15
Payilitu Tjiitju Tjapinma
Matthew 27.1-2, 11-14, Luke 23.1-5, John 18.28-32
1 Raakarra yirna-yirna wamumpu-ya wangkama Tjiitju-ya Payilitkutu katikuwa. Palurunpa-ya turlku tjarlu-tjarlu laltu kamu nintipuka laltu kamu yirna-yirna laltu nyinama. Tjiitjanu Tjiitjuku-raya marumpu karrpirnu katingu Payilitku yungu-raya.
2 Payilitu tjapirnu, “Kulun nyuntu Tjarluminyirri Tjuwuku-tjanampa?”
Tjiitju wangkangu, “Nyuntunku ngaatja wangka.”
3 Yirnalu laltulu-ya Payilita tjakultjunama palurulu kutjuwarra ngawunma. Tjiitjulu-tjananya yakalu ngarala kulinma.
4 Payilitpa wangkangu, “Kulun wulu yaka ngaramalpa? Ngaatjanta-ya laltulu watjarnin nyuntulun kutjuwarra ngawunma.”
5 Tjiitju wulu yaka wangkaparni ngarama. Katji Payilitpa-ra karrartarringu wululpi kulinma.
Payilitu Tjiitju Yiyarnu Wartangka Mirri-ya Pungkuwa
Matthew 27.15-26, Luke 23.13-25, John 18.39-19.16
6 Year kutjupangka year kutjupangka Payilitu wulu watjanma puntu kutju pirtitjanu pakara yankuwa. Turlku tjarlungka wumurringama Payilitu-tjananya tjapinma, “Puntu ngana-rna watjalku pirtitjanu pakara yankuwa?”
7 Kurralkatjanu puntu yini Parapatja kamu puntu laltu-ya kapamanku-tjanampaya wirrilirringu. Kamu lanymarringulpi-ya puntu kutju mirri-ya pungu. Katji-tjananyaya pirtingka tjarrpatjunu lanymatjanu.
8-9 Puntu laltu-ya kutjungkarringu yanu Payilitpa-ya tjapirnu puntu kutju pakaltjunkuwa yiyalkuwa. Payilitu-tjananya tjapirnu, “Kulu ngaatja nyuntunku Tjuwuku Tjarluminyirri pakaltjunku-rnangkuya?”
10 Paluru-tjanampa nintikili nyinama turlku tjarlu-tjarlulu-ya matjulu Tjiitju nyalura katingu.
11 Turlku tjarlu-tjarlulu laltulu yarnangu-tjananyaya parra watjapungama Parapatja tjapilkuwa.
Laltulu-ya watjanma, “Parapatja pakaltjurra-lampatju.”
12 Payilitu-tjananya tjapirnu, “Nyaaltjinku-rna ngaatja nyuntunkurnu Tjarluminyirri?”
13 Katji-ya laltu paarlmanama watjanma-ya, “Tjurra-ya wartangka!”
14 Payilitu tjapirnu, “Nyaaltjirnu ngawu ngaalu?”
Wulu-ya paarlmanama, “Tjurra-ya wartangka!”
15 Payilitu Parapatja pakaltjunu yiyarnu. Kamu watjarnu-tjananya warrmarlalu Tjiitju-ya tjanawana wilypirnpungkuwa katiku wartangka tjunkuwa.
Warrmarlalu-ya Tjiitju Ngarlputjunama
Matthew 27.27-31, John 19.2-3
16 Tjiitjanu warrmarlalu laltulu Tjiitju manulpi-ya katingu tjarrpatjunu Payilitkurnu yaata kaninytjarra. Yarltingu-tjananyaya warrmarla kalkinpa yankuwa-ya.
17 Tjiitjanu tjarntu tjarlura-ya tjina-tjinayuru purplewanpa tjunu-luya Tjiitjungka. Tjiitjanu manulpi-ya tjilka-tjilka kamu karrpirnu mukartiyuru tjunu-luya Tjiitjukurnungka katangka.
18 Kamu warrmarla-ya laltuminyirri parra ngarama ngarlpulu paarlmanama, “Yuwa, Tjuwuku-tjanampan Tjarluminyirri.”
19 Tjiitjanulpi pungu-ya wartakululu katawana kamu tjalatjunama. Katji-ya ngarlpukarra-ya pupatima.
20 Katji-ya ngarlpurringu wiyarringu. Kamu tjarntu tjina-tjinayuru purplewanpa yurulypungu-luya. Kamu marlaku-luya tjarntu walytja tjunu. Tjiitjanu Tjiitju katingulpi-ya wartangkalpi tjunkuwa.
Tjiitju Wartangkalpi-ya Yutitjunu
Matthew 27.31-44, Luke 23.26-43, John 19.17-27
21 Puntu kutju katji yanama puutjatjanu. Palurukura yini Simonpa. Paluru ngurra kutjupatjanu yini Tjarinitjanu. Katja kutjarra kanyinma Alexander kamu Rufuspa. Warrmarlalu-ya muunpungu Simonpa warta-ra katikuwanpa.
22 Warinykatingu-ya ngurra yini Kalkatjakutu nganayi kata kitjikulu.
23 Warrmarlalu-raya wama mirritjinikulu Tjiitjuku purtu-raya yungama.
24 Katji-ya Tjiitju wartangkalpi kankarra yutitjunu. Tjiingkalpiya warrmarla laltu ngarlpurrima nganalu winimankuwa Tjiitjuku tjarntu kutjupa-kutjupa mankuwa-ya.
25 Tjirntungka-ya kankarrangkalpi Tjiitju-ya wartangkalpi yutitjunu.
26 Ngaatja-ya mirli-mirlingka wakarnu tjunu, “Tjuwuku-tjanampa Tjarluminyirri”. Tjiitjanu murrutjunu-luya palurungkalpi kankarra.
27 Warrmarlalu puntu ngawu kutjarra yitingka-pulanyaya Tjiitjungka tjunu.
28 Kurralkatjanu puntulu Mamaku tjukurrpa wakarnu tjunu. Wangka ngaatja, “Puntungka ngawungka mirrirringu.” Tjiitja yutirringulpi.
29 Yarnangu laltu-ya wayintara yanama. Nyangu-ya mantarrima watjanma, “Yuwayi. Nyuntulun watjanma churchpan Tjarlu punkatjunku kamu ngurra kutjarratjanulu walytjalulpi marlakun palyalkuwa.
30 Yuwayi, walytjalu kanalangku tjawutilpi wartatjanu.”
31 Turlku tjarlu-tjarlu laltu kamu nintipuka laltu-ya lurrtju mantarrima watjanma, “Ngaalu-tjananya yarnangu laltu kananma. Wiyangku walytjalulpi kananinpa.
32 Kulu palurukutju Mamalu yiyarnu Tjarlu-lampa ngayanku? Nyawa-la wartatjanu tjawutikuwa tjiitja-la nyaku kulilkulpi.” Puntu ngawu kutjarralu lurrtju-pula Tjiitjungka yitingka mantarrima kalkinyurulu watjanma.
Tjiitju Wartangka Mirrirringu
Matthew 27.45-56, Luke 23.44-49, John 19.28-30
33 Karrpungka ngurra laltuwana mungarringu ngarama. Yulyulytjarralpi tjirntu marlaku yutirringu.
34 Tjiitjanu Tjiitju paarlmanu watjarnu, “Yilayi, Yilayi lama tjapatjani?” Tjitja watjarnin, “Mama, Mama, nganatjanu-rnin ngayu wantitjunu?”
35 Puntu kalkinpa-ya parra ngarama kulirnulpi-ya paluru katji wangkama. Watjarnu-ya “Kulila. Yarltinpa-ra Elijaku.”
36 Puntu kutju taputjunu tjarntu lamparnpa manu kamu wamangka tupurltjunu. Kamu puntu palurulu warta lampantalu karrpirnu yititjunu-lu Tjiitjungka tjikilkuwa. Puntu palurulu watjarnu, “Yuwayi, wurra-lara kulyakanyilku katji Elija marlakurriku mankuwa wartatjanu walatjunkuwa.”
37 Tjiitju wituka paarlmanu kamu mirrirringulpi.
38 Tjiingka churchtja Tjarlungka tjarntu tjarlu kankarratjanulpi yankirryanu parnakutu.
39 Warrmarla tjarlulu kutjulu nyangu Tjiitju mirrirringulpi. Kamu wangkangulpi, “Puntu ngaatja mularrpa Mamakurnu katja.”
40 Tutjulu laltulu-ya tiwatjanulu nyangama. Tutju yini Mary Magdalan, kamu Tjalumi, kamu tutju kutjupa yini Mary, Jamesku marlatjanuku kamu Josephku-pulampa yipi.
41 Tutjulu tjiintu wulu Kalalitjanulu Tjiitju-ya parra wananma. Kamu wulu-ya mangarri parra kutjanma ngurra kutjupa ngurra kutjupangka. Kamu tutjulu-ya kalkintu Kalilitjanulu Tjiitju wanarnu. Tjiintu-ya Tjiitju wartangka tiwatjanulu nyangama.
Tjiitju Pirnkingka Mirrilpi-yaTjunu
Matthew 27.57-61, Luke 23.50-56, John 19.38-42
42 Tjiitju mirrirringulpi Rapungka. Karrpu tjiingkalpi tjamunpa-ya palyanma yungunpalpi-ya miirl-miirlpa tjarukupuru warakparni nyinamalpa.
43 Tjirntu tjarrpakitja puntu kutju warrinkatingu-lu Payilatkutu. Puntu yini Josephpa ngurra Arimatheatjanu. Puntu palyaminyirri councilpa nyinama. Palurulu wulu kulinma Mama-lampa yarnanguku kutjuwarraku tjarluminyirri wulu nyinamalpa. Josephtu marrkaluminyirri Payilatpa tjapirnu Tjiijuku mirri mankuwa katikuwa.
44 Payilatu purtu-ra kulinma tjiitjanta Tjiitju wala mirrirringu. Payilatu warrmarla kutju yarltingu tjapirnu, “Kulu mularrpa paluru mirri?”
45 Watjarnu, “Yuwayi.” Tjiitjanu Payilatu watjarnu Josephpa Tjiitju mirrilpi manku katikuwa.
46 Josephtu tjarntu manu katingu wartakutu. Manulpi mirri karrpirnu tjunu tjarntungka. Katingu tjarrpatjunu pirnkingka. Kurralkatjanu-ya pirnki tjiitja pamarrpa tjarlungka tjawarnu-ya wantitjunu. Josephtu pamarr tjarlu manu maa yurnturnu pirnki yangatjunu.
47
Tutju kutjarralu-pula Mary Magdalantu kamu Mary kutjupalu Josephkurnu yipilu nyangu-pula pirnkingka tjarrpatjunu.