26
La warwara taum pas sur lar umkol e Iesu
(Mk 14:1-2; Lk 22:1-2; Jn 11:45-53)
Ning e Iesu ka atong arop tar a warwarala ne, i atai anuna kakak a asaerla mang, “Mulo ka tasmani ning naur a pukakiar ir rop, dir turpas a tnan pukakiar a lotu na Hanlakai, pa dir saran tar a Nat a Barsan sur dir sai ahati saot na rakai kutus.”
Ana tuka kamis ot ning a leklek na tena artabarla tetek e God pa na ningnigo anuna tarai, la kes taum ting na tnan rumai ane Kaiapas, a ningnigo na tena artabar. La warwara taum pas sur lar tong kumnan e Iesu, pa lar umkoli. La atongi mang, “Gong dala toli ana tnan pukakiar a lotu, sakana a taraila lar akamtur ta harum.”
Ning a hane i pek a polo tomtoboh saot na pukul e Iesu
(Mk 14:3-9; Jn 12:1-8)
E Iesu i kes tumo e Betani, ting na rumai ane Saimon, esaning nating i sasam ana lepra. Ning a hane i han tetek e Iesu ana polo na tomtoboh, a matana i abit kol, kaning na koto ning di toli ana hat. I peki saot na pukul e Iesu, ning kaning ot e Iesu i hangan. Ning a kakak a asaerla la oroi i, la balakut kol ono, pa la atongi mang, “Sur asa ning i pek orosan a polo na tomtoboh ne? Sur asa ning bel di siuran pasi sur al galis a mani sur dir tabar na kapan a tarai ono?”
10 E Iesu ka tasman asaning la warwara ono, pa i atai la mang, “Sur asa ning mulo saran a mamahat tetek a hane ne? I ka tol tar a wakak a titol hok. 11 A kapan a taraila lar laun bolbolos taum ot o mulo. Ika iau, bel ar kes bolbolos napirimulo. 12 I pek tar a polo na tomtoboh ne te na palaok sur ir sang iau sur a pukakiar ning ar mat pa dir akas a minatik ting na kulam a minat. 13 A atong momoli ta mulo, ana hananuala te na rakrakan hanua, ning dir warawai ana Wakak a Warwara tingia, dir patuai otleng ana sa ning a hane ne ka tol tari, sur dir nuk akes pasi.”
E Judas i malmaling sur lamur ir saran tar e Iesu tetek a ningnigola anuna tarai Juda
(Mk 14:10-11; Lk 22:3-6)
14 E Judas Iskariot, a halin ning a bonot pa pisir naur a kakak a asaer, i han tetek a leklek na tena artabarla tetek e God. 15 Pa i deken la mang, “Ning ar saran tar e Iesu tetek mulo, asa mulor tokom iau ono?” Pa la saran tar natol a bonot a silwa tana. 16 Turpasi ana pukakiar ning i nuknuk sur ta wakak a pukakiar ning ir saran tar e Iesu tetek la.
E Iesu taum ana nuna kakak a asaerla la ien a utna na Hanlakai
(Mk 14:12-21; Lk 22:7-14, 21-23; Jn 13:21-30)
17 Ana ningnigo na pukakiar ana tatatnan pukakiar a lotu na bret ning belal is ono, na kakak a asaer la han tetek e Iesu, pa la dekeni mang, “U mang sur milar sang andala a utna sur a tnan pukakiar a lotu na Hanlakai tahaia?” 18 Pa i keles la mang, “Mur han kas usaot e Jerusalem, mur barat ning a barsan, pa mur atai i mang, ‘A Tena Asaer i atongi mang: Anuk a pukakiar ka milau. Mila taum ana nuk a kakak a asaerla milar asilang a tnan pukakiar a lotu na Hanlakai ting na num a rumai.’ ” 19 Naur a kakak a asaer dia tol ot asaning e Iesu ka atong tari tandiau, pa dia sang a utna na Hanlakai.
20 Ning ka rah, e Iesu taum ana nuna ning a bonot pa pisir naur a kakak a asaer la kes ana utna na hangan. 21 La hangan pa i atongi mang, “A atong momoli ta mulo, takai o mulo ir saran tar iau na kun a hiruala.” 22 La bal maris kol pa la rop taktakai la tur pas a deke teteki mang, “Leklek, belsur iau gepi?” 23 E Iesu i keles la mang, “Esaning mia amurung taum amiau naur a dia bret te na besen, i ning ir saran tar iau na kun a hiruala. 24 A Nat a Barsan ir hirua arlar larot ning di ka tumus tari ting na Buk Tabu. Ika ir laulau kol tetek a barsan ning ir saran tari tetek a hiruala. Ir wakak teteki ning bel dir agoni.” 25 E Judas, esaning ir saran tari tetek a hiruala, i dekeni mang, “Tena Asaer, belsur iau gepi?” I kelesi mang, “U ka.”
A ararop a utna na hangan anuna Leklek
(Mk 14:22-26; Lk 22:14-20; 1Kor 11:23-25)
26 Ning kaning ot la hangan, e Iesu i kibas pas a bret, i atong wakak pas ono, i tibiki, pa i tabar anuna kakak a asaerla ono, pa i atongi mang, “Mulor kibasi pa mulor ieni. Ine a palaok.” 27 Lamur i kibas a kap, i atong wakak pas ono pa i sarani tanla. I atongi mang, “Mulo rop mulor gang ono. 28 Ine a sulukik, ning i amomol tar a kunubus ning i dat taum tar e God pa a tarai. A sulukik ne, i tapek sur ir kepsen na toltol laulau anuna galis a tarai. 29 A atongi ta mulo mang, bel ar gang ulak al wain, tuk ning dalar gang a tona wain saot na matanitu ane Tata.”
30 Ning la ka saken tar a saksak a lotu, la han usaot na Mangir Oliw.
E Iesu i warwara nigo tar o e Pita mang ir puain seni
(Mk 14:27-31; Lk 22:31-34; Jn 13:36-38)
31 E Iesu i atongi tanla mang, “Mese na morom, mulo rop mulor han kusun iau. Anasa di ka tumus tari ting na Buk Tabu mang,
E God i atongi mang, ‘Ar um a tena tai alar ana sipsipla,
pa na sipsip lar liu sarara.’ Sekaraia 13:7
32 Ika ning ia ka kamtur ulak kusun a minat, ar nigo utumo e Galili.” 33 E Pita i atai i mang, “Ning la rop lar han kusun u, ika iau bel.” 34 E Iesu i kelesi mang, “A atong momoli tam, mese na morom, ning a kakaruk belot ir kurkurakuk, ur puai munatol mang bel u tasman iau.” 35 E Pita i atai i mang, “Belar puain sen u. Ning iau otleng ar hirua taum hom, i wakak ka.” Pa kakak a asaerla rop la atongi otleng larning.
E Iesu i nunung tumo e Getsemani
(Mk 14:32-42; Lk 22:39-46)
36 E Iesu taum ana nuna kakak a asaerla la hanot ting na pukna a risana e Getsemani, pa i atai la mang, “Mulor kes ka te, pa iau ar han utumo, sur ar nunung.” 37 I ben pas e Pita taum ana naur a nat e Sebedi. I turpas a bal maris pa i mamahat kol a nuknukna. 38 I atai ditol mang, “Anuk a lalaun i mamahat kol ana bal maris, milau ar mat ono. Mutol ir kes ka te, pa mutol ir koikoi tar taum hok.” 39 I han siklik tar usa lanigo, i punga tuntudu tar ting na piu, pa i nunung mang, “Tata, ngandek ning ir sot, ur kibas sen a kap a mamahat ne kusun iau. Ika gong u mur a nuknukik, ur mur ot a nuknukim.”
40 I ulak tetek natol a kaklik a asaer, pa i oroi ditol, ditol ka borbor duman. I deken e Pita mang, “I mangasa, bel mutol tolsot sur mutol ir koikoi taum hok on ta tuka kamis lik ka? 41 Mutol ir koikoi, pa mutol ir nunung, sur gong mutol punga ana alam. A ingumutol i mang sur ir longor, ika a palaomutol i ngoro.”
42 Munaur a tinan ulak i han kusun ditol, pa i nunung mang, “Tata, ning bel i sot sur ur kibas sen a kap a mamahat ne kusun iau, i wakak ka sur ar kilangi. Ar muri ot a nuknukim.” 43 Ning i ulak, i oroi ditol, ditol ka borbor duman ulak, anasa a matanditol ka sulam kol. 44 Pa i han ulak kusun ditol, i munatol ana nunung, pa i paliu ulak a nunung ning ka atong tari kaba.
45 Lamur i ulak tetek natol a kaklik a asaer, i atai ditol mang, “Mutol ir borbor liklik kama pa mutol ir manah? Oroi i, a tuka kamis ka milau, ning dir saran tar a Nat a Barsan uting na kun a tena laulaula. 46 Mutol kamtur, dala kar han! Oroi, a barsan ning ir saran tar iau uting na kun a hiruala, ka hanot.”
Di dat pas e Iesu
(Mk 14:43-50; Lk 22:47-53; Jn 18:3-12)
47 Ning e Iesu kaning ot i warwara, e Judas, a hala ning a bonot pa pisir naur a kakak a asaer, i hanot, la taum ana kunum a tarai. La los na liwan a harum pa na nalnal. A leklek a tena artabarla tetek e God pa na ningnigo anuna tarai, la sune sen la. 48 Esaning ir saran tar e Iesu uting na kun a hiruala ka atai nigon tar a kunum a tarai ana akinalang ning ir toli larne, “Esaning ar goro a ris a pahana, i ning. Mulor tong akesi.”
49 Ono otning e Judas i han tetek e Iesu pa i atongi mang, “Wakak a morom, Tena Asaer!” Pa i goro i. 50 E Iesu i kelesi mang, “Halik, ur tol ka asaning u han ute suri.” Pa a taraila ning, la han tetek e Iesu, la tong akes pasi pa la dati.
51 Takai onla ning la han taum o e Iesu, i dat pas anuna liwan a harum, pa i ting kutus sen a talngan a tena titol oros anuna ningnigo na tena artabar tetek e God. 52 E Iesu i atai i mang, “Akas ulak anuma liwan ting na ngasna, anasa la rop ning la arting taum ana liwanla na harum, lar hirua taum ana liwanla na harum. 53 I mangasa, u nuki mang, bel ar tolsot sur ar nunung e Tata sur al galis a rip a angelo, pa ono otne ir sune sen la tetek iau? 54 Ika, ning ar toli larne, bel dir tolsot pas a warwarala ting na Buk Tabu ana ututnala ning i sot sur dir toli hok.”
55 Ana taem ning, e Iesu i atai a kunum a tarai mang, “I mangasa, ngandek iau a tena harum pa a tena kinkinau, sur i ma ne mulo hanot taum ana liwanla na harum pa na nalnal sur mulor tong akes iau? Ana pukakiarla rop a sira kes tingui na woroh na rumai a artabar, a sira asaer a taraila, pa bel mulo tong akes iau. 56 Ika a ututnala rop ne i hanot sur dir tolsot pas na tumtumus anuna propetla.” Lamur anuna kakak a asaerla rop la liu sarara pas kusuni.
E Iesu i tur ana warkurai na matan a tarai a kiwung
(Mk 14:53-65; Lk 22:54-55, 63-71; Jn 18:13-14, 19-24)
57 La ning la ka tong akes pas e Iesu, la beni uting na rumai ane Kaiapas a ningnigo na tena artabar tetek e God. Na tena asaer tagun a warkurai pa a ningnigola kaning la kes taum. 58 E Pita i mur amon e Iesu, ika i bakbak ot kusuni, sur uting na pukna anuna ningnigo na tena artabar tetek e God. I kas uting na pukna ning, pa i kes taum ana tena tai alar sur ir oroi asaning dir toli o e Iesu.
59 A leklek a tena artabarla tetek e God, taum ana tarai a kiwung rop, la tai sur ta asasongo na warwara ana ta laulau a utna ning e Iesu ka tol tari, sur lar tiwi ono, pa lar umkoli. 60 A galis a tena asasongo la hanot, ika bel la pastek ta utna ning lar tiwi ono. Naur ning dia hanot murmur, 61 dia atongi mang, “A barsan ne i atongi mang, ‘Ar regen sen a rumai a artabar ane God, par tol ulak pasi ana natol a pukakiar ka.’ ”
62 A ningnigo na tena artabar tetek e God i tur, pa i deken e Iesu mang, “I mangasa, bel ur keles la? Asa ning ur keles a warwarala na artitiu ne ono?” 63 Ika e Iesu bel i warwara. A tena artabar ning, i atongi tana mang, “Ana risana e God, a lalaun na, ur atai mila ning u a Karisito a Nat e God, o bel.”
64 E Iesu i kelesi mang, “I ot ning u atongi. Pa atai mulo mang, turpasi anone, mulor oroi a Nat a Barsan ir kes ana sot a kuna e God, esaning i rakrakai kol, pa lamur mulor oroi i ning ir hanot ana didia bakutla misaot na langit.” 65 A ningnigo na tena artabar i balakut pa i silir anuna kaen pa i atongi mang, “Onone ka atong laulau e God. Dala mang ulak sur al warwara na artitiu sur asa? Mulo ka longor tar anuna warwara laulaula o e God. 66 Asa mulo nuki?” Pa la kelesi mang, “I wakak sur ir hirua.”
67 Pa la namis a patarna, pa la tubuli, pa dingla na tarai la pasari, 68 pa la atai i mang, “Karisito, u a propet, ur atai mila, esining i tubul u.”
E Pita i puain sen e Iesu
(Mk 14:66-72; Lk 22:56-62; Jn 18:15-18, 25-27)
69 Ning e Pita kaning i kes tar tumo lapiu ting na rumai ning, ning a hane, a tena titol i han teteki pa i atai i mang, “U otleng taum o e Iesu a te Galili.” 70 Ika i puai na matan la rop, i atongi mang, “Bel a tasman asaning u warwara ono.” 71 Lamur i han utumo napir a taman a woroh, ning a hane maleng i oroi pasi, pa i atai a taraila tingia mang, “A barsan ne, dia ma e Iesu a te Nasaret.” 72 Pa i puai ulak, i lele mang, “A momolna, bel a tasman a barsan ning.”
73 Lamur siklik, la ning la tur tingia la han tetek e Pita, la atai i mang, “A momolna, u otleng ning a halinla. Anasa mila longor lalan u ka ana num a liu a warwara.” 74 Pa i lele tetek la, i atongi mang, “E God ir warkurai laulau iau ning ar asongo. Bel a tasman a barsan ning.” Pa ono otning a kakaruk i kurkurakuk. 75 Pa e Pita i nuk pas a warwara ning e Iesu ka atong tari tana mang, “Ning a kakaruk belot ir kurkurakuk, ur puai munatol mang, bel u tasman iau.” Pa i purum kusun a pukna ning, pa i tangis koli.