3
ལྕེ༌ ཅུན༌ཏེ༌ བོར༌ཅེས༌།
3:1 ནེ༌ 12
1 ངའེ༌ སྤུན༌གུན༌, ཁྱོ༌ཞའ༌ མང༌པོའེ༌ ཆོས༌ཚོགས༌སི༌ ནང༌ང༌ གེར༌གན༌ གྱུར༌ཨིན༌ སམ༌ཏེ༌ རེ༌ཝ༌ ཅོ༌ མ༌གོས༌, ཅིའ༌ཟེར༌ན༌ དཀོན༌མཆོག༌གི༌ ང༌དང༌ ལབ༌ཞའ༌ ཏང༌ཁན༌གུན༌ལ༌ ཀྲག༌ག༌ ཁྲིམས༌ཅད༌ ཕོག༌ཅེས༌པོ༌, ཁྱོ༌ཞའ༌ གྱུས༌ཨིན༌ནོག༌།
2 འོ༌ན༌, ང༌དང༌ ཚང༌མའེ༌ སྐྱོན༌ མང༌པོ༌ཞིག༌ ཅོའ༌ནོག༌། གལ༌ཏེས༌ མི༌ཞིག༌གི༌ ཟེར༌ཁན༌ ཚང༌མ༌ སྐྱོན༌མེད༌ ཡོད༌པིན༌ན༌, ཁོ༌ ཕུན༌སུམ༌ཚོགས༌པ༌ཞིག༌ ཡོད༌གྲོ༌, ཡང༌ ཁོའེ༌ ལུས༌ གང༌པོ༌ ཅུན༌ཏེ༌ བོར༌ཐུབ༌བ༌ནོག༌།
3 རྟའེ༌ ཁའེ༌ ནང༌ང༌ ཡོད༌ཁན༌ནི༌ སྲབས༌པོ༌ གྱུད༌ཏེ༌ ང༌དང༌གུན༌ ཀ༌རུ༌ ཆེན༌ སམ༌ནའང༌, ཏེ༌རུ༌ རྟ༌བོ༌ ཁྲིད༌ཏེ༌ ཁྱེར༌ ཉན༌ན༌ནོག༌།
4 ཏེན༌ན༌ ཙོགས༌ལ༌ ཤེད༌ཅན༌ ལུངས༌པོའེ༌ རིལ༌ཨིན༌ ཡོད༌ཁན༌ ཏེ༌ གྲུ༌ཟིང༌ ཆེན༌མོ༌བོའང༌ གྲུ༌ཟིང༌ངི༌ ཇུག༌ག༌ ཡོད༌ཁན༌ནི༌ ཤིང༌ལེབ༌ ཆུ༌ངུན༌བོ༌ ཉམ༌པོ༌, གྲུ༌ཟིང༌ སྲུལ༌ཁན༌བོའེ༌ ཀ༌རུ༌ སྲུལ༌ཏེ༌ ཁྱེར༌ཨིན༌ སམ༌ནའང༌, ཁྱེར༌ ཉན༌ན༌ནོག༌།
5 ཏེན༌ན༌ ཙོགས༌ལ༌ ལྕེ༌བོ༌ ང༌དང༌ངི༌ ཟུགས༌པོའེ༌ ཁག༌ ཆུ༌ངུན༌ཞིག༌ ཨིན༌ནའང༌, འི༌བོའེ༌ ཕོ༌སོ༌ཅན༌ནི༌ སྤེ༌རའེ༌ མི༌ མང༌པོ༌ཞིག༌ག༌ ནོད༌སྐྱལ༌ ཉན༌ན༌ནོག༌, ཀ༌ཟུག༌ མེ༌ཙག༌ ཆུ༌ངུན༌ཞིག༌གི༌ ནགས༌ཚོགས༌ ཆེན༌མོ༌ཞིག༌ མེའ༌ སྤར༌ཉན༌ཨིན༌།
6 ལྕེ༌བོ༌ ནི༌ མེ༌ ཙོགས༌ ཨིན༌ནོག༌། ཟུགས༌པོའེ༌ ཡན༌ལག༌གུན༌ནི༌ ཕྲོ༌ནེ༌ ལྕེ༌བོ༌ ནི༌, ངན༌པ༌ གངས༌ཁན༌ནི༌ ནས༌ས༌ཤིག༌ ཨིན༌ནོག༌། འི༌བོའེ༌ ཟུགས༌པོ༌ གང༌པོ༌ ཚི༌ཏུ༌ གྱུར༌ ཅུགས༌ཏེ༌, ཁོའེ༌ མི༌ཚེ༌ གང༌པོའ༌ མེ༌ བར༌ ཅུག༌ག༌ནོག༌, ཅིའ༌ཟེར༌ན༌ ལྕེའ༌ མེ༌ སྤར༌ཁན༌བོ༌ ཉལ༌ཝའེ༌ མེ༌ ཨིན༌ནོག༌།
7 མིའ༌ སེམས༌ཅན༌, ཅ༌, རྒལ༌ཅིག༌གི༌ རིགས༌ དང༌, ཚོའེ༌ ནང༌ང༌ ཉ༌ ཆེན༌མོ༌ སྣ༌ཚོགས༌ གུན༌, ཁོ༌རང༌གུན༌ནི༌ ཝང༌ངི༌ ཡོག༌ག༌ ཁྱོང༌ ཉན༌ན༌ནོག༌།
8 ཨིན༌ནའང༌ སུ༌ཞིག༌གའང༌ ལྕེ༌བོ༌, ཁོ༌རང༌ངི༌ ཝང༌ངི༌ ཡོག༌ག༌ ཁྱོང༌ མ༌ཉན༌ན༌ ཨིན༌ནོག༌། འི༌བོ༌ ནི༌ དུག༌ མ༌ནེ༌ མ༌ཉན༌ཁན༌ནི༌ ངན༌པ༌, ཤི༌ཅུག༌ཁན༌ནི༌ ཏུག༌གི༌ གངས༌ཏེ༌ ཡོད༌ཏེ༌ ཨིན༌ནོག༌།
9 ང༌དང༌གུན༌ནི༌ འིན༌ན༌ ལྕེ༌ ཉམ༌པོ༌ ང༌དང༌ངི༌ གཙོ༌བོ༌, ཡབ༌ དཀོན༌མཆོག༌ག༌ སྟོད༌པ༌ ཕུལ༌ལ༌ནོག༌། ཨིན༌ནའང༌ ཏེན༌ན༌ ལྕེ༌ ཉམ༌པོ༌ དཀོན༌མཆོག༌གི༌ ཁོང༌རང༌ ཙོགས༌ ཅོའ༌ ཛད༌ཁན༌ནི༌ མི༌གུན༌ལ༌ རྔན༌ ཏབ༌བ༌ནོག༌།
10 ཡང༌ སྟོད༌པ༌ དང༌ རྔན༌ ཏབ༌ཅེས༌ ཉིས༌ཀོ༌, ཏེན༌ན༌ ཁའེ༌ ནང༌ནེ༌ བིང༌ང༌ནོག༌། དེན༌བ༌ ངའེ༌ སྤུན༌གུན༌, ཏེ༌ཙོགས༌ ཆ༌ མ༌གོས༌།
11 ཅི༌ ཆུ༌མིག༌ཤིག༌གི༌ ནང༌ནེ༌ ཆུ༌ ལག༌མོ༌ དང༌ ཚཱ༌ཀུ༌ ཉིས༌ཀོ༌ བིང༌ཨིན༌ན༌?
12 ངའེ༌ སྤུན༌གུན༌, ཅི༌ ཕིག༌གི༌ ཁ༌ཟས༌སི༌ ལྕང༌མའེ༌ ཀ༌ནེ༌ ཨོ༌ལིཝ༌ ཡ༌ རྒུན༌ནི༌ ཁ༌ཟས༌སི༌ ལྕང༌མའེ༌ ཀ༌ནེ༌ ཕིག༌ སྨིན༌ཨིན༌ན༌? མ༌ནེ༌ མི༌སྨིན༌། ཏེན༌ན༌ ཙོགས༌ལ༌ ཁྱོ༌ཞ༌གུན༌ནི༌ ཆུ༌མིག༌གི༌ ཆུ༌ ཚཱ༌ཀུའི༌ ནང༌ནེ༌ ཆུ༌ ལག༌མོ༌ ཕིང༌ མི༌ཉན༌།
དེན༌བའེ༌ ཤེས༌རབས༌ དཀོན༌མཆོག༌ནེ༌ བྱུང༌ང༌ནོག༌།
3:13 ནེ༌ 18
13 ཁྱོ༌ཞ༌གུན༌ནི༌ ཕྲོ༌ནེ༌ ཤེས༌རབས༌ཅན༌ དང༌ ཧ༌གོ༌ཅན༌བོ༌ སུ༌ ཨིན༌? ཏེ༌ཙོགས༌སི༌ མི༌བོའེ༌, ཤེས༌རབས༌ནེ༌ ཡོང༌ཁན༌ནི༌ པས༌མོ༌ ཉམ༌པོ༌ ལས༌ ཅོས༌ཏེ༌ མི༌ཚེ༌ ཟང༌པོ༌ཞིག༌ ཕུད༌ཏེ༌ སྟོན༌།
14 ཨིན༌ནའང༌ གལ༌ཏེས༌ ཁྱོ༌ཞའེ༌ སེམས༌སི༌ ནང༌ང༌ སྲན༌ཏྲེ༌ ཚིགས༌ཅེས༌ དང༌ རང༌དོད༌ ཡོད༌ན༌, ཤེས༌རབས༌ཅན༌ ལྟན༌ཨིན༌ རང༌སྟོད༌ ཏངས༌ཏེ༌ དཀོན༌མཆོག༌གི༌ དེན༌བའེ༌ ལབ༌ཞའེ༌ གྱབ༌གལ༌ མ༌ཅོ༌།
15 ཏེ༌ཙོགས༌སི༌ ཤེས༌རབས༌ དཀོན༌མཆོག༌གི༌ ཆོགས༌ནེ༌ མ༌ཡོང༌ང༌, ཇིག༌རྟེན༌པ༌ ཏད༌པ༌ མེད༌ཁན༌གུན༌ནི༌ སམ༌ཚུལ༌ དང༌ རྡུད༌ གུན༌ནེ༌ ཡོང༌ང༌ནོག༌།
16 ཀ༌རུ༌ ཚིག༌ཅེས༌ དང༌ རང༌དོད༌ ཡོད༌, ཏེ༌རུ༌ ཧི༌ལིངས༌ དང༌ ཚིར༌ཀ༌ མེད༌ཁན༌ ཡང༌ ངན༌པའེ༌ རིགས༌ ཚང༌མ༌ ཡོད༌ཏེ༌ ཨིན༌ནོག༌།
17 ཨིན༌ནའང༌ དཀོན༌མཆོག༌ནེ༌ ཡོང༌ཁན༌ནི༌ ཤེས༌རབས༌པོ༌ ནི༌, ཏང༌པོ༌རང༌ སེམས༌ ལག༌མོ༌, ཏེ༌ནེ༌ ཞི༌དེའ༌ ཐད༌ཁན༌, སེམས༌ བོལ༌མོ༌ ཡོད༌ཁན༌, ཝང༌ངི༌ ཡོག༌ག༌ དུག༌ག༌ལ༌ ཐད༌ཁན༌, སྙིང༌རྗེའེ༌ གངས༌ཁན༌, ལས༌ ཟང༌པོ༌ ཅོ༌ཁན༌, ཆོག༌རིས༌ མ༌ཅོ༌ཁན༌ དང༌ ཁ༌ཆོས༌ མ༌ཅོ༌ཁན༌ གུན༌ ཨིན༌ནོག༌།
18 མི༌ པར༌ལ༌ ཞི༌དེ༌ ཁྱོང༌ཁན༌གུན༌ནི༌ ཞན༌མ༌གུན༌ནི༌ སེམས༌སི༌ ནང༌ང༌ ཞི༌དེའེ༌ ས༌འོན༌ ཏབ༌བ༌ནོག༌, ཡང༌ དྲང༌པོའེ༌ སྟོན༌ཐོག༌ རྔའ༌ནོག༌།