3
Yóni simátímakain-kwasai.
Mátíyu 3:1-12, Mááka 1:2-8, Yóni 1:19-28
1 Árómáani-kwaasiti anóndako áwí'a Táípíriyasi ména kawáá-máyáí mairéna sísamaivakemba éva'aasei kumbaimái-ima maisuwónka'a Yútiyaa-marara-kawaanako áwí'a Póntíyasi Páíráti máyowana Káríri-marara-kawaanako áwí'a Éróti máyowana áváko áwí'a Vírípi kwemá Ítúréa-maravare Tárékónaitisi-maravare kárákwirowana Áráíseni Ápíríni-marava'a kárákwirowasa
2 miráumai-kwaasi kárákwironka'a Ánásiye Káyavaasiye aiva'-mónó-káwáánákáí máyóyana Sékáraya ááninko áwí'a Yóni kavóná-marava'a máyowana Áánútu aaimá simámuwana
3 Yóni Yótáni-nonkona arúvá'á kwénaaena simátimena séna sáwí-imayaa tuwé'a Áánútunopa'a tíya'a nombá pétinkaanana Áánútu kentí sáwí-imayaa maitiyuwáníye Yóni siráiye.
4 mirá súntavena naaóvá'á Áánútun-aai simátímakowai áwí'a Áísáya agaimaréna séna
moóráwai kavóná-marava'a ména aayamáírakemba séna Ísóigona aambá kwirankánááomba kwená aambá arupí íyana minámpá'á kwíno.
5 omá'a kárámai ukwítu'mae koró. kae'náér-amba arupí oró. kuváúsaavau-amba maimái kawe'á oró.
6 Áánútu sáwí'o umáímo máyáampinkemba kawer-ámpá'á métinkaniwaimba ai'maráínana kumínímba amáparawaima awánanaaowe
Áísáya agaimaréna sirónka'a póna Yónintavena mináímbá siráiye.
7 súwasa Yóni nombá pésinkainkwae sésa sáwíva-kwaasi kwenópa'a tóyo uwaná Yóni simátimena séna iyánkó póígon-araa'an-owe. Áánútu kentí sáwí-meyamba timínívo nááwa simátímísara iséra inkaiséra kwéteo.
8 kentí sáwí-mayai tuwé'o Áánútumpa'o té'o é'a kawe'-máyáí máyéwa'a tuwánanaumne. Ááváramu kentáá síkwá'ná imbá póta Áánútuna kawe-kwáásíyá úne sé'a mirán-ímáyáá íma oró. Áánútu Ááváramu aísaavutantamba ónááowe sénaraankasi maanóntámpínkémbá kanaám-po'a kwaási aúráaro sisa'á aúráasino. Ááváramu aísaavutantamba uráundawai póta kawe-kwáásíyá úne sé'a mirán-ímáyáá íma oró.
9 íma kawer-árámbá íyain-taima ááimpimba kwéayaisuwesa iravímbó agaisúwáántemba Áánútu miráumai kentí sáwí-meyamba timíníye Yóni siráiye.
10 súwasa isésa sésa simásimenda-ainta nóraya ónaumno suwaná
11 Yóni séna kaer-únánkwátói makáawai ímo makáawaima moórá-mora-umai tímatuwaaro. toómbá makáawai ímo makáawaima moórá-mora-umai tímatuwaaro Yóni súwasa
12 táákísi-ontamba kwémayon-umoyan-kwaasi Yóni nombá pésinkainkwae sésa kwenópa'a tésa sésa anóndako ómpo nóraya ónaumno suwaná
13 Yóni séna íma kampa'á simái anón-ontamba maé'a táákísi-ontane su'mai máyáaro súwasa
14 i-kwáásí sésa kesáá nóraya ónaumno suwaná Yóni séna tínkantuke'a miwítí óísamba mayánáe íma seró. kampar-áímbá kwésimatime'a miwítí óísamba mayánáe íma seró. kentí mayáígóná meéyántávé'a íma kayoré'a tirunkó kawe'á kwéina'a máéro Yóni siráiye.
15 Yútaa-kwaasi Áánútumo usásinankaiwaimba amu'marésa mésa Yónin-aai isésa anón-imayaa ésa sésa Áánútumo usásinankaiwai kwemá Yóniya'i. á'owaawa'iyo kwésuwana
16 Yóni séna kesínaaemba tíníwai kwemá anóndakoma kembá usáyaaitaraimba pó'a kwemó aaimó síndavimba kemá aaimá sendamá uwóví'a ónaumne. kemá nombá pétinkaundanivo kwemá Áánútun-amankomba ai'maráínana kuména keinárawapimba anómba umátinkaniye. iramó agáyáantemba íníye.
17 aawinkwínaumo sípétivimbo mósá makésamo iyaavumásúwááwanamo anómbo marapá'ó kúmísanamo ásima úndáomo tútúwaisasamo kaíkai'o ínín-iravimbo kwiyúmaimo agaisuwésamo anómbo naaúmpa'o mósá máráantemba kwaási miráráámbá íníye Yóni séna
18 Áánútuna áséi-kwasai ísámai kawer-ígwáe séna mirán-áímbá simátíma'maena iráiye.
Ísumba nombá pérankarain-kwasai.
Mátíyu 3:13-17, Mááka 1:9-11
19-22 Yóni simátíma'maena kwéiyena sáwíva-kwaasi nombá kwévetinkena naaémba Ísumba pérankowana námúnaa kwésuwana sokón-tawaai taaínkaar-úwana Áánútun-amanko mááiraamba úmaena ane'á kumbáyowana aaigówé su'mai kwíyómpakemba séna emá kesááninko óna'a ená imáyáa kwée'a ávááraumai aamoí umánkaumne siráiye.
Yóni Áánútuna áséi-kwasai kwésimatimumbanivo Káríri-marara-kawaanako áwí'a Érótima áváko awainínkó áwí'a Erotíyasimba mairówana mindáyavena ó'on-o'on-tantaa'a sáwí'a uráintavena Yóni séna sáwísawaa kwéone súwana Éróti Yónimba áí'mai ándáva'a ankéna mindáyavena sáwí-mayai maimaéna iráiye.
Ísu aíkwá'nái túwíkona kwaasái.
Mátíyu 1:1-17
23 Ísu marapá'á kumbéna kaumbo-síyáánkáí-ímá maisuwéna kwénaaena Áánútun-aai simátiminimba ááimba asówasa kwaási imáyáa ésa sésa Yósépi ááninkoman-iye kwésewe.
Yósépi avowá áwí'a Írai úwana
24 Írai avowá áwí'a Mátáta úwana
Mátáta avowá áwí'a Árívái úwana
Árívái avowá áwí'a Méokai úwana
Méokai avowá áwí'a Yánai úwana
Yánai avowá áwí'a Yósépi úwana
25 Yósépi avowá áwí'a Mátátayasi úwana
Mátátayasi avowá áwí'a Émósi úwana
Émósi avowá áwí'a Néamu úwana
Néamu avowá áwí'a Ésérai úwana
Ésérai avowá áwí'a Nágai úwana
26 Nágai avowá áwí'a Méata úwana
Méata avowá áwí'a Mátátayasi úwana
Mátátayasi avowá áwí'a Sémeni úwana
Sémeni avowá áwí'a Yóséke úwana
Yóséke avowá áwí'a Yóta úwana
27 Yóta avowá áwí'a Yóánana úwana
Yóánana avowá áwí'a Árésa úwana
Árésa avowá áwí'a Sérápápeo úwana
Sérápápeo avowá áwí'a Síátio úwana
Síátio avowá áwí'a Nérai úwana
28 Nérai avowá áwí'a Méokai úwana
Méokai avowá áwí'a Étai úwana
Étai avowá áwí'a Kósamu úwana
Kósamu avowá áwí'a Éómetamu úwana
Éómetamu avowá áwí'a Eyá úwana
29 Eyá avowá áwí'a Yósúwa úwana
Yósúwa avowá áwí'a Éríyesa úwana
Éríyesa avowá áwí'a Yórimu úwana
Yórimu avowá áwí'a Mátáta úwana
Mátáta avowá áwí'a Árívái úwana
30 Árívái avowá áwí'a Símiyoni úwana
Símíyoni ávowá áwí'a Yútaa úwana
Yútaa avowá áwí'a Yósépi úwana
Yósépi avowá áwí'a Yónamu úwana
Yónamu avowá áwí'a Éráyakimu úwana
31 Éráyakimu avowá áwí'a Méríya úwana
Méríya avowá áwí'a Ména úwana
Ména avowá áwí'a Mátáta úwana
Mátáta avowá áwí'a Nétáani úwana
Nétáani avowá áwí'a Tévíti úwana
32 Tévíti avowá áwí'a Yési úwana
Yési avowá áwí'a Ópéti úwana
Ópéti avowá áwí'a Póási úwana
Póási avowá áwí'a Sára úwana
Sára avowá áwí'a Násoni úwana
33 Násoni avowá áwí'a Ámínátapa úwana
Ámínátapa avowá áwí'a Á'mini úwana
Á'mini avowá áwí'a Ánái úwana
Ánái avowá áwí'a Éséroni úwana
Éséroni avowá áwí'a Pérési úwana
Pérési avowá áwí'a Yútaa úwana
34 Yútaa avowá áwí'a Yákópo úwana
Yákópo avowá áwí'a Áísákaa úwana
Áísákaa avowá áwí'a Ááváramu úwana
Ááváramu avowá áwí'a Téra úwana
Téra avowá áwí'a Né'o úwana
35 Né'o avowá áwí'a Séráka úwana
Séráka avowá áwí'a Áríyu úwana
Áríyu avowá áwí'a Péréki úwana
Péréki avowá áwí'a Ípa úwana
Ípa avowá áwí'a Síra úwana
36 Síra avowá áwí'a Kénááni úwana
Kénááni avowá áwí'a Avakatí úwana
Avakatí avowá áwí'a Sému úwana
Sému avowá áwí'a Nówaa úwana
Nówaa avowá áwí'a Árémeki úwana
37 Árémeki avowá áwí'a Métúsara úwana
Métúsara avowá áwí'a Ínóki úwana
Ínóki avowá áwí'a Yéréti úwana
Yéréti avowá áwí'a Má'árario úwana
Má'árario avowá áwí'a Kénááni úwana
38 Kénááni avowá áwí'a Ínosi úwana
Ínosi avowá áwí'a Séti úwana
Séti avowá áwí'a Áándamu éna kwemá Áánútu áánimban-iye.
miwí Ísu aíkwá'ná owé-ímáyáá uráawe.