18
Natangkaan Nan Iliyay Babilonia
Nappung kunan sachi, inila' nan sawhali anghel gway chumo'cho''oyaay nerpud langit gway anna nan amochay ayobhongana kun nalinangan nan luta san inachajawna. Kun nampo'aw as towhag gway manggwana,
“Natangkaan, natangkaan nan apigsaan gway Babilonia!
Kun nangngachan iingkagwan chanan chimunju
ja mantatalluwan nan gwaschi ayasin nan aisaw ja lagwingay mammanu'.
Na'gwa nannaja tan sa'ad chanan takud Babilonia isun chi impainumcha san losanay taku nan isun chi mampaitay whajascha
gway sachi nan mijalikan nan nangagwisancha sasan atakutakuway sumuyut san lagwingay o'ooncha.
Sa'ad chanan ali san luta nitapicha an chicha nanggwa
san whayangna awhawhain ja ina'aisaw gway pijaon nan longag,
ja humma'nang chanan mangamusanti kapu san amochay mamayucha san lagwingay kankanas nan whijag.”
Gwot chingngor' nan sawhali kinga gway nerpud langit gway ananaon,
“Cha'ajuway taku' lumajaw aju san sanatay ili
tot achi aju mitapi san whersucha
ta achi aju milamuyam san amochay likat gway maatod an chicha.
Tan ummamaamod nan whersucha gway isun chi nasonsosonson kun chummakus ad langit
ad sosom'on Apudyus nan wha'on kus ustu o'ooncha.
Oonju an chicha nan isun chay inggwa'inggwacha sasan taku,
ja mamidgwaonju whayusan nan lagwingay inggwacha sasan taku.
Isiitju nan whajas san tasacha gway mamiggwa nan pigsana
nu san inatodcha san uchumay pinainumancha.
Nu ngachan nan ininoncha nangipangas san longagcha ja nawhijag as lamay as amod,
sachi nan topong nan atchonju palikat ja sasanga an chicha.
Tan anancha san somsomo'cha,
‘Mantutuyay amiyay amas reyna.
Wha'on kus isumi chi nawhayu
ja achi ami kun puyus mansasanga.’
Sija nan san osa erkaw mangkikisan nan humu'nag an chicha
gway amochay likat gway otoy, sasanga, uyat
ja maskob nan ilicha kapu tan amod napigsa
as Apu gway Apudyus gway sija nan mangu'um an chicha.”
Ad sa'ad chanan ali san luta gway nitapi sasay manggwamanggwa san whayangna awhawhain ja ina'aisaw gway pijaon nan longag ja nawhijagcha as lamay as amod, maniwhilcha ja mansayotcha nu ilancha nan asu' gway merpu san ilichaay masmaskob. 10 Sumisi'adcha san achaju kapu san ogjatcha san amochay palikat nan sachi ili gway ananchaon,
“Ina'ay! A'oogjat eka' amod nan na'gwa
san apigsaanay ili gway Babilonia
kapu tan nau'um san osa eka uyas!”
11 Ad sa'ad chanan mangamusanti ad asna luta, iwhilancha ja isasangaancha nan sachi ili tan maid kun malla'u san la'ya'ucha. 12 Maid kun malla'u san huyagwancha, wha'yaw, man'apapatokay whatu, perlas, puta'ay luput gway nagwa san lino, malluyom nan chayagna luput, mallammu'uy gway luput ja chata' nan chayagna luput. Maid kun malla'u san losanay ayasin nan mangwhangu aju gway ila'ucha ja chanan whayangnaay na'gwa san saung nan elepante, whayangnaay na'gwa san aju, hulinsi, aka ja whatuway marbel. 13 Maid kun malla'u san losanay ayasin nan mampapija san ma'an, nangina whangwhangyu ja lana gway isun nan sinamon, mirra, insenso ja purpus gway ma'gwaniyon frankincense. Maid kuhos malla'u san whajas, lanan nan olibu, alina, kerkergwit, wha'a, kernero, awhaju, lukanay awhaju nan mangkud ja uyay pay chanan ila'uchaay mudchachu ja uchumay taku.
14 Anan chachay malla'ya'u san sachi ili,
“Losanay whayu gway whayugwomay man'ugwa mumaid.
Losanay inayamay nan whijag ja losanay mailam gway a'erjad mumaidcha an cha'aju
ad achim pun chicha ayan agkulinon!”
15 Sa'ad chachay malla'ya'u san a'ammaschi gway humma'nang san sachi ili, sumisi'adcha san achaju kapu san ogjatcha san amochay palikat nan sachi ili. Maniwhilcha ja mansasangacha 16 gway manggwana,
“Ina'ay! A'oogjat eka' amod nan na'gwa san apigsaanay ili gway agwachan chanan taku
nansisillup san puta'ay luput gway nagwa san lino, malluyom nan chayagna
ja chata' nan chayagna luput ancha natamotamojan nan longagcha san huyagwan, man'apapatog gway whatu ja perlas.
17 San osa ekay gway uyas natangkaan chanan amochay whina'nangcha.”
Ad nan losanay apitan nan papur, losanay namapur taku ja chanan manterterwhasu san papur ancha losanay merpu san whaywhay nan iwhijagcha, iingkawcha san achajuway summisi'ad 18 kun maniwhiiwhilcha gway mangiila san asu' gway merpu san ilichaay masmaskob gway manggwana, “Maid kun isun nan sanatay apigsaan gway ili!” 19 Kun chinapuyancha nan wha''agcha kun nampa'uycha, maniwhiiwhilcha ja mansasangacha gway manggwana,
“Ina'ay! A'oogjat eka' amod nan na'gwa san apigsaanay ili.
Humma'nang nan losanay agwad nan papurcha san whina'nangcha
gwon san osa ekay gway uyas natangkaan nan sachiyay ili!”
20 Mallagsa' ajuway agwad ad langit,
chanan takun Apudyus, chanan apostoles ja chanan profeta
tan inu'um Apudyus chanan taku san sachi ili kapu san inggwacha an cha'aju!
21 Awni kun nangaya nan osa napigsaay anghel san whatuway isun nan acha'orn nan kikillinganay whatu kun intoperna san whaywhay gway manggwana,
“Amasna nan manangkaan Apudyus san Babilonia gway apigsaanay ili
ad maid kun maillana asin.
22 Ad maid kun magngor san sanatay ili as tu'ern chanan mantutu'er san arpa,
antan chanan man'a'anta, manutungali ja manatangkujub.
Ad nan losanay mangakammuway manggwa san whayangna terwhasu
maid kun ma'chasan san sanatay ili
ja maid kunon magngor as kingan nan kilingan.
23 Ad nan silaw achi kun asin mansilaw san sanatay ili
ja maid kun magngor as nayagsa' as kingan nan mamyay.
Ma'gwa nannaja kapu tan sa'ad chanan mangamusanti san sachiyay ili chicha nan apatokan san luhung,
inallilawcha nan ailiili kapu san sayumang'an chanan taku san sachiyay ili.”
24 Nachusa nan sachiyay ili tan aschi nan nangtojancha sasan profeta
ja chanan takun Apudyus ancha losanay taku san luta gway napatoy.