ติ โมเซ
พะทัม ติ โมเซ มัฮ ป เกือฮ เอะ ยุง ตอก ยุฮ โรง พะจาว โอเอีฮ โครยญ เจือ, เตือง ไลลวง ตอก ยุฮ อื ปุย ปลัฮเตะ. พะทัม เฮี เกือฮ โรฮ เอะ ยุง ตอก ฮอยจ มั่ป นึง ปลัฮเตะ, ไม่ ตอก เกิต กัน โซะ ละ ปุย โครยญ เจือ. เอะ ยุ โรฮ ตอก เรอึม พะจาว ปุย ปลัฮเตะ เน่อึม เมือ โรง อื. พะทัม ติ โมเซ ไก ลอา คัก.
(1) โบ่ต 1 ฮอยจ ละ โบ่ต 11. คัก เฮี มัฮ ไลลวง ตอก ยุฮ พะจาว ปลัฮเตะ ไม่ โอเอีฮ โครยญ เจือ. มัฮ โรฮ ไลลวง ปุย ไพรม ตอก ไลลวง อาดั่ม ไม่ เอวา, ไลลวง คาอิน ไม่ เฮเบ่น, ไลลวง เลอึป รอาวม ปลัฮเตะ เจน โนอา, ไม่ ไลลวง เจดี่ ฮลาวง ป อัฮ ปุย บ่าบี่โลน ไม่.
(2) โบ่ต 12 ฮอยจ ละ โบ่ต 50. คัก เฮี มัฮ ไลลวง จัตเจือ โม อิซราเอน. ปุย ระ ไล ฮา ปุย ไฮญ นึง อื มัฮ อัปราฮัม. ปุย ไตม อัปราฮัม เซ นึง มัฮ อื ปุย ตอน รพาวม เจือ ไม่ เนอึง อื ป อัฮ พะจาว. ฟวยจ เซ มัฮ ไลลวง ยิซฮัก ป มัฮ กวน อื ไม่ ยาโคป ป มัฮ กวนโซะ อื. กวน รเมะ ยาโคป เซ ไก กาว ลอา ปุย. โม เซ ลอต แปน ฮัวนา เจอ โม อิซราเอน เตือง กาว ลอา เจอ อื. ไก โฮวน โบ่ต ป เกว ไม่ โยเซป นึง อื ไม่ ไลลวง ตอก โฮลฮ ยาโคป ไม่ กวน ไฮญ อื โฮว อาวต นึง เมือง อียิป เปอ.
พะทัม ติ โมเซ, ปัง ไก ไลลวง ปุย นึง โฮวน ไลลวง, ระ ลั่ก มัฮ แตะ ไลลวง กัน ซัมคัน ป ยุฮ พะจาว. เมือ โรง อื มัฮ ป รโฮงะ ไลลวง ยุฮ พะจาว โอเอีฮ โครยญ เจือ. ลั่ก ก ลอยจ อื มัฮ ลปุง ซันญา นึง ไลลวง ซ แลน แก ลอป พะจาว ปุย ไน แตะ. พะทัม เฮี โครยญ โบ่ต อื มัฮ พะจาว ป มัฮ ป ระ ไล นึง อื. พะจาว เซ รเตีฮ โม ป ยุฮ กัน พิต เกือฮ อื ลอก ตุต แตะ. ละ โม ป มัฮ ปุย ไน แตะ พะจาว นัม คระ ละ อื, เรอึมชวย ตูเตอึม อื. เพรียง โรฮ อาึง ป ไมจ ละ อื ลั่กกา อื. พะทัม ติ โมเซ เฮี มัฮ ป เกือฮ เอะ ยุง ไลลวง รพาวม เจือ ปุย ไพรม. เญือม ลาว ปุย อื โครยญ เจน ปุย เยอ, พะทัม เฮี เกียฮ เรอึม ปุย เกือฮ ไก โรฮ รพาวม เจือ เนอึม ตอก โม เซ โรฮ.
1
พะจาว ยุฮ ปลัฮเตะ ไม่ ปลัฮ มะลอง
1 โฆะ ลั่ง เมือ โรง อื พะจาว ยุฮ ปลัฮเตะ ไม่ ปลัฮ มะลอง.
2 เญือม เซ ปลัฮเตะ ดิ แปน โตว ฮุป ฮอย แตะ เฟือฮ. ม่าวง เยือ ลั่ง. รไม่ ลั่ง ไม่ รอาวม. ราว รอาวม โด่ะ เซ เฟียก ตัน ลั่ง. ลปุ พะจาว มอง ควป คุม ราว รอาวม เซ.
3 พะจาว อัฮ เฮี, “เกือฮ ซเปีย ไก,” อัฮ เซ. ซเปีย เซ ไก เนอึม ฆาื อื.
4 พะจาว เญือม ยุ อื ซเปีย เซ ไมจ ละ อื. พะจาว รกัฮ ซเปีย ฮา เฟียก อื.
5 ซเปีย เซ อัฮ เมือ ซเง่ะ ไม่ อื. เฟียก เซ อัฮ เมือ ก ซาวม ไม่ อื. เมือ กปู อื ไก. เมือ กซะ อื ไก. มัฮ ซเงะ ติ นึง อื.
6 ฟวยจ เซ พะจาว อัฮ เฮี, “เกือฮ รตา ไก ซน่ะ รอาวม ละ ซ เกือฮ อื รอาวม เซ รกัฮ ฮา ปุ แตะ,” อัฮ เซ.
7 เญือม เซ พะจาว ยุฮ เนอึม อื ตอก อัฮ แตะ เซ. รอาวม เซ รกัฮ เนอึม ฮา ปุ แตะ. รอาวม อาวต ราว เซ อาวต โน่ง. รอาวม อาวต ฆรึม เซ อาวต โน่ง โรฮ.
8 พะจาว อัฮ ปลัฮ มะลอง ไม่ รตา เซ. เมือ กปู อื ไก. เมือ กซะ อื ไก. มัฮ ซเงะ ลอา นึง อื.
9 พะจาว อัฮ แม เฮี, “เกือฮ รอาวม อาวต ฆรึม มะลอง รโจะ ติ โดฮ เดอึม ซ ไก เตะ ซออฮ นึง,” อัฮ เซ. ไก เนอึม ตอก อัฮ อื เซ.
10 พะจาว อัฮ ปลัฮเตะ ไม่ เตะ ซออฮ เซ. รอาวม รโจะ เซ อัฮ ปลัฮ รอาวม ไม่ อื. พะจาว เญือม ยุ อื ไมจ ละ อื.
11 เญือม เซ พะจาว อัฮ เฮี, “เกือฮ ปลัฮเตะ กวยฮ โอเอีฮ นึง โครยญ เจือ, ตอก โคะ เอาะ, เฮงาะ รโกะ, ไม่ พักเญือ เมาะ ป ไก เปลิ ไก โนง นึง ปลัฮเตะ เฮี เตือง โอยจ อื,” อัฮ เซ. ไก เนอึม ตอก อัฮ อื เซ.
12 ปลัฮเตะ กวยฮ เนอึม โอเอีฮ ตอก เซ นึง. พะจาว เญือม ยุ อื ไมจ ละ อื.
13 เมือ กปู อื ไก. เมือ กซะ อื ไก. มัฮ ซเงะ ลอวย นึง อื.
14 พะจาว อัฮ แม เฮี, “เกือฮ ควน ซเปีย ยุฮ โอเอีฮ ไก นึง ปลัฮ มะลอง, ละ ซ รกัฮ แตะ เมือ ซเง่ะ อื ฮา เมือ ก ซาวม อื. เกือฮ แปน ควน ยุง ปุย เวลา, ซเงะ เคิ เนอึม นึง.
15 เกือฮ แปน ป รัง นึง ปลัฮ มะลอง, ไม่ ซเปีย โรฮ อื ฮอยจ นึง ปลัฮเตะ,” อัฮ เซ. ไก เนอึม ตอก อัฮ อื เซ.
16 พะจาว ยุฮ เนอึม ควน ซเปีย ระ ลอา โม่ว. ป ระ นึง อื เกือฮ อื ตัตเตียง เมือ ซเง่ะ อื. ป แตวะ นึง อื เกือฮ อื ตัตเตียง เมือ ก ซาวม อื. ยุฮ โรฮ ซโมยญ เตือง โอยจ อื.
17 พะจาว เกือฮ อื อาวต นึง ปลัฮ มะลอง. เกือฮ อื ซอต ซเปีย ฮอยจ นึง ปลัฮเตะ.
18 เกือฮ อื ตัตเตียง เมือ ซเง่ะ ไม่ เมือ ก ซาวม อื, ไม่ เกือฮ อื รกัฮ ก ซเปีย ฮา ก เฟียก อื. พะจาว เญือม ยุ อื ไมจ ละ อื.
19 เมือ กปู อื ไก. เมือ กซะ อื ไก. มัฮ ซเงะ ปาวน นึง อื.
20 พะจาว อัฮ แม เฮี, “เกือฮ รอาวม ไก โกะโกลง นึง โฮวน, โครยญ เจือ. เกือฮ โรฮ ไซม โปว นึง กังฮาว ราว ปลัฮเตะ,” อัฮ เซ.
21 เญือม เซ พะจาว ยุฮ กะ ระ ไก นึง ปลัฮ รอาวม. ยุฮ โรฮ โกะโกลง โครยญ เจือ, เกือฮ อื อาวต โตะ รอาวม โฮวน, ตัม เจือ อื ไอฮ โครยญ เจือ. ยุฮ โรฮ ไซม โครยญ เจือ, ตอก เจือ แตะ ไอฮ โรฮ. พะจาว เญือม ยุ อื ไมจ ละ อื.
22 พะจาว ปิฮ มุ่น ละ อื. อัฮ เฮี, “เกือฮ ติ เปอะ พรุฮ โฮวน ปอ นาวก อื ยุฮ ปลัฮ รอาวม. โม ไซม เกือฮ โรฮ พรุฮแพร เลี่ป ปลัฮเตะ โรฮ,” อัฮ เซ.
23 เมือ กปู อื ไก. เมือ กซะ อื ไก. มัฮ ซเงะ พอน นึง อื.
24 พะจาว อัฮ แม เฮี, “เกือฮ ปลัฮเตะ ไก โกะพริ โกะย่วง นึง, ไม่ ซัตซิง ป โฮว ลังเตะ ตัม เจือ อื ไอฮ โครยญ เจือ,” อัฮ เซ. ไก เนอึม ตอก อัฮ อื เซ.
25 พะจาว ยุฮ เนอึม โอเอีฮ ตอก เซ โครยญ เจือ. เญือม ยุ อื ไมจ ละ อื.
26 เญือม เซ พะจาว อัฮ เฮี, “ไมจ เอะ ยุฮ ปุย ตอก ฮุปฮอย เอะ ไอฮ. เกือฮ ตอก เอะ. เกือฮ ตัตเตียง กะ นึง ปลัฮ รอาวม. ตัตเตียง โรฮ อื ไม่ ไซม ไล่ ไม่ โกะพริ โกะย่วง เตือง โอเอีฮ ปลัฮเตะ เตือง โอยจ อื, ไม่ ซัตซิง ป โฮว ลังเตะ เตือง โอยจ อื โรฮ,” อัฮ เซ.
27 พะจาว ยุฮ เนอึม ปุย ตอก ฮุปฮอย โกะ แตะ ไอฮ. ยุฮ อื เตือง ปรเมะ ปรโปวน.
28 พะจาว ปิฮ มุ่น ละ อื ตอก เฮี, “เกือฮ ติ เปอะ พรุฮแพร โฮวน ปอ นาวก เปอะ ยุฮ ปลัฮเตะ. เกือฮ ติ เปอะ ปุน กุม โอเอีฮ ปลัฮเตะ เตือง โอยจ อื. ไมจ เปอะ ตัตเตียง กะ นึง ปลัฮ รอาวม. ตัตเตียง โรฮ ไม่ ไซม ไล่ ไม่ โอเอีฮ ไฮญ ป โฮว นึง ปลัฮเตะ เตือง โอยจ อื,” อัฮ เซ.
29 เญือม เซ พะจาว อัฮ เฮี, “ง่อต แลน เมอะ. เฮงาะ รโกะ ไม่ พักเญือ ไม่ เปลิ โคะ เปลิ เอาะ, อาึ เอีจ เกือฮ แปน ป โซม ป ปอน ละ เปอะ โครยญ เจือ.
30 ฮละ โคะ ฮละ เอาะ ไม่ ไรป เบระ โอเอีฮ, อาึ เอีจ เกือฮ โรฮ แปน ป โซม ละ โกะพริ โกะย่วง ไม่ ไซม ไล่ ไม่ ซัตซิง ป โฮว ลังเตะ โครยญ เจือ,” อัฮ เซ พะจาว. แปน เนอึม ตอก เซ.
31 พะจาว เญือม ยุ อื โอเอีฮ ป ยุฮ แตะ เซ โครยญ เจือ, ไมจ เนอึม ละ อื. เมือ กปู อื ไก. เมือ กซะ อื ไก. มัฮ ซเงะ แลฮ นึง อื.