4
ཆག༌ཆོག༌ཆོག༌གི༌ ཟ༌མའེ༌ ནང༌ང༌ ཡོད༌ཁན༌ནི༌ ནོར༌།
4:1 ནེ༌ 18
1 དཀོན༌མཆོག༌གི༌ ཁོང༌རང༌ངི༌ སྙིང༌རྗེའེ༌ ནང༌ང༌, ང༌ཞ༌གུན༌ལ༌ འི༌ ཞབ༌སྟོག༌གི༌ ཆག༌ལས༌པོ༌ སལ༌ལ༌ ཛད༌ པ༌སང༌, ང༌ཞ༌གུན༌ནི༌ མ༌ནེ༌ སྤོས༌པ༌ མི༌ཕང༌།
2 ང༌ཞ༌གུན༌ནི༌ སེམས༌ངན༌ སྦས༌ཏེ༌ ཡོད༌ཁན༌ དང༌ ཁྲེལ༌བའེ༌ ལས༌ ཚང༌མ༌ ཕངས༌ཏེ༌ སུ༌ཞིག༌གའང༌ གོབ༌ མ༌སྐོར༌ར༌ ཡ༌ དཀོན༌མཆོག༌གི༌ བཀའེ༌ ནང༌ང༌ གྱུར༌ཇ༌ མ༌ཁྱོང༌ང༌ ཨིན༌། དཀོན༌མཆོག༌གི༌ ཟིག༌ཤེས༌ ང༌ཞ༌གུན༌ལ༌ གྱུས༌ཡོད༌པ༌ ཁོང༌ངི༌ ལོན༌གུན༌ ང༌ཞའེ༌ དྲང༌པོ༌ ཤད༌དད༌, ཡང༌ ང༌ཞའེ༌ ལས༌གུན༌ནི༌ ཞས༌ཏེ༌, སེམས༌ རྩང༌མ༌ ཡོད༌ཁན༌ ཚང༌མའེ༌, ང༌ཞའ༌ ཨིད༌ཤེས༌ཅན༌ ཨིན༌ཁན༌ནི༌ སྤང༌པོ༌ ཏང༌ང༌ནོག༌།
3 གལ༌ཏེས༌ ང༌ཞའེ༌ ཤད༌ཁན༌ནི༌ གའ༌མོའེ༌ ནས༌ཚུལ༌བོ༌ ཀབས༌ཏེ༌ བོར༌རད༌ན༌, ཏེ༌བོ༌ ཁྲེས༌སྟོར༌ ཆ༌ཅེས༌སི༌ ལམ༌མི༌ཀ༌ གྲུལ༌ཨིན༌ ཡོད༌ཁན༌གུན༌ནི༌ ཀ༌ནེ༌ སྦས༌ཏེ༌ བོར༌ཏེ༌ ཨིན༌ནོག༌།
4 འི༌ ཇིག༌རྟེན༌ནི༌ཀ༌ ཝང༌སྲུལ༌ཁན༌ནི༌ ཤེ༌ཏན༌ནི༌, ཏད༌པ༌ མེད༌ཁན༌ནི༌ སྙིང༌གུན༌ སྐྱོང༌པོ༌ ཅོས༌ཏེ༌ སམ༌བ༌གུན༌ ཞར༌ ཅུག༌ག༌ནོག༌། ཁོང༌གུན༌ལ༌ གའ༌མོའེ༌ ནས༌ཚུལ༌ལི༌ ཟིར༌རྗིད༌ཅན༌ནི༌ དེན༌བའེ༌ འོད༌པོ༌ ཐོང༌ མི༌ཐུབ༌ཅེས༌ལ༌ ཁོའེ༌ ཏེ༌བོ༌ ཅོའ༌ནོག༌། ཁོང༌གུན༌ནི༌ ཅི༌ས༌ ཐོག༌ནེ༌ དཀོན༌མཆོག༌ ཙོགས༌ ཨིན༌ཁན༌ནི༌ མ༌ཤི༌ཀའེ༌ ཟིར༌རྗིད༌དི༌ སྐོར༌ལ༌ གའ༌མོའེ༌ ནས༌ཚུལ༌བོ༌ ཧ༌ མ༌གོའ༌ ཨིན༌ནོག༌།
5 ང༌ཞ༌གུན༌ནི༌ ང༌ཞ༌རང༌ངི༌ སྐོར༌ལ༌ ཆོས༌ཤད༌ད༌མེད༌, ཨིན༌ནའང༌ ཡེ༌ཤུ༌ མ༌ཤི༌ཀ༌ གཙོ༌བོ༌ ཨིན༌ནོག༌ ཟེར༌ཏེ༌ ཆོས༌ཤད༌དད༌། ཡང༌ ཡེ༌ཤུའི༌ ཏོན༌ལ༌, ང༌ཞ༌གུན༌ ཁྱོ༌ཞའེ༌ ཡོག༌པོ༌ ཨིན༌།
6 དཀོན༌མཆོག༌གི༌ མོལས༌, "མུན༌ནག༌གི༌ ནང༌ང༌ འོད༌ བྱུང༌ཤིག༌", ཏེན༌ན༌ གའ༌མོའེ༌ ནས༌ཚུལ༌བོ༌ གྱུད༌ཏེ༌ ཏེ༌ འོད༌པོ༌ ང༌དང༌གུན༌ནི༌ སྙིང༌ངི༌ ནང༌ང༌ བར༌ཅུག༌ག༌ ཛད༌ཅེས༌པོའེ༌, ང༌དང༌གུན༌ནི༌ ཡེ༌ཤུ༌ མ༌ཤི༌ཀའེ༌ ཞལ༌དོང༌ ཐོང༌ཏེ༌ དཀོན༌མཆོག༌གི༌ ཟིར༌རྗིད༌པོ༌ ཧ༌གོ༌ ཐུབ༌ཨིན༌།
7 ཞན༌ ང༌ཞ༌གུན༌ནི༌ སྙིང༌ངི༌ ནང༌ང༌ ཏེ༌ འོད༌པོ༌ ཁྲ༌ཆེམ༌ཆེམ༌ ཅོ༌ཨིན༌ ཡོད༌ནའང༌, ང༌ཞ༌གུན༌ ཏེ༌ རིན༌ཅན༌ ནོར༌ བོར༌ཁན༌ནི༌ ཆག༌ཅེས༌སི༌ ཟ༌མ༌ ཙོགས༌ ཨིན༌། འི༌བོའེ༌ ཀ༌ནེ༌, ང༌ཞ༌གུན༌ནི༌ ཇིགས༌པོ༌ ཁྱུད༌པོ༌ ང༌ཞ༌རང༌ངི༌ མན༌པ༌, དཀོན༌མཆོག༌གི༌ ཆོགས༌ནེ༌ ཨིན༌ཁན༌བོ༌ སལ༌པོ༌ ཧ༌གོའ༌ནོག༌།
8 ང༌ཞ༌གུན༌ལ༌ ཆོགས༌ ཚང༌མ༌ནེ༌ ནགས༌ དང༌ བར༌དོའི༌ ནན༌ཏེ༌ ཡོད༌ཏེའང༌, ང༌ཞ༌གུན༌ མ༌ཆག༌ག༌ ཨིན༌ནོག༌། ང༌ཞ༌གུན༌ ཐེ༌ཚོམས༌སི༌ ནང༌ང༌ ཡོད༌ནའང༌, ང༌ཞ༌གུན༌ནི༌ རེ༌ཝ༌ ཆོད༌ཏེ༌ རག༌ ཟེར༌ར༌མེད༌།
9 ང༌ཞའ༌ མི༌གུན༌ནི༌ ནགས༌ ལྟན༌ནའང༌, དཀོན༌མཆོག༌གི༌ ཕང༌ང༌ ཛད༌ད༌ མི༌རུག༌། ང༌ཞའ༌ མ༌སྐྱོན༌ མ༌སྲན༌ཏྲེ༌ ཆ༌ནའང༌, ང༌ཞ༌གུན༌ མེད༌ཁན༌ ཅོ༌ ཅུག༌ག༌ ཛད༌ད༌ མི༌རུག༌།
10 མ༌ཤི༌ཀའེ༌ ཐུག༌ཉིད༌ ང༌ཞ༌གུན༌ནི༌ ནང༌ང༌ ཞུགས༌ཁན༌བོ༌, མི༌གུན༌ནི༌ ཐོང༌ ཐུབ༌ཅེས༌སི༌ ཕིའ༌, རྡུག༌ངལ༌གུན༌ གྱུད༌ཏེ༌ ང༌ཞའེ༌ ཟུགས༌པོ༌གུན༌ནིའང༌ ཡེ༌ཤུ༌ ཀྲོང༌ཤེས༌པོའེ༌ ནང༌ང༌ ཁག༌ ནེན༌ཨིན༌ ཨིན༌ནོག༌།
11 འོ༌ན༌ ཡེ༌ཤུའི༌ ཤེད༌པོ༌ ང༌ཞ༌གུན༌ནི༌ ཤི༌ཅེས༌སི༌ ཟུགས༌པོའེ༌ ནང༌ང༌ ཞུགས༌ཏེ༌ ཡོད༌ཁན༌བོ༌ ཐོང༌ ཐུབ༌ཅེས༌སི༌ ཕིའ༌ ཏུས༌གྱུན༌ ང༌ཞ༌གུན༌ ཤི༌ཅེས༌སི༌ ཇིགས༌པའེ༌ ནང༌ང༌ ལུས༌ཏེ༌ ཨིན༌ནོག༌, ཅིའ༌ཟེར༌ན༌ ང༌ཞ༌གུན༌ནི༌ མ༌ཤི༌ཀའེ༌ ཞབ༌སྟོག༌ ཞུས༌ཏེ༌ ཨིན༌ནོག༌།
12 ང༌ཞ༌གུན༌ ཤི༌ཅེས༌སི༌ ཇིགས༌པའེ༌ ནང༌ང༌ དུག༌གད༌, ཨིན༌ནའང༌ ཏེ༌བོའེ༌ བྲས༌བུ༌ ནི༌, ཁྱོ༌ཞ༌གུན༌ལ༌ ཐའ༌མེད༌པའེ༌ མི༌ཚེ༌ ཐོབ༌ཁན༌བོ༌ ཨིན༌ནོག༌།
13 ཀ༌ཟུག༌ སུང༌རབས༌སི༌ ནང༌ང༌ མོལ༌དུག༌, "ངའེ༌ དཀོན༌མཆོག༌གི༌ ནང༌ང༌ ཏད༌པ༌ ཅོས༌ པ༌སང༌, ངའེ༌ ཁོང༌ངི༌ ལོན༌བོ༌ ཤད༌པིན༌" ཏེན༌ན༌ ཙོགས༌ལ༌ ང༌ཞ༌གུན༌ནིའང༌ ཏད༌པ༌ ཅོས༌ཏེ༌ གའ༌མོའེ༌ ནས༌ཚུལ༌བོ༌ ཤད༌དད༌།
14 ང༌ཞའ༌ གྱུས༌ཡོད༌, གཙོ༌བོ༌ ཡེ༌ཤུ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཁན༌ནི༌ དཀོན༌མཆོག༌གི༌ ང༌ཞ༌གུན༌ནའང༌ མ༌ཤི༌ཀ༌ ཉམ༌པོ༌ སོན༌ཏེའ༌ ལང༌ང༌ ཛད༌ཨིན༌། ཡང༌ ང༌ཞའ༌ ཁྱོ༌ཞ༌གུན༌ ཉམ༌པོ༌ ཁོང༌རང༌ངི༌ སྐུན༌དུན༌ལ༌ ཁྱོང༌ང༌ ཛད༌ཨིན༌།
15 ང༌ཞ༌གུན༌ལ༌ རྡུག༌ངལ༌ ཐོང༌ཁན༌ ཚང༌མ༌ ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌། ཡང༌ དཀོན༌མཆོག༌གི༌ ཐུག༌རྗེ༌བོ༌ མི༌ མང༌ངི༌ སང༌ མང༌ང༌ ཐོབས༌ཏེ༌ ཐུག༌རྗེ༌ཆེ༌ ཞུ༌ཁན༌ མང༌པོ༌ ཡོང༌ཨིན༌, དཀོན༌མཆོག༌ག༌ སྤལ༌ མང༌ངི༌ སང༌ མང༌ང༌ ཐོབ༌བ༌ ཛད༌ཅེས༌ ཨིན༌ནོག༌།
16 ཏེན༌ན༌བོའེ༌ཕིའ༌ ང༌ཞ༌གུན༌ནི༌ རེ༌ཝ༌བོ༌ མ༌ནེ༌ ཕང༌ང༌ མེད༌། ཞན༌ ང༌ཞ༌གུན༌ ཟུགས༌པོའེ༌ ཐོག༌ནེ༌ ཉམས༌ཨིན༌ ཆ༌ནའང༌, ང༌ཞ༌གུན༌ནི༌ སེམས༌ལ༌ དཀོན༌མཆོག༌གི༌ ཞག༌ནེ༌ ཞག༌ག༌ ཁྱུད༌ སལ༌ལ༌ ཛད༌དུག༌།
17 ང༌ཞ༌གུན༌ལ༌ ཐོང༌ཁན༌ནི༌ རྡུག༌ངལ༌གུན༌ ཆུ༌ངུན༌ ཡང༌ ཏུས༌ མང༌པོ༌ཞིག༌ ལུས༌ས༌ མ༌ནོག༌། ཨིན༌ནའང༌ ང༌ཞའེ༌ ཕིའ༌ ཏེ༌གུན༌ནི༌ བྲས༌བུ༌ ཐའ༌མེད༌པའེ༌ ཟིར༌རྗིད༌པོ༌ ཨིན༌, ཀ༌བོ༌ འི༌ རྡུག༌ངལ༌གུན༌ནི༌ སང༌ མངས༌ཏེའང༌ ཇིགས༌པོ༌ ཡོད༌ཏེ༌ ཨིན༌ནོག༌།
18 ཏེན༌ན༌བོའེ༌ཕིའ༌ ང༌ཞ༌གུན༌ནི༌ མིག༌པོ༌ ཐོང༌ཁན༌ནི༌ རྡུག༌ངལ༌གུན༌ནི༌ཀ༌ མ༌བོར༌ར༌, མ༌ཐོང༌ཁན༌ནི༌ ཟིར༌རྗིད༌པོའེ༌ཀ༌ བོར༌རད༌, ཅིའ༌ཟེར༌ན༌ ཐོང༌ཁན༌གུན༌ གྱོགས༌པ༌ མེད༌ཁན༌ ཆའ༌ནོག༌, ཨིན༌ནའང༌ མ༌ཐོང༌ཁན༌བོ༌ ཏུས༌གྱུན༌ ལུས༌ཤེས༌ ཨིན༌ནོག༌།