Hebreo
Hebrews
Tè̤hébè Ré̤ Dố Nyě
Li Hebreo yětôba ma ǔ rǎcuố pé̤ Krístuphú dố a myáhtye sítôbè ná tè̤me̤cyě̤me̤cṳ̂ èthǐ cyě̤hyǎ ná cyě̤hyǎ rò tuố̤ cò́ dố a kíré̤ vǐkyǎ kyǎ cò́ èthǐ atè̤zṳ̂́tè̤nyá̤ tahe a o. Dố a dyéluô̌ hò́ ná Byacè Jesǔ Krístu yěnuôma Cò́marya nò̌hyǎ oluô̌htya no má̤lakǒ lố lǔ tôprè̤ hò́ akhu-akhyě, prè̤rǎli yě rǎ dyéhè̌dyére ní̤pé̤ èthǐ dố èthǐ zṳ̂́e tè̤yě akǔ hò́. È me̤ phúyě rò a dyéluô̌htya pé̤ tè̤ dố a lodu thuô̌cô. (1) Jesǔ ma Cò́marya aphúkhǔ tacṳ́prè̤ má̤lakǒ tôprè̤ hò́. Dố Jesǔ Krístu khyáthè́plòhtǔbè́ ǔ me̤cyě̤me̤cṳ̂ lǔ tahe akhu-akhyě, a ithyóthè́gně hyǎní̤ hò́ tè̤cṳ̌e má̤lakǒ hò́ aphè̌ ngó̤ hò́. È yǒ htwǒ Cò́marya aphúkhǔ akhu-akhyě adu-ahtǔklò̌ ná prè̤pro̤ dố lisǎsè̌lye̤ nuôtôba akǔ nuôtahe ná mò́khu tanéphú nuôtahe ná Mosè. (2) Cò́marya hésoluô̌ ǔ ná Jesǔ ma bwídu tacṳ́prè̤ tôprè̤, rò adu lốklò̌ cò́ ná bwídu dố lisǎsè̌lye̤ nuôtôba akǔ nuôtahe. (3) Cò́marya me̤lwóhteka̤ dǐtû́ prè̤zṳ̂́tè̤phú tahe dố tè̤thû́, tè̤taròthè́ thè́isě, tè̤thyě yětahe akǔ ná Jesǔ akhyě prè́. Htuô̌rò Jesǔ ma bwídukhulố tôprè̤, rò a me̤cwó̤ pé̤ ǔ tè̤me̤lwóhteka̤ dố a má̤lakǒ.
Amǎ̤du 11 yě akǔnuô, prè̤rǎli dyéluô̌ byábû̌ pé̤ ǔ ná Israelphú dố amwi̤ladu tahe a tè̤zṳ̂́tè̤nyá̤ tahe akhu-akhyě, prè̤rǎli kwǐthè́zò̤ prè̤hốli tahe ná a ki oklò̤sò́ma lahyǎ dố atè̤zṳ̂́ akǔ. Amǎ̤du 12 akǔ ke rò a shyakrwǒ ke prè̤hốli tahe ná a ki myáhyǎ tǒdè̌ lahyǎ prè́ dố Jesǔ a o, rò a ki zṳ̂́e plehyǎ tuố̤ lahyǎ dố atadû htuô̌to a shyakrwǒcwó̤ kuô̌ pó̤ èthǐ ná tè̤cyě̤tè̤cṳ̂ ná tè̤me̤cyě̤me̤cṳ̂ ki hyǎbè èthǐ phútě bèbè nuô, a ki khyáthè́plòhtǔ lahyǎ. Prè̤rǎli me̤tadûkyǎ liyě ná a tè̤dyéthè́gněplǒcwó̤ tahe ná tè̤dyérò̤ryě one tahe.
Tè̤hébè tôtó̤ ná tôtó̤
Tè̤hébè ré̤ dố nyě. Krístu me̤lốbǎ pé̤ Cò́marya a tè̤dyéluô̌htya tahe 1:1-3
Krístu a tè̤duhtǔ pro̤prya̤ yěnuô adulố ná mò́khu tanéphú tahe 1:4-2:18
Krístu a tè̤duhtǔ pro̤prya̤ yěnuô adulố ná Mosè ná Joshua 3:1-4:13
Krístu htwǒ prè̤lǔtyǎ tè̤ dố aduhtǔ pro̤prya̤lốǔ tôprè̤ 4:14-7:28
Krístu a tè̤ô̌lya̤ ma adulố ǔ 8:1-9:22
Krístu a tè̤lǔhtya ané̤ yěnuôma aduhtǔ pro̤prya̤ tadû cò́ 9:23-10:39
Tè̤zṳ̂́tè̤nyá̤ a tè̤lodu tahe 11:1-1229
Tè̤me̤tǒ Cò́marya athè́plò 13:1-19
Tè̤kwǐcò́bè̌ dốkhyě tadû 13:20-21
Tè̤hébè dố khyě 13:22-25
1
Cò́marya Hébètǎ̤ Dǐtû́ Ná Aphúkhǔ
1 Cò́marya hébè tǎ̤krṳ̂̌lǎ pè̤phyěpè̤phuô̌ dốnudốthakhè̌ tahe ná dố klyá è́bǒ lǎ. Rò a nò̌hébè dǐtû́ ná prè̤pro̤ tahe.
2 Manárò mò̤́nyě dố khyě tadû yětahenuô, a hébètǎ̤ dǐtû́ pè̤ ná a phúprè̤khǔ hò́. Cò́marya nò̌byátǎ̤ dǐtû́ aphúkhǔ ná hekhu mò́khu ná tè̤lò̌꤮ plǐ. Dố khyě tadû pǎnuô, lò̌꤮ tè̤yětahe thyáphú a ki htwǒ lò̌ lǔtè̤ pǎ nuôrò Cò́marya nwóhtyahò́ lǔ hò́.
3 Ǔ ki myáhtye dǐtû́ Cò́marya a tè̤taryěduhtǔ dố èkǔ pǎ. È ma a thyá lò̌lá̤takli cò́ ná Cò́marya hò́. Thyáphú hekhu ná mò́khu ná tè̤bèbyá lò̌꤮ plǐ tahe ki o plehyǎ tadû pó̤ nuô, a pṳ̂́ma cwó̤kuô̌ tè̤bèbyá lò̌꤮ plǐ yěnuô ná angó̤ dố apro̤prya̤ shyosò̌ yětahe. Bí a me̤plû́me̤htuô̌ htuô̌hò́ tè̤plwǒkyǎ lò̌lò̌꤮ prè̤lukayǎ atè̤thû́ tahe akhè̌nuô, a ka̤ kahtya dố mò́khu rò a htya-onyǎo dố Cò́marya dố apro̤aprya̤ adu-ahtǔ tadû yětôprè̤ atakhu cò́htwó tôkyě.
Cò́marya Aphúkhǔ Duklò̌ Ná Mò́khu Tanéphú Tahe
4 Cò́marya aphúkhǔyě a htwǒhtyahò́ prè̤ dố adu-ahtǔ klò̌lố cò́ ná tanéphú o dố mò́khu nuôtahe cò́. Yěnuôma a thyáhò́ ná a dyé aphúkhǔ amwi̤ dố aduhtǔ klò̌lố cò́ ná mò́khu tanéphú nuôtahe amwi̤ cò́ hò́.
5 Lisǎsè̌kǔ rǎo ná Cò́marya hé aphúkhǔ phúyě,
“Nè̤ ma vǎphúkhǔ, yětônyěrò, vǎ htwǒ hò́ nè̤phè̌ hò́,” a hé phúnuô. Manárò Cò́marya hénò́kuô̌ mò́khu tanéphú phúnuô tôprè̤꤮ to.
Lisǎsè̌ rǎo pǎ dố aruô tômǎ̤ rò a hé,
“Vǎ ki htwǒ aphè̌ pǎ, rò è ki htwǒ vǎphú pǎ,” ngó̤ phúyěnuô a hénò́kuô̌ mò́khu tanéphú tôprè̤ toto.
6 Bí Cò́marya nò̌hítǎ̤hò́ aphúkhǔ vyá̤prè̤́ dố hekhu akhè̌nuô, a hé,
“Cò́marya a tanéphú lò̌꤮ plǐ bè cò́bè̌htya phúkhǔyě,” a hé phúnuô.
7 Manárò Cò́marya héke mò́khu tanéphú tahe ari-akyǎ,
“Cò́marya nò̌htwǒhtya a tanéphú tahe phú ké̤lathè́ nuô. Èthǐ tahe nuôma Cò́marya prè̤me̤tè̤phú tahe rò a nò̌htwǒhtya èthǐ phú mikyǎ̤rahtǒ nuô,” a hé phúnuô.
8 Manárò, bí a héke aphúkhǔ ari-akyǎ akhè̌nuô,
“Kố꤮ Cò́marya nè̤htyěnè̤ké̤ nuô, a ki onyě̤dû tacṳ́prè̤ talèkrè́ pǎ꤮. Nè̤ ki pốtarí ní̤dû nè̤ kayǎ tahe ná tè̤cò́tè̤te̤ pǎ꤮.
9 Nè̤ mo̤ní̤ tè̤ dố atǒ tahe rò nè̤ thè́htení̤ tè̤ dố athû́ tahe. Dố yě akhu-akhyěrò Cò́marya dố a má̤ nè̤ Cò́marya yě nwóhtya hò́ nè̤ rò a nò̌ duklò̌htǔlốklò̌ cò́hò́ nè̤ ná nè̤khǒnè̤thyó tahe hò́. A dyadudyahtǔ hò́ nè̤, a dyéhò́ nè̤ tè̤thè́luố̤phòphû̌ hò́,” a hé lǔ phúnuô.
10 Htuô̌rò a hékuô̌ pó̤ aphúkhǔ,
“Kố꤮ Byacè, dố tôcô꤮ ohtwǒhtya tyahíto akhè̌nuô, nè̤ byálya̤ ní̤dû hekhu, nè̤ tělya̤ ní̤dû mò́lè̤̌ tahe ná nè̤ takhu.
11 Hekhu ná mò́lè̤̌ tahe ki pyékyǎ lò̌ pǎ manárò nè̤ ki oplehyǎ tadû tacṳ́prè̤ pǎ. Hekhu ná mò́lè̤̌ tahe ki lazè̤̌lamûkyǎ phú hyeca̤lye̤ hyeca̤lwǒ nuôtahe pǎ.
12 Nè̤ ki kè̤́klyédwókyǎ èthǐ tahe phú ca̤klò̌du nuô pǎ. Nè̤ ki htulya taple khókyǎ lò̌ hekhu ná mò́lè̤̌ tahe phú kayǎ tôprè̤ htulya taplekyǎ ahyeca̤ nuô pǎ. Manárò nè̤ ki dya nè̤ thè́plò khǎlé̤lé̤꤮ prè́ pǎ. Nè̤ mò̤́nyěnuô, a lò̌pé̤ cyá̤to,” a hépó̤ phúnuô.
13 “Onyǎo dố vǎ takhu cò́htwó yětôkyě, rò onyǎ tuố̤dố vǎ nò̌pốhò́ nè̤ ná prè̤ dố a thè́hte nè̤ yětahe hyǎ cò́bè̌htya tuố̤ nè̤ dố nè̤ khǎduô khǎshyé pǎ,” Cò́marya hénò́ amò́khu tanéphú tahe phúyěnuô tômû̌꤮ to.
14 Kihéphúnuôrò, mò́khu tanéphú tahe ma ǔpě? Èthǐ ma thè́htwǒprè̤ dố a me̤pé̤ Cò́marya atè̤me̤ tahe. Cò́marya nò̌me̤cwó̤ pé̤ èthǐ ná kayǎ dố a ki ní̤bè tè̤me̤lwóhteka̤ pǎ tahe agně prè́.