A Ningnigo na Pas
ane
Jon
A warwara talapor nigo
A pas ne e Jon i tumusi. E Jon i ning a halinla ning a bonot pa pisir naur a kakak a asaerla ane Iesu. I ka bun, pa i kes tumo e Epeses ning i tumus a pas ne. I tumusi tetek a tarai a lotu ting na papar Esia.
E Jon i atai la sur lar tur rakrakai ana tortorot o e God e Tamana pa e Natnalik e Iesu Karisito. Pa ning la mang sur e God lar mang sur na halalinla otleng. A marmaris i itna kol.
Pa i atai la sur lar tai alar la kusun a asasongo na tena asaerla. A tena asasongola la atongi mang e Iesu bel i hanot a barsan momol. La nuki mang a palaondala i a laulau a utna, pa e Iesu bel ir tolsot sur ir hanot a barsan momol arlar ondala. A tena asasongola la atongi otleng mang a tastasman i a tnan utna, ika a marmaris pa a wakak a toltol dia utna oros ka. A tarai ning la atongi larne, la na hirua ane Karisito, pa e Jon i mang sur dalar oroi lalan la.
A tinan ana Ningnigo na Buk ane Jon:
E Iesu i a Warwara na Lalaun (1:1-4)
A talapor pa a mormorom (1:5-2:29)
Na natnat e God pa na natnat e Satan (3:1-4:6)
A marmaris (4:7-21)
A tortorot ir tolsot pas a rakrakan hanua (5:1-21)
1
A Warwara na Lalaun
1 Mila warwara talapor o esaning a Warwara na Lalaun. Natnating ot ning belot di akes a rakrakan hanua, i laun. Mila ka longor tari, mila ka oroi tari ana matamila, mila oroi momol tari ot, pa mila tong ot a palaona.
2 Pa a Warwara na Lalaun i hanot talapor. Mila ka oroi tari, pa onone mila atalapori tetek mulo mang, i ning a lalaun tikin ning nating i kes taum o e Tamana, pa i hanot talapor tetek dala.
3 Mila warwara talapor tetek mulo o esaning mila ka oroi tari pa mila ka longor tari, sur dalar bal taum, larning mila bal taum o e Tamandala, pa e Natnalik e Iesu Karisito.
4 Pa mila tumus a ututnala ne, sur anundala gasgas ir itna ono.
E God a talapor momol
5 A warwara talapor ne, mila longori ta e Iesu Karisito, pa mila atalapori tetek mulo mange: E God a talapor momol, pa bel ta mormorom i kes onoi.
6 Ning dala atongi mang dala bal taum o e God, ika dala laun ana mormorom, dala na tena asasongola, pa a momolna bel i kes ondala.
7 Ning dala laun ana talapor, arlar o e God i kes ana talapor, dalar bal artalai dala, pa suluk e Iesu, e Natnalik, ir atotoh dala kusun a toltol laulaula rop.
8 Ning dala atongi mang belal toltol laulau anundala, dala asongo ulak dala ot, pa a momolna bel i kes ondala.
9 Ning dala atong talapor anundala na toltol laulau, e God i tostos, pa ir tolsot anuna lele pa ir kepsen anundala na toltol laulaula, pa ir atotoh dala kusun a ututnala ning bel i tostos.
10 Ning dala atongi mang bel dala tol ta toltol laulau, dala atongi mang e God a tena asasongo, pa anuna warwara bel i kes ana balandala.