☰ Nan Naipaammo 2
2
Nan Solat Jesu Cristo isnan Cheycha'y Mamati ken Siya id Efeso
1 Sa et kinwanin Jesus, “Isolatmo na isnan anghel nan mamati ay cha maam-among id Efeso:*
“Sak-en nan mangeegnan isnan pito'y tokwifi isnan kannawan ay limak ya cha manad-alan isnan kawad nan cheycha'y fallitok ay pagsilawan. Siya na nan kanak ken chakayo issa:
2 “Ammok nan inang-angnenyo, ya nan kakhetyo khapo ken sak-en, ya nan kinaanosyo. Ammok ay ad-iyo laychen nan cheycha'y kas-on mamati ya ket ay ngaag nan ik-ikkancha. Ya ammok akhes ay tinpengyo nan cheycha'y mangwanin apostolesko chaicha, ya ket inammowanyo ay langkowag cha pet. 3 Siya, naanos kayo isnan nenliglikhatanyo maigkhapo ken sak-en ya eg-ay kayo paat nginmaya. 4 Nay met achi naay si esang ay mangwaniyak ken chakayo. Tay nay et inmakit nan layadyo ken sak-en ay ad-i kag issan laplapona. 5 Sesemkenyo nan kasasaad nan layadyo issan sisya'y egayyo nayagyakhan. Enfafawi kayo, ya kasin yo angnen san khawis ay inikkanyo issan laplapona. Mo ad-i kayo, at mamaid nan silawyo, tay omali ak ay mangaan isnan pagsilawan isnan kawad-ana. 6 Ngem wad-ay akhes nan ichayawko maipoon ken chakayo. Khog-olaenyo nan ik-ikkan nan cheycha'y Nicolaita ay kholaek akhes.
7 “Wad-ay met nan kowengyo. Chengngenyo et nan kanan nan Ispirito Santo isnan cheycha'y mamati ay cha maam-among isnan teketeken ay ili. Ya mo afakenyo nan ngaag, et ipalofosko chakayo ay makikan isnan fekhas si kaew ay mangichowa isnan katakhowan, ay wad-ay isnan oman Apo Dios id chaya.”
Nan Solat Jesu Cristo isnan Cheycha'y Mamati ken Siya id Esmirna
8 Sa et kinwanin Jesus, “Isolatmo na isnan anghel nan mamati ay cha maam-among id Esmirna:†
“Sak-en nan omona ya omochi. Natey ak ya kasin ak natakho. Siya na nan kanak ken chakayo issa:
9 “Ammok nan likhatyo ya ammok ay posi kayo. Ngem tet-ewa nan kanak, chakayo nan tet-ewa ay kachangyan. Chinngek nan amsiw nan cheycha'y mangwanin Judio cha. Faken cha tet-ewa'y Judio, tay pangafong Satanas chaicha. 10 Ad-i kayo omegyat isnan at manginaakhanyo isnan likhat. Chengngenyo, at paifalod Satanas nan tapina ken chakayo ta tepngena nan pammatiyo. At palikhatencha chakayo is sinpoo ay akhew. Ilaenyo ta kokompet kayo ken sak-en, olay mo siya's ikateyanyo, sak et koronaan chakayo isnan fiyag ay maid pengpengna.
11 “Wad-ay met nan kowengyo. Chengngenyo et nan kanan nan Ispirito Santo isnan cheycha'y mamati ay cha maam-among isnan teketeken ay ili. Et mo afakenyo nan ngaag, ad-i kayo machosa id inferno.”‡
Nan Solat Jesu Cristo isnan Cheycha'y Mamati ken Siya id Pergamo
12 Sa et kinwanin Jesus, “Isolatmo na isnan anghel nan mamati ay cha maam-among id Pergamo:§
“Sak-en nan kawad-an nan at-atachem ay fadyok ay chwa nan tachemna. Siya na nan kanak ken chakayo issa:
13 “Ammok nan kasasaad nan ili ay entetey-anyo, ay iyap-apowan Satanas. Ammok ay tet-ewa kayo ken sak-en olay mo entetey-an Satanas nan iliyo, tay olay issan namateyan nan kailiyanyo ken Antipas ay kaaafolot ay takhok ay nanistikho isnan maipoon ken sak-en, et egayyo inwayang nan pammatiyo ken sak-en. 14 Nay met achi siya chana nan mangwaniyak ken chakayo: Wad-ay nan tapina ken chakayo ay menwanwaned isnan sos-olon Balaam id solit. Insolowana si Balak isnan ikkana ay mangawis isnan Israelitas ay enfasol, ta sa cha't mangan isnan naichaton isnan khinag-aeb ay dios, ya maawis cha isnan asi. 15 Siya akhes ay wad-ay ken chakayo nan mangab-afolot isnan Nicolaita ay mangisos-olo isnan asi. 16 Enfafawi kayo et mampay. Tay mo ad-i kayo, at omali ak kannay ay mangofat ken chakayo isnan fadyok ay fomab-ala isnan topekko.
17 “Wad-ay met nan kowengyo. Chengngenyo et nan kanan nan Ispirito Santo isnan mamati ay cha maam-among isnan teketeken ay ili. Et mo afakenyo nan ngaag, at ichowak isnan waschin esang ken chakayo nan kanenyo ay naitafon ay mana.* Ya sak et akhes ichowa ken chakayo nan enpokaw ay fato ay naisolatan nan falo ay ngachan ay mid makaam-ammo, mod-i yangkhay nan manawat isnan chey ay fato.”
Nan Solat Jesu Cristo isnan Cheycha'y Mamati ken Siya id Tiatira
18 Sa et akhes kinwanin Jesus, “Isolatmo na isnan anghel nan mamati ay cha maam-among id Tiatira:†
“Sak-en nan Anak Apo Dios. Kag enfidfidchang ay apey nan matak, ya kag khanfang ay enkosimsim nan sikik. Siya na nan kanak ken chakayo issa:
19 “Ammok nan ang-angnenyo: nan layadyo, nan omabfolotanyo, nan chonoyo ken sak-en ya nan anosyo. Ammok akhes ay am-amed yo kayet eesten idwani nan ang-angnenyo khapo ken sak-en mo issan lapona. 20 Nay met achi siya na nan mangwaniyak ken chakayo: Ipap-alofosyo nan chey fafai ay si Jezebel‡ ay mangwanin siya nan mamadton Apo Dios. Sailowana nan takhok, tay isolona chaicha ay mangikkan isnan asi, ya ta en cha mangan isnan naichaton isnan khinag-aeb ay dios. 21 Inagtak siya's wayana ay manokog isnan asi ay cha na ikkan, ngem ad-ina. 22 Ilaenyo, at pen isepchakko ay mangipasakit ken siya isnan kaseypana. Ya am-in nan nakiseyep ken siya, at chad-ama'y palikhatek mo ad-icha ibfafawi ya chokokhan nan inangnencha ken siya. 23 At pateyek akhes nan mangon-onod ken siya§ ta ammowen am-in nan mamati ay ammok nan nemnem nan takho ya nan am-in ay laychencha ay angnen.* At ichowak isnan waschin esang ken chaicha nan khanafencha ay osto'y maiyafoloy isnan inangnencha.
24 “Ngem nan kaangsanan ken chakayo issa id Tiatira, et egayyo inafolot nan ngaag ay sos-olona. Egayyo sinos-olo nan kananchan ad-i kaam-ammowan ay silib Satanas. Maid kasin itokhonko ken chakayo, 25 mod-i ket ta ‘Eestenyo nan pammatiyo engkhana'y omali ak.’
26-27 “Et naoney kayo ay mangafak isnan ngaag ya cha mangik-ikkan isnan nemnemko engkhana is kifos si fiyagyo. Tay ichowak ken chakayo nan siya met laeng ay kalebfengak ay inchowan Ama ken sak-en. Ichowak nan kalebfenganyo ay mangiyapo isnan kailiili, ta ikekedseyo ay manengngel ken chaicha, ya ta mekmekenyo chaicha ay kag fanga. 28 Ichowak akhes ken chakayo nan talaw ay kapigsaan nan silawna ay maiila isnan wiit.†
29 “Wad-ay met nan kowengyo. Chengngenyo et nan kanan nan Ispirito Santo isnan mamati ay cha maam-among isnan teketeken ay ili.”
* 2:1 Nan Efeso et esa'y anwaanwa ay ili. Angsan ya nateketeken ay ila nan pammatin nan takho sidi ay ili. Nan tapina, pinaticha nan dios ay makwanin Artemis. (Ilaenyo Nan Inik-ikkan Nan Apostoles 19:35). Nan akhes tapina, chinad-ayawcha nan Emperador nan iRoma tay kananchan dios siya. Wad-ay akhes nan tapina. Sa et issan timpon Pablo, angsan nan namati ken Jesu Cristo. Idwani issan timpon Juan, wad-ay nan inmali ay makwanin Nicolaita ay nangwanin chaicha et apostoles Cristo chaicha. Insos-olocha ay nangwanin: Mabfalin ay ikkan tako nan isyangkhay ay asi ay fikhawen si awak tako, tay fakinlolota tako yangkhay. Insos-olocha akhes ay mangwanin, mabfalin ay makiam-among nan namati ken Cristo isnan teken nan pammatina ta sa cha't chad-ayawen am-in nan dioscha. † 2:8 Isnan amyanan nan Efeso wad-ay nan ili ay Esmirna. Angsan cha nan kakachangyan ay komersiyanti sidi. Khag-awis nan ili ay Esmirna, ngem kaangsanan sidi nan nanad-ayaw isnan Emperador nan iRoma ay nangwanin siya nan dioscha. Sa cha't akhes khinola nan cheycha'y mamati ken Jesus tay ad-icha nakichad-ayaw isnan Emperador. Wad-ay akhes id Esmirna nan tapin si Judio ay nangapos isnan mamati ken Jesus, ya naamong cha isnan tapin nan iyEsmirna ay namap-alikhat isnan mamati. Tay siya chi, sarcha fiyag nan kasasaad nan mamati ken Jesus sidi. ‡ 2:11 Nan osto ay naisolat isna et, “Chaicha ay mangafak, et ad-i cha enliglikhat isnan ikadwa ay etey.” Am-in ay takho, matey cha. Nan namati ken Jesus, et matatakho cha is eng-engkhana ken siya id chaya. Ngem nan tap-ina, maiyey cha id inferno ay machosa is eng-engkhana. Nan takho ay natey, maid kasina kafaelan is eng-engkhana is kalofong. Siya akhes isnan omey id inferno, maid kasin kafaelana is eng-engkhana. Tay siya chi, makwanin ikadwa ay etey nan inferno. Ilaenyo nan Naipaammo 20:4. § 2:12 Isnan amyanan nan Esmirna wad-ay nan ili ay Pergamo. Nachamchamag nan ili ay Pergamo id sangad-om tay wad-ay sidi nan teketeken ay khinag-aeb ay dios, ya nan chakchake ay Timplocha. Nan esang ay khinag-aeb ay dios, ay kag oweg nan ilana, et makwanin Asklepiyos. Wad-ay kano kamabfalina ay mangipagkhawis isnan nasakit, ya kad-in naam-among nan katakhotakho ay manad-ayaw ya nenpaakhas ken siya. Angsan cha akhes id Pergamo nan nanad-ayaw isnan Emperador ay iRoma ay mangwanin siya nan dioscha, ya inpatakchegcha nan Timplo ay manad-ayawancha ken siya. Pergamo akhes nan kapital nan probinsiya. * 2:17 Issan timpon nan Israelitas isnan malalango ay lota issan kinmaanancha id Egipto id sangad-om, pinakan Apo Dios chaicha isnan makakan ay makwanin mana. † 2:18 Isnan falaan si akhew nan Pergamo wad-ay nan ili ay Tiatira. Nachamchamag nan Tiatira tay angsan nan teketeken ay maam-among ay komersiyanti sidi, ay teketeken nan cha cha khab-en ya ilako. Ya waschin esang ay pangfon ay komersiyanti, wad-ay nan teken ay khinag-aeb ay dioscha. Mo laychen nan mamati ay makikhalansiya, masapol ay maitapi isnan esang ay pangfon si komersiyanti ay makitincha ya makichad-ayaw isnan khinag-aeb ay dioscha, ya makilagsak akhes isnan asi ay okhalicha. ‡ 2:20 Si Jezebel nan asawan Ahab ay ali id Israel id sangad-om. Siya nan nangawis isnan Israelitas ay mangiwayang ken Apo Dios ta chayawencha's Baal ay dios amana. Inawisna akhes chaicha ay en menpasop-ok ya mangikkan isnan tapina kayet ay ekhad ay inyad-in Apo Dios. § 2:23 Nan osto ay naisolat isnan Griego isna et, “nan an-akna.” * 2:23 Nan osto ay nangisolat isnan Griego isna et, “Sak-en nan mangan-anag isnan cheycha'y fatin ya poso” † 2:28 Ilaenyo Nan Naipaammo 22:16 ya Daniel 12:3.
☰