ཐེ༌ས༌ལོ༌ནི༌ཀའེ༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌ ཏང༌པོ༌།
ཐེ༌ས༌ལོ༌ནི༌ཀའེ༌ ཆོས༌ཚོགས༌ལ༌ པ༌འུ༌ལུའི༌ ཆག༌བྲིས༌ ཏང༌པོའེ༌ སྐོར༌།
འི༌ ཆག༌བྲིས༌པོ༌ གཙོ༌བོ༌ ཡེ༌ཤུའི༌ སྐུ༌ཚབས༌ པ༌འུ༌ལུའི༌ བྲིའ༌ ཛད༌ཁན༌བོ༌ ང༌དང༌ང༌ འི༌ ཆག༌བྲིས༌ དང༌ སྔུན༌མའེ༌ ཆོས༌ཚོགས༌སི༌ འུ༌སྐྱོང༌གུན༌ནི༌ སྤང༌པོ༌གུན༌ནེ༌ གྱུས༌ ཆའ༌ནོག༌།
ཆོས༌སི༌ ཁས༌པ༌གུན༌ནི༌ པ༌འུ༌ལུའི༌ འི༌ ཆག༌བྲིས༌པོ༌ ཀོ༌རིན༌ཐི༌ གྱལ༌སའེ༌ ནང༌ང༌ ཡོད༌ ཟ༌ནེ༌ བྲིའ༌ ཛད༌ཁན༌བོ༌ སམ༌མ༌ནོག༌། ཁོང༌ངི༌ འི༌ ཆག༌བྲིས༌པོ༌ ཡེ༌ཤུ༌ ཀྲོངས༌ཏེ༌ སོན༌ཏེའ༌ ཞངས༌ཏེ༌ སྟིང༌ནེ༌, ལོ༌ རྕུ༌དགུ༌ནེ༌ ཉི༌ཤུའི༌ ཉེ༌ཁོར༌ལ༌ བྲིའ༌ ཛད༌ཏེ༌ ཨིན༌ནོག༌།
ཐེ༌ས༌ལོ༌ནི༌ཀའེ༌ གྱལ༌ས༌ མ༌ཀེ༌དོ༌ནི༌ཡཱའེ༌ གྱལ༌ཁག༌གི༌ ནང༌ང༌ ཚང༌མའེ༌སང༌ ཁག༌ཅན༌ གྱལ༌ས༌ཞིག༌ ཨིན༌པིན༌། ཏེ༌བོ༌ གྱ༌ཚོའེ༌ ཐའ༌མའ༌ ཆགས༌ཏེ༌ མ༌ ཁག༌ཅན༌ དང༌ ཆུག༌པོ༌ གྱལ༌ས༌ཞིག༌ ཨིན༌པིན༌། ཁོང༌ གོ༌མ༌ ཏེ༌རུ༌ སྐྱོད༌ ཟ༌ནེ༌ ཡ༌ཧུ༌དཱ༌པ༌གུན༌ནི༌ ཏེ༌ གྱལ༌སའེ༌ མི༌གུན༌ལ༌ པ༌འུ༌ལུའ༌ གྱབ༌གལ༌ ཅོས༌ཏེ༌ ནགས༌ ལྟན༌ཅུགས༌ པ༌སང༌ ཁོང༌ ཏེ༌རུ༌ ཏུས༌ ཉུ༌ངུན༌ཞིག༌ མ༌ནེ༌ ཞུགས༌ མ༌ཐུབ༌བ༌ ཤོར༌གོས༌། ཁོང༌ ཤོར༌ ཟ༌ནེ༌ ཏེ༌རུ༌ མ༌ཤི༌ཀའེ༌ ནང༌ང༌ ཏད༌པ༌ ཁྱོང༌ཁན༌ སོ༌མ༌ ཁ༌ཅིག༌ མ༌ནེ༌ མེད༌པིན༌།
པ༌འུ༌ལུའི༌ འི༌ ཆག༌བྲིས༌ བྲི༌ཅེས༌སི༌ གྱུན༌ཚན༌ ནི༌:-
ཏང༌པོ༌, ཏད༌པ༌ སོ༌མ༌ ཁྱོང༌ཁན༌གུན༌ལ༌ རྡུག༌ངལ༌ལི༌ ནང༌ང༌ རེ༌ཝ༌ མི༌ཕང༌ཅེས༌སི༌ སྤོས༌པ༌ སལ༌ཅེས༌།
ཉིས༌པ༌, དཀོན༌མཆོག༌ ཐུགས༌ཐད༌ཁན༌ནི༌ མི༌ཚེ༌ ཕུད༌ཅེས༌སི༌ ནང༌ང༌ ལབ༌ཞའ༌ སལ༌ཅེས༌།
སུམ༌པ༌, ཁོང༌གུན༌ལ༌ ཏད༌པ༌ཅན༌ ཤི༌ཁན༌གུན༌ལ༌ མ༌འོངས༌པའེ༌ ཏུས༌སི༌ ནང༌ང༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ཅེས༌སི༌ ལབ༌ཞ༌གུན༌ གྱུད༌ཏེ༌ སྤོས༌པ༌ སལ༌ཅེས༌གུན༌ ཨིན༌པིན༌༎
1
པ༌འུ༌ལུའི༌ ཆོགས༌ནེ༌ ཇུ༌།
1:1
1 ངའ༌ པ༌འུ༌ལུ༌, སི༌ལས༌ དང༌ ཏི༌མོ༌ཐི༌ ཚང༌ཀོའེ༌ ཆོགས༌ནེ༌ འི༌ ཨི༌གེ༌བོ༌ ཐེ༌ས༌ལོ༌ནི༌ཀའེ༌ གྱལ༌སའེ༌ དཀོན༌མཆོག༌ ཡབ༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ཨིན༌ཁན༌ནི༌ ཆོས༌ཚོགས༌ལ༌ བྲིའད༌། དཀོན༌མཆོག༌གི༌ ཞི༌དེ༌ དང༌ ཐུག༌རྗེ༌ ཁྱོ༌ཞའ༌ ཚང༌མ༌ལ༌ ཐོབ༌ཤིག༌།
ཐེ༌ས༌ལོ༌ནི༌ཀའེ༌ ཆོས༌ཚོགས༌སི༌ ཏད༌པའེ༌ སྐོར༌།
1:2 ནེ༌ 10
2 ང༌ཞའེ༌ མོས༌ལམ༌མི༌ ནང༌ང༌ ཁྱོ༌ཞ༌གུན༌ ཨིད༌ཏུ༌ ཅོ༌ཨིན༌ ཏུས༌གྱུན༌ དཀོན༌མཆོག༌ག༌ ཁྱོ༌ཞའ༌ ཚང༌མའེ༌ ཕིའ༌ ཐུག༌རྗེ༌ཆེ༌ ཞུའད༌།
3 ང༌ཞའེ༌ དཀོན༌མཆོག༌, ང༌དང༌གུན༌ནི༌ ཡབ༌བའ༌ མོས༌ལམ༌ ཞུ༌ ཟ༌ནེ༌, ཁྱོ༌ཞ༌གུན༌ནི༌ ཏད༌པ༌བོ༌ ལག༌ལེན༌ནི༌ ནང༌ང༌ ཁྱོང༌ཅེས༌, ཅམས༌པའེ༌ ནང༌ང༌ ཞན༌མའ༌ ཞབ༌སྟོག༌ ཞུ༌ཅེས༌ དང༌ གཙོ༌བོ༌ ཡེ༌ཤུ༌ མ༌ཤི༌ཀའེ༌ ནང༌ང༌ རེ༌ཝའ༌ སྟན༌པོ༌ བོར༌ཅེས༌པོའེ༌, སྙིང༌རུས༌ ཅོ༌ཐུབ༌ཅེས༌ གུན༌ ཨིད༌ཏུ༌ ཅོའད༌།
4 ཅེས༌པའེ༌ སྤུན༌གུན༌, དཀོན༌མཆོག༌གི༌ ཁྱོ༌ཞ༌གུན༌ལ༌ ཅམས༌པ༌ ཛད༌ཏེ༌ ཁོང༌རང༌ངི༌ མི༌གུན༌ ལྡམ༌མ༌ ཛད༌ཁན༌བོ༌ ང༌ཞའ༌ གྱུས༌ཡོད༌།
5 ཅིའ༌ཟེར༌ན༌ ང༌ཞའེ༌ ཁྱོ༌ཞ༌གུན༌ལ༌ གའ༌མོའེ༌ ནས༌ཚུལ༌ ཤད༌ ཟ༌ནེ༌, སྤེ༌ར༌ ཅིག༌པོ༌ གྱུད༌ཏེ༌ མན༌པ༌ དཀོན༌མཆོག༌གི༌ སྟོབས༌ ཉམ༌པོ༌ ཤད༌པིན༌, མ༌ཚད༌ ང༌ཞའེ༌ ཤད༌ཁན༌གུན༌ དེན༌བ༌ ཨིན༌ཁན༌བོའ༌ དམ༌པའེ༌ ཐུག༌ཉིད༌དི༌ ཁྱོ༌ཞ༌གུན༌ལ༌ སྙིང༌ངི༌ ཐིལ༌ནེ༌ ཨིད༌ཤེས༌ཤུགས༌། ཡང༌ ང༌ཞའེ༌ ཁྱོ༌ཞ༌གུན༌ནི༌ ཕྲོའ༌ མི༌ཚེ༌ ཕུད༌ཚུལ༌བོ༌, ཁྱོ༌ཞ༌གུན༌ནི༌ ཕན༌ཐོགས༌སི༌ ཕིའ༌ ཨིན༌ཁན༌བོ༌, ཁྱོ༌ཞ༌གུན༌ལ༌ གྱུས༌ཨིན༌ནོག༌།
6 ང༌ཞའ༌ དང༌ གཙོ༌བོ༌ ཡེ༌ཤུ༌ གྲུལ༌ཁན༌ནི༌ ལམ༌མི༌ཀ༌ ཁྱོ༌ཞ༌གུན༌ གྲུལས༌། ཁྱོ༌ཞ༌གུན༌ལ༌ མ༌སྲན༌ཏྲེ༌ ནགས༌ ཐོང༌ཏེའང༌, ཁྱོ༌ཞ༌གུན༌ནི༌ དམ༌པའེ༌ ཐུག༌ཉིད༌དི༌ སལ༌ཁན༌ནི༌ ཐད༌པོ༌ ཉམ༌པོ༌ ཏེ༌ ལོན༌བོ༌ ལེནས༌།
7 ཏེ༌བོའེ༌ ཞས༌ཏེ༌ གིརིས༌སི༌ མ༌ཀེ༌དོ༌ནི༌ཡཱ༌ དང༌ ཨ༌ཀ༌ཡཱའི༌ ཡུལ༌གུན༌ནི༌ ནང༌ང༌ སྤུན༌ ཚང༌མའེ༌ ཕིའ༌ ཁྱོ༌རང༌གུན༌ སྤེ༌ཞིག༌ག༌ གྱུར༌ཏེ༌ ཨིན༌ནོག༌།
8 ཁྱོ༌ཞ༌གུན༌ གྱུད༌ཏེ༌ གཙོ༌བོའེ༌ བཀའ༌བོ༌, མ༌ཀེ༌དོ༌ནི༌ཡཱ༌ དང༌ ཨ༌ཀ༌ཡཱ༌ ཡུལ༌གུན༌ནི༌ ནང༌ང༌ ཕེལ༌ཅེས༌ མ༌ཚད༌, དཀོན༌མཆོག༌གི༌ཀ༌ ཁྱོ༌ཞའེ༌ ཏད༌པ༌ ཁྱོངས༌ཁན༌ནི༌ ནས༌ཚུལ༌བོ༌ ཀ༌ནེ༌ཀ༌རུ༌ ལེབ༌། ཏེ༌ སྐོར༌ལ༌ ང༌ཞའེ༌ ཅའང༌ ཟེར༌གོས༌ མི༌དུག༌།
9 ཡང༌ ཏེ༌ ཡུལ༌མི༌གུན༌ནི༌ མི༌ཚང༌མ༌ལ༌ ཁྱོ༌ཞ༌གུན༌ནི༌ ང༌ཞའ༌ ཛ༌འོའེ༌ ཚུལ༌ལ༌ གའ༌སུས༌ ཅོ༌ཁན༌ དང༌ ཁྱོ༌ཞའེ༌ སྐུན༌དྲའ༌ ཅོལ༌ཅེས༌ ཕངས༌ཏེ༌ དེན༌བའེ༌ སོན༌པོ༌ དཀོན༌མཆོག༌ག༌ ཞབ༌སྟོག༌ ཞུ༌ཅེས༌ གུན༌ ཤད༌དུག༌།
10 མ༌ཚད༌ དཀོན༌མཆོག༌གི༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛད༌ཁན༌ སྲས༌ ཡེ༌ཤུ༌, ནམ༌ཁའ༌ནེ༌ ལོགས༌ཏེ༌ ཕེབས༌ཤེས༌སི༌ ཕིའ༌, ཁྱོ༌ཞ༌གུན༌ སྲུངས༌ཏེ༌ ཡོད༌ཁན༌བོའེ༌ སྐོར༌ལའང༌ ཤད༌དུག༌། ང༌དང༌གུན༌ དཀོན༌མཆོག༌ནེ༌ ཡོང༌ཅེས༌ཅན༌ནི༌ ཐུགས༌སྲོའེ༌ ཀ༌ནེ༌ སྐྱོབ༌བ༌ ཛད༌ཁན༌བོ༌ ཡེ༌ཤུ༌ ཨིན༌ནོག༌།