A Pas ane
Jut
A warwara talapor nigo
E Jut i tumus a pas ne. A galis a tena tastasim la nuki mang e Jut a tas e Iesu pa e Jems. Oroi Mt 13:55 pa oroi otleng a warwara talapor ana pas ane Jems.
I tumus a pas ne tetek na tena tortorot. Ning i longori mang a asasongo na tena asaerla la ben rongon la, i tumtumus sur ir atumarang la. Pa i atongi mang a Leklek ir warkurai a tena laulaula. I atai la otleng mang lar mur a Wakak a Warwara, pa lar tur rakrakai ana tortorot.
A tinan ana buk Jut:
A kamkama buk ne (1-2)
A ginina asasongo na tena asaerla (3-16)
Dalar tur rakrakai ana tortorot (17-23)
Dalar rakan aleklek pas e God (24-25)
1
1 Iau e Jut, a tena titol oros ane Iesu Karisito pa a tas e Jems. A tumus a pas ne tetek mulo, ning e God a Tamandala ka kabah pas mulo, pa i maris mulo, pa mulo kes ting na tatatai alar ane Iesu Karisito.
2 E God ir saran a tnan harnangai, a tnan bal molmol pa a tnan marmaris tetek mulo.
Mulor atumarang mulo kusun na asasongo na tena asaer
3 Na halalik, a mang kol sur ar tumtumus tetek mulo ana titol ane God ning i alaun pas dala. Ika onone, a nuki mang ar tumtumus ana ning a utna masik. Ar arakrakai mulo, sur mulor tai alar wakak a Wakak a Warwara kusun a hiruala. A Wakak a Warwara ning dala tortorot onoi, pa di ka saran tari tetek a tarai ane God, pa bel tik ir lingir lar pasi.
4 A tumtumus, anasa dingla na tarai la ka kas kumna tar tetek mulo. Bel la mur a nuknuk e God, pa lar han tostos sur a hinirua, larot ning di ka tumus tari natnating ot ting na Buk Tabu. La lingir laulau a marmaris ane God, pa la atongi mang, “I wakak ka ning dalar tol na toltol a pamuk.” Pa la puain sen anundala a Ningnigo pa anundala Leklek, e Iesu Karisito, i takai sot ka.
5 Mulo ka tasman a ututnala ne, ika a mang sur ar atai ulak mulo onoi, mang: A Leklek i alaun a tarai Israel mitumo e Ijip, ika lamur, i ahirua sen la ning bel la tortorot ono.
6 Pa angelola otleng, ning bel la mang sur a tiniba na warkurai ning e God i saran tari tanla, pa la han kusun anunla a keskes, e God ka dot akes tar la ana dodot tikin. Pa anone la ka kes ting na mormorom pa la harnanai sur a tnan pukakiar ning dir warkurai la ono.
7 Larka otleng ning e Sodom pa e Gomora, pa na hananuala milau diau. A tarai mitingia la tol a toltol na pamuk, pa la tol a laulauna ulak tetek la ot a barsanla. Na hanua ning, la hirua rop ana iah. Pa anunla hinirua i atumarang dala sur dalar tasmani mang a tnan iah ning bel i sira mat, i kes sur dir tun a tena laulaula ono.
8 Larka otleng a tarai ning la ka kas tar tetek mulo. La tortorot ana ututnala ning la oroi i ana reresala. Ana reresela ning, la adur ulak la ot ana laulau a toltolla, bel la mang sur lar kes nahai e God, pa la atong laulau na angelo misaot.
9 Ika e Maikel, a ningnigo anuna angelola, ning dia arlak taum o e Satan ana minatna e Moses, bel i atong tar ta laulau a warwara o e Satan. I atongi ka mang, “A Leklek ot ir akadik u.”
10 Ika a tarai ne la warwara laulau ana utna ning bel i talapor tetek la. Pa anunla a mananos i arlar ka ana mananos anuna inagoila, ning la muri ka a nuknuk ana palaonla. Ine a utna ning lar hirua ono.
11 Ir laulau kol tetek la ning! La mur a toltol ane Kain. Pa la arlar o e Balam, ning i tol ka a laulau a titol sur ir kibas mani onoi. Pa lar hirua arlar o e Kora, esaning i nigon pas a tarai ning la gilam ris kusun e God, pa la hirua rop.
12 A tarai ning, la arlar ana dur a utna, ning la kes taum o mulo ting na utna na hangan. La tabar masur pas la ot, pa bel la hanrawai a tarai masik. La arlar ana kokok a bakut ning a wuwu i wus taltali, pa kiar bel i punga. La arlar otleng ona rakaila ning bel la wai ana kalang a wai, la ka mat. Di ka gat sen la, pa ine a munaur a minatinla.
13 La arlar ana tnan top ning i takube, pa nunla na toltol na meme, ning bel la sira meme ono, i hanot talapor arlar ana busana. Pa la arlar otleng ana nangnangla ning bel la kes ting na ngasinla, la han taltal ka, pa e God ka sang tar a tnan mormorom sur la, ning bel ir rarop.
14 Pa e Enok otleng, mais a mangis a tarai o e Adam, ka atong tar a warwara na propet onla mang, “Oroi i, a Leklek ir hanot ana nuna galis a rip a totoh na angelo,
15 sur ir warkurai a tarai rop. Pa la rop ning bel la mur a nuknukna e God, lar hirua ana warkurai, ana anunla na laulau a titol ning la ka tol tari, pa ana laulau a warwara ning a laulau a tarai la ka atong tari ana Leklek.”
16 A tarai ne, la na tena abereng wara pa na tena linglingir. La mur a laulau a nuknukinla, pa la aitna pas la ot. La amoro pas ka a tarai ana anunla na namnamin a warwara, sur lar kibas ta utna kusun la.
Mulor arakrakai anumulo a tortorot
17 Ika mulo, na halalik, mulor nuk pas a warwarala anuna aposella ane Iesu Karisito anundala a Leklek, ning la ka atai nigon tar mulo ono.
18 La ka atong tari ta mulo mang, “Ana ararop a pukakiarla, al tarai lar atong laulau e God, pa lar mur a nuknukinla, ning bel i arlar ana nuknuk e God.”
19 Ine a tarai ning la pagal mulo. La mur ka a nuknuk mite na rakrakan hanua, pa a Talngan Tabu bel i kes onla.
20 Ika mulo, na halalik, ir wakak ning mulor arakrakai anumulo a totoh a tortorot, pa mulor nunung ana rakrakai ana Talngan Tabu.
21 E God i sira mang kol sur mulo pa mulor kes milau i pa mulor noreni sur ir mang bolbolos sur mulo. Pa mulor harnanai sur anundala Leklek e Iesu Karisito ning ir tabar mulo ana lalaun tikin, anasa i maris mulo.
22 Mulor asangan a marmaris tetek la ning a nuknukinla i talar.
23 Pa mulor kepsen kapit pas dingla na tarai ning kaning na iah pa mulor alaun la. Pa tetek dingla na tarai otleng mulor asangan a marmaris pa mulor matmataut, sur gong mulo kibas anunla na toltol. Pa mulor matatan anunla na kaen ning i dur ana anunla na laulau a toltol.
A warwara na atong aleklek e God
24 Dalar atong aleklek pas e God, ning i tolsot pas sur ir tai alar mulo sur gong mulo punga, pa ir atur mulo namatan anuna matatar, ana tnan gasgas pa bel ta artitiu ir kibas mulo.
25 Takai ka a God pa i anundala a Tena Alaun, anasa ana minat e Iesu Karisito anundala a Leklek. Anunai ot a matatar, a keskes a leklek, a rakrakai pa a warkurai, tagun na raula ning ka rop, pa onone, pa bel ir rarop. Amen.