6
སྡིག༌པའེ༌ ཝང༌བོ༌ ཅག༌ག༌ ཛདས༌།
6:1 ནེ༌ 23
1 ཏེ༌ནེ༌ ང༌ཏི༌ ཅི༌ ཟེར༌གོས༌, དཀོན༌མཆོག༌གི༌ ཐུག༌རྗེའེ༌ གྱས༌ཤུག༌ཅེས༌ལ༌, ཅི༌ ང༌དང༌གུན༌ནི༌ སྡིག༌པ༌ ཅོ༌ཨིན༌ ཆ༌གོས༌ས༌?
2 མ༌ནེ༌ མ༌གོས༌། ང༌དང༌གུན༌ སྡིག༌པའེ༌ ཕིའ༌ ཤི༌ཏེ༌ ཨིན༌ པ༌སང༌, ཏེ༌ནེ༌ ང༌དང༌གུན༌ནི༌ ཏེ༌ནང༌ང༌ མི༌ཚེ༌ ཀ༌ཟུག༌གི༌ ཕུད༌ཨིན༌?
3 མ༌ཤི༌ཀ༌ ཡེ༌ཤུའི༌ ཁྲུས༌སི༌ ནང༌ང༌ དྲེས༌ཁན༌གུན༌ནི༌ ཁོང༌ངི༌ ཤི༌ཅེས༌སི༌ ནང༌ངའང༌ དྲེས༌ཏེ༌ ཨིན༌ཁན༌བོ༌, ཅི༌ ཁྱོ༌ཞ༌གུན༌ལ༌ གྱུས༌མེད༌ད༌?
4 ཁྲུས༌ལེན༌ཅེས༌ གྱུད༌ཏེ༌, ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌ཏེ༌ སུབས༌ཁན༌ ཙོགས༌ ཨིན༌ནོག༌། ཡང༌ ཀ༌ཟུག༌ དཀོན༌མཆོག༌ ཡབ༌བི༌ ཟིར༌རྗིད༌དི༌ ཁྱུད༌ གྱུད༌ཏེ༌, མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ ལང༌ང༌ ཛད༌པ༌, ཏ༌ ང༌དང༌གུན༌ནིའང༌ མི༌ཚེ༌ སོ༌མ༌ཞིག༌ ཕུད༌ཐུབ༌ཅེས༌ ཨིན༌ནོག༌།
5 གལ༌ཏེས༌ ཁྲུས༌ལེན༌ཅེས༌པོའེ༌, ང༌དང༌གུན༌ ཡེ༌ཤུ༌ ཀྲོང༌ཤེས༌པོའེ༌ ནང༌ང༌ དྲེས༌ན༌, ཏེ༌ནེ༌ ང༌དང༌གུན༌ ཁོང༌ ཉམ༌པོ༌ སོན༌ཏེའ༌ ལང༌ཅེས༌པོའེ༌ ནང༌ངའང༌ དྲེ༌ཤེས༌པོ༌ ཏན༌ཏན༌ ཨིན༌ནོག༌།
6 ང༌དང༌གུན༌ལ༌ གྱུས༌ཨིན༌ནོག༌, སྡིག༌པའེ༌ ཝང༌བོ༌ ང༌དང༌ངི༌ མི༌ཚེའེ༌ ནང༌ང༌ མི༌ལུས༌ཤེས༌སི༌ ཕིའ༌, ང༌དང༌གུན༌ནི༌ སྙིང༌པ༌ སྡིག༌ཅན༌ ཟུགས༌པོ༌བོ༌ མ༌ཤི༌ཀ༌ ཉམ༌པོ༌ རྐྱང༌ཤིང༌ངི༌ཀ༌ རྐྱངས༌ཏེ༌ ཨིན༌པིན༌། ཏ༌ ང༌དང༌གུན༌ སྡིག༌པའེ༌ ཚེ༌ཡོག༌ག༌ ལུས༌གོ༌ཤེས༌ མ༌ནོག༌།
7 ཅིའ༌ཟེར༌ན༌ ནམ༌ ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌, ང༌དང༌གུན༌ལ༌ སྡིག༌པའེ༌ ཝང༌ནེ༌ ཐར༌པ༌ ཐོབ༌ཏེ༌ ཨིན༌ནོག༌།
8 ཡང༌ ང༌དང༌གུན༌ མ༌ཤི༌ཀ༌ ཉམ༌པོ༌ ཤི༌ པ༌སང༌, ཁོང༌ ཉམ༌པོ༌ མི༌ཚེ༌ ཕུད༌ཅེས༌པོའང༌ ང༌དང༌གུན༌ལ༌ གྱུས༌ཨིན༌ནོག༌།
9 ཏེ༌གུན༌ ཏན༌ཏན༌ ཨིན༌ཁན༌བོ༌ ང༌དང༌གུན༌ལ༌ གྱུས༌ཨིན༌ནོག༌, ཅིའ༌ཟེར༌ན༌ མ༌ཤི༌ཀ༌ ཤི༌ཁན༌གུན༌ནི༌ ཕྲོ༌ནེ༌ སོན༌ཏེའ༌ ལང༌ང༌ ཛདས༌, ཁོང༌ ཡང༌སྐྱར༌ མ༌ནེ༌ མི༌ཤི༌, ཏ༌ ཁོང༌ངི༌ཀ༌ ཤི༌ཅེས༌པོའ༌ ཝང༌ མེད༌པ༌ ཨིན༌ནོག༌།
10 ནམ༌ མ༌ཤི༌ཀ༌ ཀྲོངས༌, སྡིག༌པའེ༌ ཝང༌བོ༌ ཅག༌ཅེས༌ལ༌ ཁོང༌ ལན༌ཕོག༌ ཅིག༌ ཀྲོངས༌། ཨིན༌ནའང༌ ཏ༌ ཁོང༌ སོན༌པོ༌ ཞུགས༌ཏེ༌, ཡང༌ ཁོང༌ངི༌ དཀོན༌མཆོག༌གི༌ སྤལ༌ལི༌ ཕིའ༌ མི༌ཚེ༌ ཕུད༌ད༌ ཛད༌ད༌ནོག༌།
11 ཏེན༌ན༌ ཙོགས༌ལ༌ ཁྱོ༌ཞ༌གུན༌ནའང༌ སྡིག༌པའེ༌ ཝང༌ངི༌ ཕིའ༌ ཤི༌ཏེ༌ ཡང༌ མ༌ཤི༌ཀ༌ ཡེ༌ཤུ༌ གྱུད༌ཏེ༌, དཀོན༌མཆོག༌གི༌ སྤལ༌ལི༌ ཕིའ༌ མི༌ཚེ༌ ཕུད༌ཨིན༌ ཨིན༌ཁན༌བོ༌ སམ༌གོས༌།
12 ཏེ༌ནེ༌ ངན༌པའེ༌ དོད༌པ༌གུན༌ནི༌ ཁའ༌ མི༌ཉན༌ཅེས༌སི༌ ཕིའ༌ ཁྱོ༌ཞ༌གུན༌ནི༌ ཤི༌ཅེས༌ཅན༌ནི༌ ཟུགས༌པའེ༌ཀ༌ སྡིག༌པ༌ ཝང༌སྲུལ༌ མ༌ཅུག༌ཤིག༌།
13 ཁྱོ༌ཞ༌གུན༌ནི༌ ཟུགས༌པོའེ༌ ཁག༌ཅིག༌གའང༌, སྡིག༌པའེ༌ ཡོག༌པོ༌ ཅོ༌ཨིན༌ ངན༌པའེ༌ ལག༌ཆ༌ རིག༌ག༌ གྱུར༌ མ༌ཅུག༌ག༌, ཁྱོ༌ཞ༌རང༌གུན༌ ཅི༌ས༌ཐོག༌ནེ༌ དཀོན༌མཆོག༌ག༌ ཕུལ༌ཤིག༌། ཅིའ༌ཟེར༌ན༌ ཁྱོ༌ཞ༌གུན༌ ཤི༌ཏེ༌ ཨིན༌པིན༌, ཨིན༌ནའང༌ ཏ༌ ཁྱོ༌ཞ༌གུན༌ལ༌ མི༌ཚེ༌ སོ༌མ༌ཞིག༌ ཡོད༌ཏེ༌ ཨིན༌ནོག༌། ཏེ༌བོའེ༌ཕིའ༌ ཁྱོ༌ཞ༌གུན༌ནི༌ ཟུགས༌པོ༌བོ༌ དཀོན༌མཆོག༌ག༌ སྤལ༌ ཐོབ༌ཅེས༌ལ༌ འོས༌པའེ༌ ལས༌གུན༌ ཅོ༌ཅེས༌སི༌ ལག༌ཆ༌ ཙོགས༌ལ༌ ཀོལ༌ཤིག༌།
14 ཏ༌ སྡིག༌པ༌བོ༌ ཁྱོ༌ཞ༌གུན༌ནི༌ སྤོན༌བོ༌ མ༌ནོག༌, ཅིའ༌ཟེར༌ན༌ ཁྱོ༌ཞ༌གུན༌ནི༌ ཁྲིམས༌སི༌ ངའ༌ཡོག༌ག༌ མི༌ཚེ༌ མ༌ཕུད༌ད༌, དཀོན༌མཆོག༌གི༌ ཐུག༌རྗེའེ༌ རང༌ཝང༌ངི༌ ངའ༌ཡོག༌ག༌ མི༌ཚེ༌ ཕུད༌ད༌ནོག༌།
15 ཏེ༌ནེ༌ ཅི༌, ང༌དང༌གུན༌ ཁྲིམས༌སི༌ ངའ༌ཡོག༌ག༌ མན༌པ༌, ཐུག༌རྗེ༌ ངའ༌ཡོག༌ག༌ ཨིན༌ཅེས༌པོའེ༌ སྡིག༌པ༌ ཅོ༌གོས༌ས༌? མ༌ནེ༌ མ༌གོས༌།
16 ཁྱོ༌ཞའེ༌ ཁའ༌ ཉན༌ཅེས༌ལ༌ ལྡམས༌ཁན༌བོའེ༌, ཁྱོ༌ཞའ༌ ཡོག༌པོ༌ གྱུར༌ཅེས༌པོ༌, ཧ༌གོའ༌ མེ༌རག༌ག༌? གལ༌ཏེས༌ སྡིག༌པའེ༌ ཡོག༌པོ༌ གྱུར༌ཅུག༌ན༌, ཏེ༌བོའེ༌ ཁྱོ༌ཞ༌གུན༌ ཉལ༌ཝའེ༌ ནང༌ང༌ ཁྲིད༌ཨིན༌, ཨིན༌ནའང༌ དཀོན༌མཆོག༌གི༌ ཁའ༌ཉན༌ན༌, ཏེ༌བོའེ༌ ཁྱོ༌ཞ༌གུན༌ མི༌ཚེ༌ དྲང༌པོ༌ཞིག༌གི༌ ནང༌ང༌ ཁྲིད༌ཨིན༌།
17 ཁྱོ༌ཞའ༌ སྡིག༌པའེ༌ ཚེ༌ཡོག༌ ཨིན༌པིན༌, ཨིན༌ནའང༌ ཏ༌ ཁྱོ༌ཞ༌གུན༌ནི༌ ང༌ཞའེ༌ ལབ༌ཞ༌ ཏང༌ཁན༌གུན༌ནི༌ཀ༌ སེམས༌ གང༌པོ༌ནེ༌ ཁའ༌ཉན༌ཅེས༌པོའེ༌ཀ༌ ངའེ༌ དཀོན༌མཆོག༌ག༌ ཐུག༌རྗེ༌ཆེ༌ ཞུའད༌།
18 ཏ༌ ཁྱོ༌ཞ༌གུན༌ སྡིག༌པའེ༌ ཀ༌ནེ༌ ཐར༌ཏེ༌ དྲང༌པོ༌ མི༌ཚེ༌ཞིག༌ ཕུད༌ཅེས༌སི༌ ཚེ༌ཡོག༌ གྱུར༌ཏེ༌ ཨིན༌ནོག༌།
19 སེམས༌ཤུགས༌ མེད༌ཁན༌ནི༌ མི༌ ཨིན༌ཅེས༌པོའེ༌, ཁྱོ༌ཞ༌གུན༌ལ༌ འི༌ ཚང༌མ༌ ཧ༌གོ༌ཅུག༌ཅེས༌ལ༌ ངའེ༌ ཚེ༌ཡོག༌གི༌ སྤེ༌བོ༌ ཀོལ༌ལད༌། སྔུན༌ལ༌ ཁྱོ༌ཞའེ༌, ཁྱོ༌ཞ༌རང༌གུན༌ མང༌ངི༌ སང༌ མང༌ང༌ ངན༌པ༌ དང༌ ཚི༌ཏུ༌ ལས༌ ཉིས༌ཀོའེ༌ ཚེ༌ཡོག༌ གྱུར༌ཅུགས༌། ཏ༌ དམ༌པ༌ གྱུར༌ཅེས༌སི༌ ཕིའ༌ ཁྱོ༌ཞའེ༌ རང༌དང༌རང༌ མི༌ཚེ༌ དྲང༌པོ༌ཞིག༌གི༌ ཚེ༌ཡོག༌ གྱུར༌ཅུག༌གོས༌།
20 ཁྱོ༌ཞ༌གུན༌ སྡིག༌པའེ༌ ཚེ༌ཡོག༌ ཨིན༌ ཟ༌ནེ༌, ཁྱོ༌ཞ༌གུན༌ལ༌ མི༌ཚེ༌ དྲང༌པོ༌ཞིག༌ ཕུད༌ཅེས༌སི༌ ཚེར༌ཁའ༌ མ༌ནེ༌ མེད༌པིན༌།
21 ཡང༌ ཏེ༌བོའེ༌ བྲས༌བུ༌ ཀ༌ཟུག༌ཤིག༌ ཡོངས༌? ཏ༌ ཁྱོ༌ཞ༌གུན༌ ཏེ༌ཟུག༌ ཅོ༌ཁན༌གུན༌ནི༌ཀ༌ ཙམ༌ཤིག༌གི༌ ཁྲེལ༌བ༌ ཚོར༌ར༌ནོག༌, ཀ༌བོའེ༌ བྲས༌བུ༌ ཐའ༌མེད༌པའེ༌ ཤི༌ཅེས༌པོ༌ ཨིན༌ནོག༌།
22 ཨིན༌ནའང༌ ཁྱོ༌ཞ༌གུན༌ སྡིག༌པའེ༌ ཝང༌ངི༌ ཡོག༌ནེ༌ ཐར༌ཏེ༌, དཀོན༌མཆོག༌གི༌ ཚེ༌ཡོག༌ གྱུར༌ཏེ༌ ཨིན༌ནོག༌། ཏ༌ ཁྱོ༌ཞ༌གུན༌ནི༌ དམ༌པ༌ ཆོགས༌ལ༌ ཁྲིད༌ཁན༌ནི༌ ལས༌གུན༌ ཅོ༌ཨིན༌ ཨིན༌ནོག༌, ཀ༌བོའེ༌ བྲས༌བུ༌ ནི༌ ཐའ༌མེད༌པའེ༌ མི༌ཚེ༌བོ༌ ཨིན༌།
23 སྡིག༌པའེ༌ ལ༌ཆ༌བོ༌ ནི༌ ཤི༌ཅེས༌པོ༌ ཨིན༌ནོག༌། ཨིན༌ནའང༌ ང༌དང༌གུན༌ནི༌ གཙོ༌བོ༌ མ༌ཤི༌ཀ༌ ཡེ༌ཤུ༌ གྱུད༌ཏེ༌ དཀོན༌མཆོག༌གི༌ ཆོན༌ལ༌ སལ༌ལ༌ ཛད༌ཁན༌ནི༌ སོལ༌རས༌པོ༌ ནི༌, ཐའ༌མེད༌པའེ༌ མི༌ཚེ༌བོ༌ ཨིན༌།