12
E Maria i sang e Iesu sur a pukakiar ning ir mat pa dir akasi ting na kulam a minat
(Mt 26:6-13; Mk 14:3-9)
Diono na pukakiar kaning ot lanigo tana lotu na Han Lakai, e Iesu i hanot saot e Betani, a hanua ane Lasarus, a barsan ning e Iesu i alaun pasi kusun a minat. Pa la tol a utna na hangan na kes taum o e Iesu tingia. E Mata i susuk anlai, pa e Lasarus i ning a halinla ning la kes taum o e Iesu ana utna na hangan. E Maria i los pas a koto na tomtoboh ning di atongi ana nad, a matana i abit kol. Pa i peki ana naur a hana e Iesu, pa i sah diau ana hihna. A tobohna i tatah tingui na rumai.
Ning a halin na kakak a asaerla ane Iesu, e Judas Iskariot, ning ir asobor tar e Iesu, i atongi mange, “Sur asa ning bel di siuran a koto na tomtoboh ne sur a ngas a arlou tagun a takai a rau kidol, sur dir tabar a kapan a taraila ono?” Bel i maris a kapan a taraila. I atongi larne, anasa i sira tai alar anunla mani pa i sira kinau kumnani, anasa i a tena kinkinau. Ning e Iesu i longor a warwara ane Judas, i kelesi mange, “Noren a hane ning, i tol a titol ne hok sur a pukakiar ning ar mat pa dir akas iau ting na kulam a minat. A kapan a tarai lar laun mokos taum o mulo, ika iau bel ar kes tikin napirimulo.”
La wolwol sur lar umkol e Lasarus
Ning a kunum a tarai tagun a tarai Juda la longori mang e Iesu kano e Betani, la han uto. Bel la han sur lar oroi e Iesu ka, la han otleng sur lar oroi e Lasarus, ning e Iesu i alaun pasi kusun a minat. 10 Pa a leklek a tena artabarla la wolwol sur lar umkol e Lasarus otleng, 11 anasa a galis a Juda la han kusun la pa la tortorot o e Iesu, kamkamna o e Lasarus.
E Iesu i han usaot e Jerusalem lar a king
(Mt 21:1-11; Mk 11:1-11; Lk 19:28-40)
12 Ana pukakiar lamur a tnan kunum a taraila ning la hanot sur a lotu na Han Lakai, la longori mang e Iesu otleng kaning i han amon usaot e Jerusalem. 13 La los pas a paka baibaila pa la han sur lar barat e Iesu. La kukuk mange,
“Hosana! Esaning i hanot ana risan a Leklek i angis.’ Buk Song 118:25-26
A King anuna tarai Israel i angis!”
14 E Iesu i ben pas a dongki, pa i kes saot onoi, larning a Buk Tabu ka atong tari ono mange,
15 “A tarai Saion, gong mulo matmataut.
Oroi, anumulo a king i hanot,
i kes ana nat a dongki.” Sekaraia 9:9
16 A kakak a asaerla ane Iesu bel la tasmani mang a ututnala ning di ka tumus nigon tari ting na Buk Tabu. Ika ning e Iesu ka kes ana nuna matatar, io, la bot nuk lalani mang di ka tumus tar a ututnala ne o e Iesu, pa di ka tol tar a ututnala ne onoi.
17 A galis a tarai ning la tur taum o e Iesu ning i kabah purum pas e Lasarus kusun a kulam a minat pa i alaun pasi, la ning la warwara talapor onoi. 18 A galis a tarai la han sur lar barat e Iesu, anasa la ka longor tar a warwara ana akinalang ning. 19 A Parisaiola la atai artalai la mange, “Mulo oroi, bel dalar tolsot pas ta utna ning dala mang sur dalar toli. Anasa a tarai tagun a rakrakan hanua rop la ka muri.”
A tarai Grik la mang sur lar oroi e Iesu
20 Dingla na tarai Grik otleng la han usaot e Jerusalem ana lotu na Han Lakai, sur lar lotu. 21 Pa la han tetek e Pilip, a te Betsaida. E Betsaida a hanua ting na papar Galili. Pa la atai i mange, “Lak, mila mang sur milar oroi e Iesu.” 22 E Pilip i han pa i atai e Endru, pa dia han sur diar atai e Iesu. 23 Pa e Iesu i keles diau mange, “A pukakiar ka hanot ning dir mermer a Nat a Barsan. 24 A atong momoli ta mulo, ning a pat a wit bel ir punga ting na kabalapiu pa bel ir mat pas, ir kes ot larning, takai ka. Ika ning ir mat pas, ir wai pa ir suah galis a patna. 25 Esining i mang kol sur anuna lalaun, ir hirua, pa esining i nget anuna lalaun te na rakrakan hanua, ir suahi sur a lalaun tikin. 26 Esining ir titol tetek iau, i wakak ning ir mur iau, pa i anuka tena titol pa ir kes taum hok ting na pukna ning ar kes ia. Esining ir titol tetek iau, e Tata ir aleklek pasi.
E Iesu i warwara ana nuna minat
27 “Onone anuka lalaun i mamahat kol. Asa ning ar atongi? Mangmangasa, ar atongi larne, ‘Tata, gong u noren tar a mamahat ne ir hanot tetek iau’? Bel! Bel ar nunung larne, a kamkamna ot ne, ning a hanot suri. 28 Tata, ur aleklek a risam!”
Pa a elngen takai misaot na langit i atongi mange, “Ia ka aleklek tari, pa ar aleklek ulaki.” 29 A kunum a tarai ning la tur tingia la longori. Dingla na tarai la atongi mang a pungpugur, pa dingla otleng la atongi mange, “Ning a angelo i warwara teteki.” 30 Ika e Iesu i atongi mange, “A elngen takai ne bel i warwara sur ir nangan iau, sur ir nangan mulo ot. 31 Onone ka taem sur dir warkurai a rakrakan hanua, pa dir alulu sen e Satan, a ningnigo tagun a rakrakan hanua. 32 Ika iau, ning dir rakan kas iau usaot mite lapiu, ar dat a taraila rop tetek iau.” * 33 I atongi larne sur ir atalapori mang ir mat mangmangasa.
34 Pa kunum a tarai la atai i mange, “Mila longori ana Buk na warkurai mange, e Karisito ir kes tikin. Sur asa u atongi mang dir rakan kas a Nat a Barsan usaot? Esining a Nat a Barsan?” 35 E Iesu i atai la mange, “A talapor bel ir kes kol ma napirimulo. Mulor taltal ning a talapor kanet, lamur a mormorom ir poroi alar mulo. Esining ir taltal ana mormorom bel ir tasmani mang ir han utaha. 36 Ning a talapor kanet, mulor tortorot onoi, sur mulo na natnat a talapor.” Ning e Iesu ka atong arop tar a warwara ne, i kamtur pa i han kumna kusun la.
Dingla na tarai Juda bel la tortorot o e Iesu
37 E Iesu ka tol tar a galis a akinalang namatanla, ika bel la tortorot onoi, 38 sur a warwara ning a propet Aisaia i warwara tar onoi ir hanot momol. I atongi mange,
“Leklek, esining ka tortorot ana warwarala ning mila atongi?
Pa esining di ka asangan tar a rakrakai anuna Leklek tana?” Ais 53:1
39-40 Pa ka atong tari otleng manglarne,
“E God ka bingakut tar a matanla,
pa ka sanalar tar a nuknukinla,
sur gong la tai ana matanla,
pa gong la tasman lalani ana nuknukinla,
pa bel lar talingir tetek iau,
sur ar alaun la.” Ais 6:10
A kamkamna ine, ning bel la tortorot. 41 E Aisaia i atongi larne, anasa ka oroi nigon tar a matatar ane Iesu, pa i warwara onoi.
42 Pa galis a ningnigola otleng tagun a tarai Juda la tortorot o e Iesu, ika bel la warwara talapor onoi, sakana a Parisaiola lar kepsen la kusun a rumai lotula. 43 Bel la warwara talapor onoi anasa la mang kol sur a tarai lar aleklek la, pa bel la nuk pas a warwara gasgas ane God tetek la.
A warwarala ane Iesu ir warkurai a taraila
44 E Iesu i warwara kol mange, “Esining i tortorot hok, bel i tortorot ka hok, i tortorot otleng o esaning i sune iau ute. 45 Pa esining i oroi iau, ka oroi tar esaning i sune iau ute. 46 A hanot ute na rakrakan hanua lar a talapor, sur esining i tortorot hok, bel ir kes ana mormorom. 47 Ning tik i longor anuk na warwarala pa bel i muri, iau, bel ar warkurai i. Anasa bel a hanot sur ar warkurai a rakrakan hanua, a hanot sur ar alauni. 48 Esining bel i mang sur iau pa bel i kibas anuk na warwarala, anuk na warwarala ot ning lar warkurai i ana ararop a pukakiar. 49 Anasa a warwarala ning ia ka atong tari bel anuki, e Tata ot i sune iau ono ute sur ar atongi pa ar atong mangmangasa i. 50 A tasmani mang anuna warkuraila ir saran a lalaun tikin. A warwarala a atongi, e Tata i sune iau ono sur ar atongi.”
* 12:32 E Iesu i warwara larlar ana nuna minat saot na rakai kutus.