Tɩa -sɛbhɛ Pɔlʋ 'paa Timotee yoo
'Sɛbhɛ *Pɔlʋ 'paa ɔ 'tale Timotee yoo, mʋ -wa. Timotee mɩa, nyimeslɔyu, -ɔ -saa Pɔlʋ 'wʋ ɔ lubho -nʋda, mɔ -wa. Sa -Lagɔnyɩmaa 'Yugalɩnyɔ 'kaa -mɩ tɩklɩɩ, 'mʋ Pɔlʋ cɛlɩa Timotee 'wʋ.
1
Fʋsawɛlɩ
1 -Amɩ *Pɔlʋ cɛlɩa 'sɛbhɛ nɩ. -Zezu *Klisɩɩ *tietienyɔ ɩn -mɩa. Nɩɩ, -Lagɔ -ɔ -saa -aɩn gbʋ 'wʋ, ɔ -yɔ -Zezu Klisɩ -a mɩa wʋda, ma -zɛlɩa 'mɩ wa tietienyɔ.
2 -Mɩ Timotee na cɛlɩa 'wʋ. -Amɩaa -Lagɔ dlɩgʋzʋzʋe 'wʋ, -mɩ -wa na 'yuu 'zayli.
Nɩɩ, -amɩaa Dide -Lagɔ -yɔ -amɩaa -Kanyɔ -Zezu Klisɩ ŋwna -mɩ 'nyu la, wa 'yɩlɩ -mɩ nyazɩ, 'ɩn wa 'nyɛ -mɩ 'wʋtʋtʋe -dlɔɔ.
3 Da ɩn mɩa Masedʋanɩ mnɩda, ɩn nɛɛ -mɩ -yla: «-Ɩn -tʋ Efɛzɩ, -ɩn -tʋ -bha.» Nyɩma -wa mɩa yoyogbʋ -sloluda, -ɩn -kʋlʋ wa yoo.
4 -Ɩn 'tʋlʋ wa, wa 'sasʋkpa -ninenya nɩ -yɔ wa dʋkpasɩɩ zɛlɩzɛlɩe -we 'nɩa bhloluda -ka, wa 'bhʋ we 'bɩ. Wee gbʋnya mɩa dɛ nɩ, -zlɛ we laa, 'ɩn we'e kwaa -aɩn 'yloogblʋ we 'wʋ wa nɔa -Zezu 'bɩ dlɩzʋzʋe nya.
5 -We ka 'gbʋ ɩn yia gbʋ nɩ gba, mʋ -wa nɩɩ, wa 'ka zɛkɩkalɩ. Nyɩma 'ka wa -limaa zɛkalɩ, wa -ka dlɩ -zɔnʋ, wa nʋ gbʋzɔnʋʋ 'dɛkpʋa lɛ, 'ɩn wa zʋ -Lagɔ dlɩ -gʋ dlɩ weee nya.
6 Nyɩma tɔlʋa ka wee 'yloogblʋ labhʋlʋ. Wa'a nʋ -slɛɛn gbʋzɔnʋ lɛ, -zlɛ -klo -kpʋa wa saa.
7 Wa 'yɩbha wa 'ka -Lagɔɔ tite -slolunya -zɛ. Nɩɩ, gbʋ wa slolua, wa 'nɩ we -yi, 'ɩn wɛlɩ -we wa mɩa gbada 'tɩtɛ nya, wa 'dɛ'ɛ 'nʋ we 'wʋla.
8 -A -yi we 'ji nɩɩ, -Lagɔɔ tite nanɩ 'yli. -Ɩn -ka we 'yliyɔzʋ sa we mɩa cɛlɩda, 'ɩn we nanɩa 'yli.
9 -A 'nʋ we 'wʋla nɩɩ, -Lagɔ 'nɩ ɔ tite palɩ nyɩma tɩklɩɩɩ 'gbʋ. Nɩɩ, nʋkplɛ 'ylinyunonyaa 'gbʋ ɔ yia we palɩ. -Wa nʋa 'ylinyuno gbʋ lɛ, ma -wa. -Wa sɔlʋa -Lagɔ -yɔ 'wʋ, -wa'a zʋa -Lagɔ 'nʋŋwɛ, -wa nʋa gbʋnyuu lɛ, -wa 'nɩa -mɩ tɩklɩɩ -Lagɔ 'yu, -wa nyanɩa -Lagɔgbʋ, -wa bhaa we 'nɩ wa dide -zɛ wa 'nyaa, -wa bhaa nyɩma, ma -wa.
10 Nɩɩ, -wa kaa mʋtnɩ kwɛ, nʋkpasia -wa -yɔ nʋkpasia dɩa -budu 'wʋ, -wa paa galɩ pɛlʋ, -wa tʋbhʋa yo we -yɔ -wa'a gba gbʋzɔnʋ gbʋwʋbhunya 'yu. -Lagɔ palɩ 'yaa ɔ tite, gbʋnyuu pnɩɩɩ 'gbʋ, nɩɩ, mʋ nyumoa gbʋ -slolue tɩklɩɩ.
11 Wee -slolue mɩa, we mɩ -Lagɔgbʋ -we -Lagɔ tɩa 'mɩ -yɔ lubho nya, we mɩ we glaa. Nɩɩ, mʋ gbaa 'wʋtʋtʋe -dlɔɔ -Lagɔɔ 'ŋnɩylilo gbʋ.
Pɔlʋ paa -Lagɔ fuo ɔ nyazɩdlɩɩ 'gbʋ
12 -Amɩaa -Kanyɔ -Zezu Klisɩ na paa fuo. Mɔ 'nyɛa 'mɩ 'tɩtɛ, ɩn 'ka ɔ lubho nʋ. Mɔ 'yɩa 'mɩ nyɩmɛ -ɔ kaa we 'klʋ, ɩn 'ka ɔ lubho nʋ nya.
13 -Amɩ, -ɔ gba bhaa ɔ daa gbʋnyuu, -amɩ, -ɔ 'palɩ bhaa ɔ 'klɩyɩe 'wʋ, -amɩ, -ɔ vɛlɩ bhaa ɔ, nɩɩ, ɔ ka 'mɩ nyazɩ 'yɩlɩ. -We ka gbʋ -wa, -we na nʋ bhaa lɛ, ɩn 'nɩ we -yi. Ɩn 'nɩ ɔ dlɩ -gʋ zʋʋ 'gbʋ.
14 -Amɩaa -Kanyɔ ka 'mɩ 'nanɩ 'wluo nʋ, 'ɩn dlɩzʋzʋe -yɔ zɛkalɩe -we -a gbɔlʋa 'wʋ -Zezu 'wʋ, ɔ yia 'mɩ -mʋʋ 'nyɛ.
15 Nɩɩ, wɛlɩ -zɔnʋ -we nyɩma weee 'kaa -yɔŋwnu, mʋ -wa nɩɩ, -Zezu Klisɩ yia dʋdʋ -gʋ, ɔ 'ka gbʋnyuu -lɛnʋnya gbʋ 'wʋsa, -amɩ -wa gbʋnyuu -lɛnʋnyaa -kanyɔ.
16 Nɩɩ, -Lagɔ ka 'mɩ nyazɩ 'yɩlɩ. -We ka 'gbʋ ɔ yia -amɩ gbʋnyuu -lɛnʋnyaa -kanyɔ nyazɩ 'yɩlɩ, mʋ -wa nɩɩ, -Zezu Klisɩ 'ka ɔ dlɩtie weee -slolu nyɩma -yla. 'Ɩn sa -wa yia -Zezu dlɩ -gʋ zʋa, 'ɩn wa 'ka 'yliyɔgagɩe 'yɩ, -amɩ 'ka wa 'yli -slolunyɔ -zɛ.
17 Nyɩmaa 'wlulapɩlɩnyɔ -ɔ ka nyɩmaa 'wlulapɩlɩe 'nɩa bhloluda -ka, -ɔ 'na 'kaa tlɩ, -ɔ wa'a 'yɩa -yɔ, mɔ -wa -Lagɔ -bhlogbɔɔ. 'Ŋnɩmnɩe -yɔ -bhazʋzʋe -mɩ ɔ -nʋ nya 'ylɩ weee nya! *-Amɛnɩ!
18 Na 'yu Timotee, 'dɩ na yia -mɩ zʋa, we -yɔ wɛlɩ -we -Lagɔ 'nyɛ bhaa ɔ gbʋʋ -falɩpanya, we 'dɛ 'sɔ -bhlo. -Ɩn kpa wee wɛlɩ la -kli, 'ɩn -ɩn 'ka -gɔlʋ -zɔnʋ gʋ.
19 Zʋ -Lagɔ dlɩ -gʋ, -ɩn 'na nʋnʋ zʋbhalɩ gbʋ lɛ -nɩ. Tɔlʋa ka wee 'yoo -zɔnʋ -gʋ labhʋlʋ, 'ɩn wa yia dlɩ -Lagɔ -gʋsa, 'ɩn wa dlɩzʋzʋe yia wa 'wʋ -nyumɔ.
20 Imenee -yɔ Alɛzandlɩ mɩ wa glaa. 'Ma ɩn tɩlɩa *-Saatan, 'ɩn wa 'ka we 'wʋla 'nʋ nɩɩ, wa'a vɛlɩ -Lagɔ.