Nan Umunaay Suyat Pablo Sasan iCorinto
Nan Mipangkop Sannaja Suyat
Sa'ad nan mi'aggwaay nangwhaatan Pablo san ummoyna nangipaakammugwan san Whayuway Chamag, nangkagka'ay ad Corinto gway Kapital nan Acaya. Sa'ad nan Corinto osaay cha'or ili gway sa'up nan Roma. Cha'or nannaja syudad gway ilin nan Griego. Kapu tan agwad san agwachan nan whaywhay, angsan ahos chanan mangamusanti namapur. Nanchinamag nan sachi syudad kapu san inawha'nangna ja na'aya'ayasi nan pammatin chanan umili ad aschi ja angsanay manggwas whayangna awhawhain ja ina'aisaw gway pijaon nan longag. Takangay machugwan tagwon nan iniingkagwan Pablo ad aschi gway nangipaakammu san Whayuway Chamag kun angsan chanan namati.
Lummaus kunan tuyu tagwon san iniingkagwan Pablo ad Efeso gway nangipaakammu san Whayuway Chamag, iningkaw nan inagwatna suyat gway nerpu san maayuayus gway namati ad Corinto. Iningkaw ahos nan chinamagna gway mipangkop san naniisi'an chanan namati ja uchum pay. Sija nan nanuyat as Pablo an chichaay namatid Corinto ad sachi nan Umuna Suyat Pablo sasan iCorinto. Sannaja suyat tinudtuchugwana chicha san mipangkop san naniisi'ancha ja san achicha kun nangaanan san osa huyunchaay na'assuy san wha'on kus asagwana. Sinungwhatana hos nan imuscha mipangkop san mangasawwan, nan oon nan nawhayu ja uchumay maid kun asagwacha ja san mipangkop san ma'an gway nichatun san sinang'apudyus. Iningkaw ahos nan ingwhakana an chicha mipangkop san maurnusancha nu mangkimungcha, nan na'aya'ayasi ayobhongan gway inatod nan Ispilitun Apudyus ja san ustuway ausayancha ancha nan mipangkop san matakuwan nan natoy. Ingwhakan Pablo an chicha nannachaja tot maagwatanchaay ustu nan maserpuway ooncha.
Chanan Hu'yona
Nan Manjamanan Pablo An Apudyus 1:1-9
Wha'on Kus Naurnus Chanan Namati Ad Corinto 1:10-17
As Kristu Nan Ayobhongan Ja Laing Apudyus 1:10-31
Nan Mipangkop San Inalaing Apudyus 2:1-16
Chanan Mansilsilwhi Ja Apostoles Apudyus 3:1–4:21
Nan Lagwingay Ma'ma'gwa Sasan Maayuayus Gway Namati 5:1-13
Nan Mangichayuman Nan Namati San Sunudna San Pammati 6:1-11
Nan Ustuway Mangusayan San Longag As Michajagwan Apudyus 6:12-20
Nan Mipangkop San Mangasawwan Ja Achi Mangasawwan Nan Taku 7:1-40
Nan Mipangkop San Ma'an Gway Nichatun San Sinang'apudyus 8:1–11:1
Nan Ustuway Oon Chanan Huwhai Manchajaw An Apudyus 11:2-16
Nan Ustuway Oon San Manomsom'an San Natojan Apu Hesus 11:17-34
Nan Mipangkop Sasan Ayobhonganay Atchon Nan Ispilitun Apudyus 12:1–14:40
Nan Natakuwan Hesus Ja Nan Matakuwan Chanan Natoy 15:1-58
Nan Tuyung Chanan iCorinto Sasan Namatid Jerusalem 16:1-4
Nan Pangkop Pablo 16:5-9
Nan Pungpung Nan Suyat Pablo 16:10-24
1
Nan Manjamanan Pablo An Apudyus
1 As Pablo na nannaja nanuyat gway chinutu'an Kristu Hesus as apostolna kapu tan sija nan whinayun Apudyus. Huyun'u hos ad asna as Sostenes gway osaay sunud ta'u namati.
2 Annaja nan suyatmi an cha'ajuway maayuayus gway namati an Apudyus ad Corinto gway init'on Apudyus as takuna kapu san na'aosossaanju an Kristu Hesus. Pinilin Apudyus cha'aju as takuna pati chanan losanay manchaychajaw an Apu Hesu Kristu gway agwad san losanay ili. Sija nan Apucha ja Apu ta'u.
3 Ilugwayu' gway ipailan Apudyus gway Ama ta'u ja as Apu Hesu Kristu nan inawhayucha ja pawhayugwoncha nan whijagju.
4 Patinajunay manjamana' an Apudyus'u san mipangkop an cha'aju kapu san inawhayun Apudyus gway impailana an cha'aju kapu san na'aosossaanju an Kristu Hesus.
5 Tan kapu san na'aosossaanju an sija inatchan cha'ajus amod man'awhawhayu ayobhongan gway mansilwhi an sija isun nan laingjuway kuminga ja ayobhonganjuway ma'aagwat san atuttugwaan gway nerpu an sija.
6 Sa'ad nan atuttugwaan gway impaakammumi an cha'aju gway mipangkop an Kristu mama''ila san whijagju.
7 Sija nan achi aju kun nan'uyang san ayobhongan gway inatod nan Ispilitun Apudyus an cha'aju san manguullajanju san managkulinan Apu ta'uway Hesu Kristu.
8 Sija ahos nan mangipapigsa san pammatiju ingkana san anungus nan erkaw tot maid ma'gwaniyanju san erkaw gway managkulinan Apu ta'uway Hesu Kristu.
9 Napudnu as Apudyus gway sija nan namili an cha'aju as ma'aosossaan san Ana'na gway Hesu Kristu gway Apu ta'u.
Wha'on Kus Naurnus Chanan Namati Ad Corinto
10 Susunud san pammati, kapu san ayobhongan gway inatod Apu ta'uway Hesu Kristu an sa'on, anna amma' iwhaka san sana an cha'aju gway maninnayaan aju losan ta achi aju masississiyan ad nanosossaan aju san somsomo' ja pangkop.
11 Tan impaakammun chanan uchumay wherjan Cloe an sa'on nan mipangkop an cha'ajuway susunud gway agwad chanan maniisi' an cha'aju.
12 Iwhaka' nannaja tan anan nan uchum an cha'ajuwon, “As Pablo nan mitunucha'” ja anan anu nan uchumon “As Apolos nan mitunucha'.” Anan anu hos nan uchumon, “As Pedro nan mitunucha'” ja anan nan uchumon, “As Kristu nan mitunucha'.”
13 Jo'o nakogkoggwa as Kristu ta. Jo'o nilansaa' san krus kapu an cha'aju. Jo'o nahonjakan aju as pasuyut'u.
14 Manjamana' an Apudyus tan maid kun whinonjaka' an cha'aju, ahus cha Crispo an Gayo
15 tot maid osas manggwanaon nahonjakan aju as pasuyut'u.
16 Ay oon uwa, whinonjaka' hos cha Estefanus gway singwherjan. Maid kun somsom'o' as uchum as whinonjaka'.
17 Tan wha'on kus sija nangiwhaunan Kristu an sa'on nan manghonjaka' gwon ingwhauna' ta ipaakammu' nan Whayuway Chamag. Wha'on kus usayo' nan apapat sikun san inalaing nan taku tot achi ma'aan nan ayobhongan nan natojan Kristu san krus.
As Kristu Nan Ayobhongan Ja Laing Apudyus
18 Nan sussuyuway mipangkop san natojan Kristu san krus, maid kun silwhina sasan takuway misiyan an Apudyus as ingkaingkana. Gwon an chita'uway tinakuna, sijana nan maillan nan ayobhongan Apudyus.
19 Tan nilista san Ukud Apudyus gway anana, “Tangkaa' nan laing chanan nalalaing ja oo' as maid kun kutu'na nan inalaingcha.”
20 Maid kun kutu' nan laing chanan nalalaing, chanan mangaagkammu san lintog ja chanan takud asna luta gway nalalaingay ma'asinnungwhat. Nan inatuttugwaana inggwan Apudyus as maid kun kutu' nan laing chanan taku san luhung.
21 Tan kapu san inalaing Apudyus, simsimmo'na gway achin ku chanan taku maakammugwan as sija kapu san ugwachaay laing. Tan nan pangkop Apudyus takuwona chanan mamati an Kristu kapu san sussuyumi gway iwhilang chanan achi kun mamati as katkatung.
22 Tan sa'ad chanan Hudyu sija whayugwoncha ilan chanan mangimatunanay mataakan ja sa'ad chanan Griego sija anaponcha nan laing.
23 Gwon sa'ad as cha'ami, ipaakammumi as Kristu gway nilansa san krus gway lalawwingon chanan Hudyu as chongyon ja maid kun kutu'na sasan wha'on kus Hudyu.
24 Gwon sa'ad chanan pinilin Apudyus as mantakuna gway Hudyu gwinnu chanan wha'on kus Hudyu, as Kristu nan maillan nan ayobhongan ja laing Apudyus.
25 Kapu tan sa'ad chanan inggwan Apudyus gway anan chanan takuwon maid patogna, napatpatog nu san inalaingcha. Ad sa'ad nan ananchaon ina'apsut Apudyus, napigpigsa nu san pigsan chanan taku.
26 Susunud, somsom'onju nan asasaadju san namiliyan Apudyus an cha'aju. Wha'on kus angsan an cha'aju nan nalaing san mangilan chanan taku. Wha'on kus angsan an cha'aju nan nangatu nan saadna ja wha'on kus angsan an cha'aju nan nerpu san wha'nangay wherjan.
27 Gwon pinilin Apudyus chanan iwhilang chanan taku as maid kun silwhina tot iwhawhainna chanan nalaing gway taku. Ad pinilina hos chanan nawhawha nan saadna taku tot iwhawhainna chanan nangatu saadna.
28 Ja pinilin Apudyus chanan wha'on kus mawhigwhig nan nerpugwancha ja chanan mawhanwhanitay taku tot oona as maid kun kutu'na nan iwhilang chanan taku as napatog.
29 Sijana nan inggwan Apudyus ta maid osas pumangas san sanguna.
30 Tan kapu an Apudyus na'aosossaan aju an Kristu Hesus kun nangngachanonas Kristu as merpugwan nan laing ta'u. Kapu an Kristu niwhilang ta'u as ustu san mangilan Apudyus ja niit'on ta'u as takun Apudyus ancha nagwajagwajaan ta'u san chusan nan hummasuyan ta'u.
31 Sija nan, anana san nilista gway Ukud Apudyus, “Nu agwad mamayuway mampangas, maserpu sija ipangasna nan inggwan Apu.”