8
A gurarala la armuri taum o e Iesu
1 Lamur e Iesu i han taltal ana tatatnan hanua pa na nanatar a hananuala otleng, pa i warawai ana Wakak a Warwara ana matanitu ane God tetek la. La armuri taum ana nuna ning a bonot pa pisir naur a kakak a asaerla,
2 pa a gurarala otleng ning ka kepsen tar a motla kusun la, pa ka alangolango pas la kusun a tinsamanla. Ine a risanla: E Maria, ning a risana otleng e Magdalene, esaning mais a motla la purum kusuni,
3 pa e Joana a hane ane Kusa, i a ningnigo ana rumai ane Herot, pa e Susana, pa a galis otleng. A gurarala ne la nangan e Iesu pa anuna kakak a asaerla ana nunla na gongon ot.
A warwara larlar ana tena omomai
(Mt 13:1-17; Mk 4:1-12)
4 Ning a tnan kunum a tarai tagun a hananuala la hanot tetek e Iesu, i atong a warwara larlar tetek la mange,
5 “Ning a tena omomai i han sur ir sapran a pat a witla. Ning i sapran amon la, dingla la punga ting na ngas, pa tarai la papas saot onla, pa manila otleng la ien sen la.
6 Dingla otleng la punga ting na pukna ning i hatat, pa ning la gomo ot, la main, anasa a piu i sengsenge kol.
7 Dingla na patna otleng la punga tar ting na tinine rosrosla, pa a rosrosla la gomo taum onla, pa la rau alar pas la.
8 Dingla na patna otleng la punga tar ting na wakak a piu, la gomo pa la wai. Taktakai a rakai i suah takai a mar a wanala.”
Ning ka atong tar a warwara ne tetek la, i atongi mang, “Esining a talngana kaning, i wakak ning ir longor ono.”
9 Anuna kakak a asaerla la dekeni sur ir papak talapor ana warwara larlar ning ka atong tari.
10 Pa i atai la mange, “E God ka saran tar a tastasim ta mulo sur mulor talapor ana ututnala ana nuna matanitu, ning nating i kes kumna. Ika tetek a tarai masik a asaer la ana warwara larlarla, sur
‘lar oroi i pa bel lar oroi lalani,
lar longori pa bel lar talapor onoi.’ Ais 6:9
E Iesu i pak a warwara larlar ana tena omomai
(Mt 13:18-23; Mk 4:13-20)
11 “A kamkama warwara larlar ne i mange, a pat a wit i arlar ana warwara ane God.
12 A pat a witla ning la punga ting na ngas, la arlar ana tarai ning la longor a warwara, pa e Satan i hanot, pa i kepsen a warwara miting na balanla, sur gong la tortorot, pa gong di alaun la.
13 Pa a patnala ning la punga ting na pukna ning i hatat, la arlar ana tarai ning la longor a warwara, pa la tong akesi ana gasgas. Ika, belal wakirinla, anunla tortorot bel i tur bongnani, pa ning a larlar ir hanot tetek la, lar punga ka.
14 Pa a patnala ning la punga tar ting na tinine rosrosla, la arlar ana tarai ning la longor a warwara, ika ana nunla lalaun, a nuknuk kol, a gongonla, pa a gasgas tagun a lalaun anone, la rau alar a warwara, pa bel la wai.
15 Ika patnala ning la punga ting na wakak a piu, la arlar ana tarai ning a balanla i wakak pa i tostos. La longor a warwara, la tong rakrakai i, pa la tur rakrakai, tuk ning lar wai.
A warwara larlar ana lam
(Mk 4:21-25)
16 “Bel tik ir asot tar ta lam pa ir aroh alari ana paket, pa bel ir suah i otleng ting nahai a logo. Ir suah i ot saot na turtur ngasna, sur la ning lar kas, lar oroi a talaporna.
17 Pa ututnala rop ning i kes kumna, ir hanot talapor. Pa ututnala rop ning i kes mumun, lamur ir hanot talapor.
18 Mulor nuknuk wakak ana warwara ning mulo longori. Esining i tastasman ana warwara ane God, dir tabar ulaki ana galis. Ika, esining bel ta tastasman kaning tana, dir kepsen otleng siklik tastasman ning kaning tana.”
E tana e Iesu pa na tastasna
(Mt 12:46-50; Mk 3:31-35)
19 E tana e Iesu pa na tastasna la hanot sur lar oroi i, ika bel la tolsot sur lar han milau i, anasa a kunum a tarai la tur alar pasi.
20 Pa di atai e Iesu mang, “E tnam pa na tastasim, kanumo la tur tumo lapiu. La mang sur lar oroi u.”
21 Pa i atai la mang, “La ning la longor a warwara ane God pa la muri, la ning e nang pa na tastasikla.”
E Iesu i sairas a wuwu pa top
(Mt 8:23-27; Mk 4:35-41)
22 Ning a pukakiar e Iesu i atai anuna kakak a asaerla mang, “Dalar han lakai utumo na ris a puka tasi.” La kas uting na mon, pa la han.
23 Ning la dun amon ana sel, e Iesu i borbor duman. A rakrakai a wuwu i ragati tanla ting na tasi, pa a mon i songsongi, pa milau lar hirua.
24 A kakak a asaerla la han teteki, la amata i, pa la atai i mange, “Tena Asaer, Tena Asaer, dala kar hirua!” I kamtur, i sairas a wuwu pa a tatatnan top sur diar mamah. Dia manah, pa tasi i mililo rop.
25 Pa i atongi tana kakak a asaerla mang, “Kanahaia numulona tortorot?” La matmataut, pa la kulkulan, la deken artalai la mang, “Esi na ngas a barsan ne? I warkurai a wuwu pa top pa dia longor tana.”
E Iesu i kepsen a motla kusun ning a barsan
(Mt 8:28-34; Mk 5:1-20)
26 E Iesu taum ana nuna kakak a asaerla la sot ting na papar anuna tarai Gerasa, ning i kes to na ris a puka tasi tumo na papar Galili.
27 Ning e Iesu i purum kusun a mon, ning a barsan miting na hanua ning, a motla la solongi, i han barati. Ka bongnani, bel i pipis ta kaen, pa bel i kes otleng ana ta rumai, i keskes ka ting na kulamla ngasa minatla.
28 Ning i oroi pas e Iesu, i kukuk, pa i punga purum tar ting na naur a hana, pa i kukuk kol mange, “Iesu, a Nat e God a Leklek Kol, asaning ur toli hok? A nunung u, gong u akadik iau.”
29 I atongi larne, anasa e Iesu ka warwara rakrakai pas tetek a mot sur ir purum kusun a barsan ne. A galis a taem a mot i solsolongi. A tarai la sira tai alar a barsan ne, la sira dot naur a kuna pa naur a hana ana sen, ika i sira dat kutus la ka, pa mot i sira angongosi usaot na hanua bel.
30 E Iesu i dekeni mange, “Esi na risam?” Pa i kelesi mange, “A risak a liur a mot,” anasa a galis a mot la solongi.
31 Pa la nunung rakrakai e Iesu sur gong i sune kas la ana tnan tung ning bel ta araropna.
32 A tnan liur a boroi la hangan ting na mangir, pa a motla la nunung rakrakai e Iesu sur lar kas ana boroi. Pa i malmaling sen la.
33 A motla la purum kusun a barsan ning, pa la kas tar ana boroila. Pa boroila la liu purum uting na palis sur utumo na puka tasi, pa la dom rop.
34 La ning la tai alar a boroila, la oroi a utna ne, la dun ulak. La atatai ana utna ne ting na hanua anunlai, pa dingla na hananuala otleng.
35 Pa tarai la han sur lar oroi asaning i hanot. Ning la hanot tetek e Iesu, la oroi a barsan ning a motla la ka purum tar kusuni, i kes milau tar naur a hana e Iesu, ka pipis pas pa ka mananos ulak. Pa la matmataut.
36 La ning la oroi asaning e Iesu i toli, la atai a tarai mang e Iesu ka kepsen tar a motla kusun a barsan ning.
37 Pa taraila rop tagun a papar anuna Gerasala la nunung e Iesu sur ir han kusun la, anasa la matmataut kol. Lamur e Iesu i kas ulak ana mon pa i han.
38 A barsan ning a motla la purum kusuni, i nunung e Iesu sur diar armuri. Ika e Iesu i sune seni ka mang,
39 “Ur han uting na num a rumai, pa ur warwara ana tnan utna ning e God ka tol tari hom.” Pa i han, i warwara ting na hanua ning ana tnan utna ning e Iesu ka tol tari onoi.
E Iesu i alaun pas a nat e Jairus pa i alangolango pas ning a hane
(Mt 9:18-26; Mk 5:21-43)
40 Ning e Iesu i ulak, a kunum a tarai la gasgas pasi, anasa la rop la harnanai ka suri.
41 Ning a barsan, a risana e Jairus, a ningnigo tagun a rumai lotu, i hanot pa i punga tar ting na ris a hana e Iesu. I nunungi sur ir han usa na rumai ngasna,
42 anasa takai ka natna hane, ning anuna rau i ning a bonot pa pisir naur, milau ir mat.
Pa ning e Iesu i han, a tnan kunum a tarai la arsugut alar pasi.
43 Ning a hane tingia i sasam ana tinsaman a suluk. Ka sasam pas ning a bonot pa pisir naur a rau, ika bel tik i alangolango lar pasi.
44 I han tumo lamur ta e Iesu, pa i tuk a ris a tuka saket anunai, pa a suluk i manah kakat.
45 Pa e Iesu i deke mange, “Esining i tuk iau?” La rop la puai, e Pita i atongi mang, “Tena Asaer, a tnan kunum a tarai ne la tur talilis u pa la arsugut alar pas u.”
46 E Iesu i atongi mange, “Ning a halinla ka tuk tar iau, a kilangi mang a rakrakai i purum kusun iau.”
47 Lamur a hane i tasmani mang di ka pastetek pasi, pa i koloron ot, pa i punga salanigo ta e Iesu. Namatana taraila rop, i atai e Iesu ana kamkamna ning i tuk tari, pa i atai i otleng ning i langolango kakat.
48 Pa e Iesu i atai i mange, “Natuklik, anuma tortorot ka alangolango pas u. Ur han taum ana bal molmol.”
49 Ning e Iesu kaning ot i warwara, takai i hanot mito na rumai ane Jairus, a ningnigo tagun a rumai lotu, pa i atai i mange, “Gong u amolot a Tena Asaer. E natum hane ka mat.”
50 Ning e Iesu i longor a warwara ning, i atai e Jairus mange, “Gong u matmataut, ur tortorot ka, pa dir alaun ulak pasi.”
51 Ning i hanot ting na rumai, bel i malmaling pas tik sur ir kas taum onoi. I malmaling pas ka e Pita, e Jon pa e Jems, pa e taman a kaklik pa e tana otleng.
52 A taraila rop la kunkun pogol ana domos, pa e Iesu i atai la mang, “Gong mulo domos. A kaklik ning bel i mat, kaning i borbor duman ka.”
53 Pa la malani ka, anasa la tasmani mang ka mat.
54 Ika e Iesu i tong pas a kuna kaklik hane, pa i atai i mang, “Natuklik, ur tur.”
55 Pa inguna i ulak teteki, pa i kamtur kakat. Pa e Iesu i arsune sur ta utna ana hane lik ning sur ir ieni.
56 Tamana pa e tana dia kulkulan kol, pa e Iesu i sairas diau sur gong dia atai tik ana sa ning i hanot.