คู ไมจ พันญา
พะทัม คู ไมจ พันญา มัฮ ไลลวง ป คิต ป ง่อต ปุย ติ ปุย ป อัฮ ติ แตะ มัฮ “คู ไมจ พันญา.” เอะ เกียฮ แจง โตว นึง ป มัฮ ปุย เซ, ปังเมอ โฮวน ป แกต มัฮ กซัต ซาโลมอน ป ไซฮ แฮ. ป ไซฮ พะทัม เฮี ง่อต ที ไลลวง จีวิต ปุย นึง ปลัฮเตะ เฮี. จีวิต ปุย ฮัง ซ เงี่ยง ไม่ โอ อื ทัน ไก ป มัฮ ละ อื. เญือม ยุ อื โอเอีฮ โฮวน เจือ ป โอ ปุก โอ ลอก นึง ปลัฮเตะ เฮี, ลอต อัฮ “ป โอ ไก ป มัฮ” ไม่ จีวิต ปุย ฆาื อื. ปุย เซ เกียฮ คาวไจ โอยจ โตว ตอก ยุฮ ตอก อัฮ พะจาว โอเอีฮ. ปัง โอ คาวไจ อื, ปุย เซ ซตอก ลั่ง ปุย เกือฮ ยุฮ กัน ไม่ เกือฮ อื ติ แตะ มวน รพาวม นึง ป โฮลฮ แตะ เบือ กัน ยุฮ แตะ เซ, นึง มัฮ ป โฮลฮ อื เซ ป เกือฮ พะจาว ละ อื.
ป คิต ป ง่อต คู ไมจ พันญา เฮี ตึน ซ ตังเจือ ละ ง่อต เอะ อื ง่อน. ติ ติ เลีฮ อื ป อัฮ อื เซ ตอก เอิน ป อัฮ ปุย โอ ยุง พะจาว เฟือฮ โฮ. ลั่ก ก ลอยจ อื นึง โบ่ต 12 ป ไซฮ พะทัม เฮี ปังเมอ เปลีฮ โรฮ ไก รพาวม เจือ แตะ. มัฮ โรฮ ตอก ปุย ป เลี่ญ ซ คาวไจ ตอก มัฮ ตอก มอยฮ พะจาว โฮ. รซอม เฮี เอีจ รโจะ ดิ นึง พะทัม ละ ซ เรอึม อื ปุย ไฮญ ป เลี่ญ ซ คาวไจ ไลลวง พะจาว ตอก ปุย เฮี. ตึน กอ ไก ปุย ป ซองไซ นึง พะจาว ไม่ อาวต แตะ ไม่ รพาวม ไลจ แตะ. เอีจ ไก โรฮ โฮวน ปุย ป ปุน คิง แตะ เบือ พะทัม คู ไมจ พันญา เฮี. ฟวยจ เซ เญือม แลน อื พะทัม ไฮญ ป เกือฮ พะจาว ละ ปุย เอีจ โฮลฮ ซโอว รพาวม นึง พะจาว เบือ อื. ยุง ไลลวง จีวิต โกะ แตะ ฆาื อื นึง ไก เนอึม ป มัฮ อื เบือ พะจาว.
1
จีวิต เฮี ไก โตว ป มัฮ
1 ลปุง โม เฮี มัฮ ป อัฮ คู ไมจ พันญา กวน รเมะ ด่าวิต ป มัฮ กซัต นึง เวียง เยรูซาเลม.
2 คู ไมจ พันญา เซ อัฮ อื ตอก เฮี, “ป โอ ไก ป มัฮ, ป โอ ไก ป มัฮ, โอเอีฮ โครยญ เจือ มัฮ เนอึม ป โอ ไก ป มัฮ,” อัฮ เซ.
3 ปุย ปลัฮเตะ ยุฮ เนอึม ยุฮ แนม กัน ปอ โซะ ไมญ โซะ ปี แตะ, มัฮ เมอ ป ซ โฮลฮ ซ ปุน ปุย เบือ กัน ยุฮ แตะ นึง ปลัฮเตะ เฮี เยอ?
4 จีวิต ปุย เอีจ ลอยจ ติ เจน ติ เจน แม, ฮอยจ โคระ แม โรฮ ติ เจน ติ เจน แม, ปลัฮเตะ เฮี ปังเมอ มัฮ ป อาวต ลอป ตอก ไพรม แตะ.
5 ซเงะ เอ โอก, ฟวยจ เซ เลียก แม, ไม่ ซไจ แนฮ อื โฮว ฮอยจ นา ก โอก แตะ เซ แม.
6 กาื เยอ บาึง โฮว ลวง ลั่กเซฮ, ฟวยจ เซ ลเตือฮ แม บาึง โฮว ลวง ลั่กล่าวง. โฮว บังบอย แนฮ กูแก วังเวียต ตอก เซ, ฟวยจ เซ ลเตือฮ แม แม ตัม คระ โฮว กูแก แตะ เซ แม.
7 รอาวม โครยญ โกลง ปัต ฮอยจ ละ ปลัฮ รอาวม, ปลัฮ รอาวม เซ ปังเมอ โอ นาวก ติ ชวง. รอาวม ปัต โอก เน่อึม นา ออฮ, ซ แม แม ฮอยจ นา เซ ตอก ไพรม แตะ.
8 โอเอีฮ โครยญ เจือ มัฮ เยือ ป โซะไมญ รพาวม ปุย นึง, ปอ เอิน โอ ปุย เญาะ ยุง ตอก ซ อัฮ แตะ. ไง่ ปุย ซัก เตือ โตว นึง แลน แตะ โอเอีฮ ติ ชวง. ฮยวก ปุย นาวก โตว โรฮ นึง ป ฮมอง แตะ ติ ชวง.
9 โอเอีฮ ป เอีจ ฟวยจ เกิต, มัฮ ป ซ เกิต แม. โอเอีฮ ป เอีจ ฟวยจ ยุฮ ปุย มัฮ ป ไมจ ปุย เฌาะ ยุฮ แม. โอเอีฮ เมาะ ป อาวต นึง ปลัฮเตะ เฮี ไก โตว ป โคระ นึง ติ เจือ เนอึม.
10 ปัง อัฮ ปุย ตอก เฮี, “แลน เมอะ, โอเอีฮ เฮี มัฮ ป โคระ.” ปัง อัฮ เซ, โอเอีฮ เซ มัฮ ป เอีจ ตึน ไก, เอีจ ไก เน่อึม กา เกิต เอะ ลั่ง.
11 ไก โตว ป เกียฮ ไตม โอเอีฮ ป เอีจ เกิต โฆะ โอ. ปุย เจน โคระ เฆียง เฮี ปุ โรฮ ซ เกียฮ ไตม โอเอีฮ เจน กา โกะ แตะ โรฮ.
ป เอีจ เกิต ละ คู ไมจ พันญา
12 อาึ ป มัฮ คู ไมจ พันญา เอีจ โฮลฮ แปน กซัต ตัตเตียง โม อิซราเอน นึง เวียง เยรูซาเลม.
13 อาึ เอีจ โฆง ตังไจ แตะ ซาวป เฮียน โอเอีฮ เมาะ ป ยุฮ ป อัฮ ปุย นึง ปลัฮเตะ เฮี ติ ฆรึม มะลอง เบือ วิซา พันญา แตะ. โอเอีฮ ป เกือฮ พะจาว เกิต ละ ปุย เยอ มัฮ เนอึม ป ญัก.
14 อาึ เอีจ ยุ กัน ยุฮ ปุย นึง ปลัฮเตะ เฮี เตือง โอยจ อื. โอเอีฮ โม เซ มัฮ ตื โอเอีฮ โอ ไก ป มัฮ. มัฮ เยือ ป ปลาว ตอก โฮมวต ปุย กาื โฮ.
15 โอเอีฮ ป รบ่อก รแบ่ก เกอ ไก โตว ป เกียฮ ยุฮ เกือฮ ซื เยอ. ดัฮ มัฮ โอเอีฮ โอ ไก โฮ, ซ เมีญ เกือฮ ไก ปุ โรฮ แปน.
16 อาึ ง่อต โตะ รพาวม แตะ ตอก เฮี, อาึ เอีจ โฮลฮ ซติ พันญา แตะ โฮฮ ฮา โม ป เอีจ ตัตเตียง เวียง เยรูซาเลม กา แตะ เตือง โอยจ อื เซ. อาึ เอีจ อาวต เนอึม ไม่ กัมกึต วิไซ ไมจ แตะ ไม่ เอีจ โฮวน โรฮ ป ยุ ป ยุง เงอะ, อาึ อัฮ เซ ละ โกะ แตะ.
17 อาึ เอีจ โฆง ซาวป เฮียน เกือฮ ติ แตะ ยุง, เมาะ ตัง ป เฮียง ยุง ไม่ ป งาวไงญ, เมาะ ตัง ปุย ไก พันญา ไม่ ปุย เง่าะ ปุย บ่า ฮา ปุ แตะ. ฟวยจ เซ อาึ ยุง ที เยอะ, โอเอีฮ โม เซ มัฮ เยือ ป ปลาว ตอก โฮมวต ปุย กาื โฮ.
18 เมาะ ป ไก ซติ พันญา ซ ไก โรฮ รพาวม ตุก, เมาะ ป โฮวน ป ยุ ป ยุง ซ โฮวน โรฮ ตอก ไลจ รพาวม ฆาื อื.