5
Nan Nalolonlon ay Papil ya nan Kordero
Idwani inilak is kakannawan ay liman nan tomotokcho is katrono nan nalolonlon ay papil ay nasolatan nan nentinnopak. Et wad-ay nan pito ay naiipket ay silyona. Sak et inila nan mafikas ay anghel ay nangipapangekhe ay cha mangwanin, “Sino nan wad-ay kalebfengana ay mangaan isnan naiipket isnan nalolonlon ay papil ta fitlakhena?” Nay met achi, maid paat olay sino id chaya paymo is kalota ya olay isnan kawad nan natey, is nakabfaer ay mamitlag isnan chey ay nalolonlon ay papil ta ilaena nan wad-ay ischi. Chad-ama ay nenngegngengegngeg ak tay maid paat naanapan is mabfalin ay mamitlag isnan papil paymo mangila isnan wad-ay ischi. Ya ket kanan nan esa'y am-ama ken sak-en, “Ad-i ka man en-akha! Ilaem kay ya! Wad-ay nan chey ay makwanin Layon ay nalpo isnan tribon Juda ya waned David. Siya nan nangafak isnan isyangkhay ay ngaag, ya nay et wad-ay kalebfengana ay mangaan isnan pito ay mangiipket isnan papil ya nan mamitlag ischi.”
Sak et inila nan Kordero ay tomatakcheg isnan khawan nan trono. Liliwsen nan epat ay nasantowan ay enkik-iwi ya nan cheycha'y amam-a. Nan ilan nan Kordero et kag napatey. Sa et pito nan sakkhodna,* ya pito nan matana ay siya nan pito ay Ispiriton Apo Dios ay naifaa isnan olay entona issa ay lota. Inmey nan Kordero ay mangala isnan chey nalolonlon ay papil ay wad-ay isnan kakannawan ay liman nan tomotokcho isnan trono. Issan nangalaana isnan nalolonlon ay papil, ya ket nenfalintomeng ay nentowad kannay is kasakhangna nan cheycha'y epat ay nasantowan ay enkik-iwi ya nan cheycha'y chwan poo ya epat ay amam-a, ay waschin nangeegnan isnan arpa ya nan fallitok ay mallokong ay napno is insinso, ay siya nan lowalon nan cheycha'y takhon Apo Dios. Et inchag-ayancha nan Kordero isnan falo ay chag-ay:
“Sik-a nan maikali
ay manawat isnan nalolonlon ay papil
ya mangaan isnan mangiipket ischi.
Tay sik-a nan chey naipapatey,
ya maichalan isnan eteymo sinfotmo
nan am-in ay ilan si takho
isnan olay entona issa ay ili
ay nateketeken nan ekhad ya kalicha,
ta enfalin cha am-in ay takhon Apo Dios.
10 Ya nenfalinem chaicha is ali ya pachi
ay mensilsilfi isnan Dios tako,
et sa cha en-apo isnan lofong.”
11 Ya kek et inila ya chinngek nan kalin nan angsaangsan ay angheles ay mid konton nan kaangsancha tay kalifolifo cha. Linilwescha nan trono ya nan cheycha'y epat ay nasantowan ay enkik-iwi ya nan cheycha'y amam-a. 12 Sa cha't inpapangekhe ay nangwanin,
“Nan nay Kordero ay napatey et maikali ay machayaw, maipateg ya matangtangad, tay wad-ay ken siya nan am-in ay kamabfalin, kinafaknang, silib ya fikas.”
13 Sak et chinnge akhes nan kalin nan am-iam-in ay winad-ay Apo Dios: id chaya, is kalota, isnan kawad nan natey ya is kafayfay. Wad-ay cha am-in ay nangwanin,
“Machad-ayaw is eng-engkhana nan Dios ay tomotokcho is katrono ya nan Kordero. Machad-ayaw, maipateg ya matangtangad cha ay kawad nan kamabfalin.”
14 Sa et sinmongfat nan epat ay nasantowan ay enkik-iwi ay nangwanin, “Tet-ewa sa.” Sa et nenfalintomeng ay nentowad nan cheycha'y amam-a ay nenchayaw.
* 5:6 Isnan Judio nan laychen nan pito ay kanan et maid kolangna. Adi kad nan ayen nan pito nan sakkhodna et maid kolang nan fikasna, tay nan ayen akhes nan sakkhod et fikas. Siya akhes nan laychen nan pito ay mata ay kanan, et makaila isnan am-iam-in. Nan ayen nan pito ay Ispiriton Apo Dios et nan Ispirito Santo ay maid paat enkolangana. 5:9 Nan osto ay naisolat isnan Griego isna et, “maichalan isnan chalam.”