เอเซเคียน
เอเซเคียน มัฮ ป ซึป ลปุง พะจาว, อาวต นึง เมือง บ่าบี่โลน ปุก เจน เญือม ยุฮ ปุย ไลจ ไม่ เวียง เยรูซาเลม 586 เนอึม กา ฮอยจ พะเยซู นึง ปลัฮเตะ. (ก่อน ค.ศ. 586 เนอึม) ฟวยจ เซ อาวต ลั่ง นึง เมือง บ่าบี่โลน, ซึป แนฮ ลั่ง ลปุง พะจาว ละ ปุย. รซอม เพอึก อื ปุย, มัฮ ป ฮอยจ ละ โม ป อาวต นึง เมือง บ่าบี่โลน ป แปน ดิ ครา ปุย ไม่ โกะ อื ง่อน. โนก ฮา เซ ฮอยจ โรฮ ละ โม ป อาวต ลั่ง นึง เวียง เยรูซาเลม ง่อน. พะทัม เอเซเคียน ไก ไม่ ปุ แตะ ปาวน คัก ระ.
(1) มัฮ ลปุง ซตอก รเง่อึม ปุย นึง ไลลวง กัน ซ รเตีฮ พะจาว โม โกะ อื ไม่ กัน ซ ไลจ ซ โลม เวียง เยรูซาเลม.
(2) มัฮ รซอม อัฮ พะจาว อาึง นึง ไลลวง ซ รเตีฮ โรฮ อื ปุย โฮวน เมือง ป กอ โคมเฮง โม อิซราเอน ไม่ กอ เพอึก อื ยุฮ กัน พิต ละ พะจาว.
(3) มัฮ ไลลวง เกาะ โลม พะจาว โม อิซราเอน ฟวยจ ไลจ โลม เยรูซาเลม ไม่ ลปุง ซันญา เกว ไม่ ป ไมจ ป ไก ลั่กกา ปุย.
(4) มัฮ โอเอีฮ ป ยุ บลอง เอเซเคียน ป เกว ไม่ วิฮัน โคระ ไม่ เมือง โคระ ป ซ เกือฮ พะจาว ละ ปุย ไน แตะ เซ.
เอเซเคียน มัฮ ปุย ตอน เนอึม รพาวม เจือ. เวือฮ เนอึม ป คิต ป ง่อต เบือ อื. ป รโฮงะ อื ละ ปุย เซ โฮวน ลั่ก มัฮ แตะ ป โฮลฮ อื เญือม ยุ บลอง อื โอเอีฮ เบือ พะจาว. เญือม รโฮงะ อื โอเอีฮ ละ ปุย กอ เปลีฮ อื นึง กัน ซแด่ง แตะ นึง โกะ แตะ. โอเอีฮ เซ แปน ป ซัมคัน ละ ปุย, แปน ควน โอ ปุย เกียฮ เบีย. เอเซเคียน เนน ตอก ไมจ ปุย เฌาะ รพาวม รโม่ยฮ แตะ ไม่ ตอก ไมจ อื ยุง รัป พิต ชอป กัน พิต ยุฮ โกะ แตะ เตือง ไพ เตือง มัน. เอเซเคียน ครอฮ ลอป ไลลวง ตอก โฮลฮ ปุย ซโอว รพาวม ไม่ เวลา ซ เปียน พะจาว เมือง อิซราเอน เกือฮ ไมจ แม ติ โฮน. เอเซเคียน โนก ฮา แปน อื ป ซึป ลปุง พะจาว, มัฮ โรฮ ซตุ ติ ปุย. ตึน ซ มัฮ ฆาื เซ ป เครอึง เนอึม อื นึง วิฮัน ยุฮ พะจาว ไม่ ไลลวง ไมจ ปุย ซง่ะ ซงอม ละ พะจาว ฆาื อื.
1
เอเซเคียน ยุ บลอง โอเอีฮ
1 เญือม เอีจ ไก อาญุ อาึ ง่วย เนอึม เมอ, ไก ติ ซเงะ, เญือม เซ ปุก วันที พอน เคิ ปาวน นึง อื. ปุก โรฮ เญือม อาวต ดิ อาึ ไม่ โม ป แปน ครา นึง โบ โกลง เคบ่า นึง เมือง บ่าบี่โลน. เญือม เซ อาึ ชวน โบฮ โตะ มะลอง, ยุ บลอง เงอะ พะจาว.
2 ซเงะ เซ เยอ ปุก วันที พอน เนอึม พอน เคียง เอีจ โรวก ปุย กซัต เยโฮยาคิน เกือฮ แปน ครา เซ.
3 ลปุง พะจาว ฮอยจ ละ อาึ ป มัฮ เอเซเคียน. อาึ มัฮ โรฮ ซตุ ติ ปุย, มัฮ กวน บุ่ซี. เญือม เซ ปุก ลไล อาวต เตอะ นึง โบ โกลง เคบ่า นึง เมือง บ่าบี่โลน เซ. อาึ อาวม เอิน อาวต อัมนัต ระ ไล ยุฮ พะจาว ไม่ แตะ นา เซ.
4 เญือม แก อาึ โอเอีฮ ฮี อาึ ชวน เนอะ กาื ระ กาื กอ เน่อึม ลวง ลั่กล่าวง. ชวน แม โรฮ ชุต รวู ติ โม่ว ระ. นึง เฆียง ชุต รวู เซ ไก แม รัง ซเปีย เฌียป เลียป นึง ไม่ รเออึป งอ ปอ ไคว อื. ลลาึง รเออึป งอ เซ ไก แม ป ตอก ไร ซเงี ตอฮ รฌิญ นึง ติ เจือ แม.
5 ลลาึง รเออึป งอ เซ ไก แม ปุย ตัง เจือ นึง ปาวน ปุย. ฮุนฮัง อื มัฮ ตอก ฮุนฮัง ปุย ปลัฮเตะ โฮ.
6 ปุย ตัง เจือ โม เซ ติ ติ อี ปังเมอ ไก นา ปาวน. ไก แม โรฮ โพรยจ ปาวน.
7 ชวง อื ซื, ลเตือก ชวง อื ตอก ลเตือก ชวง กวน โมวก โฮ. ชวง อื เซ ตอฮ ตอก ตอฮ ไร ซเงี ป ญื ปุย โฮ.
8 โนก ฮา ไก นา อื เตือง ปาวน ลวง ไม่ ไก โพรยจ อื ปาวน เนอ, ไก แม โรฮ เตะ ตอก เตะ ปุย โฮ, อาวต นึง ฆรึม โพรยจ อื เซ เตือง ปาวน อื.
9 ปุย ตัง เจือ โม เซ เยอ กัง โพรยจ แตะ. เปือง โพรยจ อื เซ เกือฮ อื รติต ดิ ไม่ โพรยจ ปุโฮมว แตะ แปน เอิน ปาวน เลียม. เญือม โปว อื โปว ดิ เอิน ไม่ ปุ แตะ, เญาะ พัต โตว ติ แตะ เฟือฮ.
10 นา ปุย ตัง เจือ โม เซ มัฮ ตอก เฮี. นา ลวง ลั่กกา อื ตอก นา ปุย โฮ. นา ลวง ดอม อื ตอก นา รเวีย ซิงโต. นา ลวง วิ อื ตอก นา โมวก โฮ. นา ลวง ลั่กเคะ อื ตอก นา กลัง ลอง.
11 ปุย ตัง เจือ โม เซ โครยญ โฆะ อื กัง แม โพรยจ แตะ. ตา ลอา เปือง โพรยจ อื เซ เกือฮ อื เอีญ ติต ดิ ปุ แตะ ไม่ โพรยจ ปุโฮมว แตะ เซ โครยญ โฆะ แตะ. โพรยจ ตา ลอา อื แม เลอึป โกะ แตะ นึง อื.
12 ปุย ตัง เจือ โม เซ เตือง ปาวน ปุย อื นา เตือง ปาวน ลวง อื. โฮลฮ โฮว ซื นา คระ ฆวต โฮว แตะ ฆาื อื แปน มู แตะ เตือง โอ แตะ จัมเปน ลเตือฮ.
13 ลลาึง ปุย โม เซ เยอ ไก ป รัง นึง ติ เจือ. รเออึป ไม่ อื ตอก รเออึป ออม โฮวน โฮ. รซอฮ ไม่ อื ลลาึง ปุย โม เซ. ลลาึง รัง งอ เซ โอก แม โรฮ ป รัง เฌียป เลียป นึง ตอก ปลุกปลัก โฮ. เปียน ไป มา ลอป ติ แตะ.
14 ปุย ตัง เจือ โม เซ เยอ ตอ ไป ตอ มา ตอก รัง ปลุกปลัก โฮ.
15 ลไล แก อาึ ปุย ตัง เจือ เตือง ปาวน อื เซ, อาึ ชวน แม เยอะ โวงเลาะ นึง ปาวน โวง โบลวง ติ แตะ ลังเตะ, โวงเลาะ โม เซ เยอ อาวต นึง เฆียง ปุย โม เซ ติ โวง ติ ปุย.
16 นา โวงเลาะ เตือง ปาวน อื เซ ตอก ตื ปุ แตะ, รัง ตอฮ รฌิญ ตอก แกว ไมจ โฮ. โวงเลาะ ติ โวง อื เซ อาวต รแกน ติ แตะ นึง โตะ กไน โวงเลาะ ไฮญ เซ.
17 เญือม ซ โฮว อื เตอึม คระ ฆวต โฮว อื เกียฮ โฮว ตื นึง อื เตือง ปาวน ลวง อื.
18 คอป โวงเลาะ โม เซ เยอ ฮลาวง ลัมเลือ เอิน ปอ เอิน ฮลัต ปุย นึง. ไก แม โรฮ ไง่ ไคว คอป เลาะ เซ เตือง ปาวน อื.
19 เญือม โฮว ปุย ตัง เจือ โม เซ, โวงเลาะ โม เซ เยอ โฮว อาื โรฮ อื เฆียงๆ อื. เญือม โปว โม เซ นึง กัง ฮาว เยอ, โวงเลาะ โม เซ เยอ โปว โรฮ ไม่ อื.
20-21 โฮว ปุย โม เซ ลั่ก ออฮ โวงเลาะ เซ จัมเปน โฮว ลั่ก เตีฮ. ดัฮ ปุย โม เซ อาวต, โวงเลาะ ซ อาวต โรฮ. ดัฮ ปุย โม เซ โปว นึง กัง ฮาว โวงเลาะ เซ ซ โปว โรฮ. มัฮ ฆาื เอีจ อาวต เอิน รพาวม ปุย โม เซ นึง โวงเลาะ เซ เอิน.
22 ราว ไกญ ปุย โม เซ นึง กัง ฮาว เยอ ไก แม ป ตอก พรัง นึง โม่ว ไม่ อื. ป ตอก พรัง เซ เยอ ไก แม ป รัง เฌียป เลียป นึง ตอก แกว รฮอง โฮ.
23 โม ปุย ตัง เจือ เซ ชุง ฆรึม พรัง เซ. ดี โพรยจ แตะ ตา ลอา ก บลัฮ อื, เกือฮ อื รติต ดิ ไม่ โพรยจ ปุโฮมว แตะ. โพรยจ อื นึง ลวง ฆรึม อื เตือง ลอา ก บลัฮ อื เซ เลอึป โกะ แตะ นึง อื.
24 เญือม โปว ปุย โม เซ เยอ, อาึ ฮมอง ลอยฮ โพรยจ อื ตอก เอิน ลอยฮ ปลัฮ รอาวม พุกเพียก โฮ. ตอก ลอยฮ โฮว ตฮัน โฮวน โฮ. ตอก โรฮ ลอยฮ เซียง พะจาว ป ตึก นึง ระ อัมนัต แตะ. เญือม เอีจ ลโล่ะ ปุย โม เซ เยอ, โพรยจ อื เซ โลป แม โรฮ อื.
25 เน่อึม นึง ราว พรัง ราว ไกญ อื เซ ปังเมอ ไก ลั่ง ลเลาะ โอเอีฮ นึง เรียง.
26 นึง ราว พรัง เซ ไก แม โรฮ โอเอีฮ นึง ตอก นา ก งาวม คึ โฮ. ยุฮ ปุย นึง แกว มาฮานิน, ป งาวม นึง ก งาวม คึ เซ ฮุนฮัง อื มัฮ ตอก ปุย ปลัฮเตะ โฮ.
27 เคียง ญวย ปุย เซ ฮาวก ก ล่าวง เงอ ตอก ไร ซเงี ตอฮ เฌียป เลียป ป อาวต ลลาึง รเออึป งอ โฮ. เคียง ญวย อื แม เลีฮ ก เซฮ เฮ, ตอก รเออึป งอ โฮ. รวิต รเวียง อื รัง ตื ฆาื อื.
28 รัง ซเปีย ป ชวน เนอะ โอก อื เน่อึม นึง อื เซ, โฮวน ซี ตอก ซี รยุง โฮ. เอีจ มัฮ ตอก เซ ตอก เปลีฮ ซเปีย คึนัก ยุฮ พะจาว ติ แตะ เนิ อี. เญือม ชวน อาึ โอเอีฮ ตอก เซ เยอ อาึ วัต เอิน ติ แตะ ฆลาื รเคอึป เอิน เนอะ ลังเตะ. ฟวยจ เซ อาึ ฮมอง แม โรฮ เซียง ปุย ติ.