5
A lalaun ana talapor
1 Mulor laun arlar ana lalaun ane God, anasa mulo na natnat e God, pa i maris kol mulo.
2 Mulor laun ana marmaris, arlar larning e Karisito i maris dala, pa i saran tar anuna lalaun sur dala, arlar ana artabar ning i toboh wakak tetek e God.
3 Gong ta pamuk a toltol i kes potor ta mulo, gong ta dur a toltol, pa gong otleng mulo nuknuk sur a galis a gongon. Anasa na toltol ne bel i sot sur a totoh a tarai ane God lar toli.
4 Gong mulo atong ta laulau a warwara, o ta longlong a warwara, pa gong mulo morot ana laulau a morot. A warwarala ne bel i wakak sur mulor atongi, ika mulor atong wakak tetek e God.
5 Mulor tasman a utna ne: La ning la tol a pamuk a toltol, o a dur a toltol, pa la ning la nuknuk sur a galis a gongon, bel lar kibas a matanitu ane Karisito pa e God. Anasa la ning la nuknuk sur a galis a gongon, la ning a tena lotu tetek a asasongo na godla.
6 Gong mulo noren tar tik sur ir asongo mulo anal warwara oros ka. Anasa a toltolla ning ir dat pas ka a balakut ane God tetek la ning bel la longor teteki.
7 Larning, gong mulo tur taum onla ana nunla na toltol laulaula.
8 Nating mulo kes ana mormorom, ika ne a Leklek ka akes tar mulo ana talapor. Pa mulor laun arlar ana natnat a talapor.
9 Anasa a wana lalaun anun esining i kes ana talapor i manglarne: a wakak a toltolla, a tostos a toltolla, pa momolna.
10 Pa mulor tai sur a toltol ning a Leklek i gas onoi.
11 Gong mulo tol a toltolla ning a tarai a mormorom la sira toli ning bel ta wana. Ika mulor apuasa anunla toltolla.
12 Anasa a toltolla ning la sira tol kumnani, a utna na meme kol, pa dalar meme ning dalar warwara onoi.
13 Ika a talapor i apuasa a toltolla rop sur ir hanot talapor.
14 Anasa ning a talapor i atalapor a ututnala, dir oroi lalan la. I maining di atongi larne,
“U ning a tena borbor,
ur mata,
ur kamtur kusun a minat,
pa e Karisito ir atalapor u.”
15 Mulor tai alar wakak anumulo a ngas a lalaun, pa gong mulo arlar ana longlongla, mulor arlar ana tarai a tastasmai.
16 Ana pukakiarla rop, ning i langolango sur mulor apuasa anumulo a tortorot, mulor toli, anasa a pukakiarla ne, a laulau a pukakiarla.
17 Larning, gong mulo longlong, ika mulor tasman a nuknuk anuna Leklek.
18 Gong mulo gang a wain pa mulo sipak onoi, anasa ir alaulau mulo. Ika, mulor bukus ana Talngan Tabu.
19 Pa mulor awara artalai taum ana saksak miting na Saksakla ane Dewit, na saksak a lotu, pa saksakla ning a Talngan Tabu i tabar mulo onoi. Pa mulor saksak taum ana warwara leklek ting na balamulo tetek a Leklek.
20 Pa ana pukakiarla rop, mulor atong wakak ana ututnala rop tetek e God a Tamandala, ana risana e Iesu Karisito anundala a Leklek.
A asasaer ana keskes a tinaulai
(Kol 3:18-19)
21 Mulor anatarna pas mulo artalai, anasa mulo hanrawai tetek e Karisito.
22 Mulo na tinaulai a gurara, i wakak sur mulor anatarna pas mulo tetek anumulo na tarai lar otning mulo toli tetek a Leklek.
23 Anasa a barsan i a pukul a keskes a tinaulai, arlar o e Karisito i a pukul a tarai a lotu, pa la a palaona, pa i anunla Tena Alaun.
24 A tinaulai a hanela lar anatarna pas la tetek anunla na tarai ana ututnala rop, arlar ana tarai a lotu la anatarna pas la tetek e Karisito.
25 Mulo otleng, a tinaulai na tarai, mulor mang sur anumulo na gurarala, arlar lar ning e Karisito i maris a tarai a lotu, pa i saran tar anuna lalaun sur la,
26 sur la anuna tarai momol. Pa i gos totoh la ana malum pa anuna warwara.
27 I toli larne sur ir ben pas anuna tarai teteki, arlar ana nuna wakak a hane ning bel ta dur onoi, pa bel i karkar a palaona, pa bel ta laulau a utna onoi. Ir totoh pa bel dir arup sot pasi on ta rongo.
28 Mang otleng larning, na tarai lar mang kol sur anunla na gurara, lar ot ning la mang sur a palaonla ot. Esining i mang sur anuna hane, i mang suri ot.
29 Bel tik i sira bilbilor a palaona ot. I tai alari, pa i tamtabari, arlar o e Karisito otleng i toli tetek anuna tarai a lotu.
30 Anasa dala na didiah palaona e Karisito.
31 A Buk Tabu i atongi larne, “I maining a barsan ir han kusun e tamana pa e tana, pa ir kes taum ana nuna hane, sur diau takai kama.” Stat 2:24
32 A warwara ne ana tinaulai, a tnan kamkamna ning i mumun. Ika a warwara o e Karisito pa a tarai a lotu.
33 Pa i wakak otleng ning taktakai o mulo ir mang sur anuna hane larning i mang suri ot. Pa i wakak sur na gurara lar hanrawai tetek anunla na taraila.