9
ལྡམ༌མ༌ ཛད༌ཁན༌ ཨིས༌ར༌ཨེལ༌པ༌གུན༌།
9:1 ནེ༌ 29
1 ངའེ༌ ཟེར༌ཁན༌བོ༌ དྲང༌པོ༌ ཡང༌ ཟུན༌ ཏངས༌ཏེ༌ མན༌ཁན༌བོའེ༌ སྤང༌པོ༌ མ༌ཤི༌ཀ༌ ཨིན༌། ངའེ༌ སེམས༌ དང༌ དམ༌པའེ༌ ཐུག༌ཉིད༌དི༌ ཏེ༌བོ༌ ཏན༌ཏན༌ ཅོའ༌ནོག༌།
2-3 ང༌རང༌ངི༌ མི༌, ཡ༌ཧུ༌དཱ༌པའེ༌ སྤུན༌གུན༌ནི༌ ཕིའ༌ ངའེ༌ སྙིང༌བོ༌ རྡུག༌ངལ༌ ཆེན༌མོ༌ དང༌ ཐའ༌མེད༌པའེ༌ ཚེར༌ཁའེ༌ གངས༌ཏེ༌ རག༌། གལ༌ཏེས༌ མ༌ཤི༌ཀ༌ ཉམ༌པོ༌ ངའེ༌ བྲེལ༌ ཆད༌ཏེ༌ ང༌ ཏུས༌གྱུན༌ནི༌ ཕིའ༌ ངན༌ ཕོག༌ཅེས༌པོའེ༌, ཁོང༌གུན༌ སྐྱོབ༌ཐུབ༌བད༌ན༌, ང༌ ཏེ༌གུན༌ ལེན༌ཅེས༌ལ༌ ཐད༌ད༌རག༌།
4 ཁོང༌གུན༌ ཨིས༌ར༌ཨེལ༌པ༌, དཀོན༌མཆོག༌གི༌ སོས༌བུའ༌ ལྡམ༌མ༌ ཛད༌ཁན༌ནི༌ ཕྲུ༌གུ༌གུན༌ ཨིན༌ནོག༌། དཀོན༌མཆོག༌གི༌ ཟིར༌རྗིད༌པོ༌ ཁོང༌གུན༌ལ༌ ཇལ༌ ཅུག༌ག༌ ཛདས༌, ཡང༌ ཁོང༌གུན༌ ཉམ༌པོ༌ ཆད༌དོན༌ ཅོའ༌ ཛད༌ཏེ༌ ཏེ༌གུན༌ལ༌ ཁོང༌རང༌ངི༌ ཁྲིམས༌ སལ༌ལ༌ ཛདས༌། དཀོན༌མཆོག༌གི༌ ཁོང༌གུན༌ལ༌ ཁོང༌ངི༌ ཧ༌ལས༌ཤེས༌སི༌ ཞལ༌ཆད༌གུན༌ ཐོབ༌ཅེས༌ དང༌ ཁོང༌ང༌ ཅོལ༌ཅེས༌སི༌ རྩི༌ཝ༌ སལ༌ལ༌ ཛདས༌།
5 ཨབ༌ར༌ཧམ༌, ཨི༌སཱག༌ དང༌, ཡ༌ཀོབ༌ གུན༌, ཁོང༌གུན༌ནི༌ ཕ༌མེས༌པོ༌ ཨིན༌ནོག༌། མ༌ཤི༌ཀ༌ མིའི༌ ཚུལ༌ལ༌ ལྟམས༌ ཟ༌ནེ༌, ཁོང༌ ཨིས༌ར༌ཨེལ༌པ༌ཞིག༌ ཞུགས༌ཏེ༌ ཨིན༌པིན༌། ཡང༌ ཁོང༌ ནི༌ དཀོན༌མཆོག༌ ཞུགས༌ཏེ༌ ཨིན༌ནོག༌། ཁོང༌ ནི༌ ཅི༌ཚང༌མའེ༌ཀ༌ ཝང༌སྲུལ༌ ཛད༌ཁན༌ དང༌ ཏུས༌གྱུན༌ སྟོད༌པ༌ ཐོབ༌ཅེས༌སི༌ འོས༌པ༌ ཨིན༌ནོག༌, ཨ༌མེན༌།
6 ཏེ༌ནེ༌ ཅི༌? དཀོན༌མཆོག༌གི༌ ཨིས༌ར༌ཨེལ༌པ༌གུན༌ལ༌ ཛད༌ཁན༌ནི༌ ཞལ༌ཆད༌པོ༌ དྲན༌དྲའ༌ མ༌གྲུབ༌བ༌ ཨིན༌ནོག༌ག༌? མ༌ནེ༌ མ༌ནོག༌། ཨིས༌ར༌ཨེལ༌ལི༌ ཡུལ༌ལ༌ སྐྱེས༌ཁན༌གུན༌ནི༌ ནང༌ནེའང༌ ཚང༌མ༌, དཀོན༌མཆོག༌གི༌ མི༌གུན༌ནི༌ ནང༌ང༌ ཐེའ༌ མ༌ཛདས༌།
7 ཨབ༌ར༌ཧམ༌མི༌ པུར༌གྱུད༌ ཨིན༌ཁན༌གུན༌ནི༌ ནང༌ནེའང༌ ཚང༌མ༌, ཨབ༌ར༌ཧམ༌མི༌ དེན༌བའེ༌ ཕྲུ༌གུ༌ མ༌ནོག༌, ཅིའ༌ཞུ༌ན༌ དམ༌པའེ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌, "ཨི༌སཱག༌ ནི༌ ཏེན༌ན༌ བུ༌ཚ༌བོ༌ ཨིན༌, ཀ༌བོ༌ གྱུད༌ཏེ༌ ཁྱོ༌རང༌ངི༌ པུར༌གྱུད༌གུན༌ བྱུང༌ཨིན༌། "
8 ཏེ༌བོའེ༌ ཏོན༌ ནི༌, ཟུགས༌སི༌ ཐོག༌ནེ༌ ཨབ༌ར༌ཧམ༌མི༌ པུར༌གྱུད༌གུན༌ དཀོན༌མཆོག༌གི༌ ཕྲུ༌གུ༌ མ༌ཐེའ༌, ཞལ༌ཆད༌ ཛད༌ཁན༌ནི༌ པུར༌གྱུད༌གུན༌, ཨབ༌ར༌ཧམ༌མི༌ ཕྲུ༌གུ༌ ཐེའ༌ ཛད༌ཨིན༌།
9 ཅིའ༌ཟེར༌ན༌ དཀོན༌མཆོག༌གི༌ ཞལ༌ཆད༌ ཛདས༌, "སྟིང༌མ༌ ལོ༌, ཧ༌ལམ༌ འིན༌ན༌ཏུས༌ཤིག༌ག༌ ང༌ ལོགས༌ཏེ༌ ཡོང༌ ཟ༌ནེ༌ སཱ༌ར༌, བུ༌ཚ༌ཞིག༌ སྐྱེས༌ཏེ༌ ཡོང༌ཨིན༌། "
10 འི༌ བུ༌ཚ༌བོ༌ ང༌དང༌གུན༌ནི༌ ཕ༌མེས༌པོ༌ ཨི༌སཱག༌ ཨིན༌པིན༌། ཁོའེ༌ ར༌བེ༌ཀ༌ ན༌མ༌ ཅོས༌ ཡང༌ ར༌བེ༌ཀ༌ བུ༌ཚ༌ ཚག༌ཕྲུག༌ ཇོར༌།
11 ཨིན༌ནའང༌ ཁོང༌གུན༌ སྐྱེ༌ སང༌ སྔུན༌ལ༌, ཡང༌ ཁོང༌གུན༌ནི༌ ཟང༌པོ༌ ཡ༌ ངན༌པ༌ ཅོའེ༌ སང༌ སྔུན༌ལ༌, ར༌བེ༌ཀ༌ དཀོན༌མཆོག༌གི༌ ཆོགས༌ནེ༌ ལོན༌ཞིག༌ ཐོབ༌། ༼འི༌ ལོན༌བོའེ༌ ཏོན༌ ནི༌, དཀོན༌མཆོག༌གི༌ མི༌གུན༌ ཁོང༌རང༌ངི༌ གྱུན༌ཚན༌ཞིག༌གི༌ ཕིའ༌ ལྡམ༌མ༌ ཛདས༌,
12 ཁོང༌ངི༌ མི༌གུན༌ བོད༌ད༌ ཛདས༌, ཨིན༌ནའང༌ ཏེ༌གུན༌ནི༌ ལས༌ ཟང༌པོ༌ ཡ༌ ངན༌པ༌ གུན༌ནི༌ཀ༌ རག༌ལས༌ཏེ༌ མ༌ནོག༌༽། ཁོང༌ངི༌ ར༌བེ༌ཀ༌ མོལས༌, "ཁྱོ༌རང༌ངི༌ བུ༌ཚ༌ ཆེའ༌བོའེ༌ ཆུང༌ང༌བོའ༌ ཞབ༌སྟོག༌ ཞུ༌ཨིན༌། "
13 ཏེ༌ཟུག༌ གྲུབ༌ཅེས༌ལ༌ སུང༌རབས༌སི༌ ནང༌ང༌ མོལ༌ཏེ༌ ཨིན༌ནོག༌,
"ངའེ༌ ཡ༌ཀོབ༌བ༌ ཅེས༌པ༌ ཅོའད༌
ཨིན༌ནའང༌ ཨི༌སུ༌ གྱབ༌ གྱུར༌རད༌།"
14 ཏེ༌ནེ༌ ང༌དང༌གུན༌ནི༌, དཀོན༌མཆོག༌ མི༌འོས༌པ༌ ཛད༌ཁན༌ཞིག༌ ཞུགས༌ཏེ༌ ཨིན༌ནོག༌ ཟེར༌ཨིན༌ན༌? མ༌ནེ༌ མ༌ནོག༌།
15 དཀོན༌མཆོག༌གི༌ མོ༌ཟེས༌ལ༌ མོལ༌ལ༌ ཛདས༌,
"ངའེ༌ ལྡམ༌ཁན༌གུན༌ནི༌ཀ༌ སྙིང༌རྗེ༌ ལྟན༌ཨིན༌,
ཡང༌ ངའེ༌ ལྡམ༌ཁན༌གུན༌ནི༌ཀ༌ ཅམས༌པ༌ ལྟན༌ཨིན༌། "
16 ཏེན༌ན༌བོའེ༌ཕིའ༌ ཏེ༌བོ༌ མི༌ དོད༌པ༌ ཡ༌ རྩོན༌གྲུས༌སི༌ཀ༌ མན༌པ༌, དཀོན༌མཆོག༌གི༌ སྙིང༌རྗེ༌ཀ༌ རག༌ལས༌ཏེ༌ ཨིན༌ནོག༌།
17 དཀོན༌མཆོག༌གི༌ ཨི༌ཇིབ༌བི༌ གྱལ༌པོ༌ ཕེ༌རོའ༌ མོལ༌ཁན༌བོ༌ སུང༌རབས༌སི༌ ནང༌ང༌ བྲིའ༌ཛད༌ཏེ༌ ཨིན༌ནོག༌, "ཁྱོ༌རང༌ངི༌ ནང༌ང༌ ངའེ༌ ཤེད༌པོ༌ ལྟན༌ཅེས༌ དང༌ ངའེ༌ མིང༌བོ༌ ཇིག༌རྟེན༌ གང༌པོའེ༌ ནང༌ང༌ ཕེལ༌ཅུག༌ཅེས༌སི༌ ཕིའ༌ ངའེ༌ ཁྱོ༌རང༌ ལྡམས༌ཏེ༌ ཨིན༌། "
18 ཏེན༌ན༌བོའེ༌ཕིའ༌ དཀོན༌མཆོག༌གི༌ སྙིང༌རྗེ༌ ལྟན༌ཅེས༌སི༌ ཐུགས༌དོད༌ ཡོད༌ཁན༌གུན༌ནི༌ཀ༌ སྙིང༌རྗེ༌ ལྟན༌ན༌ ཛད༌ཨིན༌, ཡང༌ ཁོང༌ངི༌ སྙིང༌ སྐྱོང༌པོ༌ ཅོའ༌ ཛད༌ཅེས༌སི༌ ཐུགས༌དོད༌ ཡོད༌ཁན༌གུན༌ནི༌ སྙིང༌གུན༌ སྐྱོང༌པོ༌ ཛད༌ཨིན༌།
19 ཁྱོ༌ཞ༌གུན༌ནི༌ ཟེར༌སྲིད༌ཅེས༌ ཨིན༌ནོག༌, "སེམས༌ གྱུར༌ཏེ༌ གྱོད༌པ༌ མ༌ཅོ༌ཁན༌གུན༌ལ༌ ཅིའ༌ དཀོན༌མཆོག༌གི༌ སྐྱོན༌ ཀལ༌ལ༌ ཛད༌ད༌ནོག༌? དཀོན༌མཆོག༌གི༌ ཁོང༌གུན༌ལ༌ ཅོ༌ ཅུག༌ག༌ ཛད༌ཁན༌བོ༌ ཁོང༌གུན༌ནི༌ ཅོས༌ཏེ༌ མ༌ནོག༌ག༌?"
20 ཨིན༌ནའང༌ དཀོན༌མཆོག༌གི༌ གྱབ༌གལ༌ལ༌ སྤེ༌ར༌ ཟེར༌ཁན༌ ཁྱོ༌རང༌ མི༌ སུ༌ ཨིན༌? ཅོ༌ཁན༌བོའེ༌ ཅོའ༌ ཛད༌ཁན༌བོའ༌ ཟེར༌གོས༌ས༌, "ཅིའ༌ ཉེ༌རང༌ངི༌ ང༌ འི༌ཙོགས༌ ཅོའ༌ ཛད༌ཏེ༌ ཨིན༌?"
21 ཟ༌མ༌ ཅོ༌ཁན༌ཞིག༌གི༌ ཏེན༌ན༌ ཀ༌ལག༌པོའེ༌ ཀ༌ནེ༌ ཟ༌མ༌ ཅིག༌, རྩི༌ཝ༌ཅན༌ནི༌ ལས༌ལ༌ ཀོལ༌ཅེས༌, ཡང༌ ཅིག༌ ཞག༌ཏང༌ངི༌ ལས༌ལ༌ ཀོལ༌ཅེས༌སི༌ ཕིའ༌, ཅོ༌ཅེས༌སི༌ ཐོབ༌ཏང༌ ཁོའ༌ མེད༌པ༌ ཨིན༌ནོག༌ག༌?
22 ཏེན༌ན༌ ཙོགས༌ལ༌, ཞན༌ དཀོན༌མཆོག༌ག༌ ཁོང༌རང༌ངི༌ ཐུགས༌སྲོ༌ དང༌ ཤེད༌པོ༌ ལྟན༌ཅེས༌སི༌ ཐོབ༌ཏང༌ ཡོད༌ནའང༌, ཁོང༌ངི༌ ཐུགས༌སྲོ༌ བབས༌ཤེས༌ དང༌ ཁྲེས༌སྟོར༌ ཆ༌ཅེས༌ ཆོགས༌ལ༌ ཆའ༌ཁན༌གུན༌ནི༌ཀ༌ མ༌སྲན༌ཏྲེ༌ ཟོད༌པ༌ སྒོམ༌མ༌ ཛད༌ད༌ནོག༌།
23 ཁོང༌ངི༌ སྙིང༌རྗེ༌ ལྟན༌ན༌ ཛད༌ཁན༌གུན༌ནི༌ཀ༌ ཁོང༌ངི༌ ཐུག༌རྗེ༌ ཙམ༌ཤིག༌གི༌ གྱས༌པ༌ ཨིན༌ཁན༌བོ༌ ལྟན༌ཅེས༌ལ༌ ཁོང༌ངི༌ ཏེ༌བོ༌ ཅོའ༌ ཛདས༌། ཡང༌ ཁོང༌ངི༌ ཏེ༌གུན༌ སྔུན༌ནེ༌ ཕར༌ལ༌ ནམ༌ཁའེ༌ ནང༌ང༌ ཟིར༌རྗིད༌ཅན༌ནི༌ ནས༌སའེ༌ ཕིའ༌ གྲལ༌གྲིག༌ ཅོའ༌ ཛད༌ཏེ༌ ཨིན༌པིན༌།
24 ཁོང༌ངི༌ ལྡམ༌མ༌ ཛད༌ཁན༌གུན༌ནི༌ ནང༌ང༌ ང༌དང༌གུན༌ནའང༌ ཨིན༌ནོག༌, ཡ༌ཧུ༌དཱ༌པ༌གུན༌ ཅིག༌པོའེ༌ ཕིའ༌ མན༌པ༌ ཡ༌ཧུ༌དཱ༌པ༌ མན༌ཁན༌གུན༌ནི༌ ཕིའང༌ ཨིན༌ནོག༌།
25 ཀ༌ཟུག༌ ཡ༌ཧུ༌དཱ༌པ༌ མན༌ཁན༌གུན༌ནི༌ སྐོར༌ལ༌ ལུང༌སྟོན༌པ༌ ཧོ༌ཤཱ༌ཡི༌ སྤེ༌ཆའེ༌ ནང༌ང༌ དཀོན༌མཆོག༌གི༌ མོལ༌ལ༌ ཛདས༌,
"ངའེ༌ མན༌ཁན༌ནི༌ མི༌གུན༌ལ༌ ངའེ༌ ང༌རང༌ངི༌ མི༌ ཟེར༌ཨིན༌།
ཡང༌ ངའེ༌ ཅེས༌པ༌ མ༌ཅོ༌ཁན༌གུན༌ལ༌ ངའེ༌ ཅེས༌པ༌ ཅོ༌ཨིན༌། "
26 ཡང༌ " 'ཁྱོ༌རང༌གུན༌ ངའེ༌ མི༌གུན༌ མན༌' མོལ༌ཁན༌ནི༌ ཏེན༌ན༌ ནས༌ས༌བོའེ༌ཀ༌
ཁོང༌གུན༌ལ༌, 'སོན༌པོ༌ དཀོན༌མཆོག༌གི༌ ཕྲུ༌གུ༌གུན༌' མོལ༌ཨིན༌། "
27 ཡང༌ ཨིས༌ར༌ཨེལ༌པ༌གུན༌ནི༌ སྐོར༌ལ༌ ལུང༌སྟོན༌པ༌ ཡེ༌ཤ༌ཡཱའེ༌ ཀུ༌ཅོ༌ ཏང༌ཨིན༌ ཟེརས༌,
"ཞན༌ ཨིས༌ར༌ཨེལ༌ལི༌ མི༌གུན༌ གྱ༌ཚོའེ༌ ཐའ༌མ༌ ཡོད༌ཁན༌ནི༌
པེ༌མ༌ ཙོགས༌ མང༌པོ༌ ཡོད༌ཏེའང༌, ཁ༌ཅིག༌ མ༌ནེ༌ མི༌སྐྱོབ༌།
28 ཅིའ༌ཟེར༌ན༌ གཙོ༌བོའེ༌, ཁོང༌རང༌ངི༌ ཆད༌པ༌བོ༌ འི༌ ཇིག༌རྟེན༌ནི༌ཀ༌
གྱོགས༌པ༌ དང༌ གང༌པོ༌ ཁྱོང༌ང༌ ཛད༌ཨིན༌། "
29 དམ༌པའེ༌ སུང༌རབས༌སི༌ ཞན༌ཡང༌ ནས༌ས༌ཞིག༌གི༌ ནང༌ང༌ ཡེ༌ཤ༌ཡཱའེ༌ འིན༌ན༌ སྤེ༌ར༌བོ༌ བྲིའ༌ ཛད༌ཏེ༌ ཨིན༌ནོག༌,
"གལ༌ཏེས༌ ནམ༌ཁའེ༌ མག༌མི༌གུན༌ནི༌ གཙོ༌བོའེ༌,
ང༌ཏི༌ ཕྲུ༌གུ༌ ཉུ༌ངུན༌ཞིག༌ ཕུད༌ད༌ མ༌ཛད༌པིན༌ན༌,
ཏེ༌ནེ༌ ང༌དང༌གུན༌ སོ༌དོམ༌པ༌ ཙོགས༌ལ༌ མེད༌ཁན༌
ཡང༌ ག༌མོ༌ར༌པ༌ ཙོགས༌ལ༌ ཁྲེས༌སྟོར༌ ཅོའ༌ ཛད༌ཏེ༌ ཡོད༌གྲོ༌།"
ཏད༌པ༌ མེད༌ཁན༌ནི༌ ཨིས༌ར༌ཨེལ༌པ༌གུན༌།
9:30 ནེ༌ 10:4
30 ཏེ༌ ཚང༌མའེ༌ ཏོན༌བོ༌ ཏེ༌ནེ༌ ཅི༌ ཨིན༌ནོག༌? ཞན༌ ཡ༌ཧུ༌དཱ༌པ༌ མན༌ཁན༌གུན༌ནི༌, དཀོན༌མཆོག༌གི༌ སྐུན༌དུན༌ལ༌ དྲང༌པོ༌ གྱུར༌ཅེས༌སི༌ རྩོན༌གྲུས༌ མ༌ཅོ༌ནའང༌, ཁོང༌གུན༌ནི༌ ཏད༌པ༌ ཅོ༌ཅེས༌པོའེ༌, དཀོན༌མཆོག༌གི༌ སྐུན༌དུན༌ལ༌ དྲང༌པོ༌ གྱུར༌།
31 ཨིན༌ནའང༌ ཨིས༌ར༌ཨེལ༌པ༌གུན༌ནི༌ ཁྲིམས༌གུན༌ ཁའ༌ཉན༌ཏེ༌ དཀོན༌མཆོག༌གི༌ སྐུན༌དུན༌ལ༌ དྲང༌པོ༌ གྱུར༌ཅེས༌སི༌ མ༌སྲན༌ཏྲེ༌ རྩོན༌གྲུས༌ ཅོ༌ནའང༌, ཁྲངས༌པོ༌ མ༌ནེ༌ མ༌ལུས༌།
32 ཅིའ༌ ཁྲངས༌པོ༌ མ༌ལུས༌? ཅིའ༌ཟེར༌ན༌ ཁོང༌གུན༌ནི༌ ཏད༌པ༌ མན༌པ༌, ཁྲིམས༌ ཁའ༌ཉན༌ཏེ༌ ལས༌ ཅོ༌ཅེས༌པོ༌ གྱུད༌ཏེ༌, དཀོན༌མཆོག༌གི༌ སྐུན༌དུན༌ལ༌ དྲང༌པོ༌ གྱུར༌ཅེས༌སི༌ རྩོན༌གྲུས༌ ཅོས༌། ཁོང༌གུན༌ ཁོང༌རང༌གུན༌ནི༌ ལམ༌མི༌ཀ༌ ཡོད༌ཁན༌ནི༌ རྡོའ༌ ཆེན༌མོའེ༌ཀ༌ སྒག༌གྱབས༌ཏེ༌ ཨིན༌ནོག༌།
33 དཀོན༌མཆོག༌གི༌ ཡ༌ཧུ༌དཱ༌པ༌གུན༌ལ༌ ཏེ༌བོའེ༌ སྐོར༌ལ༌ སྤང༌པུད༌ད༌ ཛདས༌, ནམ༌ ཁོང༌ངི༌ དམ༌པའེ༌ སུང༌རབས༌སི༌ ནང༌ང༌ མོལས༌,
"ངའེ༌ ཡེ༌རུ༌ཤ༌ལེམ༌མི༌ ནང༌ང༌ མི༌གུན༌ལ༌ སྒག༌གྱབ༌ཅུག༌ཁན༌ནི༌
རྡོའ༌ཞིག༌ བོར༌རད༌, གྱེལ༌ཅུག༌ཁན༌ནི༌ ཕོ༌ལོངས༌ཞིག༌།
ཨིན༌ནའང༌ ཁོང༌ངི༌ ནང༌ང༌ ཨིད༌ཤེས༌ ཅོ༌ཁན༌ནི༌,
རེ༌ཝ༌བོ༌ མ༌ནེ༌ ཅག༌ག༌ མི༌ཛད༌།