19
Gong tik i kutus a tinaulai
(Mk 10:1-12)
1 Ning e Iesu ka atong rop tar a warwarala ne, i han mitumo e Galili, utumo na papar Judia, ting na ning a ris a malum Jodan.
2 Pa a tnan kunum a tarai la muri, pa i alangolango pas a tinsamanla tingia.
3 Dingla na Parisaio la han teteki sur lar tohi. La dekeni mang, “I tostos arlar ana nundala a Warkuraila sur a barsan ir kepsen anuna hane na palai ta utna oros ka, o bel?”
4 I keles la mang, “I mangasa, belot mulo was a warwara ting na Buk Tabu? I atongi larne: Ana kamkama a akakes, a Tena Akakes ‘i akes a tarai, sur lar barsan pa lar hane,’ Stat 1:27
5 pa i atongi mang, ‘Ine a kamna ning a barsan ir han kusun e tamana pa e tana, pa ir kes taum o e anuna hane, sur diar hanot takai ka.’ Stat 2:24
6 Pa bel ma dia naur, dia takai ka. Asa ning e God ka kubus taum tari, gong ulak ma tik i kutusi.”
7 La deken ulaki mang, “Sur asa ning e Moses i saran a warkurai sur a barsan ir tumus a paka buk na kutus tinaulai pa ir sarani tetek anuna hane, sur dir kutus a keskes na tinaulai?”
8 I keles la mang, “E Moses i malmaling sen mulo sur mulor kepsen anumulo a gurarala, anasa a balamulo i rakrakai kol. Ika ana kamkama akakes bel i manglarne.
9 A atongi ta mulo, ning tik ir kepsen anuna hane ning bel i tol ta toltol laulau taum ana ta barsan masik, pa a barsan ning i taulai ulak ta hane, a barsan ning i tol a toltol laulau.”
10 Pa anuna kakak a asaerla la atongi tana mang, “Ning i manglarning tetek ta barsan pa anuna hane, i wakak sur gong tik i taulai.”
11 I keles la mang, “Belsur a tarai rop lar tolsoti sur lar kibas a warwara ne. La ka ning e God ka saran tar a rakrakai tanla.
12 Urmatana kamkamna ning a tarai bel lar taulai. Dingla na tarai di agon la lar otning. Dingla na tarai, a tarai alaulau la, pa dingla na tarai otleng, bel lar taulai anasa la molot ana titol ana matanitu misaot na langit. Esi ning i tol asoti, ir mur a warwara ning.”
E Iesu i suah naur a kuna saot on kakakla
(Mk 10:13-16; Lk 18:15-17)
13 Di ben kakakla tetek e Iesu sur ir suah naur a kuna saot onla pa ir nunung onla. Ika anuna kakak a asaerla la kepsen la.
14 E Iesu i atongi mang, “Mulor noren sen kakakla sur lar han tetek iau. Gong mulo sairas la, anasa a matanitu misaot na langit anunla ning la manglarne.”
15 Ning ka suah tar naur a kuna saot onla, i han mitingia.
A tena gongon a barman
(Mk 10:17-31; Lk 18:18-30)
16 Ning a barman i han tetek e Iesu, pa i dekeni mang, “Tena Asaer, esi na wakak a utna ning ar toli sur ar kibas a lalaun tikin?”
17 E Iesu i kelesi mang, “Sur asa ning u deken iau ana sa ning i wakak? Takai sot ka i wakak. Ning u mang sur ur kibas a lalaun tikin, ur longor ana warkuraila.”
18 Pa i dekeni mang, “Esi na warkuraila?” E Iesu i kelesi mang, “ ‘Gong u umkol tik, gong u tol a toltol laulau ana ta hane anuna tik o ta barsan anuna tik, gong u kinkinau, gong u artitiu asasongo,
19 ur hanrawai e tamam pa e tnam,’ Kisim Bek 20:12-16
pa ‘ur mang sur a halim larning u mang sur u ot.’ ” Liwai 19:18
20 A barman ning i atai i mang, “A warkuraila rop ning ia ka mur sot pasi. Asa ulak ma ar toli?”
21 E Iesu i kelesi mang, “Ning u mang sur ur tostos momol, ur han pa ur siuran sen anuma gongonla rop, pa a mani taguni, ur tabar a kapan a tarai ono. Ning ur toli larning, anuma wakak a gongon kanisaot na langit. Lamur ur han ute pa ur mur iau.”
22 Ning a barman i longor a warwara ne, i han ana bal maris, anasa anuna gongon i galis kol.
23 Pa e Iesu i atongi tana nuna kakak a asaerla mang, “A atong momoli ta mulo, i ngangaten kol tetek a tena gongon sur ir kas ting na matanitu misaot na langit.
24 A atongi otleng ta mulo mang, ir ngangaten sur a kamel ir kas ana mosol a sur na susuk, ika, i ngangaten kol sur a tena gongon ir kas ana matanitu ane God.”
25 Ning anuna kakak a asaerla la longori, la kulkulan kol pa la atongi mang, “Ning i manglarning, esi ma ning dir alauni?”
26 E Iesu i tai tetek la pa i atongi mang, “A tarai bel lar tolsot pasi, ika e God sot ka ir tolsot pas a ututnala rop.”
27 E Pita i kelesi mang, “Oroi i, mila ka han kusun anumila na ututnala rop, pa mila mur u. Asa ning milar kibasi lamur?”
28 E Iesu i atongi tanla mang, “A atong momoli ta mulo, ning dir atona a ututnala rop, a Nat a Barsan ir kes na king ana nuna keskes na matatar. Pa mulo ning mulo ka mur iau, mulor kes ana ning a bonot pa pisir naur a keskes a king, pa mulor warkurai ning a bonot pa pisir naur a mangis a tarai Israel.
29 Pa la rop ning la ka han kusun anunla na rumai, o kusun a tastasinla, taraila pa gurarala, o kusun na tamtamanla, o na kabatnanla, o na natnatunla, o kusun anunla na piu, anasa la anuki, dir saran a marmar a utna larne tanla, pa lar kibas otleng a lalaun tikin.
30 Ika a galis ning la nigo anone, lar mur, pa la ning la mur anone, lar nigo.”