7
आकान को पाप
1 पर इस्राएलियों न भेंट की चिज को बारे म विश्वासघात करयो; मतलब यहूदा वंश को आकान, जो जेरहवंशी जब्दी को नाती अऊर कर्मी को टुरा होतो, ओन भेंट की चिजों म सी कुछ ले लियो; यो कारन परमेश्वर को कोप इस्राएलियों पर भड़क उठ्यो।
2 यहोशू न यरीहो सी ऐ नाम को नगर को जवर, जो बेतावेन सी लग्यो हुयो बेतेल को पूर्व को तरफ हय, कुछ आदमियों ख यो कह्य क भेज्यो, “जाय क ऊ देश को भेद ले क आवो।” अऊर उन आदमियों न जाय क ऐ नगर को भेद लियो।
3 अऊर उन्न यहोशू को जवर लौट क कह्यो, “सब लोगों ख वहां जान की जरूरत नहाय, केवल दोय यां तीन हजार लोग जाय क ऐ नगर ख जीत सकय हय; सब लोगों ख वहां जान लायी तकलीफ देन की जरूरत नहाय, कहालीकि हि लोग थोड़ोच हंय।”
4 येकोलायी इस्राएलियों को लगभग तीन हजार आदमी वहां गयो; पर उन्ख ऐ नगर को निवासियों को सामने सी भगनो पड़्यो,
5 तब ऐ नगर को रहन वालो न उन म सी छत्तीस आदमी ख मार डाल्यो, अऊर अपनी फाटक सी शबारीम तक उन्को पीछा कर क् खदानों तक उन्ख मारतो गयो। तब लोगों को मन पिघल क थंडो पड़ गयो।
6 तब यहोशू न पराजय को दु:ख प्रगट करन लायी अपनो कपड़ा फाड़्यो, ऊ शाम होन तक परमेश्वर की सन्दूक को सामने जमीन पर मुंह को बल गिर क पड़्यो रह्यो; असोच इस्राएली बुजूर्गों न भी करयो अऊर उन्न दु:ख प्रगट करन लायी अपनो मुंड पर धूल डाली।
7 अऊर यहोशू न कह्यो, “हाय, प्रभु परमेश्वर, तय अपनी या प्रजा ख यरदन नदी को येन पार कहाली लायो? का हम्ख एमोरियों को वश म कर क् नाश करन लायी लायो हय? भलो होतो कि हम सन्तुष्ट कर क् यरदन नदी को ओन पार रह्य जातो!
8 हाय, प्रभु मय का कहूं, जब इस्राएलियों न अपनो दुस्मनों ख पीठ दिखायी हय!
9 कहालीकि कनानी जाति बल्की यो देश को सब रहन वालो यो सुन क हम्ख घेर लेयेंन, अऊर हमरो नाम निशान कर क् धरती पर सी मिटाय डालेंन; फिर तय अपनो बड़ो नाम को लायी का करजो?”
10 परमेश्वर न यहोशू सी कह्यो, “उठ, खड़ो होय जा, तय कहाली यो तरह मुंह को बल जमीन पर पड़्यो हय?
11 इस्राएलियों न पाप करयो हय; अऊर जो वाचा मय न उन सी अपनो संग बान्धी होती ओख उन्न तोड़ दियो हय, उन्न भेंट की चिजों म सी ले लियो, बल्की चोरी भी करी अऊर छल कर क् ओख अपनो सामान म रख दियो हय।”
12 येकोलायी इस्राएली अपनो दुस्मनों को सामने खड़ो नहीं रह्य सकय; हि अपनो दुस्मनों ख पीठ दिखावय हय, येकोलायी हि खुद भेंट की चिज बन गयो हय। अऊर यदि तुम अपनो बीच म सी भेंट की चिज को सत्यानाश नहीं कर डालो, तब तक मय तोरो संग नहीं रहूं।
13 उठ, प्रजा को लोगों ख पवित्र कर, उन्को सी कह्य, सुबेरे तक अपनो आप ख पवित्र कर क् रखो; कहालीकि इस्राएल को परमेश्वर यहोवा यो कह्य हय, “हे इस्राएल, तोरो बीच म भेंट की चिज हय; येकोलायी जब तक तय भेंट की चिज ख अपनो बीच म सी दूर नहीं करय तब तक तय अपनो दुस्मनों को सामने खड़ो नहीं रह सकजो।”
14 येकोलायी सुबेरे तुम हर एक कुल को अनुसार जवर खड़ो करयो जावो; अऊर जो कुल ख परमेश्वर पकड़ेंन हि एक एक कुल कर क् जवर आये; अऊर जो कुल ख परमेश्वर पकड़ेंन ऊ परिवार एक एक परिवार कर क् जवर आये; फिर जो परिवार ख परमेश्वर पकड़ेंन हि एक एक आदमी कर क् जवर आये।
15 तब जो आदमी भेंट की चिज रख्यो हुयो पकड़्यो जायेंन, ऊ अऊर जो कुछ ओको होना सब आगी म डाल क जलाय दियो जायेंन; कहालीकि ओन परमेश्वर की वाचा ख तोड़्यो हय, अऊर इस्राएल म अनुचित काम करयो हय।
16 यहोशू सुबेरे उठ क इस्राएलियों ख कुल कुल कर क् जवर लायो, अऊर यहूदा को कुल पकड़्यो गयो;
17 तब ओन यहूदा को परिवार ख जवर लायो, अऊर जेरहवंशियों को कुल पकड़्यो गयो; फिर जेरहवंशियों को परिवारों को एक एक आदमी ख जवर लायो, अऊर जब्दी पकड़्यो गयो;
18 तब ओन ओको परिवारों को एक एक आदमी ख जवर खड़ो करयो, अऊर यहूदा कुल को आकान, जो जेरहवंशी जब्दी को नाती अऊर कर्मी को टुरा होतो, पकड़्यो गयो।
19 तब यहोशू आकान सी कहन लग्यो, “हे मोरो बेटा, इस्राएल को परमेश्वर यहोवा को आदर कर, अऊर ओको आगु कबूल कर; अऊर जो कुछ तय न करयो हय ऊ मोख बताय दे, अऊर मोरो सी कुछ मत छुपाय।”
20 आकान न यहोशू ख उत्तर दियो, “सचमुच मय न इस्राएल को परमेश्वर यहोवा को खिलाफ पाप करयो हय, अऊर यो तरह मय न करयो हय,
21 कि जब मोख लूट म शिनार देश को एक सुन्दर अंगरखा, अऊर दोय किलो चांदी, अऊर अरधो किलो सोनो को एक ईटा देख्यो होतो, तब मय न उन्को लालच कर क् उन्ख रख लियो; हि मोरो डेरा को अन्दर जमीन म गड़्यो हय, अऊर सब को खल्लो चांदी हय।”
22 तब यहोशू न कुछ दूत भेज्यो, अऊर हि ऊ डेरा म दौड़ क गयो; अऊर का देख्यो कि हि चिजे ओको डेरा म गड़्यो हय, अऊर सब को खल्लो चांदी हय।
23 उन्ख उन्न डेरा म सी निकाल क यहोशू अऊर सब इस्राएलियों को जवर लाय क परमेश्वर को सामने रख दियो।
24 तब सब इस्राएलियों समेत यहोशू जेरहवंशी आकान ख, अऊर वा चांदी अऊर अंगरखा अऊर सोनो की ईटा ख, अऊर ओको बेटा बेटियां ख, अऊर ओको बईलों, गधा अऊर मेंढियों को झुण्ड ख, अऊर ओको डेरा ख, मतलब जो कुछ ओको होतो उन सब ख आकोर नाम की घाटी म ले गयो।
25 तब यहोशू न आकान सी कह्यो, “तय न हम्ख कहाली तकलीफ दियो हय? अज को दिन परमेश्वर तोखच तकलीफ देयेंन।” तब सब इस्राएलियों न ओको पर पथराव कर क् मार डाल्यो; अऊर उन्ख आगी म डाल क जलायो, अऊर उन्को ऊपर गोटा डाल दियो।
26 अऊर उन्न ओको ऊपर गोटा को बड़ो ढेर लगाय दियो जो अज भी वहां हय; तब परमेश्वर को भड़क्यो हुयो कोप शान्त भय गयो।
यो तरह ऊ जागा को नाम अज तक आकोर की घाटी पड़्यो हय।