Nan Suyat Pablo An Filemon
Nan Mipangkop Sannaja Suyat
Sa'ad as Filemon osa wha'nang gway taku ad Colosas gway namati an Apu Hesus. Iningkaw nan mudchachuna gway mangngachan Onesimo gway ummagwid kun ummoy as sija ad Roma gway aschi nan niwhawhalluchan Pablo. Sa'ad san iningkagwan Onesimo ad aschi, namatis sija kapu tan insuyun Pablo nan ukud Apudyus an sija. Whayugwon otjan Pablo gway ingkaw as Onesimo an sija tot humachang an sija gwon achina kun ipatut nu achin Filemon itachun. Kun simsimmo' Pablo gway ipagkulin as Onesimo an Filemon. Sija nan nampa'pa''aasis Pablo an Filemon san suyatna gway ligwatana nan whersun Onesimo. Impa'pa''aasin ahos Pablo an Filemon gway achina iwhilang as Onesimo as mudchachu ekay gwon iwhilangnas Onesimo as osaay sunudna kapu tan namati hos an Apu Hesus.
Chanan Hu'yona
Nan Lugyukin Nan Suyat 1-3
Nan Nanjamanan Pablo Kapu An Filemon 4-7
Nan Pa'pa''aasin Pablo An Filemon Mipangkop An Onesimo 8-22
Nan Pungpung Nan Suyat 23-25
1
1 As Pablo nannaja nanuyat gway annaay niwhawhayud kapu san mangisuyuwa' san pammati' an Kristu Hesus ja nampaitapi ahos nampaisuyat as Timoteo gway sunud ta'u san pammati.
Annaja nan suyat'u an si'a Filemon gway napatokay huyunmi san terwhasu an Apudyus.
2 Insuyat'u hos nannaja an Apiya gway sunud ta'u san pammati ja an Erkipus gway huyun ta'u san terwhasu an Apudyus ja sasan maayuayus gway namati a' ugwaju.
3 Ilugwayu' gway ipailan Apudyus gway Ama ta'u ja as Apu Hesu Kristu an cha'aju nan inawhayucha ja pawhayugwoncha nan whijagju.
Nan Nanjamanan Pablo Kapu An Filemon
4 Sa'ad san gwaschi mangilugwayuwa' an si'a, patinajuna'ay manjaman an Apudyus gway chaychajagwo'
5 tan chongyochongyo' nan pammatim an Apu ta'uway Hesus ja nan lajadnu san losanay namati.
6 Ilugwayu' gway sa'ad nan nitapijam san pammatim san uchumay namati sachi nan manka san mangagwatan san losanay whayuway naatod an chita'u kapu san pammati ta'u an Kristu.
7 Ad kapu ahos san lajadnu sasan namati, mallaylajacha' ekay ja impawhayum ekay somsomo''u. Tan nan lajadnu sachi nan nampayagsa' sasan namati, sunuchay Filemon.
Nan Pa'pa''aasin Pablo An Filemon Mipangkop An Onesimo
8 As osa sunudnu san pammati an Kristu achiya' kun sumingon gway mangipuyung an si'a san maserpuway oom.
9 Gwon kapu san lajad anna mampa'pa''aasiya' ekay an si'a tan sa'on as Pablo gway mansasa'usa' an Kristu sasan taku ja san sana nawhayucha' ahos kapu san pammati' an Kristu Hesus.
10 Mampa'pa''aasiya' an si'a mipangkop an Onesimo gway nangngachan ana''u san pammati an Hesu Kristu. Sa'ad sanna niwhawhallucha' nangngachana' amana kapu san pammati an Hesu Kristu.
11 Maid kun kutu' Onesimo an si'a san nugwan gwon san sana mikutu' chadlu an chita.
12 Ipagkulin'u an si'a as sija gway napatog as amod an sa'on.
13 Whayugwo' otjanay iingkaw as sija an sa'on ad asna ta sija nan misu'at an si'a gway humachang an sa'on sannaay niwhawhallucha' kapu san nangisuyuwa' san Whayuway Chamag mipangkop an Hesus.
14 Gwon wha'on kus whayugwo'ay iingkaw as sija an sa'on nu achim ijuja. Lagwingo'ay mapatut'a gway mangijuja gwon ijujam tan sija nan whayugwom.
15 Sija nin nan aysanana an si'a as sina'itan ta managkulin ad inchakasna an si'a.
16 Wha'on kus sissijaay mudchachu ekay as sija gwon ununnayna san mudchachu tan sa'ad san sana nangngachan napatokay sunudnu. Napatog as sija an sa'on gwon amamod an si'a wha'on kus ahus ekay kapu san inatatakunaay mudchachu tan san sana sunudnu as sija san pammati.
17 Sija nan nu iwhilanga' as huyunnuway mansilwhi an Apudyus agkulinom as Onesimo an si'a as isun nan mangagwatnu an sa'on.
18 Nu agwad lagwa na'awhasuyana an si'a gwinnu utangna an si'a, sa'on nan nangamung.
19 As sa'onay Pablo mismu nan nanuyat sannaja. Sa'on nan mamajad san ngachan ninatay utangna. Wha'on kun nin as maserpu ipasmo''u an si'a gway kapu an sa'on naatod an si'a nan whijag gway maid kun pungpungna.
20 Sunud, sija nan patkam otjan nannaja ochaw'u kapu an Apudyus. As osa sunudnu san pammati an Kristu akagnuud pajapagwon nan somsomo''u.
21 Insuyat'u nannaja an si'a tan aagkammu'ay chuchumngor'a ja akammu'ay oom nan amamod pay sannaja ingwhaka' an si'a mipangkop an Onesimo.
22 Ad nan osa ahos isakanam nan ingkagwa' tan namnamao'ay chongyon Apudyus nan lugwayuju ad nanagkulinona' an cha'aju.
Nan Pungpung Nan Suyat
23 Anan ahos Epapfras gway isu'ay nawhayud kapu san pammatina an Kristu Hesus ininon nan whijagnu.
24 Amasna ahos nan anan cha Mer'us, Aristercos, Demas ja Lukas gway huhuyun'u mansilwhi an Apudyus.
25 Ipailan Apu Hesu Kristu nan inawhayuna an cha'aju.