5
ཡེ༌ཤུའི༌ རྡུད༌ ཞུགས༌ཁན༌ནི༌ མི༌ཞིག༌ ཕན༌ཅུག༌ག༌ ཛདས༌།
5:1 ནེ༌ 20
1 ཁོང༌གུན༌ ཚོའེ༌ ཕར༌ཀའ༌, ག༌ད༌རཱའེ༌ ཡུལ༌ཇོངས༌ལ༌ སྐྱོདས༌།
2 གཙོ༌བོ༌ ཡེ༌ཤུ༌ གྲུ༌ཟིང༌ནེ༌ བིང༌ང༌ ཛད༌ད༌ཅིག༌, རྡུད༌ ཞུགས༌ཁན༌ ཞིག༌ ཁོང༌ ཇལ༌ལ༌ལ༌ རོམ༌ཁང༌ངི༌ ནས༌ས༌ནེ༌ བིངས༌ཏེ༌ ཡོངས༌།
3 ཁོ༌ རོམ༌ཁང༌གུན༌ནི༌ ནང༌ང༌ དུག༌གད༌པིན༌, སུ༌ཞིག༌གིའང༌ ཁོ༌ ལྡམས༌ཏེ༌ བོར༌ མ༌ཉན༌ན༌ ཨིན༌པིན༌, ལྕག༌ཐག༌ ཉམ༌པོའང༌།
4 ལན༌ མང༌པོ༌ཞིག༌ ཁོའེ༌ རྐང༌ལག༌གུན༌ ལྕག༌ཐག༌ ཉམ༌པོ༌ ཏགས༌ཏེ༌ བོར༌ནའང༌ ཁོའེ༌ ལྕག༌ཐག༌ ཅད༌ཏེ༌ ཕངས༌, སུ༌ཞིག༌གའང༌ ཁོ༌ ལྡམས༌ཏེ༌ བོར༌ཅེས༌སི༌ ཤེད༌ མེད༌པིན༌།
5 ཉིན༌ཚན༌ མེད༌པ༌ ཁོ༌ རི༌ དང༌ རོམ༌ཁང༌གུན༌ནི༌ ཕྲོའ༌ ཁོར༌ཨིན༌, ཀུ༌ཅོ༌ ཏང༌ཨིན༌, རྡོའ༌ ནོན༌པོ༌ ཉམ༌པོ༌ རང༌ངི༌ ཟུགས༌པའེ༌ ཤ༌གུན༌ ཅད༌དད༌པིན༌།
6 ཁོའེ༌ ཐག༌རིང༌ནེ༌ ཡེ༌ཤུ༌ ཇལ༌ལ༌ཅིག༌, བང༌ཏངས༌ཏེ༌ ཁོང༌ངི༌ དུན༌ལ༌ ཁོ༌རང༌ངི༌ པིག༌དོང༌ ཙུགས༌།
7 ཁོའེ༌ ནང༌ང༌ ཞུགས༌ཁན༌ནི༌ རྡུད༌པོའེ༌ ཀུ༌ཅོ༌ ཤེད༌ཅན༌ ཏངས༌ཏེ༌ ཟེརས༌, "ཡེ༌ཤུ༌ དཀོན༌མཆོག༌ ཀུན༌ཝང༌ངི༌ སྲས༌ ཉེ༌རང༌ ངའེ༌ ལས༌སི༌ ནང༌ང༌ ཅིའ༌ དྲེས༌སད༌? ང༌ ནགས༌ མི༌ལྟན༌ཅེས༌ལ༌, དཀོན༌མཆོག༌གི༌ ཚན༌ནི༌ ནང༌ང༌ ནའ༌ ཁུར༌ར༌ ཛད༌།"
8 ཅིའ༌ཟེར༌ན༌ ཡེ༌ཤུའི༌ ཁོའ༌, "རྡུད༌, ཁྱོ༌རང༌ འི༌ མི༌བོའེ༌ ནང༌ནེ༌ བིང༌ཏེ༌ ཡོང༌" མོལ༌ལ༌ ཛད༌ཏེ༌ ཨིན༌པིན༌།
9 ཏེ༌ནེ༌ ཡེ༌ཤུའི༌ ཁོའ༌ ཏྲིའ༌ ཛདས༌, "ཁྱོ༌རང༌ངི༌ མིང༌ང༌ ཅི༌ ཨིན༌?"
ཁོའེ༌ ལན༌ཏངས༌, "ངའེ༌ མིང༌ང༌ རྡུད༌ཚོགས༌ ཨིན༌, ཅིའ༌ཟེར༌ན༌ ང༌ཞའ༌ མང༌པོ༌ཞིག༌ འི༌ མི༌བོའེ༌ ནང༌ང༌ ནས༌ཏེ༌ ཡོད༌།"
10 ཏེ༌ནེ༌ ཁོའེ༌ ཡེ༌ཤུའ༌ ཁོང༌གུན༌ འི༌ གྱལ༌ཁག༌ནེ༌ ཐག༌རིང༌ང༌ མི༌ཕིང༌ཅེས༌ལ༌ ཇུ༌ཇུ༌ ཞུ༌ཨིན༌ ཡང༌ནེ༌ ཡང༌ ཞུ༌ཝ༌ ཕུལས༌།
11 རི༌ ཉེ༌མོ༌ཞིག༌གི༌ཀ༌ ཕག༌གི༌ ཁྱུ༌ ཆེན༌མོ༌ཞིག༌ རྩཱ༌ ཟེན༌ ཡོད༌པིན༌།
12 རྡུད༌གུན༌ནི༌ ཡེ༌ཤུའ༌ ཇུ༌ཇུ༌ ཞུ༌ཨིན༌ ཟེརས༌, "ང༌ཞའ༌ འ༌ ཕག༌གུན༌ནི༌ ནང༌ང༌ ཀལ༌ལ༌ ཛད༌, ང༌ཞའ༌ ཏེ༌གུན༌ནི༌ ནང༌ང༌ ཆ༌ཅུག༌ག༌ ཛད༌།
13 ཡེ༌ཤུའི༌ གོངས༌པ༌ སལ༌ལ༌ ཛད༌པ༌, རྡུད༌གུན༌ བིང༌ཏེ༌ ཕག༌གུན༌ནི༌ ནང༌ང༌ ཞུགས༌། ཏེ༌ ཕག༌གི༌ ཁྱུ༌ ཧ༌ལམ༌ 2,000 ཞིག༌, རི༌ནེ༌ ཐུར༌ལ༌ བང༌ཏངས༌ཏེ༌ ཚོའེ༌ ནང༌ང༌ བུད༌ ཡང༌ ཆུའི༌ ནང༌ང༌ ནུབ༌ཏེ༌ ཤི༌།
14 ཕག༌ཚོ༌ཁན༌གུན༌ གྲོང༌ཁྱེར༌ དང༌ ཉེ༌ཁོར༌རི༌ ནས༌ས༌གུན༌ལ༌ བང༌ཏངས༌ཏེ༌ སོང༌ ཡང༌ བྱུང༌ཁན༌ ཚང༌མ༌ ཤདས༌, མི༌གུན༌ བྱུང༌ཁན༌གུན༌ ལྟའ༌ལ༌ སོང༌།
15 ཁོང༌གུན༌ ཡེ༌ཤུ༌ ཡོད༌ས༌ ལེབ༌བ༌ཅིག༌, རྡུད༌ ཚོགས༌ ཞུགས༌ཁན༌ནི༌ མི༌བོ༌, ཀོས༌ལག༌ གོན༌ཏེ༌ སྙོ༌ མ༌སྙོའ༌ ཏེ༌ཀ༌ དུགས༌ཏེ༌ ཐོང༌པ༌ ཁོང༌གུན༌ ཇིགས༌།
16 ཏེ༌ ཚང༌མ༌ ཐོང༌ཁན༌གུན༌ནི༌ རྡུད༌གུན༌ ཞུགས༌ཁན༌ནི༌ མི༌ དང༌ ཕག༌གུན༌ལ༌ བྱུང༌ཁན༌ནི༌ སྐོར༌བོ༌ མི༌གུན༌ལ༌ ཞིབ༌སལ༌ ཅོས༌ཏེ༌ ཤདས༌།
17 ཏེ༌ནེ༌ མི༌གུན༌ནི༌ ཡེ༌ཤུའ༌, ཁོང༌གུན༌ནི༌ ཡུལ༌ནེ༌ བིང༌ཏེ༌ སྐྱོད༌ ཇུ༌ཇུ༌ ཟེརས༌།
18 ཡེ༌ཤུ༌ གྲུ༌ཟིང༌ངི༌ ནང༌ང༌ ཞོན༌ན༌ ཛད༌ ཟ༌ནེ༌ སྔུན༌ལ༌ རྡུད༌གུན༌ ཞུགས༌ཏེ༌ ཡོད༌ཁན༌ནི༌ མི༌བོའེ༌ ཡེ༌ཤུའ༌, ཁོ༌ ཁོང༌ ཉམ༌པོ༌ ཡོང༌ ཅུག༌ག༌ ཛད༌ཅེས༌ལ༌ ཇུ༌ཇུ༌ ཟེར༌ཨིན༌ ཞུ༌ཝ༌ ཕུལས༌།
19 ཨིན༌ནའང༌ ཡེ༌ཤུའི༌ ཁོ༌ ཡོང༌ མ༌ཅུགས༌ ཡང༌ མོལས༌, "ཁང༌པ༌ ཁྱོ༌རང༌ངི༌ ནང༌མི༌གུན༌ ཡོད༌ས༌ སོང༌ཏེ༌, གཙོ༌བོའེ༌ ཁྱོ༌རང༌ངི༌ ཕིའ༌ ཛད༌ཁན༌ ཚང༌མ༌ དང༌ ཁྱོ༌རང༌ངི༌ཀ༌ ཁོང༌ངི༌ ཙམ༌ཤིག༌གི༌ སྙིང༌རྗེ༌ ལྟན༌ན༌ ཛད༌ཁན༌བོ༌ ཤོད༌།
20 ཏེ༌ནེ༌ ཁོ༌ ཏེ༌ཀ༌ནེ༌ སོང༌ཏེ༌ གྱལ༌ས༌ རྕུ༌ ཡོད༌ཁན༌ནི༌ གྱལ༌ཁག༌གི༌ ནང༌ང༌ ཡེ༌ཤུའི༌ ཁོའ༌ ཛད༌ཁན༌ ཚང༌མ༌ ཤདས༌, ཡང༌ ཁོའེ༌ ཤད༌ཁན༌གུན༌ ཚོར༌ཏེ༌ མི༌གུན༌ ཧ༌ལས༌།
བུ༌མོ༌ ཆུ༌ངུན༌ ཤི༌ཁན༌ དང༌ ཟུ༌མོ༌ ཡོང༌ཁན༌ནི༌ ན༌ཆུང༌ཞིག༌།
5:21 ནེ༌ 43
21 གཙོ༌བོ༌ ཡེ༌ཤུ༌ ཡང༌སྐྱར༌ གྲུ༌ཟིང༌ངི༌ ནང༌ང༌ ཚོའེ༌ འ༌ངོ༌ ཆོགས༌སི༌ ཕར༌ཀ༌ ལེབ༌བ༌ཅིག༌, ཚོའེ༌ ཐའ༌མ༌ ཡོད༌ ཟ༌ནེ༌ མི༌ཚོགས༌ ཆེན༌མོ༌ཞིག༌ ཛོམས༌ཏེ༌ ཁོང༌ང༌ ཁོར༌ཏེ༌ དུགས༌།
22 ཏེ༌ནེ༌ ཡ༌ཧུ༌དཱ༌པའེ༌ དུ༌ཁང༌ངི༌ འུ༌སྐྱོང༌ ཡའེ༌རས༌ ཟེར༌ཁན༌བོ༌ ཏེ༌རུ༌ ཡོངས༌། ཡེ༌ཤུ༌ ཇལ༌ལ༌ཅིག༌, ཁོ༌ ཁོང༌ངི༌ ཞབས༌སི༌ དུན༌ལ༌ གྱེལ༌ཏེ༌
23 སྙིང༌ནེ༌ ཇུ༌ཇུ༌ ཞུ༌ཨིན༌ ཟེརས༌, "ངའེ༌ བུ༌མོ༌ ཆུ༌ངུན༌བོ༌ ཤི༌ཀྱིས༌ དུག༌། ཇུ༌ཇུ༌ སྐྱོད༌ཏེ༌ ཉེ༌རང༌ངི༌ ཆག༌ ཁོའེ༌ཀ༌ བོར༌ར༌ ཛད༌ན༌ ཁོ༌ ཕན༌ཏེ༌ སོན༌ཨིན༌།"
24 ཡེ༌ཤུ༌ ཁོ༌ ཉམ༌པོ༌ སྐྱོད༌ད༌ ཛདས༌། མི༌ཚོགས༌ ཆེན༌མོ༌, ཁོང༌ངི༌ སྟིང༌རང༌ནེ༌ ཡོངས༌ཏེ༌ ཁོང༌ང༌ ནན༌ཏེ༌ ཁྱོངས༌།
25 བུད༌ཁན༌ནི༌ ལོ༌ ཅུག༌ཉིས༌ནེ༌ ཕར༌ལ༌ ཏུས༌གྱུན༌ ཟུགས༌པོ༌ ཞིག༌ཅེས༌སི༌ ཟུ༌མོ༌ ཡོངས༌ཁན༌ནི༌ བུ༌མོ༌ཞིག༌ མི༌ཚོགས༌སི༌ ཕྲོའ༌ ཡོད༌པིན༌།
26 ཨམ༌ཆི༌གུན༌ནི༌ ལྟ༌སྟོགས༌སི༌ ནང༌ང༌ ནགས༌ མང༌པོ༌ ཐོང༌ཏེ༌ ཁོ༌རང༌ངི༌ པེ༌ནེ༌ ཚང༌མ༌ སྐྱགས༌ཏེའང༌, ཁོ༌ གྱལ༌ལ༌ ཆ༌ཅེས༌སི༌ སང༌ མང༌ང༌ ཐུའ༌ སོང༌ཏེ༌ ཡོད༌པིན༌།
27 ཁོའ༌ ཡེ༌ཤུའི༌ སྐོར༌ལ༌ ཚོར༌པ༌, མི༌ཚོགས༌སི༌ ནང༌ང༌ ཁོང༌ངི༌ གྱབ༌ནེ༌ ཡོངས༌ཏེ༌ ཁོང༌ངི༌ ནམ༌ཟའ༌ ལག༌པ༌ ཏུགས༌།
28 ཅིའ༌ཟེར༌ན༌ ཁོའེ༌ ཁོ༌རང༌ངི༌ སེམས༌སི༌ ནང༌ང༌ སམ༌, "གལ༌ཏེས༌ ཁོང༌ངི༌ ནམ༌ཟའ༌ ལག༌པ༌ ཐུག༌ན༌ ངའེ༌ ཟུ༌མོ༌ གྱལ༌ལ༌ནོག༌"
29 ཏེན༌ན༌མལ༌ལ༌ ཁྲག༌པོ༌ ཆད༌ཏེ༌ རྩོག༌པོ༌ ཟུ༌མོ༌ནེ༌ ཕན༌ཁན༌བོ༌ ཁོའ༌ གྱུས༌སོང༌།
30 ཏེན༌ན༌ ཏུས༌ལ༌, ཁོང༌ངི༌ ནང༌ནེ༌ ཕན༌ཅུག༌ཁན༌ནི༌ སྟོབས༌ བིངས༌ཏེ༌ ཆའ༌ཁན༌བོ༌ ཡེ༌ཤུའི༌ ཁྱེན༌། ཁོང༌ངི༌ འི༌ངོ༌ འ༌ངོ༌ གྱུར༌ཨིན༌ མི༌ཚོགས༌ལ༌ ཟིགས༌ཏེ༌ ཏྲིས༌, "སུའི༌ ངའེ༌ ཀོས༌ལག༌ག༌ ལག༌པ༌ ཏུགས༌?"
31 ཁོང༌ངི༌ ལོབ༌ཕྲུགས༌གུན༌ནི༌ ཁོང༌ང༌ ཟེརས༌, "མི༌ཚོགས༌སི༌ ནན༌ཨིན༌ ཕུལ༌ཨིན༌ ཁྱོང༌ཅེས༌པོ༌ ཉེ༌རང༌ངི༌ ཟིགས༌ས༌ནོག༌, ཏེ༌ནེ༌ ཉེ༌རང༌ངི༌ སུའི༌ ངའ༌ ལག༌པ༌ ཏུགས༌ མོལ༌ཏེ༌ ཅིའ༌ ཏྲིའ༌ ཛད༌དད༌?"
32 ཨིན༌ནའང༌ ལག༌པ༌ ཏུགས༌ཁན༌བོའ༌ ཟིག༌ཤེས༌ལ༌ ཁོང༌ངི༌ འི༌ངོ༌ འ༌ངོའ༌ ཟིགས༌ཨིན༌ ཞུགས༌།
33 ཏེ༌ནེ༌ བུ༌མོ༌བོའེ༌ ཁོ༌རང༌ང༌ བྱུང༌ཁན༌གུན༌ གྱུས༌ཡོད༌པ༌, ཇིགས༌ཨིན༌ ཏར༌ཨིན༌ ཡེ༌ཤུའི༌ དུན༌ལ༌ ཡོངས༌ཏེ༌ ཁོང༌ངི༌ ཞབས༌སི༌ཀ༌ གྱེལས༌ ཡང༌ ཁོང༌ང༌ ཅི༌ཚང༌མ༌ དྲང༌པོ༌ ཤདས༌།
34 ཡེ༌ཤུའི༌ ཁོའ༌ མོལས༌, "བུ༌མོ༌ ཁྱོ༌རང༌ངི༌ ཏད༌པའེ༌ ཁྱོ༌རང༌ ཕན༌ཅུགས༌ཏེ༌ ཨིན༌། ཞི༌དེའེ༌ ཉམ༌པོ༌ སོང༌, ཁྱོ༌རང༌ངི༌ རྡུག༌ངལ༌བོ༌ མེད༌ཁན༌ སོང༌ཏེ༌ ཨིན༌ནོག༌།"
35 ཁོང༌ངི༌ ཞལ༌ཏ༌ སལ༌ཨིན༌ ཡོད༌ ཟ༌ནེ༌, དུ༌ཁང༌ངི༌ འུ༌སྐྱོང༌ ཡའེ༌རས༌སི༌ ཁང༌པ༌ནེ༌ མི༌ ཁ༌ཅིག༌ ཡོངས༌ཏེ༌ ཁོའ༌ ཟེརས༌, "ཉེ༌རང༌ངི༌ བུ༌མོ༌བོ༌ ཤི༌, ཏ༌ ལོབ༌པོན༌ལེའ༌ འོབ༌གྱལ༌ ལྟན༌ན༌ མ༌ཛད༌།"
36 ཨིན༌ནའང༌ ཡེ༌ཤུའི༌ ཁོང༌གུན༌ནི༌ ཟེར༌ཁན༌བོའ༌ སྣང༌ང༌ མ༌སལ༌ལ༌ ཡའེ༌རས༌ལ༌ མོལས༌, "ཇིགས༌ མ༌ཇིགས༌། ཏད༌པ༌ རང༌ ཅོས༌།"
37 ཏེ༌ནེ༌ ཡེ༌ཤུའི༌ པི༌ཏྲར༌, ཡ༌ཀོབ༌ དང༌, ཁོའེ༌ ནོ༌ ཡོ༌ཧཱ༌ནན༌ མ༌སྟོགས༌ ཞན༌སུ༌ཞིག༌གའང༌ ཁོང༌ ཉམ༌པོ༌ ཡོང༌ ཅུག༌ག༌ མ༌ཛདས༌།
38 ཁོང༌གུན༌ དུ༌ཁང༌ངི༌ འུ༌སྐྱོང༌ངི༌ ཁང༌པ༌ ལེབ༌བ༌ཅིག༌, ཀུ༌ཅོ༌ ཏང༌ཨིན༌, ངུ༌ཨིན༌ མི༌ མང༌པོ༌ཞིག༌གི༌ ཧི༌ལིངས༌ ཏང༌ང༌ ཡེ༌ཤུའི༌ ཟིགས༌།
39 ཁོང༌ ནང༌ཀུག༌ག༌ སྐྱོད༌ཏེ༌, "ཅི༌ཕིའ༌ ངུ༌ཨིན༌ ཧི༌ལིངས༌ ཏང༌ངད༌? ཕྲུ༌གུ༌བོ༌ མ༌ཤིའ༌ ཉིད༌ལོགས༌ཏེ༌ ཨིན༌" མོལ༌པ༌
40 ཁོང༌གུན༌ནི༌ ཁྲེལ༌གོད༌ ཏངས༌།
ཡེ༌ཤུའི༌ ཁོང༌ ཚང༌མ༌ ཁང༌པ༌ནེ༌ ཕི༌ལོག༌ག༌ བིངས༌ཏེ༌ བུ༌མོའེ༌ ཕ༌མ༌ དང༌, ཁོང༌རང༌ངི༌ ལོབ༌ཕྲུགས༌ སུམ༌ཀོ༌ ཁྲིད༌ཏེ༌ བུ༌མོ༌ ཡོད༌སའེ༌ ནང༌ང༌ སྐྱོདས༌
41 ཡང༌ བུ༌མོའེ༌ ལག༌པ༌ ཐམས༌ས༌ ཛད༌ཏེ༌ ཁོའ༌ མོལས༌, "ཏ༌ལི༌ཐའ༌ ཀོའམ༌" ཀ༌བོའེ༌ ཏོན༌ཏག༌པོ༌ "བུ༌མོ༌ ཆུ༌ངུན༌ ལོངས༌" ཟེར༌ར༌ནོག༌།
42 ཏེན༌ན༌མལ༌ལ༌ ལོ༌ ཅུག༌ཉིས༌ ཆའ༌ཁན༌ནི༌ བུ༌མོ༌བོ༌ ཀོའག༌ ལངས༌ཏེ༌ གྲུལས༌། ཏེ༌བོ༌ ཐོང༌ཏེ༌ ཁོང༌གུན༌ མ༌སྲན༌ཏྲེ༌ ཧ༌ལས༌།
43 བྱུང༌ཁན༌བོ༌ སུའང༌ མི༌ཤད༌ཅེས༌ལ༌ ཡེ༌ཤུའི༌ ཁོང༌གུན༌ལ༌ བཀའ༌ སལས༌, ཡང༌ ཁོང༌གུན༌ལ༌ བུ༌མོ༌བོའ༌ ཅི༌ཏོང༌ཤིག༌ ཟའ༌ ཏང༌ཅེས༌ལ༌ མོལས༌།