2
A tena tastasmaila la artabar tetek e Iesu
Di agon e Iesu tumo na hanua Betlihem ting na papar Judia, ana rau ning e Herot i king. Lamur dingla na tena tastasmaila tagun a nangnangla, la han mitingia ana pukna ning a kamis i pusa ot ia, pa la hanot saot e Jerusalem. Pa la deke mang, “Kanaha a kaklik ning di agoni, sur ir king anuna tarai Juda? Anasa mila oroi anuna nangnang ting na pukna ning a kamis i pusa ot ia, pa ine mila han ute sur milar lotu teteki.”
Ning e king Herot i longori, a nuknukna i talar pa nuknuk a tarai Jerusalem rop otleng. Lamur i ben taum rop pas a leklek a tena artabarla tetek e God pa tena asaerla tagun a warkurai. Pa i deken la mang, “A Karisito ning e God ir sune i, dir agoni tahaia?” La kelesi mang, “Tumo e Betlihem ana papar Judia, anasa a propet i ka tumus tari mang,
‘Ika u e Betlihem ana piu ana mangis a tarai Juda,
Bel u natarna kol tana ningnigola anuna mangis a tarai Juda,
Anasa a ningnigo ir hanot tagun u,
ning ir nigon anuka tarai Israel arlar ana tena tai alar anuna sipsipla.’ ” Mika 5:2
Lamur e Herot i arsune kumnan pas a tena tastasmaila tagun a nangnangla sur ir talapor pas tanla mang, nangse momol ning a nangnang i hanot. I sune sen la utumo e Betlihem ana warwara larne, “Mulor han pa mulor tai wakak sur a kaklik. Pa ning mulo ka pastek pasi, mulor atai iau, sur iau maleng ar han pa ar lotu teteki.”
Ning la ka longor tar a king, la han. La oroi ulak pas a nangnang ning la ka oroi tari ting na pukna ning a kamis i pusa ot iai. I nigon amon la tuk ning i tur saot na pukna ning a kaklik kaningia. 10 Ning la oroi a nangnang ning, la kilang a tnan gasgas. 11 La kas ting na rumai pa la oroi pas a kaklik, pa e tana e Maria. La kes ana bokona hanla pa la lotu tetek a kaklik. Lamur la sapang pas anunla na bek pa la tabari ana artabarla ne: a gol, pa a paura di tuni pa sasawana i toboh wakak ning di atongi ana insens, pa a torok ning i toboh wakak otleng ning di atongi ana mira. 12 E God ka atumarang tar la ana reresa, sur gong la ulak tar sur e Herot. Pa la ulak sur anunla a hanua ana maskan a ngas kama.
A tinan kumna utumo e Ijip
13 Ning la ka han tar, a angelo ana Leklek i hanot tetek e Josep ana reresa pa i atongi mang, “Ur kamtur, ur ben pas ditana, pa mutol ar liu kumna utumo e Ijip. Pa mutol ar kes tumo ia, tuk ning ar atai ulak u, anasa e Herot ir tai sur a kaklik sur ir umkoli.” 14 Pa i kamtur, i ben pas ditana ana morom, pa ditol han utumo e Ijip. 15 Ditol kes tingia tuk ning e Herot i mat. Ana nunditol a keskes tingia, di tolsot pas a warwara anuna Leklek, ning a propet ka warwara nigo tar ono larne, “A kabah pas a natuklik mitumo e Ijip.” Hosea 11:1
16 Ning e Herot i oroi i mang a tena tastasmaila tagun a nangnangla la ka asongo tari, i balakut kol pa i arsune sur dir umkol arop sen a kakak barsanla tumo e Betlihem pa ting na hananuala otleng ning la kes milau. I saran a warkurai sur dir umkol la ning naur a rau anunla, pa la otleng ning belot naur a rau anunla, anasa a tena tastasmaila la ka atai tari ana rau anuna kaklik. 17 Pa di ka tolsot pasi bot a warwara ning e propet Jeremaia i warwara nigo tar onoi mang,
18 “Tumo e Rama di longor a elngen takai,
a tintinangis pa agaia,
E Rakel i domos na natnatnala,
anasa la ka mat rop,
pa bel di tolsot pasi su dir amanahi.” Jer 31:15
E Josep la tamana la ulak utumo e Nasaret
19 E Herot ka mat, pa angelo anuna Leklek i hanot tetek e Josep ana reresa tumo e Ijip. 20 Pa i atongi tana mang, “Ur kamtur, ur ben pas ditana, pa mutol ir han utumo e Israel, anasa la ning la mang sur lar umkol a kaklik, la ka mat.” 21 Lamur i kamtur, i ben pas ditana, pa ditol han utumo e Israel. 22 Ika i longori mang, e Akelaus i keles e tamana e Herot, sur i maleng ir hanot a king tumo na papar Judia, pa e Josep i matmataut sur ir han utumo e Judia. Pa e God i sairas tari ana reresa, sur gong ditol han utumo na papar Judia. Pa ditol han kama utumo na papar Galili. 23 Pa ditol han pa ditol kes ana hanua a risana e Nasaret. Ana anunditol a keskes tingia, di tolsot pas a warwara anuna propetla mang, “Dir atongi mang i a te Nasaret.”