-18 Mamalu-pulanya tili tjarlu kutjarra palyarnu, tjirntu kamu yakanpa. Wilpa lurrtju palyarnu wantingu. Tjirntu tjunu karrpungka raayanku maa tjarrpaku mungarrikulpi. Yakanpalpi tjunu mungangka raayanku. Mamalu parra nyangu watjarnu, “Yuwayi tjilanyartuka palya ngarinpa.”
19 Yulyultjarrarringu kamu karrpu muntungkalpi wiyarringu.
20 Mamalu watjarnu yawu kutjuwarra kalyungka yutirrikuwa miku-ya parra lalturrikuwa kalyungka. Tjiitjanu Mamalu watjarnu turru kutjuwarralpi yalkiringka yutirrikuwa parra paarrpakanmalpa-ya, tjarlu-tjarlu kamu tjukurn-tjukurnpa. Mularrpakili yutirringu yalkiriwana parra-ya paarrpakanma.
21 Tjilanyartuka yawu kutjuwarra tjarlu-tjarlu kamu tjukurn-tjukurnpa lurrtju palyarnu. Tjiitjanu turru kutjuwarra palyarnu yalkiriwana parra-ya paarrpakanmalpa. Tjiitjanu palurulu parra nyangu ngurrkurringu watjarnu, “Palyaminyirri.”
22 Tjiitjanu palurulu-tjananya yawuku kamu turruku wangka palyaminyirri watjarnu. Palurulu watjarnu-tjananya, “Wulu nyurra laltumanamalpa.” Mularrpakili-ya wulu maa lalturrima.
23 Yulyultjarrarringu karrpu rakangkalpi wiyarringu.
24-25 Mamalu watjarnu yanumalpa kutjuwarra parnangka-ya yutirrikuwa. Mularrpalpi yutilpi-ya ngarangu. Kalkinpa kuka, kalkinpa kuka wiya, kalkinpa parra-ya wayinma parnawana. Mamalu yanumalpa kutjuwarra palyarnu. Mularrpalpi palurulu parra nyangu watjarnu, “Palyaminyirri.”
26 Mamalu watjarnu, “Kuwarri ngayantula puntu palyalku ngayanyuru. Miku-tjananyaya kutjuwarra ngampurrtu kanyinmalpa, yawu turru kamu yanumalpa kutjuwarra kuka kamu kalkinpa-ya kuka wiya kamu parra wayinmalpa parnawana.”
27 Tjiitjanu Mamalu-pulanya yarnangu palyarnu puntu kamu tutju. Yuwayi mularrpakili palyarnu-pulanya paluruyuru.
28 Tjiitjanu palurulu-pulanya wangka palya watjarnu, “Nyuntu kutjarralu nyupararalu wulu-tjananyan tjitji maa laltumanamalpa ngawitji, kamu kumpurru nyinakuwa-ya parnangka. Miku-tjananyaya yawu, turru yanumalpa lurrtju ngampurrmanamalpa.”
29 Mama wangkangu, “Kulila, ngayulurna nyurrampa mangkalpa lurrkarrarakulu kutjuwarra warta kutjuwarra mangarrikulu tjunu miku nyurra ngalamalpa.
30 Kamu-rna mangkalpa kamu warta yukirikulu tjunu yanumalpa-ya kutjuwarralu kamu turrulu mangarri ngalamalpa.” Yuwayi nyamu. Mama wangkangu tjilanyartuka ngaramalpa.
31 Mamalu kutjuwarra parra nyangu watjarnulpi, “Yuwayi kutjuwarra palyatuka ngarinpa.” Yulyultjarrarringu kamu karrpu kalyungkalpi wiyarringu.