13
བཱར༌ན༌བས༌ དང༌ ས༌འུལ༌ ཆོས༌ཤད༌ཅེས༌ལ༌ སྐོའ༌ ཛདས༌།
13:1 ནེ༌ 3
1 ཨན༌ཏི༌ཡོག༌གི༌ ཆོས༌ཚོགས༌སི༌ ནང༌ང༌ ལུང༌སྟོན༌པ༌ དང༌ ལོབ༌པོན༌ གུན༌ ཡོད༌པིན༌, ཁོང༌གུན༌ནི༌ ཕྲོའ༌ བཱར༌ན༌བས༌, ཤི༌མི༌འོན༌ མི༌ནག༌ ཟེར༌ཁན༌, ཀི༌རིན༌པ༌ ལུ༌ཀེ༌འུས༌, མ༌ན༌ཧེན༌ ༼གྱལ༌པོ༌ ཧེ༌རོ༌དཱ༌ ཉམ༌པོ༌ ལྡན༌ཁན༌༽ དང༌ ས༌འུལ༌ ཡོད༌པིན༌།
2 ཁོང༌གུན༌ ཉེ༌ནས༌ ཡང༌ན༌ རོ༌ཟཱ༌ དུགས༌ཏེ༌ གཙོ༌བོའ༌ ཅོལ༌ཨིན༌ ཡོད༌ ཟ༌ནེ༌ དམ༌པའེ༌ ཐུག༌ཉིད༌དི༌ ཁོང༌གུན༌ལ༌ མོལས༌, "ངའེ༌ བོད༌ཁན༌ནི༌ ལས༌ ཅོ༌ཅེས༌ལ༌ བཱར༌ན༌བས༌ དང༌ ས༌འུལ༌ ཉིས༌ཀོ༌ སྐོས༌།"
3 ཁོང༌གུན༌ ཉེ༌ནས༌ལ༌ དུགས༌ ཡང༌ མོས༌ལམ༌ ཞུས༌ཏེ༌ ཁོང༌ ཉིས༌ཀོའེ༌ཀ༌ ལག༌པ༌ བོར༌ཏེ༌ ཁོང༌གུན༌ ལམ༌ཅུག༌ག༌ ཛདས༌།
ཀིབ༌རུས༌ལ༌ ཆོས༌ ཤདས༌།
13:4 ནེ༌ 12
4 དམ༌པའེ༌ ཐུག༌ཉིད༌ གྱུད༌ཏེ༌ ལམ༌ཅུག༌ག༌ ཛད༌ཁན༌ནི༌ བཱར༌ན༌བས༌ དང༌ ས༌འུལ༌ སེ༌ལུ༌ཀི༌ཡཱ༌ ཟེར༌ས༌ ལེབ༌ ཡང༌ ཏེ༌ཀ༌ནེ༌ ཁོང༌གུན༌ གྲུ༌ཟིང༌ང༌ ཞོན༌ཏེ༌ ཀིབ༌རུས༌ ཟེར༌ས༌ སྐྱོདས༌།
5 ཁོང༌གུན༌ ས༌ལ༌མིས༌ལ༌ ལེབ༌བ༌ཅིག༌, ཏེ༌རུ༌ ཡ༌ཧུ༌དཱ༌པའེ༌ དུ༌ཁང༌གུན༌ནི༌ ནང༌ང༌ དཀོན༌མཆོག༌གི༌ བཀའ༌ ཤདས༌། ཡོ༌ཧཱ༌ནན༌ མར༌ཀུས༌ ཁོང༌གུན༌ ཉམ༌པོ༌ རོགས༌ ཅོའ༌ལ༌ ཡོངས༌ཏེ༌ ཡོད༌པིན༌།
6 ཁོང༌གུན༌ ཏེ༌ ཚོ༌ལིང༌ངི༌ , གྲོང༌ཁྱེར༌ནེ༌ གྲོང༌ཁྱེར༌ གྱུད༌ཏེ༌ པ༌ཕོས༌ ཟེར༌ས༌ ལེབ༌། ཏེ༌རུ༌ ཁོང༌གུན༌ལ༌ ཡ༌ཧུ༌དཱ༌པའེ༌ ལུང༌སྟོན༌པ༌ ཟུས༌མ༌, བར༌ཡེ༌ཤུ༌ ཟེར༌ཁན༌ནི༌ ཇའ༌དུ༌ ཅོ༌ཁན༌བོ༌ ཐུག༌།
7 ཁོ༌ ཏེ༌ ཡུལ༌ལི༌ ཀའ༌ལོན༌ སེར༌གི༌འུས༌ པ༌འུ༌ལུས༌སི༌ ཡོག༌ག༌ ལས༌ ཅོ༌ཁན༌ཞིག༌ ཨིན༌པིན༌། ཏེ༌ རིག༌པ༌ཅན༌ ཀའ༌ལོན༌བོའེ༌, བཱར༌ན༌བས༌ དང༌ ས༌འུལ༌ བོད༌ཏེ༌ ཁྱོངས༌, ཅིའ༌ཟེར༌ན༌ ཁོའ༌ དཀོན༌མཆོག༌གི༌ བཀའ༌ ཉན༌ཅེས༌སི༌ དོད༌པ༌ ཡོད༌པིན༌།
8 ཨིན༌ནའང༌ ཨེ༌ལི༌མཱའས༌སི༌ ༼གིརིས༌སི༌ སྐད༌དི༌ ནང༌ང༌ ཇའ༌དུ༌ ཅོ༌ཁན༌ལ༌ ཟེར༌ར༌ནོག༌༽ ཁོང༌གུན༌ནི༌ གྱབ༌གལ༌ ཅོས༌ཏེ༌ ཀའ༌ལོན༌ སེར༌གི༌འུས༌ལ༌ ཏད༌པ༌ ཅོ༌ཅེས༌ནེ༌ སྒག༌ཅེས༌སི༌ རྩོན༌གྲུས༌ ཅོས༌།
9 ཏེ༌ནེ༌ ས༌འུལ༌ ཀ༌བོའ༌ པ༌འུ༌ལུའང༌ ཞུའད༌པིན༌, དམ༌པའེ༌ ཐུག༌ཉིད༌དི༌ གངས༌ཏེ༌ ཇའ༌དུ༌ ཅོ༌ཁན༌བོའ༌ མིག༌ གྱངས༌ཏེ༌ ལྟས༌ ཡང༌ མོལས༌,
10 "ཝ༌, རྡུད༌གུན༌ནི༌ གོ༌བའེ༌ གྱུད༌ དང༌ དྲང༌པོའེ༌ གྲ༌འོ༌, ཁྱོ༌རང༌ངི༌ ནང༌ང༌ གོབ༌སྐོར༌ཅེས༌ དང༌ ངན༌སེམས༌ ཚང༌མ༌ གངས༌ཏེ༌ དུག༌། ཁྱོ༌རང༌ངི༌ གཙོ༌བོའེ༌ ལམ༌ དྲང༌པོ༌ ཨིན༌ཁན༌བོ༌ དྲང༌པོ༌ མ༌ནོག༌ ཟེར༌ཅེས༌པོ༌ མི༌ཕང༌ང༌?
11 ཏ༌ ལྟོས༌, དཀོན༌མཆོག༌གི༌ ཆག༌ ཁྱོ༌རང༌ངི༌ གྱབ༌གལ༌ལ༌ ཨིན༌། ཁྱོ༌རང༌ ཞ༌རའ༌ གྱུར༌ཏེ༌ ཏུས༌བན༌ཤིག༌ ཉི༌མ༌ མི༌ཐོང༌" མོལ༌པ༌, ཏེན༌ན༌མལ༌ལ༌ ཁོའེ༌ དུན༌ལ༌ མུན༌གྲིག༌ སོང༌, ཡང༌ སུ༌ཞིག༌གི༌ ཁོའ༌ ལག༌པ༌ ཐམས༌ཏེ༌ ཁྱེར༌ཅེས༌ལ༌ ཁོའེ༌ འི༌ངོ༌ འ༌ངོའ༌ མུན༌ཉུག༌ ཏངས༌།
12 ཀའ༌ལོན༌ནི༌ བྱུང༌ཁན༌བོ༌ ཐོང༌ཏེ༌ ཡེ༌ཤུའི༌ཀ༌ ཏད༌པ༌ ཅོས༌, ཅིའ༌ཟེར༌ན༌ གཙོ༌བོ༌ ཡེ༌ཤུའི༌ སྐོར༌ལ༌ ལབ༌ཞ༌གུན༌ ཚོར༌ཏེ༌ ཁོ༌ ཧ༌ལས༌།
པི༌སིད༌ཡཱ༌ ཡུལ༌ལི༌ གྱལ༌ས༌ ཨན༌ཏི༌ཡོག༌།
13:13 ནེ༌ 52
13 ཏེ༌ནེ༌ པ༌ཕོས༌ གྱལ༌ས༌ནེ༌ པ༌འུ༌ལུ༌ ཁོང༌ངི༌ ཕྲོ༌པ༌གུན༌ ཉམ༌པོ༌ གྲུ༌ཟིང༌ང༌ ཞོན༌ཏེ༌ པམ༌ཕིལ༌ཡཱ༌ ཡུལ༌ལི༌ ནང༌ང༌ ཡོད༌ཁན༌ནི༌ པེར༌ག༌ ཟེར༌སའེ༌ ནས༌ས༌ ལེབ༌། ཏེ༌རུ༌ པ༌འུ༌ལུ༌ དང༌ བཱར༌ན༌བས༌ གུན༌ བོར༌ཏེ༌ ཡོ༌ཧཱ༌ནན༌ མར༌ཀུས༌ ཡེ༌རུ༌ཤ༌ལེམ༌མ༌ ལོགས༌ཏེ༌ སོང༌,
14 ཨིན༌ནའང༌ པ༌འུ༌ལུ༌ དང༌ བཱར༌ན༌བས༌ པེར༌ག༌ནེ༌ བིང༌ཏེ༌ པི༌སིད༌ཡཱ༌ ཟེར༌སའེ༌ ཡུལ༌ལི༌ ཨན༌ཏི༌ཡོག༌ གྱལ༌ས༌ སྐྱོདས༌།
ཤབ༌བད༌དི༌ ངལ༌ཚོའེ༌ ཞག༌ག༌ ཡ༌ཧུ༌དཱ༌པའེ༌ དུ༌ཁང༌ང༌ སྐྱོད༌ཏེ༌ སེ༌ཀ༌ ཞུགས༌།
15 ཡང༌ བཀའ༌ཁྲིམས༌ དང༌ ལུང༌སྟོན༌པའེ༌ སྤེ༌ཆ༌ གུན༌ སིལ༌ ཚར༌ར༌ཅིག༌, ཡ༌ཧུ༌དཱ༌པའེ༌ དུ༌ཁང༌ངི༌ འུ༌སྐྱོང༌གུན༌ནི༌ ཁོང༌ ཉིས༌ཀོའ༌ ཟེརས༌, "སྤུན༌གུན༌, གལ༌ཏེས༌ ཁྱོ༌ཞ༌གུན༌ནི༌ མི༌ཚོགས༌ལ༌ སྤོས༌པའེ༌ བཀའ༌ ཤད༌ཅེས༌ ཡོད༌ན༌ ཤད༌ད༌ ཛད༌།"
16 ཏེ༌ནེ༌ པ༌འུ༌ལུ༌ ཞངས༌ཏེ༌ ཡང༌ ལག༌པ༌ ཉམ༌པོ༌ ཅུབ༌ཅད༌ཏེ༌ དུག༌ མོལས༌, "ཨིས༌ར༌ཨེལ༌པ༌གུན༌ དང༌ དཀོན༌མཆོག༌གི༌ ཇིགས༌སི༌ ནང༌ང༌ གྲུལ༌ཁན༌ ཡ༌ཧུ༌དཱ༌པ༌ མན༌ཁན༌གུན༌ ངའེ༌ སྤེ༌ར༌ ཉོན༌ཤིག༌།
17 ཨིས༌ར༌ཨེལ༌པའེ༌ ཅོལ༌ཁན༌ནི༌ དཀོན༌མཆོག༌གི༌ ང༌དང༌ངི༌ ཕ༌མེས༌པོ༌གུན༌ ལྡམ༌མ༌ ཛདས༌། ཨི༌ཇིབ༌ ཡུལ༌ལི༌ ནང༌ང༌ ཡོད༌ ཟ༌ནེ༌, ཁོང༌གུན༌ནི༌ ཀྲངས༌ཀ༌ གྱས༌ཏེ༌ ཁྱུད༌ཅན༌ གྱུར༌, ཡང༌ ཏེ༌ ཡུལ༌ནེ༌ ཝང༌ཅན༌ དཀོན༌མཆོག༌གི༌ ཁོང༌གུན༌ ཕིངས༌ཏེ༌ ཁྱོང༌ང༌ ཛདས༌།
18 རི༌སྟོང༌ངི༌ ནང༌ང༌ ལོ༌ ཞིབ༌ཅུ༌ ཚོག༌པ༌ ཏེ༌ མི༌གུན༌ ཁའ༌ མི༌ཉན༌ ཡོད༌ནའང༌ དཀོན༌མཆོག༌གི༌ ཟོད༌པ༌ ཉམ༌པོ༌ ཐག༌ག༌ ཛདས༌།
19 ཁོང༌ངི༌ ཀེ༌ནན༌ནི༌ གྱལ༌ཁམས༌ རྡུན༌བོ༌ མེད༌ཁན༌ ཛད༌ཏེ༌ ཏེ༌ ས༌ཀྱད༌གུན༌ ཁོང༌རང༌ངི༌ མི༌གུན༌ལ༌ ནོར༌སྐལ༌ལ༌ སལས༌།
20 འི༌ ཚང༌མ༌ གྲུབ༌ཅེས༌ལ༌ ཧ༌ལམ༌ ལོ༌ 450 གོར༌།"
"ཏེ༌ སྟིང༌ནེ༌ དཀོན༌མཆོག༌གི༌ ཤ༌མུ༌ཨེལ༌ ལུང༌སྟོན༌པའེ༌ ཏུས༌ ཚག༌པ༌ ཁོང༌གུན༌ལ༌ འུ༌སྐྱོང༌གུན༌ སལ༌ལ༌ ཛདས༌།
21 ཏེ༌ནེ༌ མི༌གུན༌ནི༌ དཀོན༌མཆོག༌ག༌ གྱལ༌པོ༌ཞིག༌ སལ༌ཅེས༌ལ༌ ཞུ༌ཝ༌ ཕུལ༌པ༌, དཀོན༌མཆོག༌གི༌ ཨིས༌ར༌ཨེལ༌ལི༌ སྡེ༌ བེན༌ཡཱ༌མིན༌ནི༌ ནང༌ནེ༌ ཁིས༌སི༌ བུ༌ཚ༌ ས༌འུལ༌ ཟེར༌ཁན༌བོ༌ སལ༌ལ༌ ཛདས༌, ཡང༌ ཁོའེ༌ ལོ༌ ཞིབ༌ཅུ༌ ཝང༌སྲུལས༌།
22 དཀོན༌མཆོག༌གི༌ ས༌འུལ༌ གྱལ༌པོའེ༌ ཝང༌ནེ༌ ཐེན༌ན༌ ཛད༌ཏེ༌ དཱ༌བིད༌ ཁོང༌གུན༌ནི༌ གྱལ༌པོ༌ ཅོའ༌ ཛདས༌། དཀོན༌མཆོག༌གི༌ དཱ༌བིད༌དི༌ སྐོར༌ལ༌ མོལ༌ཏེ༌ ཨིན༌ནོག༌, 'ང༌ ཡེ༌ཤེའེ༌ བུ༌ཚ༌ དཱ༌བིད༌ ཐོབ༌, ཁོའེ༌ དོད༌པ༌གུན༌ ང༌ ཙོགས༌ དུག༌། ཁོའེ༌ ཅི༌ཚང༌མ༌ ངའེ༌ དོད༌པ༌ ནང༌ཞིན༌ ཅོ༌ཨིན༌'།"
23 "དཀོན༌མཆོག༌གི༌ རང༌ངི༌ ཞལ༌ཆད༌ ཛད༌ཁན༌ ནང༌ཞིན༌, དཱ༌བིད༌དི༌ པུར༌གྱུད༌ནེ༌ ཨིས༌ར༌ཨེལ༌པ༌གུན༌ནི༌ སྐྱབ༌གོན༌, ཡེ༌ཤུ༌ ཀལ༌ལ༌ ཛདས༌།
24 ཡེ༌ཤུ༌ སྐྱོད༌དི༌ སང༌ སྔུན༌ལ༌, ཡོ༌ཧཱ༌ནན༌ནི༌ ཨིས༌ར༌ཨེལ༌པ༌ ཚང༌མ༌ལ༌ ཆོས༌ཤད༌ཨིན༌, གྱོད༌པ༌ ཅོས༌ཏེ༌ ཁྲུས༌ལེན༌ཅེས༌ལ༌ མོལ༌ལ༌ ཛདས༌།
25 ཡོ༌ཧཱ༌ནན༌ནི༌ ལས༌གུན༌ གྲུབ༌ ཚར༌ཀྱིས༌ ཡོད༌ ཟ༌ནེ༌, ཁོང༌ངི༌ མོལས༌, 'ཁྱོ༌ཞ༌གུན༌ནི༌ ང༌ སུ༌ ཨིན༌ནོག༌ སམ༌མ༌རག༌? ང༌ དཀོན༌མཆོག༌གི༌ ལྡམ༌མ༌ ཛད༌ཁན༌ནི༌ མ༌ཤི༌ཀ༌ མན༌། ཁོང༌ ངའེ༌ སྟིང༌ནེ༌ སྐྱོད༌ཨིན༌, ང༌ ཁོང༌ངི༌ ཞབ༌ཤི༌ ཙོགས༌ལ༌ ཞབ༌པུལ༌ ལྡམས༌ཁན༌བོ༌ ཀྲོལ༌ཅེས༌སི༌ འོས༌པ༌ མེད༌'།"
26 "ངའེ༌ ཕྲོ༌པ༌ ཨབ༌ར༌ཧམ༌མི༌ པུར༌གྱུད༌ དང༌ དཀོན༌མཆོག༌གི༌ ཇིགས༌ དང༌ རྩི༌ཝའེ༌ ནང༌ང༌ མི༌ཚེ༌ ཕུད༌ཁན༌ནི༌ ཡ༌ཧུ༌དཱ༌པ༌ མན༌ཁན༌གུན༌, འི༌ ཐར༌པའེ༌ ལོན༌བོ༌ ང༌དང༌གུན༌ནི༌ ཕིའ༌ ཀལ༌ལ༌ ཛད༌ཏེ༌ ཨིན༌ནོག༌།
27 ཡེ༌རུ༌ཤ༌ལེམ༌པ༌ དང༌ ཁོང༌གུན༌ནི༌ ཝང༌སྲུལ༌པ༌ གུན༌ནི༌ ཡེ༌ཤུ༌ ངོ༌ མ༌ཤེས༌, ཨིན༌ནའང༌ ཁོང༌ང༌ ཀྲོང༌ཤེས༌སི༌ ཁྲིམས༌ཅད༌ཏེ༌ ཤབ༌བད༌ རིམས༌སི༌ སིལ༌ཁན༌ནི༌ ལུང༌སྟོན༌པ༌གུན༌ནི༌ མོལ༌ཁན༌གུན༌ དྲན༌དྲ༌ གྲུབ༌ཅུགས༌།
28 ཁོང༌གུན༌ལ༌ ཡེ༌ཤུའ༌ སྲོག༌གི༌ ཆད༌པ༌ ཕོག༌ཅུག༌ཅེས༌ལ༌ ཅའང༌ སྐྱོན༌ མ༌ཐོབ༌ནའང༌ ཁོང༌གུན༌ནི༌ པི༌ལ༌ཏུའ༌ ཁོང༌ སད༌ཅེས༌ལ༌ ཞུ༌ཝ༌ ཕུལས༌།"
29 "ཡེ༌ཤུའི༌ སྐོར༌ལ༌ བྲིའ༌ ཛད༌ཏེ༌ ཡོད༌ཁན༌ ཚང༌མ༌ དྲན༌དྲ༌ གྲུབ༌ཅུགས༌ཏེ༌ སྟིང༌ནེ༌ ཁོང༌ངི༌ སྤུར༌བོ༌ རྐྱང༌ཤིང༌ངི༌ ཀ༌ནེ༌ ཕབས༌ཏེ༌ ཁོང༌གུན༌ནི༌ སྤུར༌ཁང༌ངི༌ ནང༌ང༌ ཞུས༌།
30 ཨིན༌ནའང༌ དཀོན༌མཆོག༌གི༌ ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛདས༌,
31 ཡང༌ ཞག༌ མང༌པོ༌ཞིག༌ གཱ༌ལིལ༌ལིའི༌ ཡུལ༌ནེ༌ ཁོང༌ ཉམ༌པོ༌ ཡེ༌རུ༌ཤ༌ལེམ༌མ༌ ཡོངས༌ཏེ༌ ཡོད༌ཁན༌གུན༌ལ༌ ཁོང༌ ཇལ༌། ཁོང༌གུན༌ནི༌ ཏ༌ ཨིས༌ར༌ཨེལ༌པ༌ ཚང༌མའེ༌ དུན༌ལ༌ ཁོང༌ངི༌ སྤང༌པོ༌ སལ༌ཨིན༌ ཨིན༌ནོག༌།"
32 "ང༌ཞའེ༌ འི༌ གའ༌མོའེ༌ ནས༌ཚུལ༌བོ༌ ཤད༌དད༌: དཀོན༌མཆོག༌གི༌ ང༌དང༌ངི༌ ཕ༌མེས༌པོ༌གུན༌ ཉམ༌པོ༌ ཞལ༌ཆད༌པོ༌ ཛདས༌,
33 ཁོང༌གུན༌ནི༌ པུར༌གྱུད༌ ང༌དང༌གུན༌ལ༌, གཙོ༌བོ༌ ཡེ༌ཤུ༌ སོན༌ཏེའ༌ ལང༌ང༌ ཛད༌ཏེ༌ དཀོན༌མཆོག༌གི༌ ཏེ༌ ཞལ༌ཆད༌པོ༌ གྲུབ༌ ཅུག༌ག༌ ཛདས༌, ཀ༌ཟུག༌ སུང༌གུར༌ ཉིས༌པའེ༌ ནང༌ང༌ ཡེ༌ཤུའི༌ སྐོར༌ལ༌ བྲིའ༌ ཛད༌ཏེ༌ ཨིན༌ནོག༌,
'ཁྱོ༌རང༌ ངའེ༌ བུ༌ཚ༌ ཨིན༌།
དི༌རིང༌ ང༌ ཁྱོ༌རང༌ངི༌ ཨ༌བའ༌ གྱུར༌ཏེ༌ ཨིན༌།'
34 དཀོན༌མཆོག༌གི༌ ཁོང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ པ༌སང༌, ཁོང༌ ཏ༌ མ༌ནེ༌ མི༌རུལ༌། དཀོན༌མཆོག༌གི༌ མོལ༌ལ༌ ཛདས༌,
'དཱ༌བིད༌ ཉམ༌པོ༌ ཁ༌ཆད༌ ཅོ༌ཁན༌ནི༌ དམ༌པ༌ ཅིན༌ལབས༌
ངའེ༌ ཁྱོ༌ཞ༌གུན༌ལ༌ ཏང༌ཨིན༌།'
35 ཞན༌ སུང༌གུར༌ཞིག༌གི༌ ནང༌ང༌ མོལ༌ཏེ༌ ཨིན༌ནོག༌།
'རང༌ངི༌ དམ༌པ༌བོ༌ ཉེ༌རང༌ངི༌ རུལ༌ ཅུག༌ག༌ མི༌ཛད༌།'
36 དཱ༌བིད༌དི༌ རང༌ངི༌ མི༌ཚེའེ༌ ནང༌ང༌ དཀོན༌མཆོག༌གི༌ ཐུག༌གོངས༌ ནང༌ཞིན༌ ཁོང༌ང༌ ཞབ༌སྟོག༌ ཞུས༌ཏེ༌ སྟིང༌ནེ༌ ཀྲོངས༌, ཡང༌ ཕ༌མེས༌པོ༌གུན༌ ཉམ༌པོ༌ ཁོང༌ངི༌ ཟུགས༌པོ༌ སྤུར༌ཁང༌ངི༌ ནང༌ང༌ བོར༌པ༌ རུལ༌།
37 ཨིན༌ནའང༌ དཀོན༌མཆོག༌གི༌ སོན༌ཏེའ༌ ལང༌ང༌ ཛད༌ཁན༌བོའ༌ རུལ༌ཅེས༌ ཉོང༌ མ༌ཐུབ༌།
38 སྤུན༌གུན༌ ཉོན༌ཤིག༌, ང༌ཞའ༌ འི༌ཀ༌ ཡེ༌ཤུ༌ གྱུད༌ཏེ༌ ཁྱོ༌ཞའེ༌ སྡིག༌པ༌གུན༌ལ༌ ཤགས༌པ༌ ཐོབ༌ཅེས༌པོ༌ ཁྱོ༌ཞ༌གུན༌ལ༌ ཤད༌ད༌ལ༌ ཡོངས༌པིན༌།
39 ཡེ༌ཤུའི༌ཀ༌ ཏད༌པ༌ ཁྱོང༌ཁན༌ ཚང༌མའ༌ སྡིག༌པ༌གུན༌ནེ༌ ཐར༌ཏེ༌ སྐྱོན༌མེད༌ གྱུར༌ཏེ༌ ཨིན༌ནོག༌, ཀ༌བོ༌ ཁྱོ༌ཞ༌གུན༌ལ༌ མོ༌ཟེས༌སི༌ བཀའ༌ཁྲིམས༌ གྱུད༌ཏེ༌ ཐོབ༌ ཉན༌ཅེས༌ མ༌ནེ༌ མེད༌པིན༌།
40 ཤང༌ ཅོས༌, ལུང༌སྟོན༌པ༌གུན༌ནི༌ མོལ༌ཁན༌གུན༌ ཁྱོ༌ཞ༌གུན༌ནི༌ཀ༌ བྱུང༌ མ༌ཅུག༌ཤིག༌",
41 " 'ལྟོས༌ཤིག༌, ངའ༌ ཚིག༌ ཏང༌ཁན༌གུན༌
ཧ༌ལས༌ཨིན༌ ཡང༌ ཤི༌ཨིན༌།
ངའེ༌ ཁྱོ༌ཞའེ༌ ཏུས༌སི༌ ནང༌ང༌ ཏེ༌ཟུག༌ ལས༌ཤིག༌ ཅོ༌ཅེས༌ ཨིན༌,
ཀ༌བོའེ༌ སྐོར༌ ཁྱོ༌ཞའ༌ ཤད༌ནའང༌ ཁྱོ༌ཞ༌གུན༌ལ༌ མ༌ནེ༌ དེན༌ མ༌ཤེས༌།' "
42 པ༌འུ༌ལུ༌ དང༌ བཱར༌ན༌བས༌ དུ༌ཁང༌ནེ༌ ཕི༌ལོག༌ག༌ བིངས༌ཏེ༌ སྐྱོད༌ ཟ༌ནེ༌ མི༌གུན༌ནི༌ ཁོང༌གུན༌ལ༌, སྟིང༌མ༌ ཤབ༌བད༌དི༌ ངལ༌ཚོའེ༌ ཞག༌ག༌, འི༌ཙོགས༌སི༌ ལབ༌ཞ༌ མང༌ང༌ ཤད༌ད༌ ཛད༌ ཟེར༌ཏེ༌ ཞུ༌ཝ༌ ཕུལས༌།
43 མི༌ཚོགས༌ ཤོལ༌ལ༌ཅིག༌ ཡ༌ཧུ༌དཱ༌པ༌ དང༌ ཡ༌ཧུ༌དཱ༌པའེ༌ ཆོས༌ལ༌ ཏད༌པ༌ ཁྱོང༌ཁན༌ མང༌པོ༌ཞིག༌ པ༌འུ༌ལུ༌ དང༌ བཱར༌ན༌བས༌སི༌ གྱབ༌ནེ༌ སོང༌། ཁོང༌ ཉིས༌ཀོའེ༌ ཁོང༌གུན༌ལ༌ སྤེ༌ར༌ ཏང༌ཨིན༌ དཀོན༌མཆོག༌གི༌ ཐུག༌རྗེ༌ཀ༌ སྟེན༌ཏེ༌ དུག༌ཅེས༌ལ༌ མ༌སྲན༌ཏྲེ༌ ཞུ༌ཝ༌ ཕུལས༌།
44 སྟིང༌མ༌ ཤབ༌བད༌དི༌ ཞག༌ག༌, ཧ༌ལམ༌ གྱལ༌ས༌ གང༌པོའེ༌ མི༌གུན༌ གཙོ༌བོ༌ ཡེ༌ཤུའི༌ བཀའ༌ ཉན༌ན༌ལ༌ ཛོམ༌།
45 ཏེ༌ཟུག༌ མི༌ཚོགས༌ ཆེན༌མོ༌ ཐོང༌ཏེ༌ ཡ༌ཧུ༌དཱ༌པ༌གུན༌ལ༌ ཚིག༌ཅེས༌ ཡོངས༌, ཡང༌ པ༌འུ༌ལུའི༌ ལབ༌ཞ༌གུན༌ལ༌ གྱབ༌གལ༌ ཅོས༌ཏེ༌ ཁོང༌ངི༌ སྕོད༌ལམ༌མི༌ སྐོར༌ལ༌ ངན༌པ༌ ཟེརས༌།
46 ཏེ༌ནེ༌ པ༌འུ༌ལུ༌ དང༌ བཱར༌ན༌བས༌སི༌ མ༌ ཧམ༌པ༌ ཉམ༌པོ༌ ཡ༌ཧུ༌དཱ༌པ༌གུན༌ལ༌ ལན༌སལས༌, "ང༌ཞའ༌ དཀོན༌མཆོག༌གི༌ བཀའ༌ གོ༌མ༌ ཁྱོ༌ཞ༌གུན༌ལ༌ ཤད༌གོས༌ཏེ༌ ཨིན༌པིན༌། ཁྱོ༌ཞའེ༌ ཏེ༌བོ༌ ཕངས༌ཏེ༌ ཁྱོ༌ཞ༌རང༌ ཐའ༌མེད༌པའེ༌ མི༌ཚེ༌ ཐོབ༌ཅེས༌སི༌ འོས༌པ༌ མ༌ཐེས༌ པ༌སང༌ ང༌ཞའེ༌ ཡ༌ཧུ༌དཱ༌པ༌ མན༌ཁན༌གུན༌ལ༌ ཉན༌ཅེས༌སི༌ སྐབས༌ ཏང༌ངད༌,
47 ཅིའ༌ཟེར༌ན༌ དཀོན༌མཆོག༌གི༌ ང༌ཞའ༌ འི༌ བཀའ༌བོ༌ སལས༌,
'ཇིག༌རྟེན༌ནི༌ ཀྲུ༌ཀྲུའི༌ ནང༌ང༌ ཐར༌པ༌ ཁྱོང༌ཅེས༌ལ༌
ངའེ༌ ཁྱོ༌རང༌གུན༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕྲོའ༌ འོད༌ ཙོགས༌ལ༌ ཀལ༌ཏེ༌ ཨིན༌།' "
48 ཏེ༌བོ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཚོར༌ར༌ཅིག༌, ཁོང༌གུན༌ སྲན༌ཏྲེ༌ ཐད༌ཏེ༌ གཙོ༌བོའེ༌ བཀའ༌ སྟོད༌པ༌ ཕུལས༌, ཡང༌ དཀོན༌མཆོག༌གི༌ ཐའ༌མེད༌པའེ༌ མི༌ཚེ༌ ཕིའ༌ ལྡམ༌མ༌ ཛདས༌ཁན༌གུན༌ནི༌ ཏད༌པ༌ ཁྱོངས༌།
49 གཙོ༌བོའེ༌ བཀའ༌ ཏེ༌ ཡུལ༌ཇོངས༌ གང༌པོའེ༌ ནང༌ང༌ ཕེལ༌།
50 ཨིན༌ནའང༌ ཡ༌ཧུ༌དཱ༌པའེ༌ ནང༌ནེ༌ ཁ༌ཅིག༌གི༌ ཏེ༌ གྱལ༌སའེ༌ ཆོས༌པ༌ བུ༌མོ༌ རྩི༌ཝ༌ཅན༌ དང༌ འུ༌སྐྱོང༌ གུན༌ལ༌ པ༌འུ༌ལུ༌ དང༌ བཱར༌ན༌བས༌སི༌ གྱབ༌གལ༌ལ༌ སྲོ༌ ཡོང༌ཅུགས༌པ༌, ཁོང༌གུན༌ནི༌ མི༌གུན༌ལ༌ ཁོང༌ ཉིས༌ཀོའ༌ ནགས༌ ལྟན༌ཅུགས༌ཏེ༌ གྱལ༌ས༌ནེ༌ ཕི༌ལོག༌ག༌ ཕིང༌ཅུགས༌།
51 ཁོང༌ ཉིས༌ཀོའེ༌ ཁོང༌རང༌གུན༌ནི༌ པ༌བུའི༌ ཐལ༌བ༌ སྲུགས༌ཏེ༌ ཁོང༌གུན༌ དཀོན༌མཆོག༌གི༌ ཆད༌པའེ༌ ཕིའ༌ བོར༌ཁན༌བོ༌ ལྟན༌ན༌ ཛདས༌ ཡང༌ ཁོང༌གུན༌ ཏེ༌ཀ༌ནེ༌ ཨི༌ཀོ༌ནི༌འམ༌མ༌ སྐྱོདས༌།
52 ཨན༌ཏི༌ཡོག༌གི༌ ནང༌ང༌ ཡོད༌ཁན༌ནི༌ ལོབ༌ཕྲུགས༌གུན༌ ཐད༌པོ༌ དང༌ དམ༌པའེ༌ ཐུག༌ཉིད༌དི༌ གང༌།