Apongua i buk ani ri
Tesalonike
Katapo ararai ta petau lava i ri vap lomlomon si taun ang e Tesalonike, kitapo sugul alava luai ta saka bil an ka serei si taun ang, Karisto ka serei pok singina. Mang matan vap kita lapo mengen ta kana taun a Volava katala serei lenginang. Asukang vang a Paulo katala salik a buk ke, asi koros pok ani kari lomlomon ri vap. Au na si oring suke, kalapo atai iria ta kana taun a Volava parik lak kapa serei. Ta e no ina i taun ang, vap duk ki sualpok alava luai, na mamain ta laulauan rikek duk ki serei alakat, na katakai i putuk saupai ka serei si me petau alava luai ani Karisto. Paulo kapo asum iria ani ki tung akit aro si lomlomon, ki paus a matan mamaiten kapo serei singiria. Kapo buk ki dual aro ani ki angkoai si aiveven akorong pok aniria, asukang val ninia katala aiveven pok ia, kuvul ve kana keve katakai i abis paluana. Ani ki ago ta ataole vo marangan ani abis. Kapa ki ago ta marangan ani li pakangai ani mang matan vap.
1
Mengen i angruduai
1 Nau Paulo, Siluano na Timoteo, namemtolpo alis a panbuk ke ane singimi vap lomlomon i Tesalonike, mipo ago e kungana i God tamara na Volava Iesu Karisto.
2 Roron na marip le si God tamara na Volava Iesu Karisto ka sinong singimi.
Taun i serei ta Karisto
3 Keve tungamem, kapo ro animem asi uli posong aro ani God, using kami lomlomon katala polok alava, na kami vinga ro taun imi angpokpokai kalapo kun laba luai.
4 Asukang a namempo aminaung marai imi e mataria i kana mamain ta kuvkuvulan a God, marai kami tung akit na kami lomlomon si keve bil i vilvil akui na atokngai mipo uli duai aniria.
5 Keve maiten ke kipo serei asi mengen amalangas animi ta kana saupai a God kapo korong aro. Singina, kapo taot imi ta mipo ro angkoai si atogon ani sinsinong si kana vainagoan. Ninia palau nang a tukulai ina na mipo asalak a maiten ke.
6 Io, kana saupai a God kapo uli korong, na ninia ka ngenget a pisu singiria kipo vil apisu imi.
7 Ka luk suai ani makus pelek imi mipo mamakus, na singimem kapa. Na bil ke ka serei si taun ang a Volava Iesu ka serei pok singina, nei ureurek lava i kut le metekuku ve kana keve angelo madot.
8 Au, na ka amiming a vap ang kipo tav katak ve God, na ria kapa parik kipa using a mengen i akus ro i kara Volava Iesu.
9 Vap ke ki an ago nei amiming kitmat asikei, na ki ago luai ta arai an ani Volava na kana kitmat lava luai.
10 Io, na taun kame serei, kakana akorong ta matan vap ki sung pukun asi amaus ania na ki man ia. Nami, mipo palak ve vap ke using mitala kun lomlomon ta akus ang namemtala akus imi tatana.
11 Au, si keve bil aongos suke, namempo uli sokotuk ta God nia ka taot imi ta mipo ro angkoai si ago si kana selen voiang katala songo imi si pasal singina. Na ka li kitmat animi ani keve lomlomonai ro ang mipo togon ia, ki serei atutuman. Na keve abis ang mitala tutapongai ania si kami lomlomon, ki uai.
12 Kamem sokotuk kapo asukang ani kana asan a Volava Iesu ka mang miminaungan singimi, na nami kapa mi mang singina, using kana roron kara God na Volava Iesu Karisto.